KO ‘EKISOTO 38
38
Ko e Ngaohi ‘o e ‘Ōlita Fai‘anga Feilaulau Tutu
(‘Eki 27.1-8)
1PEA na‘a ne ngaohi ‘a e ‘ōlita ki he feilaulau tutu ‘aki ‘a e papa sitimi: ko hono lōloa ko e kiupite ‘e nima, pea ko e kiupite ‘e nima hono māukupu: na‘e tapafā; pea ko e kiupite ‘e tolu hono mā‘olunga. 2Pea na‘a ne ngaohi hono ngaahi nifo ke tu‘u ‘i hono funga tuliki ‘e fā; na‘e sino taha mo ia hone ngaahi nifo: pea na‘a ne ‘aofi kapa. 3Pea na‘a ne ngaohi ‘a e ngaahi nāunau kehekehe ‘o e ‘ōlita, ‘a e ngaahi kane, ‘a e ngaahi huo lafalafa, ‘a e ngaahi pēsoni, ‘a e ngaahi huhu, ‘a e ngaahi ‘ainga malala: na‘a ne ngaohi kapa hono nāunau kotoa. 4Pea na‘a ne ngaohi ki he ‘ōlita ha tu‘unga vangavanga kapa, hangē ko e mata ‘o e kupenga ‘i hono lalo takai ‘o vaeuamālie hake. 5Pea ne haka ha kavei ‘e fā ki he tuliki ‘e fā ‘o e tu‘unga vangavanga kapa, mo‘o ‘ainga kaufata. 6Pea ne ngaohi ‘a e kaufata ‘aki ‘a e ‘akau sitimi, ‘o ne kofu ‘aki ‘a e kapa. 7Pea ne velo ‘a e ongo kaufata ki he ngaahi kavei ‘i he tafa‘aki mo e tafa‘aki ‘o e ‘ōlita ke kauala ‘aki; na‘a ne ngaohi ia ‘aki ‘a e ngaahi laupapa, ‘o ava ‘i loto.
Ko e Ngaohi ‘o e Pālutu‘anga Kapa
(‘Eki 30.18)
8Pea na‘a ne ngaohi kapa ‘a e Pālutu‘anga, mo hono Tu‘unga ko e kapa foki; na‘e fai‘aki ‘a e ngaahi sio‘ata ‘a e kongakau fefine, ‘a ia na‘a nau fakataha ki he matapā ‘o e Tēniti Fe‘iloaki‘anga.
Ko e Loto‘ā ‘o e Tāpanekale ‘Afio‘anga ‘o Sihová
(‘Eki 27.9-19)
9Pea na‘a ne ngaohi ‘a e Loto‘ā: ko e me‘a ki hono fa‘ahi ki he Tonga ‘o e loto‘ā (‘a e fakato‘omata‘u), ko e lulu ‘o e loto‘ā na‘e lalanga ‘aki ‘a e vavae hinehina kuo filo; ko hono lōloa, fua kiupite, ko e teau. 10Ko hono ngaahi tokotu‘u na‘e uofulu, pea ko honau ngaahi tu‘unga na‘e uofulu, ko e kapa pē; ko e siliva ‘a e ngaahi tautau‘anga ‘i he ngaahi tokotu‘u, pea mo honau ngaahi ‘akau fakakava. 11Pea ko e fa‘ahi tokelau na‘e teau ‘i he fua kiupite; na‘e uofulu hono ngaahi tokotu‘u, pea uofulu honau tu‘unga, ko e kapa pē; kae siliva ‘a e ngaahi tautau‘anga ‘i he ngaahi tokotu‘u, pea mo honau ngaahi ‘akau fakakava. 12Pea ‘i he feitu‘u ki lulunga ko e lulu tupenu na‘e nimangofulu ‘i kiupite; na‘e hongofulu hono ngaahi tokotu‘u, pea hongofulu honau ngaahi tu‘unga; pea ko e ngaahi tautau‘anga ‘i he tokotu‘u, mo honau ‘akau fakalava na‘e siliva. 13Pea ko e mata ‘o e loto‘ā ki he hopo‘anga la‘ā, na‘e kiupite ‘e nimangofulu. 14Na‘e lulu tupenu ‘a e kiupite ‘e hongofulu mā nima ‘i he pala‘ā ko ē; ko hono tokotu‘u na‘e tolu, pea ko honau tu‘unga na‘e tolu: mo e pala‘ā ko ē foki: 15‘i he tafa‘aki ko ē mo ē ‘o e matapā, ‘o e loto‘ā, na‘e lulu tupenu ‘a e kiupite ‘e hongofulu mā nima: na‘e tolu hono tokotu‘u, pea tolu honau tu‘unga. 16Ko e tupenu kotoa na‘e lulu ‘aki ‘a e loto‘ā na‘e lalanga ‘aki ‘a e vavae hinehina kuo filo. 17Pea ko e ngaahi tu‘unga ‘o e ngaahi tokotu‘u na‘e kapa; kae siliva ‘a e ngaahi tautau‘anga ‘i he ngaahi tokotu‘u, mo honau ngaahi ‘akau fakakava; pea siliva mo e teunga ‘o e ngaahi funga tokotu‘u; ‘io, na‘e siliva ‘a e ngaahi ‘akau fakalava ‘o e ngaahi tokotu‘u kotoa pē ‘o e loto‘ā. 18Pea ko e puipui ‘o e matapā ‘o e loto‘ā ko e ngāue ‘a e tuitui poto; na‘e ngaohi ‘aki ‘a e lanu langi, mo e kula-po‘upo‘uli, mo e kula-‘aho‘aho mo e vavae hinehina kuo filo: pea ko hono lōloa ko e kiupite ‘e uofulu, pea ko hono mā‘olunga, ‘a ia ko e māukupu, ko e kiupite ‘e nima, ‘o tatau mo e tupenu lulu ‘o e loto‘ā. 19Pea ko hono tokotu‘u na‘e fā, pea fā honau tu‘unga, ko e kapa; ka ko honau ngaahi tautau‘anga ko e siliva, pea ko e teuteu ‘o e funga tokotu‘u mo e ‘akau fakalava na‘e siliva. 20Pea ko e ngaahi fa‘o ‘o e Tāpanekale mo e ‘ā ‘o e Loto‘ā na‘e kapa.
21Ko hono fatu eni ‘o e ngaahi me‘a ‘o e Tāpanekale, ‘a e Tāpanekale Fakamo‘oni‘anga, ‘a ia na‘e lau ‘i he fekau ‘a Mōsese, ‘o fai ‘e he kau Līvai kae angi ‘a ‘Ītama ko e foha ‘o ‘Ēlone ko e taula‘eiki.
22Pea ko Pesalili ko e foha ‘o ‘Uli, ko e foha ‘o Hua, mei he matakali ‘o Siuta, ko ia ia na‘a ne ngaohi ‘a e ngaahi me‘a na‘e tu‘utu‘uni ‘e he ‘Eiki kia Mōsese. 23Pea na‘e tokoni ki ai ‘a ‘Aholiapi, ko e foha ‘o ‘Ahisamaki, mei he matakali ‘o Tani, ko e tokotaha tufunga maka, mo lalanga me‘a pulepule, mo tuitui poto, he fai‘aki ‘a e lanu langi, mo e kula po‘upo‘uli, mo e kula-‘aho‘aho, mo e vavae hinehina.
24Ko e lau ‘o e koula na‘e ngāue‘aki ‘i he ngaahi me‘a kehekehe ‘o e Fale Tapu, ‘io, ‘a e koula na‘e tākalo ‘aki, ko e taleniti ‘e uofulu mā hiva, mo e sikeli ‘e fitungeau mā tolungofulu (ko e lau ki he sikeli ‘o e Fale Tapu). 25Pea ko e siliva ‘a e kakai ‘o e fakataha na‘e lau, ko e taleniti ‘e teau, pea mo e sikeli ‘e taha afe mā fitungeau mā fitungofulu mā nima (ko e lau ki he sikeli ‘o e Fale Tapu); ko e peka ki he ‘ulu: (ko e haafe sikeli ia, lau ki he sikeli ‘o e Fale Tapu):#‘Eki 30.11-16 26ko e tu‘utu‘uni ia ki he tangata takitaha na‘e laka atu ki he kakai kuo ‘osi lau, ‘o kamata mei he uofulu ta‘u ‘o fai hake, ko e toko ono kilu mā tolu afe mā nimangeau mā nimangofulu.#Māt 17.24 27Pea ko e teau‘i taleniti siliva, na‘e tuku ia ke haka ‘aki ‘a e ngaahi tu‘unga ‘o e Fale Tapu, pea mo e ngaahi tu‘unga ‘o e Tatau; ko e tu‘unga ‘e teau ki he taleniti ‘e teau, ‘o taki taleniti ‘a e tu‘unga. 28Pea ko e taha afe mā fitungeau mā fitungofulu mā nima, na‘a ne ngaohi ‘aki ‘a e ngaahi tautau‘anga ‘i he tokotu‘u, ‘o ne teuteu ‘aki honau funga, mo ngaohi ‘aki honau ‘akau fakakava. 29Pea ko e kapa na‘e tākalo ‘aki na‘e fe‘unga mo e taleniti ‘e fitungofulu, pea mo e sikeli ‘e ua afe mā fāngeau. 30Pea na‘a ne ngaohi ‘aki ia ‘a e ngaahi tu‘unga ‘o e mata Tēniti Fe‘iloaki‘anga, pea mo e ‘ōlita Kapa, pea mo e tu‘unga kapa vangavanga na‘e ‘i ai, pea mo e nāunau kehekehe ‘o e ‘ōlita, 31pea mo e ngaahi tu‘unga ‘o e loto‘ā takatakai, pea mo e ngaahi tu‘unga ‘o e matapā ‘o e loto‘ā, pea mo e ngaahi fa‘o ‘o e Tāpanekale, pea mo e ngaahi fa‘o ‘o e loto‘ā takatakai.
Currently Selected:
KO ‘EKISOTO 38: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
