Luka 8

A̱ma̱ci o yoku o tonoi Yesu

1Yesu u doku u geshe ba, ɗa u ka̱na̱i kubansa likuci i gbagbaꞋin n i wawaꞋa adama a na u dana uma Arabali a Singai adama o tsugono tsu Ka̱shile. Kupanazere a kpamu i ta̱ koɓolo n a̱yi. 2A̱ma̱ci o yoku o tono yi ta̱ feu, aza a na o lokoi wunla̱i u gbani-gbani we le, n aza a na ishi nu mbanaki. A̱ ka̱tsuma̱ ke le kpamu ta punu Meri Magadaliya vuza na o lokoi wunla̱i u gbani-gbani u cindere wa̱ ni, 3n Yuwana vuka vu Kuza (vuza vu ulinga vu gbayin vi Hiridu), n Suzana, n a̱ma̱ci o yoku n a̱bunda̱i. A̱ma̱ci a nam pa a̱ ɓa̱nka̱ le ta̱ n ili i le.

Agisana a kuvishangu icuꞋu

(Mat. 13:1-9; Mar. 4:1-9)

4Ɗa ka̱bunda̱i ka uma ku uta̱i likuci likuci a banai a̱ ubuta̱ u na Yesu wi. Ɗa u yaꞋankai le agisana a kadanshi. U danai, 5“Vuma vi yoku ɗa u banai kuvishangu icuꞋu. A̱yi a kuvishangu, ɗa icuꞋu i yoku i yikpa̱i a uye, ɗa a dasai i ɗa. Ɗa kpamu nnu n ka̱na̱i kuka̱ɗa̱ i ɗa. 6I yoku i yikpa̱i a kagbata. Ana yu uta̱i ɗa i lumbai, adama a na ubuta̱ wa wi n kuta̱nu ba. 7IcuꞋu i yoku i yikpa̱i a̱ ubuta̱ wa awana, ɗa i gbonguroi, ɗa awana a̱ ka̱na̱i kara le. 8Ɗa aza o yoku a̱ yikpa̱i a̱ ubuta̱ wi iɗika i singai, ɗa i gbonguroi, ɗa a matsai arata a gbagbaꞋin. A̱ ma̱ca̱Ꞌa̱tsu dem ma na kacimbi ka ka vishangi, i yoku i matsai arata ali amangatawun.”

Ana u kotsoi kadanshi, ɗa u ɗengusa̱i ka̱la̱ka̱tsu ka̱ ni, ɗa u danai, “Vuza na baci de dem wi n atsuvu a kupana, u pana.”

Ili i na i zuwai ɗa Yesu u dansai n agisana

(Mat. 13:10-17; Mar. 4:10-12)

9Ɗa mukumitoni n ni me ecei ni, “Yi ɗa̱i agisana a kadanshi a?”

10Ɗa u danai, “A̱ɗa̱, a̱ ushuku ɗa̱ ta̱ i yeve ili i na yi usokongi punu a̱ ubuta̱ u tsugono tsu Ka̱shile dem. Amma, aza a na a buwai, sai a yaꞋanka le kadanshi n agisana, tsu na a ɗanai:

‘I ta̱ a kinda, amma e kene ba,

i ta̱ kpamu a kupana, amma e kuyeve ba.’#Ish. 6:9.

Yesu u danai le agisana a kadanshi a kuvishangu a

(Mat. 13:18-23; Mar. 4:13-20)

11“Agisana a a ɗaɗa: IcuꞋu ya kadanshi ka̱ Ka̱shile kaꞋa. 12I na i yikpa̱i a uye, ele ɗa aza a na a panai kadanshi ka̱ Ka̱shile. Ɗa Kalijani ka̱ ta̱wa̱i, ɗa ka̱ fa̱ba̱na̱i kaꞋa a̱ a̱ɗu e le, adama a na ta lo e neke a̱ɗu e le ka̱ta̱ a̱ ciya̱ wishi. 13I na i yikpa̱i a kagbata ka i ɗaɗa, aza a na a panai kadanshi ka̱ Ka̱shile. Ɗa a̱ ushuki n kaꞋa m moloko m ma̱za̱nga̱, amma a zuwa aralu ba. Ayin kenu a na baci atakaci a̱ ta̱wa̱i, a ci shamgba ba. 14IcuꞋu i na i yikpa̱i a̱ ubuta̱ wa awana, ele ɗa aza a na a panai. Amma awuya, n uciyi, n kupana ku uyoꞋo ku wuma ku nam pa ku uwai ɗa ku u kparasai le. IcuꞋu i le i kutsa an ya yawa kukyaꞋa ba. 15IcuꞋu i na i yikpa̱i a iɗika i singai, i ɗaɗa agisana aza a̱ a̱ɗu a singai. A panai kadanshi ka̱ Ka̱shile, ɗa a̱ ka̱na̱i kaꞋa mayin. Ɗa a̱ ka̱na̱i kutono kaꞋa mayin n ka̱ɗu ke te. Ɗa a gbamai asuvu ali ɗa a matsai n a̱bunda̱i.”

Ma̱kuni ma na a̱ kimba̱i n kasasu

(Mar. 4:21-25)

16Yesu u lyaꞋi kelime, “Vuza u tsu tasuku ma̱kuni, ka̱ta̱ u kimba̱ maꞋa n kasasu ba, ko u zuwa maꞋa ɗaka vu kakuba ba. Amma sai a zuwa maꞋa a kashamkpatsu ka̱ ni, adama a na uma a uwa baci ka̱ta̱ e ene kutashi. 17Ili i na baci yi usokongi dem, i ɗa yi ta̱ a̱ kuta̱ e keteshe. Ili i na yi upali dem, a̱ uta̱ka̱ i ɗa a̱ ubuta̱ u kutashi, ka̱ta̱ e ene i ɗa. 18YaꞋan cicoꞋo n uteku u na vi a kupana ili dem. Aza a na i n ili, i ta̱ o kudoku e neke le i ɗa. Amma aza a na i n i ɗa ba, i ta̱ a kisa i na a danai i n i ɗa.”

Amgbu e Yesu n a̱na̱ku e le

(Mat. 12:46-50; Mar. 3:31-35)

19Amgbu e Yesu n a̱na̱ku e le a banai wa̱ ni. Amma a fuɗa a yawa wa̱ ni ba, adama a uma. 20Ɗa vuza yoku u danai Yesu, “A̱na̱vu n amgbu a̱ nu i ta̱ ɗe pulai a kuvana wu.”

21Ɗa Yesu u danai le, “A̱na̱ku a̱ va̱ n amgbu a̱ va̱, ele ɗa aza a na a panai kadanshi ka̱ va̱, ɗa i a kuyaꞋan kaꞋa.”

Yesu u shamkpai aɓau

(Mat. 8:23-27; Mar. 4:35-41)

22Kanna ke te, Yesu u uwai a kpantsu m mukumitoni n ni. Ɗa u danai le, “YaꞋan tsu laza a kubana upashi u mala wa n tsu nan ɗe.” Ɗa ta na a̱ gita̱i nwalu. 23Ele ɗe a̱ ka̱tsuma̱ ka nwalu, ɗa Yesu u gita̱i alavu. Gogo lo, ɗa wunla̱i n aɓau a̱ ɗenga̱i, an wa liɓatangu m kpantsu ka. Ana e enei nannai, ɗa a̱ɗu e le a̱ muɗa̱i.

24Ɗa a banai adama a na a̱ ɗengusa̱ yi. Ɗa a danai, “Vuzagbayin, Vuzagbayin! A̱tsu ɗa na ɗevu n ukpa̱!”

Ɗa Yesu u ɗenga̱i, u ɓarangi wunla̱i n aɓau, ɗa a shamgbai. Ɗa ubuta̱ dem wo okpoi bini. 25Ɗa we ecei le, “Te ɗai uneki wa̱ a̱ɗu u ɗa̱ wi?”

Amma ɗa wovon u ka̱na̱i le m mereve, ɗa a̱ ka̱na̱i mecenshenei, “Vuma vi iya̱n ɗai nannai? Ali a kuɓarangu wunla̱i n aɓau, ɗa ta na a panakai ni.”

Yesu u lokoi wunla̱i u gbani-gbani

(Mat. 8:28-34; Mar. 5:1-20)

26Yesu m mukumitoni n ni a kpantsu a kubana a Garasa, uɓon wu upashi u Ga̱lili. 27Ana Yesu u yawai a̱ ka̱kina̱ ka mala, ɗa u cinai vuza yoku vu wunla̱i u gbani-gbani. A̱yi ɗa vuza vu Garasa, ayin tutu u ci yongo ta̱ koshomboɗi. U ci shamgba kpamu a kpaꞋa ba, amma ta ɗe u ci yongo a̱ ubuta̱ wa asaun. 28Ana we enei Yesu, ɗa wo orukpoi, ɗa u banai ɗa u kuɗa̱ngi a asuvu a̱ ni. Ɗa u dansai n utsura, “Yesu, Maku ma Ka̱shile MalaꞋimili, yi ɗa̱i vi a kuciga va yaꞋan nu mpa? Mi ta̱ ufolu u nu, ka̱ta̱ vi neke mu atakaci ba.” 29U danai nannai, adama a na Yesu u dana ta̱ ɗe wunla̱i u gbani-gbani wa u ka̱sa̱kpa̱ vuza va. Ayin n a̱bunda̱i wunla̱i u gbani-gbani wa u ci reme yi ta̱. Ka̱ta̱ uma e reme yi, a shiya yi n ikani e ekiye n ene. Amma u tsu kasa ta̱ ikani ya, ka̱ta̱ wunla̱i u gbani-gbani u loko yi a kubana e mere mu une.

30Ɗa Yesu we ecei ni, “Yayi kula ku nu?”

Ɗa u danai, “Kotoro,” adama a na wunla̱i u gbani-gbani u yimkpa ta̱ wa̱ ni. 31Ɗa wunla̱i u gbani-gbani wa u folonoi Yesu, “Ka̱ta̱ vu uka tsu e kpenle ku zururu a kubana ba!”

32Ushiga wu ngurusunu wi ta̱ lo ɗevu n a̱bunda̱i, a kalina lo a̱ ubuta̱ wu nsasan. Ɗa wunla̱i u gbani-gbani wa u folonoi Yesu va, u ka̱sa̱kpa̱ le a uwa punu a̱ ubuta̱ wu ngurusunu wa. Ɗa ta na u ka̱sa̱kpa̱ le. 33Ɗa a̱ uta̱i punu a̱ ubuta̱ u vuza wa, ɗa a uwai punu a̱ ubuta̱ wu ngurusunu wa. Ɗa ushiga wu ngurusunu wa u gida̱la̱i punu a mala ma. Ɗa a̱ kuwa̱i punu.

34Ana aza a na ishi a kinda ngurusunu ma enei nannai, ɗa a sumai ɗa a banai ɗa a̱ ka̱na̱i kudana uma punu a̱ likuci ya n i wawaꞋa ra̱ka̱. 35Ɗa uma a̱ uta̱i a banai adama a na e eneke ka̱ci ke le ili ya. Ana a yawai, ɗa a cinai vuma vu na wishi n wunla̱i u gbani-gbani wa. A̱yi lo ida̱shi a asuvu e Yesu, n aminya uꞋuki, m ma̱riki ma̱ ni kpamu. Ɗa dem vi le a panai wovon. 36Aza a na e enei ni, ɗa a danai uma uteku u na a̱ ta̱na̱ta̱ngi vuma va. 37Ɗa uma a uɓon u nan lo wa dem, a danai Yesu u ka̱sa̱kpa̱ le uɓon wa. Adama a na i ta̱ a kupana wovon n a̱bunda̱i.

Ana Yesu u uwai a kpantsu, an wa laza, 38ɗa vuma vu na a̱ uta̱ka̱i wunla̱i u gbani-gbani wa wa̱ ni, ɗa u folonoi Yesu, “Mi ta̱ a kuciga mo tono wu.” Amma ɗa u sa̱nga̱i ni. Ɗa u danai ni, 39“Wala o kubono a kpaꞋa, vu dana uma ili i na Ka̱shile ka yaꞋankai nu.” Ɗa vuma va u banai a̱ likuci ya dem, ɗa u ka̱na̱i kudana uma ili i na Yesu u yaꞋankai ni dem.

Mekere ma Jayiru n vuka vu mbanaki

(Mat. 9:18-26; Mar. 5:21-43)

40Ana Yesu u pasai o kubono upashi u mala, ɗa uma a rabasai ni, adama a na ishi ta̱ ɗe a kuvana yi. 41Vuma vi yoku ɗa kula ku ni ku ɗa Jayiru. A̱yi vuzagbayin ɗa ɗe a̱ kunu ka avasa. U yawai ɗa u kuɗa̱ngi e kelime ke Yesu, ɗa u folonoi ni u bana a kpaꞋa ku ni. 42Adama a na maku me mekere ma̱ ni mi ta̱ ɗe ɗevu n ukpa̱. A̱yi wi ta̱ m maku me te ma na mi n a̱ya̱ kupa n e re.

Ana Yesu wi a kubana ɗe, ɗa uma a̱ ka̱na̱i koꞋuso yi. 43Punu a̱ ka̱tsuma̱ ka uma ka, vuka vi yoku vi ta̱ lo, vuza na wi o kusoꞋo atakaci n kulolo ku mpasa ali a̱ya̱ kupa n e re. [Wu una ta̱ ikebe i ni dem a̱ ubuta̱ wa aza a̱ a̱guma̱.] Amma babu vuza na u fuɗai u ta̱na̱ta̱ngi ni. 44Ɗa wu uta̱i punu, ɗa u banai, ɗa u saꞋwai kocombo ka kuminya ke Yesu. Ɗa ta na kulolo ku mpasa ka ku shamgbai.

45Ɗa Yesu u we ecei, “Yayi u saꞋwai mu?”

Aza a na i lo dem ɗa a nanai. Ɗa Biturusu u danai, “Vuzagbayin, uma n a̱bunda̱i i ta lo a kanzai nu. Ɗa kpamu i e kutecengu wu.”

46Amma ɗa Yesu u danai, “Vuza u saꞋwa mu ta̱. N yeve ta̱ adama a na utsura wu uta̱ mu ta̱.”

47Ana vuka va vi yevei i ta̱ e kuyeve yi, ɗa wu uta̱i, ikyamba e kujeꞋe. Ɗa u kuɗa̱ngi u Yesu, e kelime ka uma lo dem. Ɗa u danai Yesu ili i na i zuwai ɗa u saꞋwai kuminya ku ni, n uteku u na kpamu u potsoi. 48Ɗa Yesu u danai ni, “Mekere ma̱ va̱, uneki u ka̱ɗu u nu u ɗa u ta̱na̱ta̱ngi nu. Laza m ma̱ta̱na̱.”

49Yesu lo a kadanshi, ɗa vuza vu usuki u yawai, wu uta̱i ɗe a kpaꞋa ku Jayiru, vuzagbayin vu kunu ka avasa ka. Ɗa u danai ni, “Maku ma̱ nu ma̱ kuwa̱ ta̱. Ka̱ta̱ vo oꞋuso malum ma gbani ba.”

50Amma ta na ɗa Yesu u panakai ni, ɗa u danai Jayiru, “Ka̱ta̱ vu pana wovon ba, neke ka̱ɗu ka̱ nu, wi ta̱ o kupotso.”

51Ana u yawai a kpaꞋa ka, u ka̱sa̱kpa̱ uma a uwa punu n a̱yi ba, sai Biturusu, n Yahaya, n Yakubu, koɓolo n esheku e mekere a, n a̱na̱ku. 52Uma a na i lo dem, ɗa a̱ ka̱na̱i ma̱shi n una̱mgbuka̱tsuma̱, adama a̱ ukpa̱ u maku wa. Ɗa Yesu u danai le, “Ka̱sa̱kpa̱i ma̱shi ma, maku ma ukpa̱ u ɗa yi ba. Alavu a ɗa yi koci.”

53Ɗa o zoꞋosoi ni, adama a na e yeve ta̱ maku ma ukpa̱ u ɗa yi. 54Amma ɗa Yesu u remei ni kukiye, ɗa u ɗekei ni, “Maku ma̱ va̱, ɗenga̱.” 55Ɗa wuma u ni u bonoi, ɗa u ɗenga̱i ta̱ra̱ka̱ci. Ɗa u dana le e neꞋe yi ilikulyaꞋa. 56Ɗa isheku i ni i ka̱na̱i mereve, amma ɗa Yesu u danai le ka̱ta̱ a dana vuza ili i na u yaꞋin ba.

Currently Selected:

Luka 8: asgNT

Highlight

Copy