Luk 21

Sana markwa wadgu ka pɗu

Mak 12:41-44

1Kəʼa ka *Yesu fatá iri ná, ta pgha tsedi gwal gadghəl da akwata pgha tsedi ma həga Lazglafta. 2Ka nghaŋtá tsi guli ta sana markwa wadgu ka pɗu ta pgha aneni his dida. 3Kaʼa mantsa: « Kahwathwata ka yu ta mnaghunata ná, mal ya markwa wadgu ka pɗu ya ta pghadatá tsedi ka inda sanlaha. 4Tsa tsedi pghada sanlaha ya ná, ma fərta tani da həŋ klaʼata həŋ ka pghadata da tsa akwati tsedi ya. Ya marakw ya ná, kɗavakta skwi ma ŋa zay ni pghada tsatsi, » kaʼa.

Dzaʼa tasiŋ tasa lu ta həga Lazglafta, ka Yesu

Mat 24:1-2, Mak 13:1-23

5Mbaɗa sana mnduha ka mna gwaɗa ta ghəŋa ɗinakwa həga Lazglafta nda rkatarkani nda pala nda skwiha ta vlə lu ŋa Lazglafta. Ka *Yesu nda həŋ mantsa: 6« Tsəna skwi ta nghə kuni na ná, dzaʼa sagha sa fitik ŋa kwal kul nghəglaŋtá nzugwatá pala ta sani, dzaʼa tasiŋ tasa lu, » kaʼa.

Skwi dzaʼa magaku ma kɗakwa ghəŋa haɗik

Mat 24:1-2, Mak 13:3-13

7« Mghama ɗa! Yawu dzaʼa magakwa tsa skwiha ya, mndəra wati ŋizla dzaʼa kəl lu ka snaŋtá magakwa tsa skwiha ya tama? » ka həŋ nda tsi. 8« Ɗaswa ka kuni da nanaghunaftá lu, kabga nda ndgha gwal dzaʼa sagha ka klaftá hga ɗa ka mnay kazlay: “Iʼi *Kristi, ndusak ndusa fitik,” ka həŋ dzaʼazlay. Yaha kuni da dzaʼa mista taŋ. 9Baɗu da snaŋta kuni ta mna gwaɗa ta vulu ta vulu lu, nda ghazeŋzeŋ ta ghazeŋzeŋ lu ya, yaha ŋuɗufa ghuni da tɗu, ya kɗakwa ghəŋa haɗik a tsaya karaku wa. Tkweʼ ka tiŋlaghuta tsa skwiha ya ta slata, » kaʼa. 10« Dzaʼa vulay mndəra sana mnduha ta vulu nda mndəra sana mnduha. Dzaʼa vulay sana mgham ta vulu nda sana mgham. 11Dzaʼa ghudzavafghudza haɗik katakata. Dzaʼa mamu ɗaŋwaha, nda maya guli ma vliha kavghakavgha. Dzaʼa mamu skwiha ta gaga zləŋ, nda ŋizlaha dagala dagala dzaʼa saha ta luwa, kaʼa.

Skwi dzaʼa slanaghatá duhwalha Yesu

12« Ma kɗaku tsa skwiha ya magaku dzaʼa kasay lu ta kaghuni, dzaʼa ghuyay lu ta ɗaŋwa ŋa ghuni, dzaʼa hlay lu ta kaghuni da həga tagha skwa la *Yahuda, ŋa tsaghunaghatá guma, dzaʼa tsatsam tsatsa lu ta kaghuni ma gamak, dzaʼa hlay lu ta kaghuni ta kəma mghamha nda ŋumnaha, kabga nzakwa ghuni ka ŋa ɗa. 13Dzaʼa slaghunagha sla tsa skwiha ya, ŋa maraŋta ghuni ta nzakwa ghuni ka masləmtsəka ɗa. 14Wya skwi ŋa famta ghuni ma ghəŋ: Yaha kuni laghu da ndanay ká kuni dzaʼa waraptá ghəŋa ghuni. 15Iʼi, dzaʼa ndanaghunaktá tva gwaɗaha nda ɗifil ŋa ŋarapta ghuni ta ghumaha ghuni, ŋa trapta taŋ ta skwi ŋa mbəɗay. 16Kulam nda dadaha ghuni tani, nda mamaha ghuni tani, nda zwana ma ghuni tani, nda zbuha ghuni tani, nda graha ghuni guli tani, dzaʼa vlatá kaghuni ŋa pslanaghutá sanlaha mataba ghuni. 17Dzaʼa husaŋ husa kuni ta həŋ demdem, kabga nzakwa ghuni ka ŋa ɗa. 18Ama dər turtuk haɗ ya dzaʼa dəɗavaghuta ma swida ghəŋa ghuni wa. 19Drusa ka kuni da nzata, ya tsaya dzaʼa kəl kuni ka kataftá htsiŋa ghuni, » kaʼa.

Skwi dzaʼa slanaghatá luwa Ursalima

Mat 24:15-21, Mak 13:14-19

20« Baɗu da nghaŋta kuni ta wanafta sludziha ta luwa Ursalima ya, ya ndusa kɗakwa gwaɗa tida nda tsa. 21Ka mantsa tsi katsi, ka hwaya gwal ta haɗika Zudiya ta ghwá. Ka sliʼapta gwal ma luwa Ursalima guli. Yagha gwal tahula luwa da sagha ka lami da huɗa luwa. 22Mantsa ya dzaʼa tsanaghata Lazglafta ta guma ta mnduha ni, ŋa hɗanamtá ghəŋa skwi ya nda vinda ma deftera Lazglafta. 23Ɗaŋwa ŋa miʼaha nda huɗi dzaʼazlay, nda gwal nda zwaŋ ta ghuva taŋ ma tsa fitik ya, kabga dzaʼa mamu ghuya ɗaŋwa dagala ma tsa fitik ya. Dzaʼa maranaŋ mara Lazglafta ta ɓasa ŋuɗufa ni ta tsa mnduha ya. 24Dzaʼa psla psla lu ta həŋ nda kafay nda za, dzaʼa hlagha hla lu ta həŋ da ga vuʼa mataba mndəra sana mnduha. Dzaʼa tasiŋ tasa gwal kul snaŋtá Lazglafta ta luwa Ursalima, ha ka kɗaghuta fitika gay taŋ ta mgham. »

Dzaʼa vraga vra Zwaŋa mndu

Mat 24:29-31, Mak 13:24-27

25« Dzaʼa nghaku ŋizla ta fitik nda tili nda tekwatsa. Ta ghəŋa haɗik guli, dzaʼa ghudzaga drəf, ŋa vavalakwa imi, ŋa ksuta ni ta mnduha ka zləŋ katakata, snaŋta a həŋ ta skwi ŋa magay wa. 26Dzaʼa rwaku mnduha da zləŋa vəl ndana skwi dzaʼa magaku ta ghəŋa haɗik, kabga dzaʼa ghudzavafghudza skwiha nda mbra nda mbra ta luwa. 27Ma tsaya dzaʼa nghaŋta lu ta *Zwaŋa mndu ta saha ma mbrakwa ni nda glakwa ni dagala ma kusay. 28Ka zlraf zlra tsa skwiha ya ta magaku katsi, ka payavata kuni, ka kapaŋta kuni ta ghəŋ ya ndusakwa fitika mbakwa ghuni tsa, » kaʼa.

Gwaɗa ta ghəŋ ghuraf

Mat 24:32-35, Mak 13:28-31

29Wya kaʼa granaftá həŋ guli: « Nghawa ngha ta ghuraf nda inda fuha ɓa. 30Ka nda ngha kuni ta zlrafta taŋ ta ɗaku, gi nda sna kuni ndusa dəwiŋ kəʼa. 31Mantsa ya, ka nda ngha kuni ta magakwa tsa skwiha ya, ka snaŋta kuni ndusak ndusa fitika ga mghama Lazglafta kəʼa. 32Kahwathwata ka yu ta mnaghunata, haɗ na mnduha gitana na dzaʼa rwuta demdem, ma kɗaku inda tsa skwiha ya ka magaku wa. 33Dzaʼa lula luwa nda haɗik, gwaɗa ɗa ná luta a ɗekɗek wu, » kaʼa.

Ɗaswa ka kuni yaha kuni da hani

34« Ɗaswa ka kuni da laghu kuni dzamtá ghəŋ ma skwi ŋa zay nda za, nda skwi ŋa say nda sa, nda ndana nzaku ma ghəŋa haɗik, da sagha tsa fitika sagha *Zwaŋa mndu ya ksaghunaghata dluk. 35Manda vza kadəŋ ya dzaʼa sagha tsi ta ghəŋa inda mnduha ta ghəŋa haɗik tender. 36Hzleŋa ka kuni nzata, ka va maga kuni ta duʼa dər ta wati luwa tsi, kada mutsafta kuni ta ndapta ma inda tsa skwiha dzaʼa magaku ya, ŋa sladata ghuni ta kəma Zwaŋa mndu, » kaʼa.

37Gifitik gifitik ya, ta tatagha skwi *Yesu ma həga Lazglafta. Ga hawu ga hawu ya guli, laghwa ni han ta sana ghwá ta hgə lu ka ghwá zaytuŋ. 38Tsaɗakwa vli ga sərɗək ya, sliʼadaghata inda mnduha da sna gwaɗa ta mnə tsi ma həga Lazglafta.

Currently Selected:

Luk 21: xed

Highlight

Copy