Yuh 14

Nda ma Yesu tva dzaʼa da Da

1Ka *Yesu nda duhwalha ni kay guli mantsa: « Yaha ŋuɗufa ghuni da tɗu, fafwa fa ta ghəŋa ghuni ta Lazglafta faf kuni guli ta ghəŋa ghuni ta iʼi. 2Nda ndəgha vla nzaku ma həga ga Da ɗa, ka má haɗ tsi mantsa wu, má mnaghuna mna yu. Dzaʼa nda sliʼa yu da payaghunatá vli. 3Tahula laghwa ɗa ka payaghunatá vli, dzaʼa vraga vra yu, ŋa hlay ɗa ta kaghuni ta vata iʼi. Ŋa mutsafta kaghuni guli ta nzaku ma vli dzaʼa nzata iʼi, kaʼa. 4Wya nda sna kaghuni ta vli ta dzaʼa yu, nda sna kuni ta tvi guli, » kaʼa. 5Ka Tuma mantsa: « Mghama ɗa, sna a ŋni ta vli ta dzaʼa ka wu, waká aŋni dzaʼa snaŋtá tvi? » kaʼa nda tsi. 6Ka Yesu nda tsi mantsa: « Iʼi tvi, iʼi kahwathwata, iʼi hafu. Haɗ mndu dzaʼa laviŋtá lami da həga ga Da, ka nza a tsi nda təv iʼi wa. 7Ka nda sna kuni ta iʼi dzaʼa nda sna kuni guli ta Da ɗa. Ndanana ná, nda sna kuni, nda ngha kaghuni guli, » kaʼa nda tsi.

8Ka Filip mantsa: « Mghama ɗa! Maraŋna mara ta tsa Da ya, ka zɗafta ŋuɗufa ŋni, » kaʼa nda tsi. 9Ka Yesu nda tsi mantsa: « Nda kɗa fitika ɗa kawadaga nda kaghuni Filip ná, ta sna a ka ta iʼi ra? Ka nda ngha mndu ta iʼi ná, nda ngha ta Da. Waká ka dzaʼa mnay kazlay: Maraŋna mara ta Da kəʼa na? 10Zlghaf a ka kazlay: Ta nzaku ma Da iʼi, Da guli ta nzaku ma iʼi kəʼa ra? Nana gwaɗaha ta mnaghunata yu na ná, ma ghəŋa ɗa a ta klaʼata yu wa. Tsa Da ta nzaku ma iʼi ya ta maga tsa slnaha ya. 11Fafwa fa ta ghəŋa ghuni ta skwi ta mnaghunata yu kazlay: Iʼi ta nzaku ma Da, Da guli ta nzaku ma iʼi kəʼa ya. Fafwa fa ta ghəŋa ghuni dər ta ghəŋa tsa slnaha yeya tsi. 12Kahwathwata ka yu ta mnaghunata, mndu ta zlghaftá iʼi, dzaʼa magay tsatsi guli ta slna ta mag yu. Dzaʼa magay ka malaghuta kabga nda sliʼa iʼi da Da ɗa. 13Mantsa tama, inda skwi dzaʼa kuni ɗawaŋta nda hga ɗa, dzaʼa magay yu, kada maraŋta Da ta glakwa ni nda ma zwaŋ. 14Ka ɗawaŋ ɗawa kuni ta sana skwi nda hga ɗa, dzaʼa magay yu, » kaʼa.

Dzaʼa ghunaga ghuna Da ta Sulkum nda ghuɓa

15« Ka ɗvu ɗva kuni ta iʼi, dzaʼa sna sna kuni ta zlahuha ɗa. 16Iʼi, dzaʼa ɗaway yu da Da ta sana mndu ŋa ghunəgaghunatani ŋa nzata ni ŋa ɗekɗek kawadaga nda kaghuni ŋa kata kaghuni. 17Tsa mndu ya ná, Sulkuma kligiŋtá kahwathwata ya. Laviŋ a mndu ma ghəŋa haɗik ta tsuʼafta wa. Laviŋ a həŋ ta snaŋta guli wa. Kaghuni nda sna kaghuni, kabga ta gɗata kawadaga nda kaghuni, dzaʼa gɗava gɗa ŋa ɗekɗek ma ŋuɗufa ghuni. 18Iʼi, zlaghunata a yu manda zwana tawakri wu, dzaʼa vragagha vra yu da kaghuni. 19Ta ɓats nzɗa ɗa, nghaŋta a mnduha ma ghəŋa haɗik ta iʼi wa. Kaghuni ya, dzaʼa nda ngha kuni ta iʼi, kabga ta nzaku nda hafu iʼi, dzaʼa nzata nda hafu kaghuni guli. 20Baɗu tsaya dzaʼa snaŋta kuni kazlay: Ta nzaku ma Da iʼi, ta nzaku ma iʼi kaghuni, iʼi guli ta nzaku ma kaghuni yu kəʼa.

21« Ka ŋana ŋa mndu ta zlahuha ɗa ka snata, tsaya mndu ta ɗvutá iʼi. Dzaʼa ɗvu ɗva Da ɗa ta tsa mndu ta ɗvutá iʼi ya. Iʼi guli dzaʼa ɗvu ɗva yu ŋa maranaŋta ɗa ta nzakwa ɗa, » kaʼa.

22« Kinawu ka kagha dzaʼa maravata da aŋni, kul maravata ka da mnduha ta ghəŋa haɗik na? » ka Yahuda, Zudas Iskaryut ya a wa. 23Ka *Yesu nda tsi mantsa: « Ka ɗvu ɗva mndu ta iʼi, dzaʼa ŋana ŋa ta gwaɗa ɗa, dzaʼa ɗvu ɗva Da ɗa ta tsatsi guli. Ŋa sagha ŋni nda Da ɗa tani ŋa nzakwa ŋni ga taŋ. 24Ka ɗvu a mndu ta iʼi wu katsi, ŋana a ta gwaɗa ɗa wu, nana gwaɗa ta mnaghunata yu ta snə kuni na ná, kla a ma ghəŋa ɗa a yu wu, tsa Da ɗa ta ghunigihata ya ta mnihata.

25« Mnaghuna mna yu ta tsaya ta wana yu kawadaga nda kaghuni na. 26Tsa mnda kata mndu dzaʼa saha ya, Sulkum nda ghuɓa ya dzaʼa ghunagata Da nda hga ɗa. Tsatsi dzaʼa taghaghunaftá inda skwi, ŋa havaghunaktá inda gwaɗa managhuna yu.

27« Zɗaku ya ta zlaghunaŋta yu#14:27 Ngha ta Isaya 9:5.. Zɗakwa ɗa ya ta vlaghunata yu. Vla a yu ŋa ghuni manda ya ta vlə mnduha ma ghəŋa haɗik wa. Yaha ŋuɗufa ghuni da tɗu, yaha kuni da zləŋ. 28Nda sna kuni ta gwaɗa mnaghuna yu kay, “nda sliʼa yu, dzaʼa vragagha vra yu da kaghuni.” Ka ta ɗvay kuni ta iʼi katsi ná, dzaʼa rfay kuni ta rfu ta ghəŋa má snaŋta ghuni kazlay: Nda sliʼa yu da Da kəʼa, kabga mal Da ka iʼi. 29Wana yu ta mnaghunatá tsa skwiha ya ndanana ma kɗaku həŋ ka slata, kada zlghafta kuni ta skwi ta mnaghunata yu, slarə tsi. 30Haɗ gwaɗa ta dagala ta ŋa mnaghunata ɗa wu, kabga wya tsa ghwaɗaka mghama na ghəŋa haɗik na ya ta sagha. Tsaw laviŋ a ta ŋraptá iʼi wa. 31Ɗina ka snaŋta mnduha ta ghəŋa haɗik kazlay: Ɗvu ɗva yu ta Da kəʼa. Inda skwiha ta mag yu guli ná, manda va ya mniha Da ta maga yu. Sliʼafwa sliʼa hadna mbaɗma, » kaʼa.

Currently Selected:

Yuh 14: xed

Highlight

Copy