KO SĒNESI 38
38
Ko Siuta mo Tema
1PEA ‘i he taimi ko ia tokua, na‘e ‘alu hifo ‘a Siuta mei hono ngaahi tokoua, ‘o ne afe atu ki ha motu‘a ‘Atulami na‘e hingoa ko Hila. 2Na‘e mamata ‘e Siuta ‘i he potu ko ia ki he ‘ōfefine ‘o ha tangata Kēnani na‘e hingoa ko Sua‘a: pea ne to‘o ia ‘o ‘alu ki ai. 3Pea ne feitama, ‘o ne fā‘ele‘i ha tama tangata ‘o ne fakahingoa ko ‘Ea. 4Pea ne toe feitama, ‘o ne fā‘ele‘i ha tama tangata; pea ne fakahingoa ia ko ‘Ōnani. 5Pea ne toe fai foki, ‘o fā‘ele‘i ha tama tangata, pea ne fakahingoa ia ko Sela: pea na‘e ‘i Kēsipi ‘a Siuta ‘i he‘ene fā‘ele‘i ia.
6Pea na‘e ma‘u ‘e Siuta ha uaifi mo‘o ‘Ea ko hono ‘uluaki, pea ko e hingoa ‘o e fefine ko Tema. 7Pea ko ‘Ea, ko e ‘uluaki foha ‘o Siuta ko e tangata kovi ia ‘i he ‘afio ‘a Sihova; ko ia na‘e tāmate‘i ia ‘e Sihova. 8Pea lea ‘a Siuta kia ‘Ōnani, ‘Alu koe ki he finemotu‘a ‘a ho ta‘okete, pea ke fai ‘a e tō‘onga ‘a e tokoua ‘o e husepāniti ‘o fokotu‘u ha hako ki ho ta‘okete. 9Ka na‘e ‘ilo ‘e ‘Ōnani ‘e ‘ikai ‘o‘ona ‘a e hako ko ia; pea ko ia ‘i he‘ene ‘alu atu ki he finemotu‘a ‘o hono ta‘okete, na‘a ne hua‘i ia ki he kelekele, koe‘uhi ke ‘oua te ne ‘ange ha hako ki hono ta‘okete. 10Pea na‘e tau kovi ki he finangalo ‘o Sihova ‘a e me‘a kuo ne fai: pea na‘a ne tāmate‘i mo ia foki. 11Pea lea ‘a Siuta kia Tema ko e uaifi ‘o hono foha, ‘Ē, ke ke nofo uitou pē ‘i he fale ‘o ho‘o tamai kae‘oua ke lahi hoku foha ko Sela: ko ‘ene pehē, Na‘a mate foki mo ia, ‘o hangē ko hono ongo ta‘okete. Pea ‘alu ‘a Tema, ‘o nofo ‘i he fale ‘o ‘ene ‘eiki.
12Pea na‘e faifai pea pekia ‘a e ‘ōfefine ‘o Sua‘a, ‘a e uaifi ‘o Siuta; pea kuo malele ‘a e mamahi ‘a Siuta, pea na‘a ne ‘alu hake ki Tīmina ki he‘ene kau kosi sipi, ‘a ia mo hono kaume‘a ko Hila ko e tangata ‘Atulami. 13Pea na‘e fakahā kia Tema, ‘o pehē, Tā ko e tamai ‘a ho ‘unoho ‘oku ‘alu hake ki Tīmina ke fai ‘ene kosi sipi. 14Pea ne hu‘ihu‘i hono ngaahi kofu fakauitou, ‘o ne ‘ai hono pūlou, ‘o ne ‘ufi‘ufi ‘aki, ‘o ne nofo ‘i he matanikolo ‘o ‘Enaimi, ‘a ia ‘oku ‘i he hala ki Tīmina; he na‘a ne vakai kuo lahi ‘a Sela, pea kuo ‘ikai ‘ange ia mōno ‘unoho.
15Pea ‘i he vakai kiate ia ‘e Siuta, na‘a ne mahalo ko e fefine fe‘auaki; koe‘uhi kuo ne pūlou hono mata. 16Pea ne afe ki ai ‘i he hala, ‘o ne pehē, Sī ni, tuku ke u ‘alu atu kiate koe (he na‘e ‘ikai te ne ‘ilo ko e ‘unoho ‘o hono foha). Pea ne tali, Ko e hā te ke foaki mai ka ke ha‘u kiate au?
17Pea ne pehē, Te u ‘atu mei he fanga manu ha ki‘i kosi. Pea pehē ‘e he fefine, Pea te ke tuku mai ha talifaki, kae‘oua ke ke ‘omi ia?
18Pea ne pehē, Ko e hā ha talifaki te u ‘atu? Pea tali ‘e he fefine, Ko ho‘o sila, mo ho‘o kahoa, mo e tokotoko ‘oku ‘i ho nima na. Pea ne ‘ange ki ai, pea ne ‘alu kiate ia, pea ne feitama kiate ia.
19Pea tu‘u hake ‘a e fefine, ‘o ‘alu, ‘o ne hu‘ihu‘i hono pūlou, ‘o ne ‘ai hono kofu fakauitou.
20Pea ‘atu ‘e Siuta ‘a e ki‘i kosi ‘i hono kaume‘a, ko e tangata ‘Atulami, koe‘uhi ke ne ma‘u mai mei he fefine hono talifaki: ka na‘e ‘ikai te ne ‘ilo ia. 21Ko ia na‘a ne fehu‘i ki he kakai ‘o e feitu‘u, ‘o pehē, Ko e fē ‘a e fefine tapu ko ia na‘a ne ‘i ‘Enaimi, ‘i he ve‘ehala ni? Pea nau tali, Na‘e ‘ikai ‘i heni ha fefine tapu.
22Pea na‘a ne foki kia Siuta, ‘o ne pehē, Kuo ‘ikai te u ‘ilo ‘a e fefine; kae‘uma‘ā na‘e tala mai ‘e he kakai ‘o e potu, ‘o pehē, Na‘e ‘ikai ha fefine tapu ‘i ai.
23Pea pehē ‘e Siuta, Tuku ai pe ā ke ne ma‘u ia, na‘a manuki‘i kitaua: Ko eni kuo u ‘atu ‘a e ki‘i kosi ni, pea ko koe na‘e ‘ikai te ke ‘ilo ia.
24Pea ‘i he faifai pea ‘osi nai ‘a e māhina ‘e tolu, na‘e fakahā kia Siuta, ‘o pehē, Kuo fe‘auaki ‘a Tema ko e ‘unoho ‘o ho foha; kae‘uma‘ā kuo ne feitama ‘i he‘ene fe‘auaki. Pea pehē ‘e Siuta, ‘Omi ia kitua‘ā ‘o tutu.
25Pea kuo ‘omi ‘a e fefine kitua‘ā, na‘a ne fekau atu ki he tamai ‘a hono ‘unoho, ‘o pehē, Ko e tangata ‘oku ‘a‘ana ‘a e ngaahi me‘a ni, ko ia ia ‘oku ou feitama ki ai: pea ne pehē foki, Ke ke vakai mu‘a pe ‘oku ‘o hai ‘a e ngaahi me‘a ni, ‘a e sila ni, mo e kahoa, mo e tokotoko.
26Pea ‘ilo ia ‘e Siuta, ‘o ne pehē, ‘Oku ne tonuhia ange ‘iate au, koe‘uhi ā na‘e ‘ikai te u ‘ange ia ki hoku foha ko Sela. Ka na‘e ‘ikai te ne toe fe‘iloaki mo ia.
27Pea ‘i he faifai pea hoko hono taimi fā‘ele, pea tā ko e māhanga, 28pea ‘i he‘ene fā‘ele na‘e ‘ai mai ha nima: pea na‘e hanga ‘a e mā‘uli, ‘o nono‘o ‘aki hono nima ha filo kula, he‘ene pehē, Ko eni ia ‘a e fuofua ha‘u. 29Pea ‘i he‘ene to‘o atu hono nima, ‘iloange na‘e tō mai hono tokoua: pea pehē ‘e he fefine, ko e hā kuo ke motuhi mai? Ke tō kiate koe ho‘o motuhi: ko ia na‘e fakahingoa ai ia ko Felesi (ko Motuhi).#38.29 Felesi; Ko e ‘uhinga ‘o e hingoá ni ‘i he faka-Hepeluú ko e “motuhi mai, ‘oho mai”. 30Pea hili ia na‘e tō mai hono tokoua, ‘a ia na‘e ‘i hono nima ‘a e filo kula: pea na‘e fakahingoa ia ko Sala.#38.30 Sala; ‘Oku vāofi ‘a hono pu‘aki ‘o e hingoá ni mo e kulokula e langi he mafoa ‘a e atá he hengihengí.
Currently Selected:
KO SĒNESI 38: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
