Ann Bokwakwarin 23
23
Sarah Irabob Ato Abraham Budi Efan Itobon
1Sarah ima inai an kwanda 127 ibo. 2On Hebron nan irabob Canaan tafanam amonai ato Abraham on Sarah aurin iyababan ato irous ibotouousai.
3On efan menan awan rabobin i yen on ikirir ato inai Hitt yangan auris; ato iyawures iyau, 4“Yau on nanawan orot nin amomui amama; motob turin auriu wonkutetai antobon on nan yau awau angarobai.”
5Osi siyafotai siyau, 6“Wai kavian, om wei wai dura untatami. Wei waitem om on bainetewar orot faiwarim bag, on mes om garob an efan obin wat erubin ato nan awam egarobai. Wei engon wabiyasisir garob efan wanitem, on nan awam ungarob.”
7Namon Abraham auris uson itur 8ato iyawures iyau, “Omi wonbibasiteu awau nin angagarob on, abifefeyanim Zohar natun Ephron on wotawur weineu. 9Yau abifefeyanai fofonin on an Mechpelah agim dogu ato motob matanai yen on yau ititeu. Yau abifefeyanai on an baiyan tutufin initeu ato omi matamui ani baiyan ato on garob efan min innat yau ininoaniu.”
10Ephron toun on an sabu Hitt yangan mat on mafam gagamin an furi awan sesebinai simair simama, on nan emon ibiyafot on osi sabu engon sitatam. 11Ephron iyau, “Au kavian, om au dura etatam. Om atonio agim dogu on men untobon mes. Yau au agim dogu a motob tutufin mat engon on asir anitem mom. Yau au sabu matasi au motob asir abitem mom ato on nan awam ungarob.”
12Namon Abraham Hitt yangan nasi uson itur, 13ato osi tainan tainan sitatam Abraham Ephron aurin iyau, “Yau abifefeyanim tainam ereben untatamiu, yau motob an baiyan tutufin anibaiyanim on unboai ato yau awau nan angarob.”
14Ephron Abraham iyafotai iyau, 15“Yau au kavian, motob an baiyan an fofon on agim silver 400 ato baise ot men ato baiyan an fofon aurin taniyamai rut basuti ma inkomas. Om motob asir ebo mom ato awam nan egarob.” 16Ephron motob an baiyan ibaton ato Abraham ibasit, on mes Hitt yangan matasi baitotobonotis sefofour ba on agim silver iyab inai ifofonin ato Ephron itai.
17On mes Ephron an motob Mechpelah amonai Mamre nan au wera matan na, on motob agim dogu mat a wengar engon on amonai on Abraham inoanai. 18Hitt yangan ato mafam gagamin an furi awan sesebinai sikuayo sibidudur on engon sisagob Abraham noan.
19Namon Abraham awan Sarah on on agim dogu amonai igarob Canaan tafanamai nan. 20On mes motob a agim dogu ato Hitt yangan ibinoanis on inat Abraham an rasi dogu mes imatar.
Currently Selected:
Ann Bokwakwarin 23: ubr
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
