Luka 9

Yesu u suki mukumitoni n ni kupa ni n re

(Mat. 10:5-15; Mar. 6:7-13)

1Ɗa Yesu u ɗekei Kupanazere a̱ ubuta̱ u te, ɗa u nekei le utsura n a̱bunda̱i, adama a na o loko wunla̱i u gbani-gbani ra̱ka̱, ka̱ta̱ o potsokpo kpamu uma. 2Ɗa u suki le a bana a̱ ka̱ra̱sa̱, adama a na a dana uma kadanshi ka̱ Ka̱shile n tsugono ci ni, ka̱ta̱ kpamu o potsokpo aza a mbanaki. 3Ɗa kpamu u danai, “Ka̱ta̱ i ɗika ili adama a nwalu a̱ ɗa̱ ba: ko kalangu, ko ujika ko ilikulyaꞋa, ko ikebe, ko motogu mo yoku kau ba. 4Ubuta̱ u na baci a isai ɗa̱ dem mayin, yongoi punu a kpaꞋa ka, ali kanna ka na yu uta̱i punu a̱ likuci ya. 5Ubuta̱ u na baci a isai ɗa̱ ba, ka̱sa̱kpa̱i likuci i nan lo ya. Ka̱ta̱ i ka̱pa̱tsa̱ lo kubuta̱ ku ene ku ɗa̱. Na lo va wo okpo ta̱ urotu we le.”#9:5 A̱ ka̱pa̱tsa̱i kubuta̱ ku ene e le, adama a na o yotsongu a na a iwain ubuta̱ u nan lo ra̱ka̱, ali n kubuta̱ ka dem.

6Ɗa mukumitoni ma n lazai a kubana a̱ likuci likuci, n a danai uma Arabali a Singai, n o potsokpoi uma a̱ ubuta̱ dem.

Hiridu u ripula̱i

(Mat. 14:1-12; Mar. 6:14-29)

7Ana Hiridu Antiba, mogono ma̱ Ga̱lili, u panai ili i na yi lo, ɗa u ripula̱i. Adama a na aza o yoku a dana yi ta̱ Yahaya Vuza vu Kusumbu ka Akucina u ɗenga̱ ta̱ a̱ ukpisa̱. 8Aza o yoku a danai Iliya ɗa u bonoi. Aza o yoku a danai keneki ko yoku kaꞋa ka cau ka̱ ɗenga̱i n wuma. 9Ɗa Hiridu u danai, “M gbatya ta̱ ɗe kaci ka Yahaya. Amma yayi tamkpamu vuma vu nam pa vu na ci a kupana kadanshi ka̱ ni?” Ɗa u ka̱na̱i kula̱nsa̱ we ene Yesu.

Yesu u cuwa̱ta̱ngi uma a̱kpa̱n a tawun n ilikulyaꞋa

(Mat. 14:13-21; Mar. 6:30-44; Yah. 6:1-14)

10Ɗa azusuki a o bonoi, ɗa a danai Yesu ili i na a yaꞋin dem. Ɗa u ɗikai le, a lazai a kubana a̱ likuci i Besaida endeꞋen le. 11Ana ka̱bunda̱i ka uma ka panai wi ta̱ lo, ɗa o tonoi ni. Ɗa u rabasai le, ɗa u yaꞋankai le kadanshi ko tsugono tsu Ka̱shile, ɗa u potsokpoi aza a mbanaki.

12Kanna ɗe a kubana kuyikpa̱, ɗa Kupanazere a banai wa̱ ni. Ɗa a danai, “Dana uma a bana a̱ likuci i wawaꞋa n ashina, a̱ la̱nsa̱ka̱ ka̱ci ke le ilikulyaꞋa n ubuta̱ u kasa, adama a na kpaꞋa ki lo ɗevu ba.”

13Amma ɗa Yesu u danai le, “A̱ɗa̱ neꞋi le ilikulyaꞋa.”

Ɗa a danai, “Ili i na ci n ɗa i ɗaɗa burodi vu tawun n adan e re. Vi ciga ta̱ tsu bana tsu tsula ilikulyaꞋa adama a uma a nam pa dem?” 14A̱ ka̱tsuma̱ ka uma a na i lo, ali a a yawa ta̱ a̱kpa̱n a tawun (5,000).

Ɗa Yesu u danai mukumitoni n ni, “Danai uma a a̱ da̱sa̱ngu uma amangerenkupa n kupa.” 15Ana mukumitoni ma n yaꞋin nannai, 16ɗa Yesu u ɗika burodi vu tawun va, n adan e re, ɗa u ɗengusa̱i a̱shi gaɗi, ɗa u cikpai Ka̱shile, ɗa u wansasai, ɗa u nekei mukumitoni n ni m peceke uma. 17Ɗa uma a dem a lyaꞋi, ɗa a̱ cuwa̱i. Ɗa a̱ ta̱ɗa̱i alyashi ali mbana kupa ni n re.

Biturusu u danai Yesu Kishi kaꞋa

(Mat. 16:13-19; Mar. 8:27-29)

18Kanna ke te, ana Yesu wi a kuyaꞋan kavasa endeꞋen ni, ɗa mukumitoni n ni m banai wa̱ ni. Ɗa we ecei le, “Yayi uma e ci ɗeke mu?”

19Ɗa a̱ ushuki, “Aza o yoku e ci ɗeke wu ta̱ Yahaya Vuza vu Kusumbu ka Akucina. Aza o yoku a dana avu ɗa Iliya. Aza o yoku tamkpamu a danai a̱ ka̱tsuma̱ ke eneki a cau ko yoku kaꞋa ka̱ ɗenga̱i n wuma.”

20Ɗa we ecei le, “A̱ɗa̱ tamkpamu, yayi i danai mpa mi?”

Ɗa Biturusu u danai, “Avu ɗa Kirisiti Kishi vuza na Ka̱shile ka̱ suki.”

21Ɗa Yesu u danai le, ka̱ta̱ a dana vuza ba.

Yesu u dansai ukuna wu ukpa̱ u ni

(Mat. 16:20-28; Mar. 8:30—9:1)

22Ɗa kpamu Yesu u doku u danai le, “Mpa Maku ma Vuma mi ta̱ o kusoꞋo atakaci, ka̱ta̱ kpamu nkoshi m gba̱ra̱gba̱ra̱ n iwan mu, n anan ganu vu gbagbaꞋin, nu nlum n Wila̱ feu. I ta̱ a kuna mu, amma a kanna ka tatsu, mi ta̱ a̱ kuɗenga̱.”

23Ɗa u danai le dem, “Vuza na baci u cigai kutono mu dem, sai u iwan ka̱ci ka̱ ni ka̱ta̱ u ɗika kpamu maɗanga ma atakaci ma̱ ni, adama a na u tono mu ayin dem. 24Aza a na baci i a kuciga a kisa wuma u le, i ta̱ a kunamba u ɗa. Aza a na baci a iwain wuma u le adama a̱ va̱, i ta̱ a̱ kuciya̱ u ɗa. 25Vuza u ciya̱ baci ili ya aduniyan dem, ɗa u nambai wuma u ni, yi ɗa̱i u kuciya̱? 26Uma i baci a kupana wono u va̱ n kadanshi ka̱ va̱, mpa Maku ma Vuma feu mi ta̱ a kupana wono u le, ayin a na baci m bonoi na n tsugbayin tsu va̱, n tsugbayin tsu Dada n tsa alingata a ciɗa. 27Mi ta̱ a kudana ɗa̱, uma o yoku i ta̱ na, aza a na e kene ukpa̱ ba, sai e ene tsugono tsu Ka̱shile.”

A sabaꞋi ikyamba i Yesu

(Mat. 17:1-8; Mar. 9:2-8)

28Ana kuden ku te ku lazai, ana u yaꞋin kadanshi ka, ɗa Yesu u ɗikai Biturusu, n Yahaya, n Yakubu, ɗa u lazai a kubana a kusan koɓolo n ele, adama a na u yaꞋan kavasa. 29A̱yi a̱ ka̱tsuma̱ ka avasa, ɗa kuca̱n n a̱shi a̱ ni a sabaꞋi, n aminya a̱ ni dem, ɗa o bonoi wa̱ri pushe-pushe. 30Gogo lo, ɗa uma e re o yoku a yawai lo, ɗa a̱ ka̱na̱i kadanshi n a̱yi. Ele ɗa Musa n Iliya, 31a kutasa langu-langu an kutashi ku gaɗi. Ɗa a̱ ka̱na̱i kuyaꞋan kadanshi uteku u na u kuka̱sa̱kpa̱ aduniyan, n tsu na kpamu u kuta̱wa̱ wa shana a Urishelima. 32Biturusu n aza a̱ ni i ta̱ alavu. Ana a̱ ɗenga̱i, ɗa e enei Yesu n tsugbayin ci ni. Uma e re a kpamu lo kashani n a̱yi. 33Ana uma a i a kulaza, ɗa Biturusu u danai ni, “Vuzagbayin, u gaꞋan ta̱ an ci na. Ci yaꞋan a̱pa̱m a tatsu, ke te ka̱ nu, ke te ka Musa, ke te kpamu ka Iliya.” A̱yi ta na ketepu kaꞋa wi a kudansa. 34A̱yi lo a kadanshi, ɗa egele a̱ uta̱i ɗe gaɗi an keleshu, ɗa ka palai le. Ɗa ta na mukumitoni ma m panai wovon ana keleshu ka ka palai le.

35Ɗa ka̱la̱ka̱tsu ku uta̱i punu e keleshu ka, ka danai, “Na va Maku ma̱ va̱ maꞋa ma na n zagbai. Panakai ni.” 36Ana ka̱la̱ka̱tsu ka ko kotsoi kuyaꞋan kadanshi, ɗa Yesu wo okpoi lo endeꞋen. Ɗa mukumitoni n ni m paɗai bini biꞋi, a dana vuza ili i na e enei ba.

Yesu u potsokpoi maku ma na mi n wunla̱i u gbani-gbani

(Mat. 17:14-18; Mar. 9:14-27)

37Ana kayin ka asai, ɗa Yesu m mukumitoni n ni a cipa̱i a kusan ka, ɗa koɓolo ka uma ka banai ka cinai ni. 38Ɗa vuma vi yoku vu lapai una̱ punu a̱ ka̱tsuma̱ ka uma ka, “Malum, mi ta̱ ufolu u nu, la̱na̱ka̱ mu maku ma̱ va̱. A̱yi ɗa mu koci. 39Wunla̱i u gbani-gbani u tso oꞋuso yi ta̱, ka̱ta̱ u ka̱na̱ yoroli n kagandalasa, ali kapufu ku uta̱ una̱ u ni. U tsu ka̱sa̱kpa̱ yi ba, ali ɗevu n kuna yi. 40N folono ta̱ mukumitoni n nu n loko u ɗa, amma a fuɗa ba.”

41Yesu u danai, “A̱ɗa̱ uma a ugbawansuvu a ɗa, yi kpamu n uneki wa̱ a̱ɗu ba. Ali wanai ɗai n kuyongo n a̱ɗa̱? Ali wanai ɗai n kulyaꞋa kelime n kureme ka̱ɗu n a̱ɗa̱? Tuka̱i mu m maku ma na.”

42Ana kolobo ka ki a kubana u Yesu, ɗa wunla̱i u gbani-gbani wa u ɗikai ni, ɗa u ɓasangi ni a iɗika ɗa u ka̱na̱i kagandalasa. Ɗa Yesu u ɓarangi u ɗa, ɗa u ta̱na̱ta̱ngi ni. Ɗa u ɗikai maku ma ɗa u nekei kesheku ka. 43Uma dem a̱ ka̱na̱i mereve adama a utsura u Ka̱shile u na e enei.

Yesu u doki u yaꞋin kadanshi ku ukpa̱ u ni

(Mat. 17:22-23; Mar. 9:30-32)

Uma lo a kuyaꞋan mereve mi ili i na Yesu wi lo a kuyaꞋansa, ɗa u danai mukumitoni n ni, 44“Ka̱ta̱ i cinukpa n ili i na mi a kudana ɗa̱ na ba. I ta̱ e kuneke Maku ma Vuma ma e ekiye a irala i ni.” 45Amma mukumitoni n ni n yeve ili i na u ciya̱i ba. Adama a na i ɗa yi ta̱ usokongi we le, adama a nannai e kuyeve ba. Ɗa kpamu a panai wovon uteku u na e kece yi.

Vuzagbayin o tsugono tsu gaɗi

(Mat. 18:1-5; Mar. 9:33-40)

46Ɗa kanananai ka̱ gita̱i a̱ ubuta̱ u mukumitoni n ni, ko yayi u kokpo vuzagbayin vi le. 47Ɗa Yesu u yevei ili i na i e kusheshe punu a̱ a̱ɗu e le, ɗa u ɗikai maku, ɗa u zuwai ni ɗevu n a̱yi. 48Ɗa u danai le, “Vuza na baci wi isai maku me kenu ma nam pa n kula ku va̱, wi isa mu ta̱ feu. Vuza na baci wi isai mu, wi isa ta̱ feu vuza na u suki mu. Vuza na baci de dem u bonokoi ka̱ci ka̱ ni an maku a̱ ka̱tsuma̱ ka̱ ɗa̱, a̱yi ɗa vuzagbayin.”

49Ɗa Yahaya u danai, “Vuzagbayin, ce ene ta̱ vuma o kuloko wunla̱i u gbani-gbani n kula ku nu, ɗa tsu danai ni u ka̱sa̱kpa̱. Adama a na ta punu wi koɓolo n a̱tsu ba.”

50U danai le dem, “Ka̱ta̱ i sa̱nka̱ yi ba. Vuza na baci wi a tsurala n a̱ɗa̱ ba, vuza ɗa̱ ɗa.”

Likuci i Samariya i iwain Yesu

51Ana ayin a̱ gita̱i kuyawa ɗevu a na a kubanka yi gaɗi, ɗa u zuwai ka̱ɗu ka̱ ni a kubana a Urishelima. 52Ɗa u suki uma kelime ka̱ ni, aza a na a banai a̱ likuci yu uɓon u Samariya, adama a na o foɓusoko yi ili dem. 53Amma uma a nan lo a kurabasa yi ba, adama a na a pana ta̱ a̱yi ta ɗe wi a kubana a Urishelima. 54Ana mukumitoni n ni n re, Yakubu n Yahaya, e enei nannai, ɗa a danai, “Vuzagbayin, ko vi ciga ta̱ ci ɗeke akina a gaɗi, ka̱ta̱ a̱ ta̱wa̱ a una le?” 55Ɗa Yesu u kpatalai, ɗa u ɓarangi le. 56Ɗa a lazai a kubana a̱ likuci i yoku.

Kutono ku Yesu ki ta̱ n atakaci

(Mat. 8:19-22)

57Ele lo a nwalu, ɗa vuma vi yoku vu banai u Yesu, u danai, “Mi ta̱ o kutono wu a̱ ubuta̱ u na baci vu banai dem.”

58Yesu u danai ni, “Iranji yi ta̱ n angu, nnu kpamu i ta̱ n cikinda, amma mpa Maku ma Vuma† mi n ubuta̱ u na n kuzuwa kaci ka̱ va̱ ba.”

59Ɗa u danai vuza yoku, “Tono mu.”

Ɗa vuma va u danai, “Vuzagbayin, yaꞋan biꞋi m bana n ciɗa̱ngu esheku a̱ va̱.”

60Ɗa Yesu u danai ni, “Ka̱sa̱kpa̱ a̱kpisa̱ a̱ ciɗa̱mgba̱na̱i. Avu bana vu dana uma ukuna u tsugono tsu Ka̱shile.”

61Ɗa kpamu vuza yoku u danai, “Mi ta̱ o kutono wu, Vuzagbayin, amma yaꞋan m bana n dana aza a̱ va̱ biꞋi.”

62Ɗa Yesu u danai ni, “Vuza na baci u remei ma̱ba̱ri ma anaka a kunima, ɗa u ka̱na̱i kula̱na̱ kucina̱, wi a kuyaꞋan ili i ma̱riki a̱ ubuta̱ u tsugono tsu Ka̱shile ba.”

Currently Selected:

Luka 9: asgNT

Highlight

Copy