A Luk Sõng 11

Tõnd Ba sẽn be arzãn pʋʋsgo

(Mt 6,9-13; 7,7-11)

1Daar a ye, a Zezi da bee zĩig a ye n pʋʋsdẽ. B sẽn pʋʋs n sɛ, b karen-biig a yembr yeel-b lame: «Soaala, zãms-y tõnd pʋʋsgo wala a Zã sẽn zãms a karen-biisi.» 2A Zezi yeelame: «Yãmb sã n pʋʋsdẽ, yeel-y woto:

‹Ba, y yʋʋr yi ne pẽgre,

y naam wa.

3Kõ-y tõnd beoog sẽn vẽeg fãa,

d daara rɩɩbo.

4Kõ-y tõnd d yel-wẽna sugri,

tɩ tõnd me kõta sẽn beeg-b tõnda fãa sugri

la y ra bas tɩ kʋɩɩbg yõk-d ye.› »

5B le yeel-b lame: «Yãmb sʋka, ned sã n tar-a zoa t'a bʋʋg-a yʋn-sʋk n yeel-a: ‹M zoa, peng-m bur a tã, 6tɩ m zoa a to n yi sor n wa, tɩ m ka tar bũmb n na n kõ-a ye.› 7Tɩ yãoo soaba zĩnd roogẽ n leoke: ‹Bas-m laafi tɩ m doog pagame, maam ne kamba kẽe gãaga, ad-m ka tõe n yik n bao n kõ-f ye.› 8Mam yeta yãmba, t'a zoa wã sã n pa yik n kõ-a, b zooda yĩng me, pẽdgra yĩnga, a na yik n kõ-a wala a sẽn dat tɛka.

9La mam yeta yãmba: kos-y tɩ b na n kõ-y lame, bao-y tɩ y na n yãeeme; kabs-y tɩ b na pak tɩ y kẽ. 10Sɩd me, sẽn bõsd-a paamdame, sẽn baood-a yãetame la sẽn kabsd-a, b pakd n kõ-a lame. 11Yãmb sʋka, roagd a bõe n be t'a biig kos-a kʋɩl-zẽoogo, t'a bas kʋɩl-zẽegã n kõt-a waafo? 12Bɩ a kos-a la gelle, t'a kõ-a nanga? 13Dẽ yĩnga, yãmb ne y wẽnema fãa, yãmb sã n mii n kõt y kamb bõn sõma, yãmb zɩ tɩ yãmb Ba wã sẽn be yĩngri, bãmb na n kõo sẽn bõsd-b bãmbã a Vʋʋsem Sõngo!»

A Zezi ne a Beelzebul

(Mt 12,22-30; Mk 3,20-27)

14A Zezi ra yiisda Sʋtãan sẽn da kẽ neda t'a lebg muka. Sʋtãana sẽn yi, muka gomame, tɩ neb pɛleng yɩke. 15#Mt 9,34; 10,25. La neb kẽer yeelame: «Ad-y yaa ne sʋtãamb naab a Beelzebul pãnga la a yiisd sʋtãamba.» 16#Mt 12,38; 16,1; Mk 8,11. La kẽer me da rat n bãnga b pãnga, n kos-b bõn-bãnd a ye sẽn yit yĩngri. 17A Zezi sẽn da mi b tagsgo, b yeel-b lame: «Rĩung a ye rãmb sã n welg n maan beem ne taaba, b wãada b rĩungã t'a rot lʋɩ n bʋʋg taaba. 18Sʋtãana sã n welg la a maand beem ne a soolem dãmba, a rĩung na n le zĩnda wãna? Yãmb sẽn yet tɩ yaa ne a Beelzebul pãnga la m yiisd sʋtãamba, 19la mam sã n digd sʋtãamba ne a Beelzebul pãnga, yãmb digd-b la ne ãnd pãng marsã? Woto yĩnga, yãmb meng n kaood y bʋʋdo. 20La mam sã n digd sʋtãamba ne Wẽnnaam nug pãnga, dẽnna Wẽnd Rĩunga sɩd waa yãmb sʋka. 21Gãndaoog bob a zab teed n gũud a zaka, a sẽn tar fãa, bũmb kõn maan ye. 22Gãndaoog a to sã n wa, n yõk-a n lubi, a pidgda a zab teedã a sẽn teeg b rãmbã, n wʋk a laog fãa n pʋɩ.

23 # Mk 9,40. Sẽn pa tũuda maam, zabda ne maam, sẽn pa sõngd n tigme, a soab sẽegdame.

24Sʋtãan dẽgd sã n yi ned pʋgẽ, a gõoda zĩ-peen-daagẽ n baood vʋʋsgo n kongdẽ. Dẽ la a wat n yeele: ‹M leb roog ninga mam sẽn yii wã.› 25A sã n le wa kẽe, a mikdame tɩ b pɩɩsa sagda n maneg-a neere; 26t'a kẽng n le tɩ wa ne sʋtãamb a yopoe wẽnem sẽn yɩɩd yẽnda, tɩ b fãa kẽ be n maag b meng n zĩndi tɩ nin-kãng yell sãam n yɩɩd pĩnda.»

27A Zezi sẽn gom woto, la pag a ye sẽn zĩnd bãndurba sʋka n zẽk a koɛɛg n yeele: «Sũ-noog soaba la pag ning sẽn tʋda y pʋga tɩ y yẽsem a bĩisim!» 28La a Zezi leokame: «Yeel-y tɩ sũ-noog rãmba n yɩɩda la sẽn kelgd-b Wẽnnaam gomde la b reegd-a.»

A Zonas makre

(Mt 12,38-42)

29 # Mt 16,4; Mk 8,12. Zãma wã ra yaa wʋsgo tɩ wa lebg pẽdgre t'a Zezi na n yeele: «Zamaan kãnga yaa zamaan yoogo; a bolgda wẽnd makre la a kõn paam makr a to n zʋʋg a Zonas rẽnda ye. 30#Zo 3,4. Wala a Zonas sẽn yɩ makre Niniv rãmb yĩnga, woto me Ned Biigã na n yɩɩ makre zamaan kãnga yĩnga. 31#1Dĩm 10,1-10; 2Nar 9,1-12. Bʋʋda raare, dĩm-poaka sẽn yi tẽn-zãorgẽ wã na n yik n bʋʋ zamaan kãnga bʋʋdo n mong-a bʋʋm, tɩ yẽ yii al dũni wã sɛtmẽ, n wa kelg yam soab a Salomo goama; la sẽn yɩɩda a Salomo n be ka. 32#Zo 3,5. Bʋʋda raare, Niniv rãmb na n yikame n bʋ zamaan kãng bʋʋdo la b na n mong-a la bʋʋm tɩ b sẽn wʋm a Zonas saglgo, b tuuba b yel-wẽna; la ade: sẽn be-a ka wã yɩɩda a Zonas.

33 # Mt 5,15; Mk 4,21; Lk 8,16. Ned kõn yõgen fitila n solg-a bɩ n fõgen-a rʋk ye; a dogend-a-la roagendga zugu tɩ sẽn kẽedba fãa yãe vẽenem. 34Fo nif la a f yĩng fitila, fo nif sã n ya sõmbo fo yĩnga fãa tara vẽenem; a sã n pa sõmbe, fo yĩnga zãng fãa zĩi ne lika. 35Ges f sẽn tar vẽenem ninga sã n ka lebg lika! 36Ad-f yĩnga fãa sã n tara vẽenem t'a wilg ba a ye ka be likẽ, a zãng faa na n yɩɩ vẽenem wala f fitil sẽn vẽnegd-f ne a vẽenem.»

Farizẽ la Sɛb-mitba sãbsgo

(Mt 23,1-36; Mk 12,38-40)

37A Zezi sẽn da waa n gomdã, Farizẽ a yembre n waa n kos tɩ b wa rɩ a yiiri. Tɩ b kẽ n sɩng rɩɩbo. 38Farizẽ wã yãee ne pɛlen-yɩka tɩ b pa reng n nudg b nus n yaool n sɩng rɩɩb ye. 39La Soaala yeel-a lame: «M nong rẽ! Yãmb Farizẽ rãmba nedgda laag la wamd poore tɩ y menga yaool n pid ne wagdem la wẽnem. 40Gãeemse! Sẽn naana poore, ka bãmb n naan pʋg la? 41Dɩk-y y sũura sẽn gãd bũmb ningã n maan wẽn-kosgo tɩ sẽn keta fãa na yɩ yɩlgemde y yĩnga. 42#Man 27,30. La na pak yãmba, Farizẽ rãmba! Yãmb yãkda y zẽ-vãadã la y zẽ-biisa sẽn tar yũ-noogã n kõtẽ, dʋr a ye piig zugu, n yaool n yãk y toog ne pʋ-peelem la Wẽnnaam nonglem: y tog n pidsẽ la boto, la woto me ra ka togẽ n pa sãoog ye. 43La na pak yãmba, Farizẽ rãmba! Tɩ pʋʋsg rotẽ yãmb nong n zĩnda taoore, waoor zĩigẽ, y nonga pʋʋs-bɛda kʋʋng zĩigẽ, sɛk zĩigẽ. 44Na pak yãmba, Farizẽ rãmba! Tɩ yãmb wẽnda yaad sẽn sarem tɩ neb tabd n pa mii ye!»

45Noor karen-saamb a ye leokame: «Yãmb sẽn gom woto wã, y sãbsda tõnd me.» 46La a Zezi leokame: «Na pak yãmb me, Noor karen-saam-dãmba! Tɩ yãmb tʋkda ninsaalba, zɩɩb b sẽn pa tõe n tʋke, tɩ yãmb menga nug-bil yaool n pa sɩɩsd bũmb ye.

47Na pak yãmba! Tɩ y manegd n meta bãngdba yaado la yaool n yaa y yaab rãmb n kʋ bãngdbã. 48Dẽnd yĩnga yãmb ne bãmb yaa kaset yɛnga: Bãmb n sɩd kʋ, tɩ yãmb, b kamba, tẽeda tɩ y roka b yãnde, n manegd bãngdba yaado!

49Yaa woto la yell kõ-ling-m Wẽnda beool n yeele: M na n tʋm-b la bãngdba la tʋʋm-tʋmdba, b na n kʋʋ kẽere, n dig kẽere, 50sẽn na n yɩ-la tɩ b wa sok zamaan kãnga kamba, bãngdba faa zɩɩm sẽn daag al dũni sɩngre, 51#Bs 4,8; 2Nar 24,20-21. sẽn sɩng ne a Abɛl zɩɩm n tãag a Zakari, b sẽn kʋ a soaba maan-kugr la Wẽnd doog sʋka. Sɩd wa m sẽn yetã, zamaan kãnga na rɩ zɩ-kãng fãa taale!

52Na pak yãmba, Noor karen-saam-dãmba! Yãmb looga ne bãngra roog kʋɩlen-bila, yãmb meng n pa kẽede la y yaool n digda sẽn dat-ba me kõom.»

53A Zezi sẽn yi be, Sɛb-mita la Farizẽ rãmba sɩng n dat-b la ne wẽnga la b pẽdgd bãmb ne sokr dãmb wʋsgo, bũmb wʋsg poorẽ. 54B ra gãnegd-b-la bẽdgo, n dat tɩ b meng noor yiis gomd sẽn na n paalg-ba.

Currently Selected:

A Luk Sõng 11: SSDC98

Highlight

Copy