Tongo nda ti aye 40

1Na peko ti aye so, ambeni kota zo ti kua ti gbia ti Ezipte asara ye ti songo be na gbia ni. Azo ni ayeke makonzi ti azo ti mungo samba na gbia na makonzi ti azo ti zongo mapa ti gbia. 2Faraon, gbia ti Ezipte asara ngonzo na tere ti azo use so; makonzi ti azo ti mungo samba na gbia na makonzi ti azo ti zongo mapa ti gbia; 3lo mu yanga titene a bi ala na da ti kanga, na da ti kanga ti makonzi ti aturugu so ayeke bata lo, ndo so a kanga Joseph daa. 4Makonzi ti aturugu ni azia ala na maboko ti Joseph titene lo baa lege ti ala. Ala ngba na da ti kanga ni ndali ti mbeni ngoi.

Joseph afa nda ti abango-li ti azo ti kanga use

5Na mbeni bi, makonzi ti azo ti mungo samba na gbia ti Ezipte, na makonzi ti azo ti zongo mapa ti lo, ala use kue abaa li ti ala na da ti kanga. Zo oko oko abaa li ti lo si nda ti bango-li ti zo oko oko ayeke nde na ti mba ti lo. 6Na ndaperere, Joseph ague na tere ti ala si lo baa so tere ti ala anzere oko pepe. 7Lo hunda ala, lo tene: “Tongana nyen si ala kanga ndö ti le ti ala kangango laso so?” 8 Ala kiri tënë na lo: “E baa li ti e, me zo oko ti fa na e nda ti bango-li ni ayeke daa pepe.” Joseph atene na ala: “Nzapa laa ayeke fa nda ti ye kue na azo pepe? Mbi gbu gere ti ala; ala fa na mbi peko ti bango-li ti ala ni.”

9Makonzi ti azo ti mungo samba na gbia afa peko ti bango-li ti lo ni na Joseph, atene: “Na ya ti bango-li ti mbi ni, mbi baa mbeni keke ti *vinye so ayeke na dawa ti mbi. 10Amaboko ti keke ni ayeke ota. Akugbe ni asigigi, akongo ni asigigi si agba ti le ni abe. 11Kopo ti gbia Faraon ayeke na maboko ti mbi. Mbi mu agba ti le ti vinye ni, mbi pete ngu ni na ya ti kopo ti Faraon si mbi mu na lo.” 12 Joseph atene na lo: “Nda ti bango-li ti mo ni ayeke tongaso: amaboko ti keke ota so ayeke lango ota. 13Angba lango ota, Faraon ayeke kiri ti zia mo na kota ndo. Fade mo yeke zia kopo ti Faraon na maboko ti lo tongana ti so mo yeke sara kozoni, na ndembe so mo ngba makonzi ti azo ti mungo samba na lo so. 14Me tongana mo baa nzoni kâ, mo dabe ti mo na mbi. Mbi gbu gere ti mo, sara nzoni be na mbi. Mo tene tënë ti mbi na mê ti Faraon si mo zi mbi na da ti kanga so. 15Biani, a gbu mbi na ngangu na kodro ti ahebro si a ga na mbi ge. So mbi yeke ge so, mbi sara nga mbeni ye oko pepe si a bi mbi na da ti kanga so.”

16So makonzi ti azo ti zongo mapa ti gbia abaa so Joseph afa nda ti bango-li ni nzoni, lo tene na Joseph, lo tene: “Mbi nga, mbi baa li ti mbi, mbi baa sakpa ota ti apendere mapa ayeke na li ti mbi. 17Sakpa so ayeke na ndö ti ambeni so, amara ti mapa nde nde so Faraon ayeke te ni ayeke daa. Me andeke aga si ala yeke te amapa ni na ya ti sakpa ni na li ti mbi.” 18Joseph akiri tënë, atene: “Nda ti bango-li ti mo ni ayeke tongaso: sakpa ota so ayeke lango ota. 19Angba lango ota, fade Faraon ayeke kiri ti zia mo na kota ndo ahon ti so be ti mo aye fade. A yeke kanga go ti mo na tere ti keke na nduzu si andeke ayeke ga ti te kasa ti tere ti mo.”

20Na lango ota ni, Faraon asara matanga ti lango ti dungo lo; lo tisa azo ti kua ti lo kue. Na popo ti ala, lo mu makonzi ti azo ti mungo samba na lo, na makonzi ti azo ti zongo mapa ti lo, lo zia ala na kota ndo. 21Lo kiri na makonzi ti azo ti mungo samba na lo na kua ti lo si lo yeke mu samba na gbia. 22 Ti makonzi ti azo ti zongo mapa, lo kanga go ti lo na tere ti keke na nduzu, gi tongana ti so Joseph afa so. 23Me makonzi ti azo ti mungo samba na gbia adabe ti lo na Joseph pepe; lo girisa lo biani.

Currently Selected:

Tongo nda ti aye 40: MNF2010

Highlight

Copy