Tongo nda ti aye 41

Abango-li ti gbia Faraon

1Na peko ti ngu use, gbia Faraon abaa li ti lo. Lo yeke luti na yanga ti *bale ti Nil. 2Lo baa apendere mama ti bagara mbarambara so akono nzoni, ala londo na ya ti ngu ni, ala sigigi si ala yeke te pere ti yanga ti ngu ni. 3Na pekoni, ambeni mama ti bagara mbarambara so ayeke sioni sioni si ala nge ngengo, asigigi na ya ti ngu ni. Ala ga aluti na tere ti akozo mama ti bagara ni, na yanga ti bale ni. 4Amama ti bagara so ayeke sioni sioni si ala nge ngengo so ate ala so ayeke pendere si ala kono nzoni so kue. Tongaso Faraon azingo na lango.

5Faraon akiri alango si lo kiri lo baa li ti lo ti fani use ni. Lo baa ali ti *ble mbarambara so akono si ayeke pendere ayeke sigigi gi na ndö ti gere ni oko. 6Na pekoni, lo baa ambeni li ti ble mbarambara so ange ngengo asigigi; pupu ti wâ ti To azö ni si ahole kue. 7Ali ti ble so ange ngengo so amene ali ti ble so akono si ayeke pendere so kue. Na pekoni, Faraon azingo na lango si lo baa lo tene, andaa bango-li fade laa!

8 So ndo ahan awe, be ti Faraon agi lo mingi. Tongaso lo tokua titene a iri azo ti nganga kue ti Ezipte nga na azo ti ndara. Lo fa peko ti abango-li ti lo ni na ala, me zo oko ti fango na lo nda ni ayeke daa pepe. 9Tongaso makonzi ti azo ti mungo samba na Faraon atene na lo: “Gbia, laso be ti mbi ati na ndö ti sioni so mbi sara lani. 10Lani gbia asara ngonzo na tere ti azo ti kua ti lo, lo mu mbi na makonzi ti azo ti zongo mapa ti lo, lo bi e use kue na da ti kanga ti makonzi ti aturugu so ayeke bata gbia. 11Na ya ti bi oko, e use kue, e baa li ti e. Nda ti bango-li oko oko ayeke nde nde. 12Mbeni maseka-koli so mara ti lo ayeke hebro si lo yeke sara kua na gbe ti makonzi ti aturugu ni, ayeke lani na tere ti e. E fa na lo peko ti abango-li ti e si lo fa na zo oko oko nda ti bango-li ti lo. 13Tongaso aye ni kue asi alingbi gi na nda ti abango-li ti e so lo fa na e so. Ti mbi, a kiri na mbi na kua ti mbi si ti mba ti mbi ni, a kanga go ti lo na tere ti keke na nduzu.”

Joseph afa nda ti abango-li ti gbia Faraon

14Gbia Faraon atokua titene a iri Joseph. Azo ague hio asigigi na lo na da ti kanga ni. A kio kua ti yanga ti lo; lo yu mbeni bongo nde si lo gue na dawa ti gbia. 15Faraon atene na Joseph: “Mbi baa li ti mbi, me zo oko ti fa na mbi nda ti bango-li ni ayeke daa pepe. Mbi ma tënë ti mo. Azo atene na mbi atene, mo lingbi ti fa nda ti bango-li na zo so atene bango-li ti lo na mo senge.” 16Joseph akiri tënë na Faraon, atene: “Ayeke mbi pepe. Me Nzapa laa ayeke kiri ande tënë na gbia Faraon titene lo duti na siriri.” 17Tongaso Faraon atene na Joseph: “Na ya ti bango-li ti mbi ni, mbi baa so mbi yeke luti na yanga ti *bale ti Nil. 18Mbi baa apendere mama ti bagara mbarambara so akono nzoni, ala londo na ya ti ngu ni, asigigi si ala yeke te pere ti yanga ti ngu ni. 19Na pekoni, mbi baa ambeni mama ti bagara mbarambara so ayeke sioni sioni, ala nge ngengo si abio ti kate ti ala kue gi na gigi. Mbi de ti baa mara ti asioni mama ti bagara tongaso na sese ti Ezipte pepe. 20Amama ti bagara so ayeke sioni sioni si ala nge ngengo so ate akozo mama ti bagara so ayeke pendere si ala kono nzoni so kue. 21Na peko ti so angengo bagara ni ate akonongo ni so kue, zo ahinga atene ala te ala pepe. Ala ngba lakue na ngengo ni tongana ti kozoni. Na pekoni, mbi zingo na lango. 22Mbi kiri mbi baa li ti mbi. Mbi baa ali ti *ble mbarambara so ale ni akono si ayeke pendere, asigigi na ndö ti gere ni oko. 23Na pekoni, mbi baa ali ti ble so ale ni akpengba kpengbango, ange ngengo asigigi. Pupu ti wâ ti To azö ni si ahole kue. 24Angengo ali ti ble ni ate akonongo ni kue. Mbi fa peko ti abango-li ni na azo ti nganga, me zo oko na popo ti ala ti fa nda ni na mbi ayeke daa pepe.”

25Joseph atene na Faraon: “Abango-li ti Faraon so kue ayeke gi na ndö ti ye oko: Nzapa afa na Faraon ye so lo ye ti sara. 26Anzoni mama ti bagara mbarambara so ayeke ngu mbarambara. Anzoni li ti ble mbarambara so ayeke nga ngu mbarambara. Bango-li ti gbia ayeke gi oko. 27Asioni sioni mama ti bagara mbarambara so ange ngengo si ala ga na peko ti akozo ni so, ayeke ngu mbarambara. Ali ti ble so ya ni ayeke senge si pupu ti wâ ti To azö ni si ahole kue so, ayeke ngu mbarambara ti kota nzara. 28Tënë so mbi yeke fade na ni ti tene na gbia Faraon laa: ye so Nzapa aye ti sara si lo fa ni na gbia so. 29Baa, ngu mbarambara ayeke ga so fade akobe ayeke gbani gbani na sese ti Ezipte kue. 30Me na pekoni, ngu mbarambara ti kota nzara ayeke ga. Na sese ti Ezipte kue, azo ayeke girisa tënë ti akozo ngu mbarambara so akobe ayeke daa gbani gbani so. Fade kota nzara ni ayeke bi kodro ni kue na sese biani biani. 31Ndali ti kota nzara so ayeke ga na pekoni, fade azo ayeke hinga tënë ti akobe so ayeke gbani gbani so pepe. Kota nzara ni ayeke hon ndoni. 32Tongana Nzapa asara si gbia Faraon abaa li ti lo fani use, ayeke mbeni ye so Nzapa aleke ni awe. Lo yeke sara titene ye ni asi fafadeso. 33Ti fadeso, ayeke nzoni gbia Faraon agi ti wara mbeni zo so ahinga ndo, zo ti ndara, lo zia lo na ndö ti kodro ti Ezipte kue. 34Ayeke nzoni gbia Faraon amu amakonzi, lo zia ala na ya ti kodro ni kue titene akobe so kue azo ayeke wara na Ezipte na ya ti ngu mbarambara so akobe ayeke gbani gbani so, ala kangbi ya ni oku, ala mu mbeni mbage ni oko abata. 35Na ya ti angu ti nzoni so ayeke ga, ala yeke bongbi akobe so ala yeke wara. Ala yeke gi ambeni ndo na ya ti agbata ti kodro ni titene ala bata *ble daa na gbe ti gbia Faraon. 36Fade ala yeke bata akobe ni so ti ku na ngu mbarambara ti kota nzara so ayeke ga na kodro ti Ezipte. Tongaso si nzara afâ azo kue na ya ti kodro ni pepe.”

Joseph aga kota zo na gbe ti gbia Faraon

37Tënë so anzere na be ti Faraon nga na azo ti kua ti lo kue. 38Faraon ahunda ala, atene: “E lingbi ti wara mbeni zo so yingo ti Nzapa ayeke na ya ti lo tongana koli so?” 39Na pekoni, Faraon atene na Joseph: “So Nzapa afa na mo aye so kue so, mbeni zo so ahinga ndo si lo yeke zo ti ndara tongana mo ayeke daa pepe. 40 Mo laa mo yeke duti na ndö ti kodro ti mbi kue. Azo ti kodro ti mbi kue ayeke ma yanga ti mo; gi mbata ti gbia ti mbi oko laa ayeke fa atene, mbi yeke kota mbi hon mo. 41Fadeso mbi zia mo ti sara komandema na ndö ti kodro ti Ezipte kue.” 42 Faraon azi bage so ayeke na maboko ti lo, lo yoro ni na maboko ti Joseph. Lo yu na Joseph mbeni pendere bongo so a sara ni na *len si lo zia na go ti lo ye ti go so a sara ni na lôro. 43Lo zia Joseph aduti na ya ti use pusu ti mbarata ti lo si na hongo ti lo, azo ayeke dekongo na dawa ti lo, atene: “Ala zia lege!” Lege so Faraon azia Joseph ti sara komandema na ndö ti kodro ti Ezipte kue laa.

44Faraon atene na Joseph: “Mbi laa mbi yeke Faraon! Tongana mo mu yanga pepe, zo oko alingbi ti sara mbeni ye na ya ti kodro ti Ezipte kue pepe.” 45Faraon amu na Joseph mbeni iri ti azo ti Ezipte, Safnat-Panea. Lo mu na lo Asenat, molenge ti Potifera ti wali titene lo ga wali ti lo. Potifera ayeke wayango-sandaga ti gbata ti One. Tongaso Joseph alondo ague ti baa ya ti kodro ti Ezipte ni. 46Joseph ayeke na ngu baleota na ndembe so lo si na tere ti Faraon, gbia ti Ezipte.

Na pekoni, lo sigigi lo tambula na ya ti kodro ti Ezipte kue. 47Na ya ti ngu mbarambara so kobe ayeke gbani gbani so, sese adu kobe ahon ndoni. 48Joseph abongbi akobe na ya ti ngu mbarambara so na sese ti Ezipte. Lo bata akobe ni na ya ti agbata ti kodro ni. Akobe ti ayaka so ayeke na tere ti agbata ni, lo bongbi ni na ya ti agbata oko oko. 49Joseph abongbi gba ti *ble, mo baa mo tene mbutu ti yanga ti kota ngu-ingo. Ala zia lege ti dikongo ni, ngbanga ti so lege ti dikongo ni ayeke daa pepe.

50Joseph adu amolenge use kozoni si kota nzara ni ati. Lo du ala na Asenat, molenge ti Potifera ti wali. Potifera ayeke wayango-sandaga ti gbata ti One. 51Joseph adi iri ti kozo molenge ni Manase, ngbanga ti so lo tene na be ti lo, lo tene: “Nzapa asara si mbi girisa apasi ti mbi nga na azo ti da ti babâ ti mbi.” 52Lo di iri ti use molenge ni Efraim, ngbanga ti so lo tene na be ti lo, lo tene: “Nzapa asara si mbi ga zo ti dungo ni na sese so a sara pasi na mbi.”

53Ngu mbarambara so kobe ayeke gbani gbani na kodro ti Ezipte so ahunzi. 54 Ngu mbarambara ti kota nzara ato nda ni, gi tongana ti so Joseph atene tënë ni so. Kota nzara amu ya ti akodro kue; me na kodro ti Ezipte kue kobe ayeke daa. 55 Tongana nzara agbu azo ti Ezipte kue, ala dekongo ti hunda kobe na maboko ti Faraon. Lo tene na ala: “Ala gue, abaa Joseph. Ye so kue lo yeke tene na ala ti sarango ni, ala sara ni.” 56Kota nzara ni amu ya ti kodro ni kue. Joseph azi yanga ti agogoro so ala bata akobe daa si lo ka akobe ni na azo ti Ezipte. Kota nzara ni ayeke ga gi ngangu ngangu lakue na Ezipte. 57Azo alondo na ya ti akodro kue si ala yeke ga na Ezipte ti vo ble na maboko ti Joseph, ngbanga ti so nzara ni ayeke ga gi ngangu ngangu na ya ti akodro kue.

Currently Selected:

Tongo nda ti aye 41: MNF2010

Highlight

Copy