A Luk Sõng 10

Karen-biis pisopoe la a yi tʋmbo

1Dẽ poore Soaala le tũusa karen-biis pisopoe la a yiibu n tʋm ba tɩ b reng bãmb taoore, b yiib-yiibu, zĩis fãa la tẽns niyns fãa bãmb meng sẽn dag n na n kẽngẽ. 2#Mt 9,37-38. B ra yet-b lame: «Ka-kɛɛra waooga la ka-kɛɛdba sõor paoodame. Pʋʋs-y Tigsga Naaba tɩ b yiis tʋʋm-tʋmdba ka-kɛɛra yĩnga. 3#Mt 10,16. Kẽng-y! La ade, m tʋmda yãmb wa pe-bi digd-n-yĩids sʋka. 4#Mt 10,7-14; Mk 6,8-11; Lk 9,3-5. Da zɩ-y korg bɩ waoog ye, bɩ neodr ye la y ra yaas n pʋʋs ned sor zugu ye. 5Yãmb sẽn kẽed zak ninga, reng-y n yeel-y: ‹Laafi sig yi-kãnga!› 6Laafi biig sã n be a pʋgẽ, yãmb laafi na sig a zugu, sã n pa rẽ, a lebda yãmba. 7#1Ko 9,14; 1Tm 5,18. Bɩ y kell n pa yir kãnga n dɩtẽ la y yũud b sẽn kõt-y bũmb ning fãa, tɩ tʋʋm-tʋmd toga ne yaoodo. Bɩ y ra sa yir woo yir ye. 8Yãmb sẽn kẽ tẽng ning fãa tɩ b reeg yã, bɩ y rɩ la y yũ b sẽn na n tẽgen y taoore. 9Sãoog-y tẽnga bãad-dãmba la y yeel nebã: ‹Wẽnd Rĩung pẽe yãmba.› 10La yãmb sẽn kẽ tẽng ninga tɩ b pa reeg yã, kẽng-y b sɛk zĩigẽ la y yeele: 11#Tv 13,51. ‹Al ba yãmb tẽnga tom sẽn tabend tõnd nao, tõnd pĩmsd-a lame n bas ne yãmba, la baasg fãa bãng-y tɩ Wẽnnaam Rĩung kolgame.› 12#Bs 19,24-28; Mt 11,24; 10,15. M yeta yãmb tɩ bʋʋda raare, Sodom sɩbgr toolem kõn zeng tẽn kãng rẽnn ye.

13 # Iz 23,1-18; Ez 26,1—28,26; Zl 4,4-8; Am 1,9-10; Zki 9,2-4. Na pak foom Korozein! Na pak foom Bɛtsayid! Tɩ wẽnd makr dãmb sẽn maan yãmb sʋka sã n da maanẽ Tir la Sidõ, b ra pĩn n yeelgẽ sũ-pa-noang futu la b bilmẽ tompɛglem n kos sugri al daar zãra. 14Dẽ yĩnga, bʋʋd kaoob daare, Tir la Sidõ rãmb sɩbgr toolem kõn kolg yãmb dẽn ye. 15#Iz 14,13-15. La foom, Kafarnaom, fo zẽkd f meng n tãag saag me, b na n sika foom al n tɩ tãag bʋg-tẽnga.

16 # Mt 10,40; Mk 9,37; Lk 9,48; Zã 13,20. Sẽn kelgd-a yãmb kelgda maam; sẽn zãgs-a yãmb zãgsa maam; sẽn zãgs-a maam, zãgsa sẽn tʋm-a maama.»

Tʋʋm-tʋmdba sũ-noogo sẽn na n yi zĩig ninga

17Karen-biis pisopoe la a yi wã lebg n waa ne sũ-noog n yeele: «Soaala, al ba sʋtãamba reegda tõnd noore, yãmb yʋʋr yĩnga.» 18A Zezi yeel-b lame: «Mam da nee sʋtãan sẽn da yit yĩngri n lʋɩt wa saag sʋʋga. 19#Yɩ 91,13. Ade, mam kõo yãmb tõog, tɩ y tab wiis la namse la bɛyã ne a pãnga fãa kõn tõog n maan y bũmb ye. 20La baasgo bɩ y ra noog y sũuri sʋtãamba sẽn deegd y noor yĩng ye, noog-y sũuri yãmb yʋy wã sẽn gʋls arzãnẽ yĩnga.»

21Wakat kãnga Wẽnd Vʋʋsem kɩtame tɩ b yeele: «Mam pẽgd-y lame, Ba, yĩngr la tẽng Soaala, yãmb sẽn solg yell bãmba, yam dãmda la yẽesem dãmba, n yaool n wilg-b kom-bõonego. N-yẽe! M Ba, woto la yãmb tʋlgre ne y nimbãan-zoeerã. 22#Zã 3,35; 10,15. M Ba rɩka bũmb fãa n kõ maam, ned ba a ye ka mi m Ba sẽn yaa a soaba, sã n ka Biigã, la Biiga sẽn sak n wilg a soaba.»

23La b wẽneg n gesa b karen-biisã n yeel-ba, bãmb ne taab bala: «Sũ-noog rãmba la nin sẽn yãet yãmb sẽn yãete! 24Mam yeta yãmba: bãngdba la nanamse tʋlg n yãee yãmb sẽn yãetã, la b pa yãe ye, la b wʋm yãmb sẽn wʋmd bũmb ningã, la b pa wʋm ye.»

Taab nonglem yelle

25 # Mt 22,35-40; Mk 12,28-34. La ade, noor karen-saamb a yembre n yik n na n bẽd-ba, n sok-ba: «Karen-saamba, bõe la m tog n maan n paam vɩɩm sẽn kõn sɛ?» 26T'a Zezi leok-a: «Noor sebre pʋgẽ b gʋlsa bõe? Bõe la y karemda?» 27#Man 19,18; Yao 6,5. T'a leoke: «Nong Soaala, f Wẽnnaam ne f sũur fãa, ne f pɛlg fãa, ne f pãng fãa la ne f yam fãa, la f nong f to n wẽnd f menga.» 28#Man 18,5. A Zezi yeelame: «Yãmb leoka neere! Maan-y woto tɩ y na paam Vɩɩm.»

29Karen-saamba sẽn da rat n kõ a meng bʋʋm, a soka a Zezi: «La m to yaa ãnna sẽ?» 30T'a Zezi leok-a: «Ned n da yi Zerizalɛɛm n dabd Zeriko n tees n lʋɩ fãadb nusẽ tɩ b rees a teeda fãa n pogl-a, n bas-a t'a rat n ki. 31Maan-kʋʋd a ye n waa n tũud so kãnga n yãend-a la a bas-a lame n looge 32maan-kʋʋd sõangd a ye n waa n yãend-a, n bas-a n looge. 33La Samari dao a yembre n da togd sore n wa lood be. A sẽn yãend-a, a zoe-la a nimbãanega, 34#2Nar 28,15. la a kolgame n dɩk rãam ne kaam n pek a noadã, n vil ne pɛɛla, n zombg-a a meng bõanga, n tall n kẽng a gãag soab yiri, n tɩbs-a. 35Vẽkembeoogo, a yãka wakɩ koeems a yiibu n kõ a gãag soaba n yeele: ‹Tɩbs-y neda neere, la y sẽn na n sãam ligd ning n paase, m sã n lɛɛg n wa, m na lebs yãmba.› 36Bãmb b tãaba sʋka, sã n ya ne yãmba, ãnda n ges raoã sẽn lʋɩ fãadba nusẽ wala a to?» 37Tɩ karen-saamba leok: «Yaa sẽn zoe-a raoã nimbãanega sẽ.» T'a Zezi yeel-a: «Bɩ y kẽnge, la yãmb me maan boto.»

A Mart la a Mari yelle

38A Zezi sẽn dɩk sor ne b karen-biisi, b tɩ kẽe tẽng-a ye tɩ pag a ye sẽn boond t'a Mart reeg-b sãando, a yiri. 39#Zã 11,1. A Mart da tara yao sẽn boond t'a Mari, la yao wã ra zĩi Soaala taoore n kelgd b goama. 40A Mart da yãgda ne rɩɩba seglgo la ragend tʋʋm a taaba; a waa n yaasa a Zezi taoore n yeele: «M yao wã sẽn bas maam tɩ m segend m yembrã ka pak yãmb ye? Soaala, yeel-y m tão wã t'a yik n wa sõng-m wɛ!» 41Soaala leok-a lame: «Mart, Mart, fo maanda yɩɩre, la fo sũkda bũmb wʋsg poorẽ, 42la yaool n yaa bũmb a ye bala n pake. A Mari sẽn yãk pʋɩɩr ningã n são, la b kõn deeg n bas-a ye.»

Currently Selected:

A Luk Sõng 10: SSDC98

Highlight

Copy