Ñwaè' Joân 12

1Mnòŋ ce a be ye Ŋkǎ' càasi-mndap vi ka' bɛti ntuunfu, Jisòs à natì a du à rla' Bɛtanì. Rla' Bɛtanì ca yu fàdì' ce Lasòròs ce Jisòs à m fʉr efa rkwe nà à m ce cu. 2A m laa byee a tar ye àgho. Maatà à m ce càasi byee. Lasòròs ye ye à m ba mò' ce a Jisòs wèe a m ce ye byee mbe tɛbùr.

3Wowèe a ka' ce ye byee, Mɛ̀ɛri à vʉ nè mgʉr ce mi m bòŋ sê, ce a m gèe nè njɛ̀ɛ mjɛɛ ce a m ce too enɛ Nâd. Mgʉr anà mi m lùu ntaa sê. Mi m ba àmbò nto'nì lità wa'a. E m lòr mgʉr anà a cu'ni à mkùu Jisòs, a siŋsi nè yi nyʉ̀'tu. Ndap à m ku rʉʉ nsìp nsìp nè mgʉr anà. 4Judas Ìskarìyòt ce e m ba mo' efa ŋgǎa yɛ'ni yì buu, ce e m ba ŋwɛ̀ ce e be lò fyèni Jisòs nà, à m làa enɛ̂, 5“Haba! Àde' a ke' ba fyèni mgʉr ca à bbǎa mbǎa btaar, lòr mbàa efa gho fa nè ŋgǎa fùp ka' njokɛ?” 6E m làa wa'a, ke' ba njobè' e m ce koosimnse nè ŋgǎa fùp ka'. E m làa wa'a njobè' e m ba nyɛ̀ɛ. A ye ce e m ce lɛ̀ yap mbàa, a ce yɛ̀ɛ mo' enjo. 7Jisòs à laa enɛ̂, “Lɛ̀ ye nyaŋ. Mà'shi tɛ e gee wa'a à nòŋ ce a be kè tuŋ mɛ̀. 8Ŋgǎa fùp a ku ba wèe wowèe à nfè' wɛɛwɛ, à ka' ba àmbò mɛ̀ yi, sèe be ba à nfè' wɛɛwɛ ka'.”

9Ma kʉr Jus a ka' yu' enɛ Jisòs yu à rla' anà, a natì a vʉ̂. Wowèe a m vʉ̀ tɛ a bo kù yɛ ba Jisòs cà'cà' ka', a m kòŋ foŋ à ryɛ Lasòròs ce Jisòs à m fʉr efa rkwe nà. 10Yi ka' ba wa'a, běe bgòrgòr efa mʉ̀ ŋgǎa taŋshi taŋshì a seesì àmbò a be yʉ Lasòròs, 11njobè' Jus magòr a m mà'shi wowèe a byemì nè Jisòs njo' ye.

12Tʉ̀' à ka' raa, ku' bèe ce a m vʉ̀ à rye ŋkà' nà, a yu' enɛ Jisòs ce vʉ̀ à rla' Jɛ̀rusalɛ̀m. 13Yi ka' ba wa'a, wowèe a gwar bbàp mtɛɛ a du a koni ye àgho à nduunjì, a ce yòp enɛ̂, “Hòsanà! Bghònì vi yu nè ŋwɛ̀ ce e ce vʉ̀ à rlii Tatâ, a ba ŋkʉʉ à to' Isrɛ̀l.” 14Jisòs à m koni muu jàaki', a ko' a cu mbo, àmbò a m saŋ mbe Ŋwǎ' Nyʉ̀ nà. A m saŋ mbo enɛ̂, 15“Rla' Sayòn, fa wɛp ka'. Yɛ yò ŋkʉʉ àmbò e ce vʉ̀, a cu mbendù muu jàaki'.” 16Ŋgǎa yɛ'ni yì buu a m rìŋ mbùu efa buu ce vi m koni na efa rkɛ̀' ka'. Wowèe a m lò a riŋ ba à nfè' ce Nyʉ̀ à m kù'si Jisòs nà. Wowèe a m kuushi buu ce a m saŋ a kuu ye à nfè' anà, a kuushi foŋ àmbò a m gèe buu ca nè ye.

17Bèe ce a m ba a Jisòs wèe à nfè' ce e m fʉr Lasòròs efa rkwe nà a m ce suŋ bèe àmbò yuu ce yi m koni. 18A mbùu ce bèe magòr ce a m yu' yuu bɛ̀ɛ ce Jisòs à m gèe anà, a m vʉ̀ a yɛ ye. 19Bèe Farìsi a ka' yɛ wa'a, a kɛ' a ce làa a wǎp mʉ enɛ̂, “Àde' sèe gee yuu mo' ka'. Yɛ àmbò bèe wɛɛwɛ a kuŋ nyor a du a yě mbùu.”

20À m ba à nfè' anà, bèe mo' à to' Grěs a ba à mʉ̀ bèe ce a m ce du à rgèe rloo à ŋkà' anà. 21Bèe Grěs ca a m dù a yɛ Felep ce à rla' Bɛ̀tsaidà à ŋgǒŋ Galèlê, a laa nè ye enɛ̂, “Masà, wèr ce kòŋ à ryɛ Jisòs.” 22Felep à du a suŋ Andrù, a ye a du a suŋ Jisòs. 23Jisòs à laa nè wowèe enɛ̂, “Nfè' à ghɛɛ ce a be kù'si Muu Ŋwɛ̀. 24M ce suŋ wèe nè mini-ŋwɛ̀ mɛnɛ, mbʉ̀ kwaa à ka' tɛ gwè à nshè kwe ka', banɛ e be kù cu mò'sir àmbò e m ba. E ka' gwe à nshè, rlir li fʉʉ, kwaa kwe, banɛ e be kù', gèe mbʉ̀ kwaa àŋgoo. 25Yi yu enɛ ŋwɛ̀ ce e ka' boŋshi li ryòŋ banɛ e be bɛ li. Ŋwɛ̀ ce e ka' tɛ boŋshi li ryòŋ njep ŋgòŋ na ka', banɛ ŋgàŋ be tʉr li ryòŋ, cu nfesè. 26Ŋwɛ̀ ce e ka' koŋ à rfà' nè mɛ̀, ŋgàŋ vʉ fa mɛ̌ mbùu. Fàdì' ce m ka' ba, banɛ yà ŋwɛ̀ rfà' be ba àfo foŋ. Ŋwɛ̀ ce e ka' fa' nè mɛ̀ banɛ yà ta be nàa ye mbekì.

27“Ya ntee yi ce fa mɛ̀ ŋgɛ' sè'ni sê. M be ka' laa mɛ kɛ? M laa mɛnɛ ‘Yà Tâ, fʉr mɛ̀ efa ŋgɛ' ce e yu sè'ni nà’ a? Ài', m be làa wa' ka'. Mɛ̀ m vʉ̀ tɛ m bo yɛ njɛ̀ɛ ŋgɛ' ca. 28Yà Tâ, gèe tɛ a ku'si lo rlii.” E ka' làa wa'a, a yu' njèndoŋ à laa embe bùu enɛ̂, “Mɛ̀ gèe wa'a, m be kèr gèe.” 29Kʉr bèe mo' ce a m ba àfo a m yu' njèndoŋ anà a laa enɛ mbèŋ à waŋger. Bèe mo' a laa yap enɛ ncìndap Nyʉ̀ à làa yuu nè ye. 30Jisòs à laa nè wowèe enɛ̂, “Njèndoŋ ca à làa njo' mɛ̀ ka', e làa njo' wèe. 31Nfè' à ghɛɛ ce Nyʉ̀ be sa' ŋgòŋ ca. Nfè' à ghɛɛ ce a be so ŋkʉʉ enjep ŋgòŋ ca. 32À ka' ba yi àmbò mɛ̀, a be nàa mɛ̀ mbekì tɛ m sʉŋ bèe wɛɛwɛ à yà.” 33Jisòs à m làa wa'a tɛ bèe a bo rìŋ njɛ̀ɛ rkwe ce e be kwe.

34Kʉr bèe anà a laa nè ye enɛ̂, “Wèr à m yu' embe Ŋwà' Mncir enɛ Krǎis anà be cu nfesè. Wɛ̀ ka' ce làa wɛnɛ a be nàa Muu Ŋwɛ̀ mbekì njokɛ? Muu Ŋwɛ̀ anà yu nda sê?” 35Jisòs à laa nè wowèe enɛ̂, “Rraa li be kù ba wèe wowèe ba à nfè' mʉcàcàr. Ce jɛr nè sè'ni àmbò rraa li bii àgho, fà dì' tʉ̀'nji koni wèe ka'. Ŋwɛ̀ ce e ke jɛ̀r à tʉ̀'nji e ke rìŋ fàdì' ce e ce dù ka'. 36Byemi nè nè rraa ca àmbò li ku bii fa wěe mʉ na, tɛ wèe bo ba boo ce à rraa.”

Jisòs à ka' làa blàa ca mìsi, a lɛ'si nyor efa mʉ̀ bèe a du a cu mimŋgi'. 37Ka' Jisòs à m dùŋshi ku' mncòo a wǎp bsii wa'a, wowèe a m byemi yap yu nè ye ka'. 38Buu ca vi m ku koni àmbò Àsayà ŋwɛ̀ ncep ntuu Nyʉ̀ à m saŋ nà. E m saŋ enɛ̂,

“Tatâ, wà' ŋwɛ̀ mò' yu ce e byemi blǎa Nyʉ̀ ce wèr à fè'shi na a?

Wà' ŋwɛ̀ mò' yu ce e rìŋ yo ŋger a?”

39Bèe anà à m byemi ka'. Yi ku ba àmbò Àsayà à m ker saŋ nà. E m saŋ enɛ̂,

40“Nyʉ̀ à cete mâp mmir,

a teesi wap btu fà dì' wowèe a bo yɛ rraa ca nè mâp mmir, rìŋ buu ca,

bèesi yap ntee vʉ̀ a mɛ̌ mbùu tɛ m bo gèe wowèe a luŋ ka'.”

41Àsayà à m ce làa buu ca wa'a njobè' e m yɛ fòo Jisòs, a ce làa ba àmbò ye.

42Geewa'a, bèe magòr a m byemi nè ye, ka' bèe mo' ce a m ba běe bgòrgòr. Wowèe a m suŋ bèe ka', njobè' wowèe a m ce wɛp bèe Farìsî. Wowèe a m gèe wa'a, fà dì' a bo jùu wowèe embe ndàp rloo ka'. 43Wowèe a m ce kòŋ à rgèe ba yuu ce vʉse Nyʉ̀ vʉse wowèe ka'. Wowèe a m ce kòŋ à rgèe ba yuu ce ku'si ba bèe kù'si wowèe.

44Jisòs à m làa nè ŋger-ŋwɛ̀ enɛ̂, “Ŋwɛ̀ à ka' byemi nè mɛ̀ banɛ ŋgàŋ à ku byemi ba nè mɛ̀ ka', e byemi foŋ nè ŋwɛ̀ ce e m tuu mɛ̀. 45Ŋwɛ̀ ce e ka' yɛ mɛ̀, banɛ ŋgàŋ à yɛ ŋwɛ̀ ce e m tuu mɛ̀. 46Mɛ̀ vʉ̀ njep ŋgòŋ na àmbò rraa tɛ ŋwɛ̀ ce e ka' byemi nè mɛ̀, e bo kèr cu à tʉ̀'nji ka'. 47Ŋwɛ̀ à ka' yu' wa blàa, ke' gee yuu ce mɛ̀ làa ka', be sa' mɛ̀ nsa' ŋwɛ̀ anà ka'. Mɛ̀ m vʉ̀ tɛ m bo sa' bèe ka'. Mɛ̀ m vʉ̀ tɛ m bo gèe bèe a lûŋ. 48Ŋwɛ̀ ce e ka' kani mɛ̀ ker kani wa blàa foŋ, ŋgàŋ tʉr yuu ce yi be sa' ye. Wa blàa a yuu ce vi be sa' ŋwɛ̀ anà à nòŋ elʉ̀simbùu. 49Yi yu wa'a njobè' m ce làa buu ca ba à ŋger ya ka'. Yu ba yà Ta ce e m tuu mɛ̀ ce e m suŋ mɛ̀ yuu ce m lâa. 50Mɛ̀ rìŋ mɛnɛ vi blàa vi yu ryòŋ ce nfesè. Banɛ blàa ce m ce làa nè wèe yu ba blàa ce mɛ̀ yu' ese yà Ta cà'cà'.”

Currently Selected:

Ñwaè' Joân 12: LNT

Highlight

Copy