A Luk Sõng 13

Sɩbgr yõodo

1Sega neb sẽn wa n togs yell ning sẽn pak Galile neb kẽere, a Pilat sẽn kɩt tɩ b zɩɩm kalm ne b maand dẽnna. 2T'a Zezi na n leok ba: «Yãmb tẽedame tɩ Galile nin-bãmba ra yaa yel-wẽn-maandb n yɩɩd b taaba bɩ? 3Ayoo! Mam yeta yãmba tɩ y sã n pa tuub y yel-wẽna, y fãa kida boto. 4La neb piig la a nii Siloe gaosga sẽn lʋɩ n bʋʋg n kʋ wã, yãmb tẽedame tɩ b beeg n yɩɩda Zerizalɛɛm neba fãa bɩ? 5Ayoo! Mam yeta yãmba tɩ y sã n pa tuub y yel-wẽna y fãa kiida kũum a woto buudu.»

Kankang sẽn ka womd yelbũndi

6A Zezi wẽ-b la yelbũnd kãnga: «Ned n da sel kankang a pʋʋgẽ. A kẽngame n na n tɩ fãs a biis n pa yãe ye. 7T'a yeel pʋʋga koaada: ‹Yaa yʋʋm a tã marsã la m wat n baood kankanga biisi n pa yãetẽ ye. Bɩ f kɛɛg-a! Bõe yĩng t'a yãmbd zĩig zaalem?› 8Koaada leok-a lame: ‹Bas-y rõandã yɛs n gese, tɩ m tũ bok n gilg n gãneg birga. 9Daare a me na yaa n wom biisi; a pa wom marsã, y na kɛɛg-a.› »

10A Zezi ra karemda zãma wã pʋʋsg roogẽ, vʋʋsg daare. 11Ade, pag a ye n da be be n tar Sʋtãan a pʋgẽ, al yʋʋm piig la a nii. Sʋtãana ra koms-a lame t'a bũndg n ka tõe n doog a meng ba bilfu. 12A Zezi sẽn yãend-a, b bool-a lame n yeele: «Fo tɩlga ne f bãagã.» 13La b tẽega b nus a zugu. Zĩig pʋgẽ bala paga dooga a menga, n yaas n pẽgd Wẽnde.

14 # Ey 20,9-10; Yao 5,13-14. Pʋʋsga roog naab sũur puugame, a Zezi sẽn sãoog paga vʋʋsg daar yĩnga; t'a na n yeel zãma wã: «Dasem a yoob n be yãmb sẽn tog n tʋm, dẽn yĩnga wa-y dasem kãense tɩ b sãoog yã, la y ra wa sibr daar ye.» 15Tɩ Soaala leok-a: «Zãmb rãmba, yãmb ned kam fãa ka lokd a bõang bɩ a naf vʋʋsg daar n tɩ yũnug bɩ? 16Sʋtãana sẽn za pagã, a Abraam biigã, al yʋʋm piig la a nii, maana a wãna tɩ m pa tõe n zaag a gadr vʋʋsg daare?» 17B sẽn gom woto, yãnd yõka sẽn da wẽed-b no-koeemdã, la zãma wã yẽ sũur da nooma al wʋsgo, Wẽnd makr dãmb sẽn da maanda yĩnga.

Yelbũn a taaba

(Mt 13,31-32; Mk 4,30-32)

18B le yeelame: «Wẽnd Rĩung wẽnda bõe, la m na n mak-a-la ne bõe? 19A wẽnda seneve tɩɩg biiga ned sẽn dɩk n bʋd a zẽedẽ, t'a yi n lebg tɩɩga tɩ yĩngr luiili soond a wilẽ.»

20B le yeelame: «M makda Wẽnd Rĩung ne bõe yɛsa? 21A wẽnda rabɩlle pag sẽn dɩk n nag zom moen a tã, t'a wuk zoma gilli.»

Dagno-sẽk yelle

(Mt 7,13-14, 21-23)

22A Zezi da pɩʋʋgda tẽn-bɛd la tẽn-bõonego n karemd neba la b rabd Zerizalɛɛm. 23Ned n sok a Zezi: «Sẽn na n fãag-bã, b sõor na n yɩɩ bilf bala?» 24Tɩ b leok-a: «Nadg-y pãnga n tũ digno-sẽka n kẽ. Tɩ maam n yet yãmba, neb wʋsg wat n makda b na kẽ la b kõn kẽ ye.

25Yir soab kẽ n sɛ n pag kʋɩlenga tɩ yãmb ket yɩnga n wẽed kʋɩlenga n tarẽ: ‹Soaala! Pak-y tɩ d kẽ!› A leokda yãmba: ‹M ka mi yãmb sẽn yitẽ ye!› 26Tɩ yãmb na n yaool n yeele: ‹Tõnd dɩɩme la d yũ ne yãmb wɛ! Yãmb karma neba d soy zutu.› 27#Yɩ 6,9. T'a leok yãmba: ‹Mam yeta yãmba tɩ m pa mi y sẽn yitẽ ye. Kẽng-y n menem-y la y bas maam, yãmb fãa, sẽn tʋmd-b tʋʋm kɛga.›

28 # Mt 22,13; 25,30. Na n lebga yãbr la yẽn wãbre, y sã n wa yãe a Abraam, la a Izaak, la a Zakoob la bãngdba fãa tɩ b zĩ Wẽnd Rĩungẽ tɩ b yaool n tus yãmb n yiis yɩnga. 29#Mt 8,11-12. Neb na n yii yaang la taoore, goabg la rɩtgo, la b na n zĩnd n dɩɩ Wẽnd Rĩungẽ wã.

30 # Mt 19,30; 20,16; Mk 10,31. La ade, sẽn ya-b poorẽ dãmba, kẽer na n lebga taoor dãmba, tɩ sẽn ya-b taoor dãmba, kẽer lebg poorẽ dãmba.»

A Zezi rabda Zerizalɛɛm

(Mt 23,37-39)

31Wakat kãng bala, Farizẽ rãmb kẽer waa n yeel-b lame: «Yik-y n kẽng-y zĩig a to t'a Erod dat n kʋʋ yãmba.» 32B leok-b lame: «Tɩ yeel-y m Ba sɩlem soaba Waaga, ade, maam yiisda sʋtãamba la m sãoogd bãad-dãmb dũna la beoogo la da-yɩten-daara tɩ m sɛɛme. 33La ya m sẽn na n kell n kẽnd Zerizalɛɛm dũnna, beoog la ra-yɩta, tɩ bãngd ka tog n ki kɛɛnga tɩ pa Zerizalɛɛm ye.

34Zerizalɛɛm, Zerizalɛɛm! Kato! Foom n kʋʋd bãngdba! B sẽn tʋm b rãmb f nengẽ, fo labd-b la ne kuga. Naoor a wãna, la m tʋlgre n tigim f kamba wala no-yãang sẽn põgend a kamba a pɩgsẽ? La yãmb pa sak ye! 35#Yɩ 118,26; Zr 22,5. Ges-y! B na n basa yãmb ne ro-vɩʋʋdo la mam yeta yãmba, y kõn le yãe maam, al tɩ tol n ta daar ning y sẽn wat n yeel-ma: ‹Sẽn wat-b Soaala yʋʋr yĩnga paam pẽgre!› »

Currently Selected:

A Luk Sõng 13: SSDC98

Highlight

Copy