KO ‘EKISOTO 39
39
Ko e Ngaohi ‘o e ngaahi Teunga ‘o e Kau Taula‘eikí
(‘Eki 28.1-14)
1PEA ko e me‘a lanu langi mo kula-po‘upo‘uli mo kula-‘aho‘aho, na‘a nau ngaohi ‘aki ia ‘a e ngaahi kofu mālohi ke fai ngāue‘aki ‘i he Potu Tapu; pea na‘a nau ngaohi ‘aki ‘a e ngaahi kofu tapu ‘a ia na‘e tu‘utu‘uni mo‘o ‘Ēlone; hangē ko e fekau ‘a e ‘Eiki kia Mōsese.
2Pea na‘a ne ngaohi ‘a e ‘ēfoti ‘aki ‘a e koula, me‘a lanu langi, mo e kula-po‘upo‘uli, mo e kula-‘aho‘aho, mo e vavae hinehina kuo filo. 3Pea na‘a nau tuki lau‘i koula ke manifi, ‘o nau tohi ke auiiki, ke pule‘i ‘aki ‘a e lanu langi mo e kula-po‘upo‘uli, mo e kula-aho‘aho, mo e vavae hinehina; ko e fai ‘e he tangata lalanga me‘a pulepule. 4Na‘a nau ngaohi fakauma ki ai; na‘e fakahoko ‘aki hono ongo potu. 5Pea ko e No‘o-pulepule ‘o e faka‘ēfoti, ‘a ia ‘oku fakaheka mei tu‘a, na‘e sino taha mo ia; tatau pē hono ngaohi ‘aki ‘a e koula, lanu langi, mo e kula-po‘upo‘uli, mo e kula-‘aho‘aho, mo e vavae hinehina kuo filo: ‘o hangē ko e tu‘utu‘uni ‘a e ‘Eiki kia Mōsese. 6Pea na‘a nau ngaohi ‘a e ongo maka-‘ōnike, ko honau ‘ainga ko e filo koula kuo fai, ‘o tongi hangē ko e tongi ‘o ha sila, ke hā ai ‘a e ngaahi hingoa ‘o e ngaahi foha ‘o ‘Isileli. 7Pea ne ‘ai ia ki he funga fakauma ‘o e ‘ēfoti, mo‘o maka fakamanatu ki ha‘a ‘Isileli; ‘o hangē ko e tu‘utu‘uni ‘a e ‘Eiki kia Mōsese.
Ko e Ngaohi ‘o e Sifá
(‘Eki 28.15-30)
8Pea na‘a ne ngaohi ‘a e sifa, ko e fai ‘e he tangata lalanga me‘a pulepule, ‘o hangē ko e ngaohi ‘o e ‘ēfoti, ‘aki ‘a e koula, lanu langi, mo e kula-po‘upo‘uli, mo e kula-‘aho‘aho, mo e vavae hinehina kuo filo. 9Na‘e tapafā ia; na‘a nau pelu ua ‘a e sifa: ko e hanga hono lōloa, pea ko e hanga hono māukupu ‘i hono pelu ua. 10Pea na‘a nau fonofono ‘aki ha ‘otu makakoloa ‘e fā: ko ha ‘otu–ko ha sātio, ha tōpasi, mo ha ‘emalata; ko e ‘uluaki ‘otu ia. 11Pea ko hono ua ‘o e ‘otu, ko ha kapukeli, ha sāfaia, mo ha pelili. 12Pea ko hono tolu ‘o e ‘otu ko ha siasini, ha ‘ākete, mo ha ‘ametisi. 13Pea ko hono fā ‘o e ‘otu, ko ha kalisolaite, mo ha maka-‘ōnike, pea mo ha siasipa: na‘e takai ‘aki ha filo koula kuo fai mo‘onau fonofononga. 14Pea ko e ngaahi maka ko ia na‘e fakatatau ki he ngaahi hingoa ‘o e fānau ‘a ‘Isileli, ko e hongofulu mā ua, ‘o fakatatau ki he hingoa ‘onautolu; na‘e tu‘u ma‘a e matakali ‘e hongofulu mā ua, ‘o takitaha hono hingoa kuo tongitongi hangē ha sila. 15Pea na‘a nau ngaohi ki he potu ‘olunga ‘o e Sifa ha ongo ki‘i tau kuo fai hangē ha afo ‘aki ‘a e koula haohaoa. 16Pea na‘a nau ngaohi ha ongo ‘ainga koula, pea mo e ongo mama koula; pea na‘a nau ‘ai ‘a e ongo mama ki he ongo taupotu ‘o e Sifa. 17Pea na‘a nau tau ‘a e ongo afo koula ki he ongo mama ‘i he ongo taupotu ‘o e Sifa. 18Pea ko e ongo potu ‘o e ongo afo na‘a nau tau ki he ongo ‘ainga, pea na‘a nau ‘ai ia ki he ongo fakauma ‘o e ‘ēfoti, ‘i hono potu ki mu‘a. 19Pea na‘a nau ngaohi ha ongo mama koula, ‘o ‘ai ki he ongo taupotu ‘o e Sifa ‘i hono tapa ki loto ki he ‘ēfoti. 20Pea na‘a nau ngaohi ha ongo mama koula, ‘o ‘ai ki he ongo fakauma ‘o e ‘ēfoti, ‘i hono potu ki ‘ao ka ‘i lalo, pea ofi ki hono fakahoko, pea ‘i ‘olunga ‘i he No‘o-pulepule ‘o e ‘ēfoti. 21Pea na‘a nau fakama‘u ‘a e sifa ‘aki hono ongo mama ki he ongo mama ‘o e ‘ēfoti ‘aki ha loufau lanu langi, koe‘uhi ke tu‘u ‘a e sifa ‘i he funga No‘o-pulepule, ‘o ‘oua ‘e mavahe mei he ‘ēfoti; ‘o hangē ko e tu‘utu‘uni ‘a e ‘Eiki kia Mōsese.
Ko e Ngaohi ‘o e ngaahi Teunga Kehe ‘o e Kau Taula‘eikí
(‘Eki 28.31-43)
22Pea na‘a ne ngaohi ‘a e Kofu-tōtōlofa ‘o e ‘ēfoti ‘aki ‘a e me‘a lanu langi, hono kotoa, ko e ngāue ‘a e tangata lalanga; 23mo e ava ‘o e kofu ‘i loto, hangē ko e ava ‘o ha kofu tau; ko ha tepi takatakai ki he ava, na‘a mahae. 24Pea na‘a nau tā ‘i he kapa‘i kofu ‘i lalo ha ngaahi pomikānite, ‘aki ‘a e lanu langi, mo e kula-po‘upo‘uli, mo e kula-‘aho‘aho kuo filo. 25Pea na‘a nau ngaohi ha ngaahi fafangu ‘aki ‘a e koula haohaoa, ‘o nau tau ‘a e ngaahi fafangu ‘i he vaha‘a ‘o e ngaahi pomikānite takatakai; 26ko ha fafangu mo ha pomikānite, ko ha fafangu mo ha pomikānite, ‘i he kapa‘i kofu takatakai, ke fai‘aki ‘ene ngāue fakalotu; ‘o hangē ko e tu‘utu‘uni ‘a e ‘Eiki kia Mōsese.
27Pea na‘a nau ngaohi ‘a e ngaahi sote tupenu, ko e ngāue ‘a e tangata lalanga, mo‘o ‘Ēlone mo hono ngaahi foha; 28pea mo e tatā tupenu, pea mo e ngaahi fa‘u tupenu, pea mo e ngaahi talausese tupenu ‘aki ‘a e vavae hinehina kuo filo; 29pea na‘a nau ngaohi ‘a e No‘o ‘aki ‘a e vavae hinehina kuo filo, mo e me‘a lanu langi, mo e kula-po‘upo‘uli, mo e kula-‘aho‘aho; ko e ngāue ‘a e tuitui poto; ‘o hangē ko e tu‘utu‘uni ‘a Sihova kia Mōsese. 30Pea na‘a nau ngaohi ‘aki ‘a e koula haohaoa ‘a e lau‘i me‘a ‘o e kalauni tapu, ‘o nau tohi ai ha tohi ‘o hangē ko e tongi ‘o ha sila, ‘o pehē, TĀPUHĀ KIA SIHOVA. 31Pea na‘a nau tau ki ai ha loufau lanu langi ke ‘ai ki he tatā mei ‘olunga; hangē ko e tu‘utu‘uni ‘a e ‘Eiki kia Mōsese.
Ko e Faka‘osi‘osi ‘o e Ngāué
(‘Eki 35.10-19)
32Pea na‘e toki ‘osi ‘a e ngāue kotoa ‘o e Tāpanekale ‘o e Tēniti Fe‘iloaki‘anga: pea na‘e fai ‘e ha‘a ‘Isileli; ‘o hangē tofu pē ko e tu‘utu‘uni ‘a e ‘Eiki kia Mōsese, na‘e pehē ‘enau fai. 33Pea na‘a nau fetuku mai ‘a e Tāpanekale kia Mōsese, ‘a e Tēniti mo hono nāunau kotoa, ‘a hono ngaahi fakama‘u, ‘a hono holisi, ‘a hono ngaahi kiato, mo hono ngaahi pou, mo hono ngaahi tu‘unga; 34pea mo e ‘u‘ufi kili‘i sipi tangata kuo fakalanukula, mo e fakatefisi kili‘i tutu‘u, pea mo e tatau puipui; 35‘a e ‘A‘ake Fakamo‘oni‘anga, mo hono kaufata, pea mo e Hōifua‘anga; 36‘a e Tēpile, ‘a hono nāunau kehekehe, pea mo e mā-fono; 37‘a e Tu‘unga-maama ma‘a, ‘a hono ngaahi nge‘esi maama, ‘io, ‘a e ngaahi maama ke faka‘otu, pea mo hono nāunau kotoa, kae‘uma‘ā ‘a e lolo ki he maama; 38pea mo e ‘ōlita Koula, mo e Lolo pani, mo e ‘inisēnisi namu kakala, pea mo e puipui ki he matapā ‘o e Tēniti; 39‘a e ‘Ōlita Kapa, mo e tu‘unga kapa vangavanga ‘o‘ona, hono kaufata, mo hono nāunau kehekehe; ‘a e Pālutu‘anga mo hono Tu‘unga; 40‘a e tupenu lulu ‘o e loto‘ā, ‘a hono ngaahi tokotu‘u, mo hono ngaahi tu‘unga, pea mo e puipui ki he matapā ‘o e loto‘ā, ‘a hono ngaahi maea, mo hono ngaahi fa‘o, pea mo e nāunau kotoa pē ke fai‘aki ‘a e ngāue ‘o e Tāpanekale ke hoko ko e Tēniti Fe‘iloaki‘anga; 41‘a e ngaahi kofu mālohi ke fai‘aki ‘a e ngāue ‘i he Potu Tapu, ‘a e ngaahi kofu tapu mo‘o ‘Ēlone ko e Taula‘eiki, pea mo e ngaahi kofu ki hono ngaahi foha ke fai‘aki ‘a e ngāue fakataula‘eiki. 42Hangē tofu pē ko e ngaahi tu‘utu‘uni ‘a e ‘Eiki kia Mōsese, na‘e pehē ‘a e fai ‘e ha‘a ‘Isileli ‘a e ngāue kotoa. 43Pea na‘e vakai ‘e Mōsese ki hono kotoa ‘o e fekau, pea tā kuo nau fai ia; hangē ko e tu‘utu‘uni ‘a Sihova, kuo pehē ‘enau fai: pea na‘e tāpuaki‘i kinautolu ‘e Mōsese.
Currently Selected:
KO ‘EKISOTO 39: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
