KO ‘EKISOTO 37
37
Ko e Ngaohi ‘o e ‘A‘ake ‘o e Fuakavá
(‘Eki 25.10-22)
1PEA na‘e fa‘u ‘e Pesalili ‘a e ‘A‘ake ‘aki ‘a e papa sitimi: ko hono lōloa ko e kiupite ‘e ua mo e haafe, pea ko hono māukupu ko e kiupite ‘e taha mo e haafe, pea ko hono mā‘olunga ko e kiupite ‘e taha mo e haafe. 2Pea na‘a ne ‘aofi ‘aki ia ‘a e koula haohaoa, ‘a loto mo tu‘a, pea ne ngaohi hano teuteu koula takatakai. 3Pea ne haka ki ai ha kavei koula ‘e fā ki hono va‘e ‘e fā; ko e ua‘i kavei ki he tafa‘aki ‘e taha, mo e ua‘i kavei ki hono tafa‘aki ‘e taha. 4Pea ne ngaohi kaufata ‘aki ‘a e ‘akau sitimi, ‘o ne kofu ‘aki ‘a e koula. 5Pea na‘a ne velo ‘a e kaufata ‘i he ngaahi kavei ‘i he tafa‘aki ‘a‘ake ke kauala ‘aki ‘a e ‘A‘ake. 6Pea na‘a ne ngaohi ha hōifua‘anga ‘aki ‘a e koula haohaoa: ko e kiupite ‘e ua mo e haafe hono lōloa, pea ko e kiupite ‘e taha mo e haafe hono māukupu. 7Pea na‘a ne ngaohi ha ongo Selupimi koula; na‘a ne tuki kinaua ‘i he konga ‘o e hōifua‘anga ‘oku hope atu ‘i potu mo potu. 8Ko e selupimi ‘e taha mei he potu ko ē, pea ko e selupimi ‘e taha mei he potu ko ē: ‘io, na‘a ne ngaohi ‘a e ongo selupimi ke sino taha mo e hōifua‘anga ‘o tu‘u ‘i potu mo potu. 9Pea na‘e tu‘u ‘a e ongo selupimi kuo mafola ‘i ‘olunga hona kapakau, ‘o fakamalu ‘aki ‘a e hōifua‘anga; pea na‘a na fehāngaaki, pea na hanga foki ki he hōifua‘anga.
Ko e Ngaohi ‘o e Tēpile Tuku‘anga Mā Feilaulaú
(‘Eki 25.23-30)
10Pea ne ngaohi ‘a e Tēpile ‘aki ‘a e papa sitimi: ko e kiupite ‘e ua hono lōloa, pea ko e kiupite ‘e taha hono māukupu, pea ko e kiupite ‘e taha mo e haafe hono mā‘olunga: 11pea na‘a ne ‘aofi ‘aki ia ‘a e koula haohaoa, pea ne ngaohi hano teuteu koula takatakai. 12Pea ne ngaohi hano kiato takatakai, ko e ‘aofi nima ‘e taha hono laulahi, pea ne ‘ai ha teuteu koula ‘o takatakai ki he kiato. 13Pea ne haka ki ai ha kavei koula ‘e fā, ‘o ne ‘ai ‘a e ngaahi kavei ki he tuliki ‘e fā ‘oku ‘i hono va‘e ‘e fā. 14Na‘e tu‘u ‘a e ngaahi kavei fe‘unga mo e kiato ko e ngaahi ‘ainga ha‘amo ke kauala ‘aki ‘a e tēpile. 15Pea ne ngaohi ‘a e kaufata ‘aki ‘a e ‘akau sitimi, ‘o kofu ‘aki ‘a e koula, ke kauala ‘aki ‘a e tēpile. 16Pea ne ngaohi ‘a e nāunau ke tu‘u ‘i he funga tēpile, hano ngaahi tisi, mo hano ngaahi tatā, mo hano ngaahi ipu, mo hano ngaahi sioki ke fai‘aki ‘a e fakatau kava: na‘e ngaohi ‘aki ‘a e koula haohaoa.
Ko e Ngaohi ‘o e Tu‘unga Māmá
(‘Eki 25.31-40)
17Pea ne ngaohi ‘a e Tu‘unga Maama ‘aki ‘a e koula haohaoa: na‘a ne ngaohi tuki pē ‘a e tu‘unga maama; ‘a hono tu‘unga, mo hono sino: ko hono ngaahi matala, ko hono ngaahi tangitangi, mo hono ngaahi lūpū, na‘a nau sino taha ai pē mo ia. 18Pea na‘e ‘alu atu mei hono tafa‘aki ‘a e va‘a ‘e ono; ko e va‘a ‘e tolu ‘o e maama na‘e tu‘u mei he potu ‘e taha, pea ko e tolu mei he potu ‘e taha: 19na‘e tu‘u ‘i he va‘a ‘e taha ‘a e ipu ‘e tolu hangē ko e matala‘i ‘ai, tangitangi mo lūpū; pea mo ha tolu‘i ipu hangē ko e matala‘i ai ‘i he va‘a ‘e taha, tangitangi mo lūpū: pehē ‘a e va‘a ‘e ono ‘oku ‘alu atu mei he maama. 20Pea na‘e tu‘u ‘i he sino‘i maama ha faa‘i ipu faka-e-matala‘i-‘ai, ‘a hono ngaahi tangitangi mo hono ngaahi lūpū. 21Pea ko e me‘a ki he va‘a ‘e ono ‘oku ‘alu atu mei he sino‘i maama, na‘e tu‘u ha tangitangi ‘e taha ‘i he lalo va‘a ‘e ua, kae taha ai pē mo ia, mo e tangitangi ‘e taha ‘i he lalo va‘a ‘e ua ‘o taha ai pē mo ia, mo e tangitangi ‘e taha ‘i he lalo va‘a ‘e ua, kae taha ai pē mo ia. 22Ko hono ngaahi tangitangi mo hono ngaahi va‘a na‘e taha ai pē kotoa pē, ‘o tuki taha pē ‘i he koula haohaoa. 23Pea ne ngaohi hono ngaahi nge‘esi maama, ko e fitu, mo hono ngaahi helekosi, mo hono ngaahi ‘ainga malala, ko e koto koula haohaoa pē. 24Na‘a ne ngāue‘aki ha taleniti koula haohaoa ‘i he‘ene ngaohi ia mo hono nāunau kotoa.
Ko e Ngaohi ‘o e ‘Ōlita Tutu‘anga ‘Inisēnisí
(‘Eki 30.1-5)
25Pea na‘a ne ngaohi ‘a e ‘ōlita Tutu‘anga-‘inisēnisi ‘aki ‘a e papa sitimi; ko e kiupite hono lōloa, pea ko e kiupite hono māukupu: na‘e tapafā; pea ko e kiupite ‘e ua hono mā‘olunga; pea ko hono ngaahi nifo na‘e sino taha pē mo ia. 26Pea na‘a ne ‘aofi ‘aki ia ‘a e koula haohaoa, ‘a hono funga mo hono ngaahi tafa‘aki, pea mo hono ngaahi nifo; pea na‘a ne ngaohi ki ai ha teuteu koula takatakai. 27Pea na‘a ne ngaohi ki ai ha kavei koula ‘e ua, ‘i he lalo teuteu, ‘i he ongo kiato na‘e tu‘u ‘i he ongo tafa‘aki, mo‘o ‘ainga kaufata ke kauala ‘aki. 28Pea na‘a ne ngaohi ‘a e kaufata ‘aki ‘a e ‘akau sitimi, ‘o ne kofu ‘aki ‘a e koula.
Ko e Ngaohi ‘o e Lolo Pani Toputapú moe ‘Inisēnisí
(‘Eki 27.1-8)
29Pea na‘a ne ngaohi ‘a e Lolo tapu ke fai‘aki ‘a e pani, pea mo e ‘inisēnisi namu kakala mo ma‘a: ko e ngāue ‘a e tangata faiva kakala.
Currently Selected:
KO ‘EKISOTO 37: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
