Ñwaè' Joân 9

1Jisòs à ka' ce càa, a yɛ ŋwɛ̀ mò' ce a m bi ye e ku ba nfèp. 2Ŋgǎa yɛ'ni yì buu a m bipshi nè ye enɛ̂, “Rabài, a m bi ŋwɛ̀ ca e ku ba nfèp njo' yì buu bbebep kɛ̀ njo' buu bbebep yì ma ba yì tâ?” 3Jisòs à beesì enɛ̂, “Yi yu ba enɛ ŋwɛ̀ ca kɛ̀ yì ta ba yì ma a m gèe buu bbebep ka'. A m bi ye e ku ba nfèp tɛ bèe a bo yɛ rfà' Nyʉ̀ njep yuu ce a be gèe nè ye. 4Sè'ni ce sèe bii à rraa, sèe ku tʉr à rgèe ba mfà' ce ŋwɛ̀ ce e m tuu mɛ̀ à fa nè sèe enɛ sèe fa'. Tʉ̀' be lò sii, tɛ ŋwɛ̀ ker fà' ka'. 5À nfè' ce m yu njep ŋgòŋ na, m yu rraa nè ŋgòŋ.” 6E ka' làa buu ca wa'a, a ce mce à nshè, a top nshe àgho a yo' nfèp anà àgho nje mmìr, 7a laa nè ye enɛ̂, “Dù su'si mmir njep tʉ̌ Sailòm (ce yi yu enɛ, ‘A tuu’).” Nfèp anà à du a su'si mi mmir njep tʉ̀ anà. A ka' ce kʉti a ce yɛ buu.

8Bèe efa yě là' ker ba bèe ce a m yɛ à nfè' ce e m ce loo buu nà, a laa enɛ̂, “A'a! Àmbò ŋwɛ̀ ca yu ŋwɛ̀ ce e m ce cu ce loo buu nà a?” 9Bèe mo' a laa enɛ̂, “Ɛ̀no, a ye.” Bèe mo' a laa yap enɛ̂, “Ài', e ku feese ye feese.” E laa yi enɛ “A mɛ̀ ŋwɛ̀ anà.” 10Wowèe a bipshì nè ye enɛ̂, “Wɛ̀ gèe wɛ kɛ a ka' ce yɛ buu?” 11E beesì enɛ̂, “Ŋwɛ̀ ce a too enɛ Jisòs nà, à topshi nshe a yo' mɛ̀ nje mmìr, a laa enɛ m du su'si mmir njep tʉ̌ Silòm. Mɛ̀ du a ka' sù'si mmir njo, a kɛ' a ce yɛ buu.” 12Wowèe a bipshì nè yi enɛ̂, “Ŋwɛ̀ anà yû?” E beesì enɛ̂, “M rìŋ fàdì' e yu ka'.”

13Wowèe a lor ŋwɛ̀ ce e m ba nfèp nà, a wowèe a du a yɛ bèe Farìsî. 14Nòŋ ce Jisòs à m topshi nshe a gee nfèp anà à ce yɛ buu nà, à m ba nyʉ̀ mmbomntaa Nyʉ̀. 15Bèe Farìsi foŋ a ker bipshi nè ye enɛ e ba gee ekɛ a ka' ce yɛ buu lɛ. E suŋ wowèe enɛ̂, “Ŋwɛ̀ anà à ba yo' mɛ̀ nshe nje mmìr, mɛ̀ du a su'si mmir, a kɛ' a ce yɛ buu.” 16Bèe mo' efa mʉ̀ bèe Farìsi a laa enɛ̂, “Ŋwɛ̀ ca yu ŋwɛ̀ ce e lò ese Nyʉ̀ ka' njobè' e cu mmbomntaa Nyʉ̀ ka'.” Bèe mo' efa wǎp mʉ a laa yap enɛ̂, “Ŋwɛ̀ ca à ba ba ŋwɛ̌ mbebep, e ba gèe yuu bɛ̀ɛ ca à njɛ̌ɛ kɛ?” Wowèe a kɛ' a ce kwà'shi jɛɛ jɛ̀ɛ jɛɛ.

17Wowèe a ker bipshi nè ŋwɛ̀ anà enɛ̂, “Àmbò ŋwɛ̀ anà à gèe wɛ̀, wɛ̀ ce yɛ buu sè'ni na, wɛ̀ làa yo wɛ kɛ àmbò ye?” E beesì enɛ̂, “Ŋwɛ̀ anà yu ŋwɛ̀ ncep ntuu Nyʉ̀.” 18Jus a m byemi yap yu enɛ ŋwɛ̀ anà à m be fep a ka' lo a ce yɛ buu ka', caar wowèe a kɛ' yì ta ba yì mâ, 19a bipshi nè wowèe enɛ̂, “Ŋwɛ̀ ca yu muu wèe a? Yi yu mini enɛ e m fèp kɛ' embe nfè' a m bi ye a? E gèe ekɛ a ka' ce yɛ buu?” 20Yì ta ba yì ma a beesì a laa enɛ̂, “Wèr rìŋ enɛ e yu muu wèr. Wèr à m bi ye e ku ba nfèp. 21Wèr à rìŋ yer yu àmbò e gèe a ka' ce yɛ buu ka', a riŋ ŋwɛ̀ ce e gèe e ka' ce yɛ buu ka'. Bipshi nè nè ye. E yu nleeŋwɛ̀. E be suŋ wèe nè yi cùu.” 22Yì ta ba yì ma a m làa wa'a njobè' a m ce wɛp Jûs. A m ce wɛp wowèe njobè' wowèe a m byemi war àbee enɛ ŋwɛ̀ à ka' laa enɛ Jisòs yu Krǎis anà, banɛ a be jùu ŋgàŋ embe ndàp rloo. 23A mbùu ce yì ta ba yì ma a m làa enɛ̂, “E yu nleeŋwɛ̀, bipshi nè nè ye.”

24Bèe Farìsi a ker kɛ' ŋwɛ̀ ce e m ba nfèp nà, a laa nè ye enɛ̂, “Làa yuu ce Nyʉ̀ rìŋ enjo. Wèr rìŋ wernɛ ŋwɛ̀ ce e gèe wɛ̀, wɛ̀ ce yɛ buu na yu ŋwɛ̀ ŋgèe buu bbebep.” 25E beesì enɛ̂, “Kɛ̀ e yu ŋwɛ̀ ŋgèe buu bbebep ɛ̀, kɛ̀ e yu ŋwɛ̀ ŋgèe buu bbebep ka' ɛ̀, mɛ̀ rìŋ ya yu ka'. Yuu ce m rìŋ yi ku ba ba enɛ mɛ̀ m fèp, a ce yɛ buu sè'ni.” 26Wowèe a bipshì nè ye enɛ̂, “E ba gee ekɛ nè wɛ̀? E ba gee à njɛ̌ɛ kɛ wɛ̀ ka' ce yɛ buu?” 27E beesì a laa nè wowèe enɛ̂, “Mɛ̀ suŋ wèe wɛɛ, wèe à ce yu' ka'. Wèe ce kòŋ enɛ m ker suŋ wèe njokɛ? Wěe kòŋ à rba ŋgǎa yɛ'ni yì buu foŋ a?” 28E ka' làa wa'a, wowèe a cɛp ye a laa enɛ̂, “A wɛ̀ ŋwɛ̀ ce à yu ŋwɛ̀ yɛ'ni yì buu, wèr yu yer ŋgǎa yɛ'ni buu Musìs. 29Wèr rìŋ enɛ Nyʉ̀ à m suŋ buu nè Musìs. À ka' ba àmbò ŋwɛ̀ ca, wèr rìŋ fàdì' ce e ce vʉ̀ ka'.” 30E beesì enɛ̂, “Cena yu ba yuu bɛ̀ɛ! Ka' wèe rìŋ fàdì' ce ŋwɛ̀ ca ce vʉ̀ ka' wa'a, ŋwɛ̀ ce e gèe mɛ̀ ka' ce yɛ buu à gèe ye. 31Sèe rìŋ enɛ Nyʉ̀ e ke yu' mloo ŋgǎa ŋgèe buu bbebep ka'. E ke yu' ba rloo ŋwɛ̀ nsìp ce e ke wɛp ye, ce gèe yuu ce e kòŋ. 32Kɛ' ese à nfè' ce Nyʉ̀ à m gèe ŋgòŋ, ŋwɛ̀ à m be yu' enɛ ŋwɛ̀ mò' à gèe ŋwɛ̀ ce a m bi ye e ku ba nfèp e ce yɛ buu ka'. 33Ŋwɛ̀ ca à ka' tɛ bà lò ba ese Nyʉ̀ ka', e ba gèe yuu mo' ka'.” 34Wowèe a beesì a laa nè ye enɛ̂, “A m bi wɛ̀ njep mʉ̀ buu bbebep, wɛ̀ ce ròo à ryɛ'ni wèr a?” A ka' làa wa'a, a juu ye embe ndàp rloo.

35Jisòs à m yu' enɛ a jùu ŋwɛ̀ anà embe ndàp rloo. E ka' ròo ye yɛ, a bipshi nè ye enɛ̂, “Wɛ̀ byemi nè Muu Ŋwɛ̀ a?” 36E beesì enɛ̂, “Masà, Muu Ŋwɛ̀ anà yu nda tɛ m bo byemi nè ye?” 37Jisòs à laa nè ye enɛ̂, “Wɛ̀ yɛ ye wɛɛ, ŋwɛ̀ ce e ce làa nè wɛ̀ sè'ni na yu ye.” 38E laa nè Jisòs enɛ̂, “Tatâ, mɛ̀ byemi nè wɛ̀.” E ka' làa wa'a, a gʉ'shi nè ye.

39Jisòs à laa enɛ̂, “Mɛ̀ m vʉ̀ njep ŋgòŋ na tɛ m bo teni mnsa' tɛ bèe ce a ce yɛ buu ka' a bo yɛ buu, tɛ bèe ce a ce yɛ buu nà a bo kʉti mnfèp.” 40Bèe Farìsi mo' ce a m ba àfo a yu' blàa ca, a m bipshi nè ye enɛ̂, “Banɛ wèr à fèp foŋ a?” 41Jisòs à laa nè wowèe enɛ̂, “Wèe à ba ba mnfèp, wèe à ba ba ŋgǎa ŋgèe buu bbebep ka'. Àmbò wèe ce làa enɛ wèe ce yɛ buu, banɛ wèe ku cu ŋgǎa ŋgèe buu bbebep.”

Currently Selected:

Ñwaè' Joân 9: LNT

Highlight

Copy