Ñwaè' Luêk 3
3
1À m ba à nfè' ce Tìbɛrìyàs à m cu mbe kʉʉ, a sa' à bfè' ncòp-ta-à-rrʉ̀ʉ, Nyʉ̀ à laa nè Jǒn muu Sàkàriyà à ntee rìŋ. À m ba à nfè' anà, Pontos Pailɛ̀t à ba govanǒ à ŋgǒŋ Jùdiyà. Hɛròd à ce sa' ŋgǒŋ Galèlê, Felep ce e m ba nfʉr yì, à ce sa' ŋgǒŋ Iturà ba ŋgǒŋ Tàkonitìs, Lesanàs à ce sa' ŋgǒŋ Abilɛ̀n. 2Anàs ba Kaifàs a m ba btu nè ŋgǎa taŋshi taŋshì nè Nyʉ̀. 3Jǒn à m jɛ̀r à bdì' wɛɛwɛ ce vi m ba à ŋgǒŋ fàdì' ce rdip Jodàn li m ba, a ce fè'shi blǎa Nyʉ̀ nè bèe, a ce làa enɛ wowèe a kupse, ma' yàp buu bbebep tɛ a baptir wowèe, tɛ Nyʉ̀ bo fòosi wowèe. 4Yi ku ba àmbò a saŋ mbe ŋwǎ' Àsayà ŋwɛ̀ ncep ntuu Nyʉ̀. A saŋ mbo enɛ̂,
“Ŋwɛ̀ mò' ce fuŋ à ntee rìŋ a ce làa enɛ̂,
‘Kupshi nè nduunjì nè Tatâ, nashi tɛ yi ba kùyɛɛ.
5A be ruusi mntòŋ wɛɛwɛ,
kɛ̀ɛshi mtùu wɛɛwɛ tɛ mi kʉti mmbo'.
A be nàshi mnduunjì ce vi gooŋger tɛ vi ba kùyɛɛ,
kupshi vì ce vi yu kotè-kotè tɛ vi ba nfɛ̌ŋ.
6Tɛ bèe wɛɛwɛ a bo yɛ rlùŋ Nyʉ̀.’ ”
7Bèe a m vʉ̀ à bkʉr à bkʉr a yɛ Jǒn enɛ e baptir wowèe. Jǒn à laa nè wowèe enɛ̂, “Boo bfî, ŋwɛ̀ ce e bɛɛ wèe enɛ wèe caŋ sòrti efa rshentee ce Nyʉ̀ be ko'si nè bèe nà, à bɛɛ nda? 8Gèe là nè buu ce vi be ce dùŋshi enɛ wèe à kupse, a ma' yè buu bbebep. Wèe fa ce làa fa wěe mʉ enɛ̂, ‘Abràham yu yèr tâ’ ka'. M ce suŋ wèe enɛ àde' Nyʉ̀ ku lor blùr ca beesi à boo Abràhâm. 9A lɛ̀ njàa njep mbùu ce wɛɛ. Ce ce yi ka' tɛ yʉ bòŋboŋ ka', banɛ a be gwàr, mà' njep mor.”
10Ku' bèe anà a bipshì nè ye enɛ̂, “Yi ka' ba wa'a, banɛ wèr be gèe wer kɛ?” 11Jǒn à beesì enɛ̂, “Ŋwɛ̀ ce e ka' tʉr bcɛ̌' bbaa, e fa mo' nè ŋwɛ̀ ce e tʉr ka'. Ŋwɛ̀ ce e ka' tʉr byee, e ku gee wa' foŋ.” 12Ŋgǎa ŋkùu mbǎa bàrà' a m vʉ̀ foŋ enɛ e baptir wowèe, a bipshi nè ye enɛ̂, “Ŋwɛ̀ ryɛ'nì, wèr be gèe wer kɛ?” 13E laa nè wowèe enɛ̂, “Wèe ka' ce kùu mbǎa bàrà', wèe fa koo càa embe dì' ce ncir yi làa ka'.” 14Bsoogɛ̀ foŋ a bipshì nè ye enɛ̂, “Yuu ce àde' wèr gee foŋ yu kɛ?” E laa nè wowèe enɛ̂, “Wèe fa koo mbàa ese ŋwɛ̀ mò' à ŋger ka', kɛ̀ nya' mnde' mbe tu ŋwɛ̀ mò' ka'. Wèe fa cɛ̀ŋ mbàa ce a ce là' wèe àgho ka'.”
15Bèe a m cu a ce kè', a ce tarni enɛ Jǒn yu Krǎis anà lɛ. 16Jǒn à laa nè wowèe wɛɛwɛ enɛ̂, “M ce bàptir wèe nè mdip, geewa'a, ŋwɛ̀ mò' ce yi ŋger yi càa ya ce vʉ̀. Mɛ̀ ghɛɛte à ŋwɛ̀ ce àde' m ba'shì vi bkʉ̀ laba' ka'. E be bàptir yi wèe nè Yʉ' Rara ba mor. 17Yì gʉ̀ yu mba yě bò, ce e be fyɛpshi msaŋ àgho, baashi msaŋ lɛ̀ njep koo. À ka' ba yi àmbò bbʉ̀shì efa gho, e be baashi tòo njep mor ce àde' yi liitì ka'.”
18Jǒn à fa ncep nè bèe à mnduunjì jɛɛ jɛ̀ɛ jɛɛ wa'a, a ce fè'shi ba Nsuŋ Mbòŋmboŋ nè wowèe. 19E m lapni ŋkʉʉ Hɛròd njobè' e m fʉr Hɛ̀rodìyà ce e m ba ŋgwa nfʉr yǐ muu ma nà, ker ba njobè' ku' buu bbebep mo' ce e m gèe. 20E m ker gee yuu mo' ce yi m bep a caa ŋger. E m koo Jǒn a fa à shaŋ.
21Jǒn à ka' bàptir bèe wɛɛwɛ, a baptir Jisòs foŋ. Jisòs à ka' ce gèe rloo, rbuu li mʉ'tì. 22Yʉ' Rara yi suu mbe yě ndù, a ba àmbò bèŋ. Njèndoŋ à laa embe bùu enɛ̂, “À yu muu wà ce m kòŋ sê. M ce yu' rbòŋ nè wɛ̀ sê.”
23Jisòs à m ce kɛ̀' li rfà', a ba àmbò bfè' mntaar. Bèe a m ce kwà'shi enɛ a ye muu Josɛ̀f ce e m ba muu Hɛlì.
24Hɛlì à m ba muu Matàr,
Matàr à ba muu Lɛvì,
Lɛvì à ba muu Mɛlɛkì,
Mɛlɛkì à ba muu Jɛ̀nayì,
Jɛ̀nayì à ba muu Josɛ̀f,
25Josɛ̀f à ba muu Màtàtiyàr,
Màtàtiyàr à ba muu Ɛmòs,
Ɛmòs à ba muu Nahùm,
Nahùm à ba muu Ɛsilè,
Ɛsilè à ba muu Nàgayì,
26Nàgayì à ba muu Mâr,
Mar à ba muu Màtàtiyàr,
Màtàtiyàr à ba muu Sɛmɛ̀n,
Sɛmɛ̀n à ba muu Josɛ̀f,
Josɛ̀f à ba muu Jodà,
27Jodà à ba muu Joanàm,
Joanàm à ba muu Rɛsà,
Rɛsà à ba muu Sɛ̀robabɛ̀r,
Sɛ̀robabɛ̀r à ba muu Shɛlatɛ̀r,
Shɛlatɛ̀r à ba muu Nɛrì,
28Nɛrì à ba muu Mɛlɛkì,
Mɛlɛkì à ba muu Adì,
Adì à ba muu Kosàm,
Kosàm à ba muu Ɛ̀limadàm,
Ɛ̀limadàm à ba muu Ɛ̂r,
29Ɛr à ba muu Joshùwà,
Joshùwà à ba muu Ɛ̀lisà,
Ɛ̀lisà à ba muu Joràm,
Joràm à ba muu Matàr,
Matàr à ba muu Lɛvì,
30Lɛvì à ba muu Simìyòn,
Simìyòn à ba muu Judà,
Judà à ba muu Josɛ̀f,
Josɛ̀f à ba muu Jonàm,
Jonàm à ba muu Ɛ̀liyakìm,
31Ɛ̀liyakìm à ba muu Mɛlìyà,
Mɛlìyà à ba muu Mɛnà,
Mɛnà à ba muu Màtatà,
Màtatà à ba muu Natàn,
Natàn à ba muu Dɛvìd,
32Dɛvìd à ba muu Jɛɛsì,
Jɛɛsì à ba muu Obɛ̀d,
Obɛ̀d à ba muu Buwàs,
Buwàs à ba muu Salmòn,
Salmòn à ba muu Nashòn,
33Nashòn à ba muu Àminadàp,
Àminadàp à ba muu Àdimìn,
Àdimìn à ba muu Arnì,
Arnì à ba muu Hɛsròn,
Hɛsròn à ba muu Pɛrɛ̀s,
Pɛrɛ̀s à ba muu Judà,
34Judà à ba muu Jakòp,
Jakòp à ba muu Aisìk,
Aisìk à ba muu Abràhâm,
Abràham à ba muu Tɛrà,
Tɛrà à ba muu Nahòr,
35Nahòr à ba muu Sɛrùk,
Sɛrùk à ba muu Rugà,
Rugà à ba muu Pɛlɛ̀k,
Pɛlɛ̀k à ba muu Ɛbɛ̀r,
Ɛbɛ̀èr à ba muu Shɛlà,
36Shɛlà à ba muu Kàyinàn,
Kàyinàn à ba muu Àfasàr,
Àfasàr à ba muu Shɛ̂m,
Shɛm à ba muu Nowà,
Nowà à ba muu Lamɛ̀k,
37Lamɛ̀k à ba muu Mɛ̀tusɛlà,
Mɛ̀tusɛlà à ba muu Ɛnòk,
Ɛnòk à ba muu Jɛrɛ̀r,
Jɛrɛ̀r à ba muu Màhàlɛlɛ̀r,
Màhàlɛlɛ̀r à ba muu Kàyinàn,
38Kàyinàn à ba muu Ɛnòs,
Ɛnòs à ba muu Sɛ̂r,
Sɛr à ba muu Adàm ce e m ba muu Nyʉ̀.
Currently Selected:
Ñwaè' Luêk 3: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
