Ñwaè' Luêk 4

1Jisòs à m ruu nè Yʉ' Rara. E m kʉti efa rdip Jodàn, Yʉ' Rara anà yi lor ye a du àgho à ntee rìŋ, 2e cu àfo à mnòŋ mkyèe, Satàn à ce mòoshi ye. E m ye yuu ka' à mnòŋ anà. Mnòŋ anà vi ka' mì, njè à yaŋ ye sê. 3Satàn à laa nè ye enɛ̂, “Wɛ̀ ka' ba muu Nyʉ̀, à laa ka tɛ blùr ca vi beeŋger à brɛ̂d.” 4Jisòs à beesì nè ye enɛ̂, “A saŋ mbe Ŋwǎ' Nyʉ̀ enɛ̂, ‘Ŋwɛ̀ e ke cu ntèe ba njo' brɛ̌d cà'cà' ka'.’ ” 5Satàn à lor ye a du àgho mbe tu rtùu, a duŋshi ye bto' wɛɛwɛ enjep ŋgòŋ na njà' mò'sir, 6a laa nè ye enɛ̂, “M be fa wɛ̀ ŋger ba bkù' ce à bto' enjep ŋgòŋ na wɛɛwɛ. A m fa buu ca wɛɛwɛ nè mɛ̀, àde' m fa nè ŋwɛ̀ ce mɛ̀ kòŋ. 7Banɛ wɛ̀ ka' gʉ'shi nè mɛ̀, buu ca wɛɛwɛ ba wo.” 8Jisòs à beesì enɛ̂, “A saŋ mbe Ŋwǎ' Nyʉ̀ enɛ̂, ‘Gʉ'shi nè Tata ce e yu yò Nyʉ̀, fa' ba nè ye cà'cà'.’ ” 9Satàn à ker lor ye a du àgho à rla' Jɛ̀rusalɛ̀m, a du nè ye mbe tu Ndap Nyʉ̀ ce yi sàp mbekì sê, a laa nè ye enɛ̂, “Wɛ̀ ka' ba Muu Nyʉ̀, à nyɛɛ ka embe na cɛɛ njep nshè, 10njobè' a saŋ mbe Ŋwǎ' Nyʉ̀ enɛ̂, ‘Nyʉ̀ be làa tɛ vi bcìndap a ke'ni wɛ̀.’ 11A ker saŋ foŋ enɛ̂, ‘Wowèe a be yà wɛ̀ mbe mmbò fà dì' à tʉʉ yo kùu à lùr ka'.’ ” 12Jisòs à beesì nè ye enɛ̂, “Ŋwǎ' Nyʉ̀ yi làa enɛ̂, ‘Fa mòoshi Tata ce e yu yò Nyʉ̀ ka'.’ ” 13Satàn à ka' mòoshi ye à mnduunjì jɛɛ jɛ̀ɛ jɛɛ mìsi, a ma'shi ye a dû, enɛ nfè' mò' e ghɛɛ, tɛ e ka' kèr kʉti.

14Jisòs à kʉtì à ŋgǒŋ Galèle nè ŋger Yʉ' Rara. Nsuŋ àmbò ye à dù à bdì' wɛɛwɛ à ŋgòŋ anà. 15E m yɛ'ni bèe a wǎp mndap mloo. Bèe wɛɛwɛ a yu' rbòŋ sê, a ku'si ye.

16E m dù foŋ à rla' Nasarɛ̀t fàdì' ce e m kù'. À ka' ba nyʉ̀ mmbomntaa Nyʉ̀, e du mbe ndàp rloo àmbò e m ce dù à nfè' wɛɛwɛ nà. A ka' bà' mbo, a nati mbekì à rbè' embe Ŋwǎ' Nyʉ̀. 17A m fa ye ŋwà' ce Àsayà ŋwɛ̀ ncep ntuu Nyʉ̀ à m saŋ. E mʉ̀' ŋwà' anà a fyɛ' mbe dì' ce a m saŋ enɛ̂,

18“Yʉ' Tata yi yu wèr ye,

njobè' Nyʉ̀ à ce mɛ̀ enɛ m fe'shi nsuŋ mbòŋmboŋ nè ŋgǎa fùp.

E tuu mɛ̀ enɛ m du suŋ bèe ce a yu mbe shaŋ enɛ nfè' à ghɛɛ ce a be fʉr wowèe efa shaŋ,

tɛ bèe ce a fèp a yɛ buu,

tɛ bèe ce bèe a ce jar nè wowèe a luŋ efa ŋgɛ',

19ker suŋ àmbò nfè' ce Tata Nyʉ̀ be ghòni yì bèe.”

20Jisòs à ka' yɛ mbe dì' ana, bè', a cetè ŋwà', a kʉsi nè ŋwɛ̀ ce e ba koo ese ye, a cu à nshè. Bèe embe ndàp rloo wɛɛwɛ a m ku ce fyɛ' ba ye. 21E kɛ' a ce làa nè wowèe enɛ̂, “Àmbò mɛ̀ bè' nlǎa Nyʉ̀ ca nè wèe ntìni, wèe à yu' na, yi ku ghɛɛte njo.” 22Wowèe wɛɛwɛ a yu' rbòŋ nè ye, a bɛɛŋger se à nlǎa bòŋboŋ ce e m làa anà. Wowèe a m làa enɛ̂, “Àmbò a ye muu Josɛ̀f a?” 23E laa nè wowèe enɛ̂, “M rìŋ mɛnɛ wèe be mà' ŋgàa ca nè mɛ̀, ‘Ŋwɛ̀ mcɛ̀p bɛ̀ɛ mo mcɛ̀p lûŋ. Gèe là njɛ̀ɛ buu ce wèr à m yu' enɛ wɛ̀ m gèe à rla' Kàpanùm nà fa wɛ̌ là' na foŋ.’ ” 24E m ker laa enɛ̂, “M ce suŋ wèe nè mini-ŋwɛ̀ enɛ àde' a yu'nì nè ŋwɛ̀ ncep ntuu Nyʉ̀ fa yě là' ka'. 25Wèe rìŋ weenɛ byepkʉʉ a m ba à to' Isrɛ̀l à nfè' yì Àlajà sê, mbe nfè' ce mbèŋ à m gwè ka' à bfě' btaar ba nto', njè à koo à bdì' wɛɛwɛ à ŋgǒŋ Isrɛ̀l à nfè' anà nà. 26Geewa'a, Nyʉ̀ à m tuusi ye nè mò' efa wowèe ka'. E m tuusi ye ba nè ŋgwaŋkʉŋwɛ̀ mò' ce e m ba à rla' Sɛrɛfàr à ŋgǒŋ Sidòn. 27Yi yu foŋ enɛ ku' ŋgǎa msàasì a m ba à to' Isrɛ̀l à nfè' yì Ɛ̀leshà ŋwɛ̀ ncep ntuu Nyʉ̀. Geewa'a, Nyʉ̀ à m gèe mò' efa wowèe à ke'sè ka'. Ŋwɛ̀ ce Nyʉ̀ à m gèe e ke'sè à m ku ba Namàn ce à m ba ŋwɛ̌ à to' Sirìyà.”

28Bèe wɛɛwɛ embe ndàp rloo a ka' yu' wa'a, nyor à bep wowèe sê. 29Wowèe a natì mbekì, a fʉr yě à rla' a ko' àgho mbe tu rtùu ce a m bà'ri lap rla' mbo nà, tɛ a bo mà' ye njep rbar. 30E tosè yi yu à btar bèe a dû.

31E m ker du à rla' Kàpanùm à ŋgǒŋ Galèlê, a yɛ'ni bèe nyʉ̀ mmbomntaa Nyʉ̀. 32Wowèe a bɛɛŋgèr se à ryu' buu ce e m ce yɛ'ni, njobè' vi blàa vi m ba nè ŋger-ŋwɛ̀ sê. 33Ŋwɛ̀ mò' à m ba mbe ndàp rloo anà ce yʉ' nyʉ̀rkà' yi m ba njep ye. Ŋwɛ̀ anà à m waa tatap sê, a laa enɛ̂, 34“Habai, Jisǒs à rla' Nasarɛ̀t, yuu ce à ce ròo ese wèr yu ba kɛ? Wɛ̀ vʉ̀ à ryʉshi wèr a? M rìŋ njɛ̀ɛ ŋwɛ̀ ce à yu, à yu ŋwɛ̌ nrara ce e lò ese Nyʉ̀.” 35Jisòs à waa yʉ' anà enɛ̂, “Cu nyaŋ, fʉʉ enjep ye.” Yi nyɛr ŋgàŋ a ma' à nshè a wǎp bsii, a fʉʉ enjep ye, a ke' bɛɛsi ye ka'. 36Wowèe a bɛɛŋgèr sê, a laa a wǎp mʉ enɛ̂, “Blàa ŋwɛ̀ ca vi yu ba à njɛ̌ɛ kɛ? E ce làa nè byʉ' bebep nè ŋger-ŋwɛ̀, vi ce fʉʉse enjep bèe.” 37Nsuŋ àmbò Jisòs à m dù à bdì' wɛɛwɛ à ŋgòŋ anà.

38Jisòs à m fʉʉ embe ndàp rloo a du mbe ndàp mbe Saimʉ̀n. Tu yi ce luu malu yì Saimʉ̀n sê, wowèe a laa nè Jisòs enɛ e ja' ye. 39E dû, a tɛɛ mbendù njeŋwɛ̀ anà a lâa, mbɛp anà à bornì. Nfè' à ke' tuuse ka', njeŋwɛ̀ anà natì mbekì a fɛr byee a fa nè wowèe. 40Nyʉ̀ à ka' ce coo, bèe wɛɛwɛ ce yàp bèe à m ce yaŋ byaŋ njɛ̀ɛ jɛɛ jɛ̀ɛ jɛɛ a vʉsè nè ŋgǎa byaŋ anà, e lɛ mi mmbo mbe wǎp ndù, a gee wowèe a ke'sè. 41Byʉ' mnyʉ̌mkà' vi m fʉse enjep bèe magòr, a ce waani sê, a ce làa enɛ̂, “A wɛ̀ Muu Nyʉ̀.” Jisòs à waa byʉ' ca, a ke' fa vi njì enɛ vi laa yuu ka' njobè' vi m rìŋ enɛ e yu Krǎis anà.

42Tʉ̀' à ka' raa, Jisòs à fʉʉ efa rla' anà a du à dì' ce e be kù ba mimŋgi'. Bèe a kɛ' a ce ròo ye, a ka' yɛ ye, a koŋ enɛ e ku cu a wowèe. 43Geewa'a, e laa nè wowèe enɛ̂, “M be kù fè'shi Nsuŋ Mbòŋmboŋ àmbò kʉʉ Nyʉ̀ à mla' mo' foŋ njobè' a yuu ce Nyʉ̀ à tuu mɛ̀ enɛ m vʉ gêe.” 44E m dù a ce fè'shi Nsuŋ Mbòŋmboŋ ca à mndap mloo wɛɛwɛ ce vi m ba à ŋgǒŋ Jùdiyà.

Currently Selected:

Ñwaè' Luêk 4: LNT

Highlight

Copy