KO SĒNESI 37
37
Ko Siosifa mo hono Fanga Tokoua
1KO E tohi eni ‘o e hako ‘o Sēkope. 2Kuo hongofulu mā fitu ta‘u ‘a Siosifa, pea ne fai mo hono ngaahi tokoua ‘a e tauhi manu; pea ko si‘i tamasi‘i na‘a ne kau mo e fānau ‘a Pīla‘a mo e fānau ‘a Sīlipa, ko e ongo uaifi ‘o ‘ene ‘eiki: pea na‘e ha‘u mo Siosifa ki he‘enau ‘eiki honau talakovi‘i.
3Pea na‘e ‘ofa lahi ‘a ‘Isileli kia Siosifa ‘i he‘ene fānau kotoa pē, he ko hono foha ia ka kuo motu‘a: pea na‘a ne ngaohi mo‘ona ha kofu pulepule.#37.3: ha kofu pulepule; pe kofu tuitui teuteu‘i; pe kote lōloa na‘e nima fakahōhōpū. 4Pea ‘i he vakai ‘e hono ngaahi tokoua ‘oku pele ‘aki ia ‘e he‘enau tamai ‘iate kinautolu, na‘a nau fehi‘a kiate ia, pea na‘e ‘ikai te nau fa‘a lea ‘ofa ange.
5Pea na‘e misi ‘a Siosifa, pea ne tala ki hono ngaahi tokoua: pea na‘e ‘āsili ai ‘enau fehi‘a kiate ia. 6He na‘a ne pehē kiate kinautolu. ‘E fanongo mai ki he me‘a kuo u misi ki ai: 7he ko eni, ko kitautolu na‘a tau ha‘i ‘ū koane ‘i he ngoue, pea ‘iloange na‘e malanga hake ‘a e ‘ū koane ‘a‘aku, ‘o ne mātu‘aki tu‘u tonu; pea fakaofo, na‘e hanga ho‘omou ngaahi ‘ū koane, ‘o tu‘u takai, ‘o nau tulolo ki he ‘ū koane ‘a‘aku.
8Pea tali ‘e hono ngaahi tokoua, ‘Io, te ke tu‘i koā kiate kimautolu? pea te ke nofo koā ko homau pule? Pea na‘e fakautuutu ‘enau fehi‘a kiate ia koe‘uhi ko ‘ene ngaahi misi, mo ‘ene ngaahi lea.
9Pea na‘a ne toe misi foki ‘o ne fakahā ki hono ngaahi tokoua, ‘o ne pehē, Ko eni kuo u toe misi, pea ko e la‘ā mo e māhina mo e fetu‘u ‘e hongofulu mā taha na‘a nau tulolo kiate au.
10Na‘a ne tala foki ia ki he‘ene tamai mo hono ngaahi tokoua: pea na‘e valoki‘i ia ‘e he‘ene tamai, ‘o ne pehē ki ai, Ko e hā ‘a e me‘a ko eni kuo ke misi ki ai? Ko e pehē koā ke mau ‘alu atu, ‘a au mo ho‘o fa‘ē mo ho ngaahi tokoua, ‘o mau tulolo ki he kelekele kiate koe? 11Pea meheka kiate ia ‘a hono ngaahi tokoua; ka ka kumuni ‘a e lea ‘e he‘ene tamai.#Ngā 7.9
Ko Hono Fakatau Atu ‘o Siosifa mo Hono ‘Ave ki ‘Isipite
12Pea ‘alu hono ngaahi tokoua ki Sikemi ke fafanga ‘a e fanga manu ‘a ‘enau ‘eiki. 13Pea lea ‘a ‘Isileli kia Siosifa, ‘Ikai ‘oku fai ‘e ho ngaahi tokoua ‘enau fanga manu ‘i Sikemi! ha‘u ‘o fai ‘eku fekau kiate kinautolu.
14Pea ne tali, Ko au eni. Pea ne pehē kiate ia, ‘Ē, ‘alu ‘o vakai pe ‘oku lelei ho ngaahi tokoua, pea lelei mo e fanga manu, pea foki mai mo hano tala kiate au. Ko ia na‘a ne fekau atu ia mei he talalo ‘o Hepeloni, pea ne ‘alu ki Sikemi.
15Pea na‘e fetaulaki mo ia ha tangata, tā ‘oku ne hēhē ‘i he vao: pea ne fehu‘i kiate ia ‘e he tangata, ‘o pehē, Ko e hā ‘oku ke kumi.
16Pea ne pehē, Ko si‘eku kumi hoku ngaahi tokoua: tala mai mu‘a pe ‘oku nau fanga manu ‘i fē?
17Pea tali ‘e he tangata, Kuo nau hiki mei heni; he na‘a ku fanongo ‘oku nau pehē, Tau ō ki Tōtani. Pea tuli atu ‘e Siosifa ki hono ngaahi tokoua, ‘o ne ‘ilo kinautolu ‘i Tōtani.
18Pea ‘i he‘enau sio kiate ia mei he mama‘o, kuo te‘eki ke ne ofi mai, na‘a nau puleaki‘i ke tāmate‘i ia. 19Pea nau fepehē‘aki; Vakai, ko e ‘eiki misi ‘ena ‘oku ha‘u. 20‘Ē, tau tāmate‘i mu‘a, ‘o lī ki ha lepa, pea te tau tala kuo keina ia ‘e ha manu fekai: ka tau vakaia pe ‘e fēfē ‘ene ngaahi misi.
21Pea fanongo ki ai ‘e Lūpeni, pea ne fakahaofi ia meiate kinautolu, he‘ene pehē, ‘Oua na‘a tau ala ki he‘ene mo‘ui. 22Pea lea kiate kinautolu ‘e Lūpeni, ‘Oua ‘e lilingi toto; lī ia ki he lepa na ‘i he toafa, kae ‘oua ‘e ala mālohi kiate ia; koe‘uhi ā, tokua, ka ne fakahaofi ia mei honau nima, ‘o fakafoki ki he‘ene tamai. 23Pea ko ia ‘i he a‘u mai ‘a Siosifa ki hono ngaahi tokoua, na‘a nau to‘o meia Siosifa hono kofu, ‘a e kofu pulepule#37.23: ha kofu pulepule; pe kofu tuitui teuteu‘i; pe kote lōloa na‘e nima fakahōhōpū. kuo ne ‘ai; 24pea nau puke ia ‘o lī ki he lepa: pea na‘e maha ‘a e lepa, ‘o ‘ikai ha vai ‘i ai.
25Pea nau nofo hifo ke kai me‘akai: pea ‘iloange na‘a nau hanga atu ‘o nau vakai, tā ko e fononga ‘Isime‘eli ‘oku ha‘u mei Kiliati, pea ‘oku uta ‘e he‘enau fanga kāmeli ‘a e nekoti mo e paame mo e lātano, ko ‘enau ‘alu ke fetuku ki ‘Isipite. 26Pea lea ‘a Siuta ki hono ngaahi tokoua, ‘o pehē, Neongo te tau tāmate‘i hotau tokoua, ‘o fufū hono toto, ka tala‘ehai te tau ma‘u ai ha me‘a. 27‘Ē, tau fakatau mu‘a ia ki he kau ‘Isime‘eli, pea ‘oua na‘a ala kiate ia ‘e hotau nima; he ko hotau tokoua ia mo hotau sino. Pea na‘e loto ki ai hono ngaahi tokoua. 28Pea na‘e laka atu ha kau tangata Mitiani, ko e kau fakatau; pea nau fusi hake ‘a Siosifa mei he lepa, pea nau fakatau ia ki he kau ‘Isime‘eli ‘aki ha pa‘anga siliva ‘e uofulu, pea nau ‘ave ‘a Siosifa ki ‘Isipite.#Ngā 7.9
29Pea foki ‘a Lūpeni ki he lepa; pea tā ‘oku ‘ikai ‘i ai ‘a Siosifa; pea ne hae hono kofu. 30Pea ne foki ki hono ngaahi tokoua, ‘o ne pehē, Kuo ‘ikai ‘a e tamasi‘i; pea ko au te u ‘alu ki fē?
31Pea nau to‘o ‘a e kofu ‘o Siosifa, ‘o nau tāmate‘i ha kosi tangata, ‘o nau unu ‘a e kofu ki he toto; 32pea na‘a nau fekau atu ‘o ‘ave ‘a e kofu pulepule ki he‘enau ‘eiki; ‘o nau pehē, Kuo mau ‘ilo ‘a e me‘a ni; ke ke vakai mu‘a pe ko e kofu ‘o ho foha pe ‘ikai.
33Pea na‘a ne ‘ilo ia, ‘o ne pehē, Ko e kofu pē ‘o hoku foha; kuo keina ia ‘e ha manu fekai: kuo pau kuo hae ‘a si‘i Siosifa. 34Pea hae ‘e Sēkope hono ngaahi kofu, ‘o ne vala tauanga‘a ‘o ne tēngihia hono foha ‘o ‘aho lahi. 35Pea na‘e tutu‘u kotoa pē hono ngaahi foha mo hono ngaahi ‘ōfefine ke fakafiemālie ki ai: ka na‘e ‘ikai te ne tali ‘enau fakafiemālie; ‘o ne pehē, Ka u ‘alu hifo tangi pē ki hoku foha ki Hētesi. Na‘e pehē hono tēngihia ia ‘e he‘ene ‘eiki.
36Ka ko e kau Mētani na‘a nau fakatau ia ki ‘Isipite, kia Pōtifa ko e ‘ōfisa ‘a Felo, ko e kapiteni ‘o e ka‘ate.
Currently Selected:
KO SĒNESI 37: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
