KO ‘EKISOTO 17
17
Ko e Vai mei he Maka
(Nōm 20.1-13)
1PEA hiki ai ‘a e nofo‘anga kotoa ‘o ‘Isileli mei he Toafa ‘o Sini, ‘o nau fononga ‘i he angi ‘a Sihova, ‘o nau fokotu‘u tēniti ‘i Lefitimi: pea na‘e ‘ikai ha vai ke inu ‘e he kakai. 2Pea na‘e lau fakamamahi ‘a e kakai kia Mōsese, ‘o nau pehē, Fei mo ‘omi hamau vai inu. Pea tali ‘a Mōsese kiate kinautolu, Ko e hā ‘oku mou fai ai ho‘omou mamahi kiate au? Ko e hā ‘oku mou ala‘aki ai kia Sihova?
3Pea na‘e feinga vai ‘a e kakai ‘i he potu ko ia; pea na‘e lāunga ‘a e kakai kia Mōsese, ‘o pehē, Ko e hā kuo pehē ai, ho‘o ‘omi kimautolu mei ‘Isipite ke tāmate‘i kita mo ‘ete fānau mo ‘ete fanga manu ‘aki ‘a e fie inu?
4Pea tautapa ‘a Mōsese kia Sihova, ‘o pehē, Ko e hā te u fai ma‘a e kakai ni? ‘oku toe si‘i pea nau tolongi au.
5Pea folofola ‘a Sihova kia Mōsese, Laka atu ‘i he ‘ao ‘o e kakai, pea ke ‘alu mo koe ‘a e kau Mātu‘a ‘o ‘Isileli; pea ko ho tokotoko, ‘a ia na‘a ke taa‘i ‘aki ‘a e vaitafe, to‘o ia ‘i ho nima, pea ke ‘alu. 6Ko au ‘eni te u ‘i he potu ko ia, ‘o tu‘u ‘i ho ‘ao ‘i he maka ‘i Hōlepi; pea te ke taa‘i ‘a e maka, pea ‘e ‘alu atu ha vai mei ai ke inu ‘e he kakai. Pea na‘e fai pehē ‘e Mōsese ‘i he ‘ao ‘o e kau Mātu‘a ‘o ‘Isileli.
7Pea na‘a ne fakahingoa ‘a e potu ko ia ko Masa (‘Ahi‘ahi), mo Mēlipa (ko Kē),#17.7 Mēlipa; Ko e ‘uhinga ‘e taha ‘o e hingoá ni ko e “lāunga”. koe‘uhi ā ko e kē ‘a ha‘a ‘Isileli, pea koe‘uhi ko ‘enau ala‘aki kia Sihova; he‘enau pehē, Pe ‘oku ‘i hotau lotolotonga ‘a Sihova pe ‘ikai?
8Pea ha‘u ai ‘a ‘Amaleki ‘o tau mo ‘Isileli ‘i Lefitimi. 9Pea lea ‘a Mōsese kia Siosiua, Fili mai ha kau tangata, pea ke ‘alu kitua‘ā ‘o tau‘i ‘a ‘Amaleki: pongipongi hake te u tu‘u au ‘i he tumutumu ‘o e mo‘unga mo e tokotoko ‘o ‘Elohimi ‘i hoku nima. 10Pea na‘e fai ‘e Siosiua ‘o hangē ko e lea ‘a Mōsese kiate ia, ‘o ne tau mo ‘Amaleki: ka ko Mōsese mo ‘Ēlone mo Hua na‘a nau ō hake ki he tumutumu ‘o e mo‘unga. 11Pea na‘e hoko ‘o pehē, ka hiki ‘e Mōsese hono nima, pea mālohi ‘a ‘Isileli; ka ‘oka fakamālōlō hifo hono nima, pea mālohi ‘a ‘Amaleki. 12Ka ko e ongo nima ‘o Mōsese na‘e mamafa; ko ia na‘a nau to‘o ha maka, ‘o ‘ai ‘i lalo, ‘o ne nofo ai; pea puke tu‘u hono nima ‘e ‘Ēlone mo Hua, ko e taha mei hē mo e taha mei hē; ko ia na‘e tu‘u ma‘u hono ongo nima ‘o a‘u ki he tō ‘a e la‘ā. 13Pea na‘e ikuna ‘e Siosiua ‘a ‘Amaleki mo hono kakai ‘aki ‘a e mata ‘o e heletā.
14Pea na‘e folofola ‘a Sihova kia Mōsese, Tohi ‘eni ‘i he Tohi ko e fakamanatu, pea lau ‘i he ongo telinga ‘o Siosiua, he te u mātu‘aki tāmate‘i ‘a e manatu kia ‘Amaleki mei he lalo langi.#Teu 25.17-19; 1 Sām 15.2-9 15Pea na‘e langa ‘e Mōsese ha ‘esi feilaulau, ‘o ne fakahingoa ia ko Sihova-Nisi (Ko ‘eku fuka ‘a Sihova); 16he na‘a ne pehē, Ko ha nima ‘i he fuka ‘a IAA;#17.16 Ko ha… IAA; ‘Oku hiki ‘e he ni‘ihi: ko e nima ‘i he taloni ‘o IAA. ‘Oku ngali tonu hono hiki ‘o Hiki ki ‘olunga ‘a e fuka ‘a Sihová; ka ‘oku ‘ikai ke mahino ‘a e faka-Hepeluú. ko e tau ‘a Sihova mo ‘Amaleki ‘o laui to‘utangata.
Currently Selected:
KO ‘EKISOTO 17: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
