Ñwaè' Joân 10
10
1“M ce suŋ wèe nè mini-ŋwɛ̀ enɛ ŋwɛ̀ à ka' ce niŋ mbe ŋka' njèe, ko' à ŋka', ke' du njì embe cǔu ŋka' ka', banɛ ŋgàŋ yu nyɛ̀ɛ a ker ba ŋkep. 2Ŋwɛ̀ ce e ka' niŋ à cǔu ŋka' banɛ ŋgàŋ yu ŋwɛ̀ ncìŋ njèe anà. 3Ŋwɛ̀ ce e ce ke'ni cǔu ŋka' be mʉ̀' cǔu ŋka' nè ye, tɛ e kɛ' yi njèe à mlii, tɛ yi njèe yi yu' yì njèndoŋ, tɛ e keŋsi yi njèe anà fʉʉ àgho embe ŋka'. 4E ka' fʉr yi njèe embe ŋka' wɛɛwɛ, tɛɛ entombì ce dù, yi njèe yi ce vʉ̀ embe yě njì njobè' yi rìŋ yì njèndoŋ. 5Àde' yi byemì à rdù àmbùu ŋwɛ̌ jɛɛ ka'. Yi ka' yɛ ŋwɛ̌ jɛɛ yi kɛ' ce caŋ caŋ, njobè' yi rìŋ njèndoŋ ŋwɛ̀ anà ka'.”
6Jisòs à m mà' ŋgàa ca nè wowèe, wowèe a ke' riŋ ŋgàa anà ka'. 7Yi ka' ba wa'a, Jisòs à laa nè wowèe enɛ̂, “M ce suŋ wèe yuu tatap, m yu cǔu ŋka' njèe. 8Bèe wɛɛwɛ ce a dù entombì nè mɛ̀, a yu byɛ̀ɛ, njèe yi mɛŋnì yàp njèndoŋ. 9A mɛ̀ cǔu ŋka'. Ŋwɛ̀ ce e ka' caa njì enjep mɛ̀ banɛ ŋgàŋ be lùŋ efa ŋgɛ'. E be niŋ mbo à nfè' ce e gwɛɛ, koni yuu ye. 10Nyɛ̀ɛ e ke vʉ̀ tɛ e bo yɛ̀ɛ, yʉ, kèr bepsi buu. Mɛ̀ vʉ̀ ya tɛ bèe a bo koni ryòŋ, tʉr buu wɛɛwɛ.
11“M yu gǎy mbòŋmboŋ. Gǎy mbòŋmboŋ e ke tami nyor à rkwe njo' yi njèe. 12Ŋwɛ̀ ce a lòr ye, e ce jà' yi jà', yu gày ce e tʉr njèe anà ka'. E ka' yɛ àmbò kuura ce vʉ̀, e be caŋ mà' njèe, tɛ kuura koshi mo', bɛr yi da' à rìŋ. 13Ŋwɛ̀ ce a lòr e ce jà' yi jà' nà e lo caŋ njobè' njèe yu yi ka'; e tʉr yi yu nfè' àgho ka'. 14M yu gǎy mbòŋmboŋ. M rìŋ ya njèe, ya njèe yi riŋ mɛ̀. 15Àmbò yà ta kòŋ mɛ̀, mɛ mɛ̀ à koŋ ye nà. Mɛ̀ tami nyor à rkwe njo' yi. 16M ker tʉr ya njèe mo', yi ba mbe ŋka' anà ka'. M be kù vʉ̀ nè njèe anà foŋ mbe ŋka' ca tɛ yi yu' yà njèndoŋ, ba kʉr e mo'sir, tʉr ŋwɛ̀ rcìŋ mò'sir. 17Yà ta kòŋ mɛ̀ njobè' mɛ̀ fa la ryòŋ tɛ m bo kèr lò koni li. 18Ŋwɛ̀ mò' be koo la ryòŋ ese mɛ̀ ka'. Ce fa ba mɛ̀ à la rkòŋ. M tʉr ŋger à rfa la ryòŋ, a ker tʉr ŋger à rkoo li. Cena yu ba yuu ce yà Ta à làa enɛ m gêe.”
19Jisòs à ka' làa blàa ca, běe bgòrgòr efa mʉ̀ Jus a kɛ' a ce kwà'shi jɛɛ jɛ̀ɛ jɛɛ njo' blàa anà. 20Bèe magòr a kɛ' a ce làa enɛ̂, “Yʉ' nyʉ̀rkà' yi karsi ye tu, e kɛ' a ce baa. Sèe ce yu' yuu ce e ce làa njokɛ sê?” 21Bèe mo' a laa yap enɛ̂, “Yʉ' nyʉ̀rkà' yi ka' karsi ŋwɛ̀ tu, e laa njɛ̀ɛ buu ca ka'. Àde' yʉ' nyʉ̀rkà' yi gee nfèp ce yɛ buu à njɛ̌ɛ kɛ?”
22Nfè' ce a m ce ye Ŋkǎ' Hànukà à rla' Jɛ̀rusalɛ̀m à m ghɛɛ. À m ba à nfè' ce saa à m ya'ni. 23Jisòs à m ker du à rla' Jɛ̀rusalɛ̀m. A ka' bà' a du mbe Ndàp Nyʉ̀ a ce jɛ̀r mbe dì' mo' ce a m ce too enɛ njì-baaki ŋkʉʉ Solomʉ̀n. 24Jus a vʉ a sir ye a kaari a tarte, a laa nè ye enɛ̂, “Wèr be kè' dù bà' ba fɛ, tɛ à ka' suŋ wèr njɛ̀ɛ ŋwɛ̀ ce à yu? Wɛ̀ ka' ba Krâis, ce yu ŋwɛ̀ rjà' ce Nyʉ̀ à m kà'ni enɛ e be tuu nà, à suŋ wèr rara.” 25Jisòs à laa nè wowèe enɛ̂, “Mɛ̀ suŋ wèe wɛɛ, wèe à byemì ka'. Buu ce m ce gèe à rlii yà Tâ, vi ce dùŋshi njɛ̀ɛ ŋwɛ̀ ce m yu. 26Ka' yi yu wa'a, wèe à byemi enɛ m yu Krǎis ka' njobè' wèe yu ya njèe ka'. 27Ya njèe yi ke yu' yà njèndoŋ, rîŋ. Mɛ̀ rìŋ yi foŋ, yi ce vʉ̀ a mɛ̌ mbùu. 28M ce fa yi ryòŋ ce nfesè, tɛ yi ker kwe à nfè' mò' ka'. Àde' ŋwɛ̀ mò' fʉr yi emba mɛ̌ mmbò ka'. 29Yà Ta ce e fa yi nè mɛ̀, tʉr ŋger a caa buu wɛɛwɛ. Àde' ŋwɛ̀ mò' fʉr njèe ca embà mmbo yà Ta ka'. 30Wèr yà Ta yu ŋwɛ̀ mò'sir.”
31Jus a ka' yu' blàa ca, a kwɛ' blùr tɛ a bo tʉʉshi ye àgho tɛ e kwe. 32Jisòs à laa nè wowèe enɛ̂, “Wèe à yɛ ku' buu bbòŋboŋ ce mɛ̀ gèe à rlii yà Tâ. Efa mʉ̀ buu ca, wèe ce kòŋ à rtʉʉshi mɛ̀ nè blùr ba àtu yì efɛ?” 33Bèe anà a beesì enɛ̂, “Wèr be tʉʉshi wɛ̀ nè blùr njobè' buu bbòŋboŋ ce wɛ̀ gèe ka'. Wèr be tʉʉshi wɛ̀ nè blùr njobè' wɛ̀ bepsi rlii Nyʉ̀. À ku ba ba ŋwɛ̀, a ce làa wɛnɛ à yu Nyʉ̀.” 34Jisòs à laa enɛ̂, “A saŋ mbe ye ŋwà' mncir enɛ Nyʉ̀ à m làa enɛ̂, ‘Wèe yu mnyʉ̀.’ 35Sèe rìŋ seenɛ blǎa Nyʉ̀ vi ke kupse ka'. Banɛ àmbò Nyʉ̀ à m làa enɛ bèe ce e làa blàa ca nè wowèe a yu àmbò ye nà, 36wèe à ka' ce làa weenɛ m ce làa mɛnɛ m yu Nyʉ̀ wa'a a ce bepsi rlii Nyʉ̀ bepsi njokɛ? Yu mɛ̀ ce yà Ta à m ce a tuu njep ŋgòŋ. 37Yi ka' ba enɛ m ce gèe ba mfà' yà Ta ka', wèe fa byemi nè mɛ̀ ka'. 38M ka' ce gèe ba mfà' yà Tâ, wèe à ka' tɛ bà byemi nè mɛ̀ njo' buu ce m ce làa ka', wèe à ba byemi nè mɛ̀ njo' buu ce m ce gèe tɛ wèe bo rìŋ rara enɛ m yu ŋgʉ̀' mò' efa yà Tâ, yà Ta à ba ŋgʉ̀' mò' efa mɛ̀.”
39Wowèe a m ker ce ròo à rkoo ye, e fʉʉ efa wǎp mʉ a dû.
40E m ker kʉti a tuu rdip Jodàn a du fàdì' ce Jǒn à m ce bàptir bèe nà, a cu àfo. 41Bèe magòr a m vʉ̀ a yɛ ye àfo, a kɛ' a ce làa enɛ̂, “Jǒn à m gèe yuu mo' à rdùŋshi enɛ à m tuu ba Nyʉ̀ a tuu ye ka'. Ka' yi yu wa'a, buu ce Jǒn à m làa àmbò ŋwɛ̀ ca vi yu mini.” 42Bèe magòr ce a m ba à dì' anà a m byemi nè Jisòs.
Currently Selected:
Ñwaè' Joân 10: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
