A Luk Sõng 14

Kapʋg sãoogre

1A Zezi kẽe Farizẽ rãmb kãsem a ye yiri vʋʋsg daare, n na n dɩ, la Farizẽ rãmba ra gũusd-b lame. 2La ade, kapʋg soab n da yɛs bãmb taoore. 3A Zezi leok-b la koɛɛga, b yeela karen-saam-dãmbã la Farizẽ rãmbã: «Vʋʋsg daare, tõe n sãooga bãad bɩ pa tõe?» 4Tɩ b fãa sĩnd b noore; t'a Zezi yõk bãada nug n sãoog-a, n kuls-a. 5#Mt 12,11. B yaool n yeela Farizẽ rãmbã: «Yãmb sʋka ãnda biig bɩ a naaf n lʋɩt bulgẽ t'a pa na n yiis-a tao tɩ yaa vʋʋsg daare?» 6La b pa tõog n leok-b tɩ bũmb ye.

Pipi zĩis yelbũndi

7A Zezi ra yãeeme tɩ b sẽn bool b rãmba tɩ b wa rɩ wã ra tũusda waoogr zĩisi, la b wẽ-b-la yelbũndi: 8«Ned sã n bool-f tɩ f wa pʋg-reem kibsa, da bao waoogr zĩig n gãand ye, daare a boola ned a to sẽn yɩɩd foom, 9la sẽn bool-a yãmb y yiibã na n wa yeela foo: ‹Yik ka tɩ m ba Zagl gãande.› Tɩ fo yik marsã n tɩ gãand poorẽ ne yãnde. 10#Yel 25,6-7. Ned sã n bool foo rɩɩbo, tɩ gãand poorẽ zĩiga tɩ sẽn bool-a fooma sã n wa bɩ a yeel-fo: ‹M zoa! Wa-y taoor ka wɛ!› La woto na yɩ zu-zẽkr fo yĩnga. 11#Mt 23,12; Lk 18,14. Tɩ sẽn zẽkd-a a menga, b na n sulg-a lame la sẽn sikd-a a menga b na n zẽk-a lame.»

Wẽnd yel-sõmd baoobo

12A Zezi yeela sẽn bool-a bãmb rɩɩbã: «Yãmb sã n mii n segl dɩɩb wĩndg bɩ yʋngo, bɩ y ra bool y zo-rãmba bɩ y ba-biisi, bɩ y roagdba bɩ y yags sẽn ya rakãagb ye tɩ b na n wa boola yãmb n lebse, tɩ rẽnna yɩɩ y rolbo. 13Yãmb sã n segl dɩɩbo, bool-y naong rãmba, wobse, kar-kegdo, zoeense. 14Woto yãmb sũur yita noogo tɩ b pa tar n na n lebs yãmb ye la y na paam dolbo nin-sõma vʋʋgr daare.»

Kibs kãseng yelbũndi

(Mt 22,1-10)

15Sẽn da rɩt-b be wã ned a ye sẽn wʋm goama, yeela a Zezi: «Sũ-noog soaba la sẽn na n dɩ-a rɩɩb Wẽnd Rĩung wã!» 16La a Zezi leokame: «Dao a yembre n maan kibs kãsenga n segl dɩɩbo la a wilga neb wʋsg tɩ b wa, a raare. 17Kibsa raare, a tʋma a sõgne t'a yi n yeel sẽn bool b rãmba tɩ b wa rɩ tɩ fãa segl n sɛɛme. 18B fãa maana no-yend n kabs tɩ b ka na n tõog n wa ye. Pipi soaba yeelame: ‹M daa pʋʋgo, yaa pakr tɩ m tɩ ges; m kotame tɩ y kabs y zu-soaba n kõ-ma.› 19T'a to yeele: ‹M daa yikay piiga tɩ m dabda n na n tɩ mag b pãng n gese; m kotame tɩ f kabs f zu-soaba n kõ-ma.› 20T'a to yeele: ‹Mam peega pag marsã, dẽn n so tɩ m pa tõe n wa.›

21Sõgna sẽn kuli, a tɩ togsa a zu-soaba b fãa leokre. Yira soab sũur puugame t'a yeel a sõgne: ‹Yi tao n kẽng neba sɛk zĩigẽ la soy zutu, tall naong rãmba, wobse, zoeens la kar-kegdo n wa ne b ka.› 22Tɩ sõgna le wa yeele: ‹M zu-soaba, yãmb sẽn kõ noor ninga, d maana me la weer ketame.› 23Tɩ zu-soaba yeel a sõgne: ‹Kẽng so-raadẽ la so-bugsẽ, n wool neba tɩ b wa kẽ tɩ m doog pidi. 24Man yeta yãmba, tɩ b sẽn deng n bool b rãmba fãa ned ba a ye kõn lemb mam dɩɩba ye.› »

A Zezi tũudem sẽn dat bũmb ninga

(Mt 10,37-38)

25Zãma kãsenga n da tũud a Zezi tɩ b wẽneg b poorẽ n yeel-ba:

26 # Mt 10,37. «Ned sã n wat mam nengẽ, a sã n pa kis a ba, n pa kis a ma, a paga, a kamba, a ba-biisi, la a tãopa la al ba a meng vɩɩm, a pa tõe n yɩ m karen-biig ye. 27#Mt 10,38; 16,24; Mk 8,34; Lk 9,23. La sẽn pa zɩt a pika n tũud m nao, pa tõe n yɩ m karen-biig ye.

28Ãnna n be yãmb sʋka, n dat n me a gaosgo n pa na n deng n zĩndi, n geelg a sẽn na n sãam ligd ninga la a ges a tara sẽn na n sek rooga meebo, 29t'a na n wa sɩng-a, n yaool n pa tõog n me-a n baase tɩ neb wa yãe n tar-a a laado: 30‹Ad daoã sɩnga meebo la pãng paoogame t'a pa baas ye.› 31Bɩ yɛ naaba n bob tãpo n na n tɩ kaoog zabre ne naab a to, n pa na n deng n zĩnd n maag a menga n tagse a sã n tõe n maana raood ne tãb-biis tus piigã, tɩ naaba to wã yaool n segd-a ne tãb-biis tus pisi? 32A sã n mi t'a ka tõe, naab a to wã nan ket yɩɩga, a na tʋm ned t'a yõk sɛɛga n yẽs laafi yẽsgo. 33Woto me, yãmb sʋka ned ninga sẽn pa rat-a n bas a sẽn tar fãa, a ka tõe n yɩ mam tũud-n-taag ye.

Da tar-y n leb poorẽ ye

(Mt 5,13; Mk 9,50)

34Yamsem yaa bõn-sõngo. La a sã n sãbge, bõe n na n le wa ne a noosem? 35A sẽn ka tog ne pʋʋgo t'a ka tõe n yɩ birga, a tɛk yaa lobr bala. Sẽn tara tʋb n dat n wʋm bɩ a wʋm.»

Currently Selected:

A Luk Sõng 14: SSDC98

Highlight

Copy