Ñwaè' Joân 11

1Ŋwɛ̀ mò' à m ba a ce yaŋ, ce a too ye enɛ Lasòròs. E m ce cu à rla' Bɛtanì a Mɛ̀ɛri ba Maatà ce à m ba bjar vi. 2Mɛ̀ɛri ce ndur yǐ Lasòròs à m ce yaŋ na, à m ba Mɛ̀ɛri ce e m cu'ni mgʉr à mkùu Tata Jisòs, a siŋsi nè yi nyʉ̀'tu nà. 3Bjar vi a m cep ntuu nè ye enɛ̂, “Tatâ, ŋwɛ̀ ce à kòŋ nà ce yaŋ.” 4Jisòs à ka' yu' ntuu ca a laa enɛ̂, “Yaŋ ca yi be lʉ̀si ba nè rkwe ka'. Cena yi yu wa'a tɛ bèe magòr a bo yɛ bkù' Nyʉ̀ tɛ a bo kù'si Muu Nyʉ̀ njobè' yi.”

5Jisòs à m kòŋ Maatà ba nfʉr yì ker ba Lasòròs. 6E ka' yu' enɛ Lasòròs ce yaŋ, a ker cu fàdì' ce e m ba nà à mnǒŋ bbaa. 7Mnòŋ anà vi ka' càa, e laa nè ŋgǎa yɛ'ni yì buu enɛ̂, “Sèe kʉti à ŋgǒŋ Jùdiyà.” 8Wowèe a laa nè ye enɛ̂, “Rabài, to mnòŋ vi ku caa mʉcàr sê, ce Jus a mʉ ce ròo à rtʉʉshi wɛ̀ nè blùr. Wɛ̀ ka' laa wɛnɛ à be kʉti à ŋgǒŋ Jùdiyà njokɛ?” 9Jisòs à beesì enɛ̂, “Nyʉ̀ e ke saŋ, kɛ̌' à mʉ ŋgàptʉ' du ba' à mbùuŋkùr. Ŋwɛ̀ à ka' ce jɛ̀r à nfè' ce ŋgòŋ yi ce raa, àde' ŋgàŋ kotè à yuu ka' njobè' ŋgòŋ yi ce raa, e ce yɛ buu. 10Geewa'a ŋwɛ̀ à ka' ce jɛ̀r nètʉ' banɛ ŋgàŋ be kote njobè' rraa li yu njep ye ka'.” 11E ka' làa wa'a, a ker suŋ wowèe enɛ̂, “Lasòròs ce yu ŋkar yìsèe ce buumi buumi. M be dù tɛ m bo yɛ̀ɛ ye efa mmirlò.” 12Ŋgǎa yɛ'ni yì buu a laa enɛ̂, “Tatâ, e ka' ce buumi banɛ e be lùŋ.” 13Wowèe a m ce làa wa'a, a ce kwà'shi enɛ Lasòròs ce buumi àmbò bèe a ke buumi nà. Geewa'a Jisòs à m ce làa ba enɛ Lasòròs à kwe kwe. 14Jisòs à m suŋ wowèe rara enɛ̂, “Lasòròs à kwe. 15M ce lu'shi njobè' wèe, mɛnɛ mɛ̀ mʉ ba àfo ka', tɛ wèe bo byemi nè mɛ̀. Banɛ sèe du yɛ ye.”

16Tomas ce a m ce too ye enɛ rfar nà, à laa nè bèe ce a wowèe a m ce yɛ'ni buu Jisòs nà enɛ̂, “Sèe du àmbùu Jisòs foŋ tɛ sèe bo dù kwe sèe wowèe.”

17Jisòs à ka' bà' à rla' Bɛtanì, a yu' enɛ yu mnòŋ kyèe àmbò a mʉ tuŋ Lasòròs. 18-19À m ba à nfè' anà Jus magòr se a lǒ à rla' Jɛ̀rusalɛ̀m a vʉ à rcà'ni Maatà ba Mɛ̀ɛri njo' ndur yàp ce e m kwe. Lǒ à rla' Jɛ̀rusalɛ̀m du ba' à rla' Bɛtanì yi yu sàsap ka'. Yi ku ba àmbò bkìlomɛtà vǐ btaar wa'a.

20Maatà à ka' yu' enɛ Jisòs ce vʉ̀, e natì a du a koni ye à nduunjì. Mɛ̀ɛri à cu yi mbe ndàp. 21Maatà à ka' koni Jisòs, a laa nè ye enɛ̂, “Tatâ, wɛ̀ mʉ ba àfa ndur yà à mʉ kwe ka'. 22Ka' sè'ni na, mɛ̀ rìŋ mɛnɛ Nyʉ̀ be fa yuu ce wɛ̀ ka' bipshi nè ye.” 23Jisòs à laa nè ye enɛ̂, “Ndur yò be fʉʉ efa rkwe.” 24Maatà à laa nè ye enɛ̂, “M rìŋ mɛnɛ e be fʉʉ efa rkwe à nòŋ elʉ̀simbùu ce bèe wɛɛwɛ a be kè fʉʉ efa rkwe nà.” 25Jisòs à laa nè ye enɛ̂, “A mɛ̀ ce mɛ̌ ke gèe bèe a ce fʉʉ efa rkwe, a ker ba ŋwɛ̀ ce e ke fa ryòŋ. Ŋwɛ̀ ce e ka' byemi nè mɛ̀, ka' ŋgàŋ à ka' kwe, e be cu nfesè. 26Ŋwɛ̀ ce e ka' cu ntèe, byemi nè mɛ̀, banɛ ŋgàŋ be cu nfesè. Wà' wɛ̀ byemi a?” 27E laa nè ye enɛ̂, “Ɛ̀no, Tatâ, mɛ̀ byemi mɛnɛ à yu Krâis, Muu Nyʉ̀ ce e m ba enɛ e be vʉ̀ njep ŋgòŋ nà.”

28Maatà à ka' làa wa'a, a du a kɛ' nfʉr yǐ Mɛ̀ɛri a cʉʉni nè ye enɛ̂, “Ŋwɛ̀ ryɛ'nì à vʉ̀ a ce kɛ' wɛ̀.” 29Mɛ̀ɛri à ka' yu', a sa'ti mbekì a du a koni ye. 30À m ba à nfè' anà, Jisòs à be niŋ à mʉ̀ rla' ka'. E m ku bii ba mbe dì' ce Maatà à m dù a yɛ ye nà. 31Jus ce a wowèe a m ce cu rkwe mbe ndàp nà a ka' yɛ àmbò Mɛ̀ɛri à sà'ti a fʉʉ njepmbè, wowèe a du a yě mbùu njobè' a m ce kwà' enɛ e ce dù à rwar rkwe fàdì' rshè li m ba.

32Mɛ̀ɛri à du a yɛ Jisòs, a gʉ'shi njep yě tìi, a laa enɛ̂, “Tatâ, wɛ̀ mʉ ba àfa, ndur yà à mʉ kwe ka'.” 33Jisòs à ka' yɛ àmbò Mɛ̀ɛri ce war, kèr yɛ àmbò Jus ce a Mɛ̀ɛri wèe a m ce vʉ̀ nà a ce warse, yi joo ye sê, mlù mi koo ye. 34E bipshì nè wowèe enɛ̂, “Wèe à mʉ tuŋ ye ba fɛ?” Wowèe a laa nè ye enɛ̂, “Tatâ, vʉ̀ yɛ.” 35Jisòs à suusì mŋgoommir. 36Jus anà a laa enɛ̂, “Yɛ nè àmbò e m kòŋ ye nà.” 37Bèe mo' a laa yap enɛ̂, “Àde' ŋwɛ̀ ce e m gèe nfèp à ce yɛ buu nà à ke' ba gèe tɛ ŋwɛ̀ ca luŋ efa rkwe ka' a?” 38Yi ker joo Jisòs, e du mbe dì' ce rshè li m ba. Rshè anà à m ba mbʉ̀' ce a m sò' nje ryɛɛ, a biŋsi lùr a cete àgho. 39Jisòs à laa enɛ̂, “Cà'si nè lùr anà.” Maatà ce e m ba njar ŋkʉshè ŋwɛ̀ nà, à laa nè ye enɛ̂, “Tatâ, e be rʉ̀ʉ sê, njobè' yu mnòŋ kyèe sè'ni àmbò a mʉ tuŋ ye.” 40Jisòs à laa nè ye enɛ̂, “Mbò mɛ̀ ba suŋ wɛ̀ enɛ à be yɛ ŋger Nyʉ̀ ce wɛ̀ ka' byemi a?” 41A m cà'si lùr embe ncǔu rshè. Jisòs à ke' mbe bùu a laa enɛ̂, “Tàr, m ce yòŋshi wɛ̀ njobè' wɛ̀ yu' la rloo. 42Mɛ̀ rìŋ mɛnɛ wɛ̌ ke yu' la rloo à nfè' wɛɛwɛ. Geewa'a, m ce làa cena njo' bèe ce a tɛɛ na, tɛ wowèe a bo byemi enɛ a wɛ̀ ce wɛ̀ m tuu mɛ̀.” 43E ka' làa wa'a, a waa mbekì enɛ̂, “Lasòròs, fʉʉ enjo!” 44Ŋwɛ̀ ce e m kwe na à fʉʉ àmbò a m kur mi mkoo ba mi mkùu nè bcɛ̀', a boo vi bsii nè bcɛ̀' nà. Jisòs à laa nè wowèe enɛ̂, “Bà'shi nè bcɛ̀' tɛ e dû.”

45Bèe ce a m vʉ̀ a Mɛ̀ɛri wèe nà, a m yɛ yuu ce Jisòs à m gèe, bèe magòr efa wǎp mʉ a byemì nè ye. 46Bèe mo' a natì yap a du a yɛ bèe Farìsi a suŋ wowèe yuu ce Jisòs à m gèe anà. 47Yi ka' ba wa'a, bèe Farìsi ca ba běe bgòrgòr efa mʉ ŋgǎa taŋshi taŋshì a kɛ' kansùr, a laa enɛ̂, “Sèe be gèe seekɛ? Ŋwɛ̀ ca ce dùŋshi ku' mncòo sê. 48Sèe à ka' ma'shi enɛ e ce gee njɛ̀ɛ buu ca, bèe wɛɛwɛ a lo byemi nè ye, tɛ běe à to' Rum a lo vʉ̀ bepsi yisèe dǐ' rara ba yisèe to'.” 49Mò' efa wowèe ce a m ce too enɛ Kaifàs ce e m ba tu nè ŋgǎa taŋshi taŋshì mbe fè' anà à m nàti mbekì a laa enɛ̂, “Wèe rìŋ yuu ka' mʉcàr ka'. 50Wèe à ba rìŋ weenɛ yi yu bòŋboŋ enɛ ŋwɛ̀ mò'sir kwe àtu bèe nè ce enɛ to' sìp yi bʉ.” 51Kaifàs à m ce làa wa'a, a ce làa ba à mkwà'shì mi ka'. Àmbò Kaifàs ca à m ba tu nè ŋgǎa taŋshi taŋshì à fè' anà, e m suŋ bèe yuu ce yi be lò ba. E m làa enɛ Jisòs tɛɛ à rkwe àtu to' wɛɛwɛ. 52Yi m ba enɛ e be kwe ba àtu to' ca cà'cà' ka'. Yi m ba enɛ e be kwe àtu bèe Nyʉ̀ ce a yu à bto' wɛɛwɛ tɛ e bo vʉ̀ nè wowèe àbee tɛ wowèe a ba ŋwɛ̀ mò'sir.

53Yi ka' ba wa'a, wowèe a kɛ' ese nòŋ anà, a ce sèesi àmbò a be gèe ka' yʉ ye. 54Yi ka' ba wa'a, Jisòs à ker kar àwaŋ à ŋgǒŋ Jùdiyà ka'. E m lò a du à rla' mo' ce a too enɛ Ɛfrɛ̀m. Rla' anà li yu àwǎa rìŋ. E m dù a cu àfo a ŋgǎa yɛ'ni yì buu wèe.

55Nfè' à m kɛ̀' a ce ghɛɛ ce a be ye ŋkǎ' càasi-mndap. Bèe a m lǒ à bbu' mla' wɛɛwɛ a du à rla' Jɛ̀rusalɛ̀m. Wowèe à m kòŋ à rgèe wap mnyor tɛ vi ba brara à bsii Nyʉ̀, tɛ nfè' ŋkà' ka' ghɛɛ. 56Wowèe a m ce ròo Jisòs, a kɛ' a ce bipshi fa wǎp mʉ mbe Ndàp Nyʉ̀ enɛ̂, “Wèe ce kwà'shi enɛ kɛ? E be vʉ̀ ŋkà' ca kɛ̀ e be vʉ̀ ka'?” 57Běe bgòrgòr efa ŋgǎa taŋshi taŋshì ba bèe Farìsi a m fa rsa' à nfè' anà enɛ ŋwɛ̀ à ka' riŋ fàdì' Jisòs yu, ŋgàŋ vʉ suŋ wowèe tɛ wowèe a bo dù koo ye.

Currently Selected:

Ñwaè' Joân 11: LNT

Highlight

Copy