KO ‘EKISOTO 19
19
Ko e A‘u ‘a e Kakai ‘Isilelí ki he Mo‘unga ko Sainaí
1‘I hono māhina tolu hili ‘a e ‘alu atu ‘a ha‘a ‘Isileli mei ‘Isipite, ‘i he ‘aho pē ko ia na‘a nau a‘u ki he Toafa ‘o Sainai. 2Pea na‘a nau hiki mei Lefitimi, pea nau a‘u ki he Toafa ‘o Sainai, ‘o nau fokotu‘u tēniti ‘i he toafa, ‘io, na‘e fokotu‘u tēniti ai ‘a ha‘a ‘Isileli, ‘o hanga ki he mo‘unga. 3Pea hā‘ele hake ‘a Mōsese kia ‘Elohimi mo e ui kiate ia ‘e Sihova mei he mo‘unga, ‘o pehē, Ko eni ‘a e lea te ke fai ki he fale ‘o Sēkope, mo fakahinohino ki ha‘a ‘Isileli:
4Kuo mou mamata ki he me‘a kuo u fai ki he kau ‘Isipite, mo ‘eku fafa kimoutolu ‘i he funga kapakau‘i ‘īkale, ‘o ‘omi kimoutolu kiate au. 5Pea ko eni, kapau te mou mātu‘aki tokanga ki hoku le‘o, mo tauhi ‘eku fuakava, te mou toki hoko ko ‘eku koloa kānokato ‘i he kakai kotoa: he ‘oku ‘o‘oku ‘a māmani kātoa:#Teu 4.20; 7.6; 14.2; 26.18; Tait 2.14 #1 Pit 2.9 6pea te mou hoko kiate au ko e tu‘unga tu‘i taula‘eiki, ko e kakai tapu. Ko eni ‘a e ngaahi lea te ke fai ki ha‘a ‘Isileli.#Fkhā 1.6; 5.10 7Pea ha‘u ‘a Mōsese, ‘o ne ui ange ‘a e Mātu‘a ‘a e kakai, ‘o ne tuku ‘i honau ‘ao ‘a e ngaahi fo‘i folofola ni, ‘a ia kuo tu‘utu‘uni ‘e Sihova kiate ia. 8Pea na‘e tali ‘a e kakai kotoa pē fakataha, ‘o pehē, Ko e me‘a kotoa kuo folofola‘aki mai ‘e Sihova te mau fai. Pea na‘e fakahoko mai ‘e Mōsese ‘a e ngaahi lea ‘a e kakai kia Sihova.
9Pea folofola ‘a Sihova kia Mōsese; Vakai, ko ‘eku ha‘u eni kiate koe kuo u kofu ‘aki ha ‘ao, koe‘uhi ke fanongo ‘e he kakai ‘oka u ka alea mo koe, ‘o nau tui ai kiate koe ‘o ta‘engata. Pea na‘e fakahā ‘e Mōsese ‘a e ngaahi lea ‘a e kakai kia Sihova.
10Pea folofola ‘a Sihova kia Mōsese, ‘Alu ki he kakai, ‘o fakama‘a ‘a kinautolu he ‘aho ni mo e ‘apongipongi, pea tuku ke nau fō honau kofu. 11Pea ke ‘osi ho‘omou teu ki hono ‘aho tolu: he ‘i hono ‘aho tolu ‘e hā‘ele hifo ‘a Sihova ki he mo‘unga ko Sainai, kae mamata ‘e he kakai kotoa. 12Pea te ke fokotu‘u ha ‘ā ki he kakai takatakai, mo ke pehē, Mou faka‘ehi‘ehi ki he ‘alu hake ki he mo‘unga, mo e lave ki hano ‘eu: he ko ia ‘oku ne lave ki he mo‘unga, te ne mātu‘aki mate.#Hep 12.18-20 13‘E ‘ikai ala kiate ia ‘e ha nima, ka ‘e mātu‘aki tolomaka‘i ia pe fana‘i; pe ko ha manu pe ha tangata, ‘e ‘ikai te ne mo‘ui: ka toki fakatangiloloa ‘a e talupite, ‘e ‘alu hake ki he mo‘unga ‘a kinautolu na.
14Pea ‘alu hifo ‘a Mōsese mei he mo‘unga ki he kakai, ‘o ne fakama‘a ‘a e kakai, pea nau fō honau kofu. 15Pea na‘a ne pehē ki he kakai, Mou ‘osi teuteu ki hono tolu ‘o e ‘aho: ‘oua na‘a ofi ki ha fefine.
16Pea ko ia ‘i hono tolu ‘o e ‘aho, ‘i he‘ene ‘aho hake, tā na‘e hoko ‘i he funga mo‘unga ‘a e ngaahi mana, mo e ngaahi ‘uhila, pea ai ha ‘ao matolu ‘i he funga mo‘unga, mo e le‘o ‘o e talupite mālohi ‘aupito: pea na‘e tete ‘a e kakai kotoa na‘e ‘i he ‘apitanga.#Fkhā 4.5 #Teu 4.11-12 17Pea na‘e taki atu ‘e Mōsese ‘a e kakai mei he ‘apitanga ke fakafe‘iloaki kia ‘Elohimi; pea na‘a nau tutu‘u ‘i he talalo ‘o e mo‘unga. 18Pea ko e mo‘unga ko Sainai ko e koto kohu fua pē, koe‘uhi ko e hā‘ele ki ai ‘a Sihova ‘i he afi; pea na‘e ‘alu hake ‘a e kohu ‘o hangē ko e kohu ‘o e fōnise, pea na‘e tete lahi ‘a e kakai kotoa.#19.18 pea na‘e… kotoa; ‘Oku tu‘u he tohi ‘e ni‘ihi: na‘e tete lahi ‘a e mo‘unga kotoa. 19Pea ‘i he ‘ai ‘a e ifi ‘o e talupite ‘o fai atu ‘o fakautuutu ‘aupito, na‘e lea ‘a Mōsese, pea tali ‘a ‘Elohimi ‘aki ha le‘o. 20Pea na‘e hā‘ele hifo ‘a Sihova ki funga Sainai, ki he tumutumu ‘o e mo‘unga; pea na‘e ui hake ‘e Sihova ‘a Mōsese ki he funga mo‘unga, pea ‘alu hake ‘a Mōsese. 21Pea folofola ‘a Sihova kia Mōsese, ‘Alu hifo; na‘ina‘i ki he kakai, na‘a ‘iloange te nau hae mai ki loto kia Sihova ke mamata, pea tō honau tokolahi. 22Pea ko e kau taula‘eiki foki ‘a ia ‘oku nau taka ofi kia Sihova, ke nau fakama‘a kinautolu, na‘a ‘iloange ‘e pā atu ‘a Sihova kiate kinautolu.
23Pea tali ‘e Mōsese kia Sihova, ‘E ‘ikai lava ‘e he kakai ke ‘alu hake ki he mo‘unga ko Sainai: he na‘a ke na‘ina‘i mai ‘o pehē, ‘Aa‘i ‘a e mo‘unga ‘o tapui ia.
24Pea folofola ‘a Sihova kiate ia, Laka hifo, pea te ke ‘alu hake ‘e koe, pea mo omi mo ‘Ēlone; kae‘oua na‘a hae mai ‘e he kau taula‘eiki mo e kakai ke ‘alu hake kia Sihova, na‘a pā atu ia kiate kinautolu. 25Pea na‘e ‘alu hifo ‘a Mōsese ki he kakai, ‘o tala kiate kinautolu.
Currently Selected:
KO ‘EKISOTO 19: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
