LEVITIKO 13
13
Ko e ngaahi Lao ‘o Kau ki he ngaahi Mahaki Kili
1PEA folofola ‘a Sihova kia Mōsese mo ‘Ēlone, ‘o pehē, 2Ka ai ha tangata ‘oku hā ‘i he kili ‘o hono kakano ha ki‘i pupula, pe ha mongumangu, pe tane hina, ‘o fai atu ‘i he kili ‘o hangē ko e tā ‘e he kilia, pea ‘e toki ‘omi ia kia ‘Ēlone ko e taula‘eiki, pe ki ha taha ‘o hono ngaahi foha ‘oku taula‘eiki. 3Pea ‘e vakai ‘e he taula‘eiki ki he tā kuo hoko ki he kili ‘o hono kakano; pea kapau kuo hina ‘a e fulufulu ‘i he potu kuo taa‘i, pea kapau ‘oku matamata loloto hifo ‘i he kili-kakano, tā ko e mahaki kilia; pea ‘e hanga ki ai ‘a e taula‘eiki, ‘o ne tala ‘oku ne ta‘ema‘a. 4Pea kapau ‘oku hinehina ‘a e tane ‘i he kili ‘o hono kakano, ka ‘oku matamata ‘ikai loloto hifo ‘i he kili, pea ‘oku ‘ikai fakahinehina mai hono fulufulu, pea ‘e toki tāpuni ‘e he taula‘eiki ‘a ia kuo te‘ia, ‘o ‘aho fitu; 5pea ‘e vakai ia ‘e he taula‘eiki ‘i hono fitu ‘o e ‘aho, pea ka ‘iloange ‘oku hā kiate ia kuo ngata ‘a e mahaki, ‘o ‘ikai mafola ‘i he kili, pea ‘e toe tāpuni ia ‘e he taula‘eiki ‘o ‘aho fitu; 6pea ‘i hono ‘aho fitu ‘e toe vakai ia ‘e he taula‘eiki; pea ka ‘iloange ‘oku mamate ‘a e hangatāmaki, pea kuo ‘ikai mafola ‘i he kili, pea ‘e tala ‘e he taula‘eiki kuo ne ma‘a; tā ko e mongumangu pē: pea te ne fō hono kofu, ‘o ‘alu ma‘a pē. 7Ka ‘o kapau kuo mātu‘aki mafola ‘a e mongumangu ‘i he kili, hili ‘ene ‘alu ki he taula‘eiki ke fakama‘a, te ne toe ‘alu ki he taula‘eiki; 8pea ‘e vakai ia ‘e he taula‘eiki, pea ka ‘iloange kuo mafola ‘a e mongumangu ‘i he kili, pea ‘e tala ‘e he taula‘eiki ‘oku ne ta‘ema‘a: ko e kilia ia.
9Ka taa‘i ha tangata ‘aki ‘a e kilia, ‘e ‘omi ia ki he taula‘eiki. 10Pea ‘e vakai ia ‘e he taula‘eiki; pea ka ‘iloange ‘oku ai ha pupula hina ‘i he kili, pea kuo fakahinehina ai ‘a e fulufulu, pea hā ‘i he pala ha kakano‘i hangatāmaki, 11tā ko ha kilia fuoloa ia ‘i he kili ‘o hono kakano; pea ‘e tala ‘e he taula‘eiki ‘oku ne ta‘ema‘a: ‘e ‘ikai te ne tāpuni ia, he ko e ta‘ema‘a. 12Ka ‘o kapau ‘e mātu‘aki tupu ‘a e hangatāmaki ‘i hono kili, pea tofu ‘a e kili ‘o e mahaki ‘i he kilia, mei he ‘ulu ki he va‘e, neongo ‘oku tūkuingata ‘e he taula‘eiki ‘ene ‘eke; 13‘io, ka vakai ‘e he taula‘eiki pea tā kuo tofu hono sino ‘i he kilia, pea te ne toki tala ki he mahaki ‘oku ne ma‘a: kuo fakakili-hina hono kotoa: ko e toko taha ma‘a ia. 14Ka ‘oka hā ai ha kakano‘i hangatāmaki, kuo ne ta‘ema‘a leva. 15Pea ‘e vakai ‘e he taula‘eiki ‘a e kakano‘i hangatāmaki, pea te ne tala ko e ta‘ema‘a ia: ‘oku ta‘ema‘a ‘a e kakano‘i hangatāmaki; ko e kilia. 16Pea ka liliu foki ‘a e kakano‘i hangatāmaki ‘o fakakili-hina mai, pea te ne ha‘u ki he taula‘eiki: 17pea ka vakai ‘e he taula‘eiki, pea tā kuo fakakili-hina mai ‘a e hangatāmaki, pea ‘e fakama‘a ‘ia ‘e he taula‘eiki ‘a e mahaki: ko e ma‘a leva ia.
18Pea ka ai ha pala ‘i he kili, pea kuo mo‘ui, 19pea ka hā ‘i he potu na‘e tu‘u ai ‘a e pala ha ki‘i pupula ‘oku hina, pe ha tane ‘oku hina ‘o meimei kulokula, pea ‘e fakahā ki he taula‘eiki; 20pea ka vakai ‘e he taula‘eiki, pea tā kuo matamata ‘asi ki loto ‘i he kili, pea kuo fakahinehina ‘a e fulufulu ‘oku ‘i ai, pea ‘e tala ki ai ‘e he taula‘eiki ‘oku ne ta‘ema‘a: ko e mahaki kilia ia kuo tupu ‘i he pala. 21Ka ‘o kapau kuo vakai ki ai ‘e he taula‘eiki, pea tā ‘oku ‘ikai ke tu‘u ai ha fulufulu hina, pea ‘oku ‘ikai ‘asi ki loto ‘i he kili, pea ‘oku mamate, pea ‘e toki tāpuni ia ‘e he taula‘eiki, ‘o ‘aho fitu; 22pea ka mafola lahi ‘i he kili, pea ‘e toki tala ki ai ‘e he taula‘eiki ‘oku ne ta‘ema‘a: ko e mala ia. 23Ka ‘o kapau kuo ngata ‘a e tane, ‘o ‘ikai mafola, tā ko e patepate pē ‘o e pala; pea ‘e tala ki ai ‘e he taula‘eiki ‘oku ne ma‘a.
24Pea kapau ko ha sino ‘oku tu‘u ‘i hono kili ha mōfia, pea kuo hā ‘i hono kakano ha pate‘i me‘a hinehina-kulokula, pe hinehina ‘aupito; 25pea ka vakai ki ai ‘e he taula‘eiki, pea tā ‘oku fakahinehina mai ‘a e fulufulu ‘i he pate‘i me‘a, pe ‘oku matamata loloto hifo ‘i he kili; ko e kilia ia: kuo tupu ia ‘i he mōfia: pea ‘e tala ki ai ‘e he taula‘eiki ‘oku ne ta‘ema‘a: ko e mala ia ko e kilia. 26Ka ‘o kapau ‘e vakai ki ai ‘e he taula‘eiki, pea tā ‘oku ‘ikai ha fulufulu hina ‘i he pate‘i me‘a, pea ‘oku ‘ikai ‘asi ki loto ‘i he kili, pea ‘oku mamate pē; pea ‘e toki tāpuni ia ‘e he taula‘eiki ‘o ‘aho fitu. 27Pea ‘e vakai ia ‘e he taula‘eiki ‘i hono ‘aho fitu: kapau kuo mafola lahi ia ‘i he kili, te ne toki tala ki ai kuo ne ta‘ema‘a: ko e tā ia ko e kilia. 28Ka ‘o kapau ‘e ngata ai ‘a e pate‘i me‘a; kuo ‘ikai mafola ia ‘i he kili, ka kuo mamate; tā ko e pupula pē ‘o e mōfia; pea ‘e tala ki ai ‘e he taula‘eiki ‘oku ne ma‘a: he ko e patepate pē ‘o e mōfia.
29Pea ka ai ha tangata pe fefine ‘oku ai ha hangatāmaki ‘i hono ‘ulu pe kava; 30pea ka vakai ‘a e hangatāmaki ‘e he taula‘eiki, pea tā ‘oku matamata loloto hifo ‘i he kili, pea ‘i ai ha feitu‘u lau ‘oku kenekena mo hikuhikumate; pea ‘e fakahā ‘e he taula‘eiki ki ai ‘oku ne ta‘ema‘a ko e kamā ia: ko e kilia ia ‘i he ‘ulu pe ko e kava. 31Pea ka vakai ‘e he taula‘eiki ki he kamā, pea tā ‘oku matamata ‘ikai ke loloto hifo ‘i he kili, pea ‘oku ‘ikai ha lau kenekena ‘i ai; pea ‘e toki tāpuni ‘e he taula‘eiki ‘a e mahaki kamā ‘o ‘aho fitu. 32Pea ‘i hono ‘aho fitu, ka vakai ‘e he taula‘eiki, tā kuo ‘ikai mafola ‘a e kamā, pea ‘oku ‘ikai ‘i ai ha lau kenekena, pea ‘oku ‘ikai ke matamata loloto ‘a e kamā ‘i he kili, 33pea ‘e toki fakatekefua ia, kae ‘ikai tele ‘a e kamā; pea ‘e tāpuni ‘e he taula‘eiki ‘a e mahaki kamā, ‘o toe ‘aho fitu ange. 34Pea ka vakai ‘a e kamā ‘e he taula‘eiki ‘i hono ‘aho fitu, pea tā kuo ‘ikai mafola ‘i he kili, pea ‘oku ‘ikai ke matamata loloto hifo ‘i he kili; pea ‘e toki tala ki ai ‘e he taula‘eiki kuo ne ma‘a; pea te ne fō hono kofu, ‘o ‘alu ma‘a ai. 35Ka ‘o kapau kuo mafola lahi ‘a e kamā ‘i he kili, hili hono fakama‘a ko ia; 36pea ka vakai ki ai ‘e he taula‘eiki, pea tā kuo mafola ‘a e kamā ‘i he kili, ‘e ‘ikai te ne ongosia kumi ki he lau kenekena; kuo ta‘ema‘a leva. 37Ka ‘o kapau ‘oku hā kiate ia kuo ngata ‘a e kamā, pea kuo tupu ai ha lau ‘uli‘uli, kuo mo‘ui ‘a e kamā; ‘oku ne ma‘a: pea ‘e tala ki ai ‘e he taula‘eiki kuo ne ma‘a.
38Pea ka ai ha tangata pe fefine, ‘a ia ‘oku tu‘u ‘i he kili ‘o hono kakano ha ngaahi tane, ko e ngaahi tane-hina; 39pea ka vakai ki ai ‘e he taula‘eiki, pea tā ko e ngaahi tane ‘i he kili ‘oku ‘ikai ke hinehina fau; tā ko e ‘ufi pē kuo tupu ‘i hono kili; ‘oku ma‘a ‘a e tokotaha ko ia.
40Pea ko e tangata kuo ngangana hono lau ko e tula pē ia: ‘oku ma‘a ‘a e toko taha ko ia. 41Pea kapau kuo mole hono lau mei mu‘a, ko e la‘e tula pē: ‘oku ma‘a ‘a e toko taha ko ia. 42Ka ‘o kapau ‘oku hā ‘i he tula, pe ko e mui‘ulu pe ko e la‘e, ha hangatāmaki hinehina-kulokula; ko e kilia ia kuo tupu ‘i hono tula, ‘a e mui‘ulu pe ko e la‘e. 43Pea ka vakai ki ai ‘e he taula‘eiki, pea tā ‘oku hinehina-meimei-kulokula ‘a e hangatāmaki ‘i he mui‘ulu pe la‘e ‘oku tula, ‘o tatau mo e ha ‘a e kilia ‘i he sino; 44ko e tangata kilia ia; ‘oku ne ta‘ema‘a: kuo pau ke tala ki ai ‘e he taula‘eiki ‘oku ne ta‘ema‘a; kuo ‘i hono ‘ulu ‘a hono mala.
45Pea ko e kilia ‘oku ‘i ai ‘a e mala, te ne kofu mahae ai pē, pea mafue hono ‘ulu, pea te ne ‘u‘ufi hono ngutu, pea te ne kaila, Ta‘ema‘a! ta‘ema‘a! 46Lolotonga ‘oku ‘iate ia ‘a e mala, te ne ta‘ema‘a; ko e tokotaha ta‘ema‘a ia, te ne nofo toko taha pē: ko e tu‘a ‘apitanga hono nofo‘anga.
47Pea kapau ko e me‘a kofu kuo hoko ki ai ‘a e mala ko e kilia;#13.47 kilia; ‘Oku tatau pē ‘a e faka-Hepelū ‘o e mala ko e kiliá mo e tu‘ungafulufuluá. pe ko e sipi, pe ko e līneni, 48pe ko e filo fokotu‘u, pe ko e filo fakalava, līneni, pe sipi, pe ko e kili‘imanu, pe ko ha me‘a ‘oku ngaohi ‘aki ‘a e kili‘imanu; 49pea kapau ‘oku meimei lanumata, pe meimei kulokula ‘a e mala ‘i he kofu, pe kili‘imanu, pe filo fokotu‘u, pe filo-fakalava, pe nāunau kili‘imanu; ko e mala ia; pea ‘e fakahā ia ki he taula‘eiki. 50Pea ‘e vakai ‘e he taula‘eiki ki he mala, pea te ne tāpuni ‘a e me‘a ‘o ‘aho fitu: 51pea ka vakai ‘e ia ‘a e mala ‘i hono ‘aho fitu, pea kuo mafola ia ‘i he kofu, pe filo-fokotu‘u, pe filo-fakalava, pe kili‘imanu, pe ko e hā fua ‘oku ngāue‘aki ‘a e kili‘imanu ki ai; ko e mala ko ia ko e kilia fakapopo; ‘oku ta‘ema‘a ‘a e me‘a ia. 52Pea te ne hanga ‘o tutu ‘a e kofu, pe filo-fokotu‘u, pe filo-fakalava, sipi, pe līneni, pe ko e hā fua ‘a e nāunau kili‘imanu ‘oku ‘i ai ‘a e mala: he ko e kilia fakapopo ia; ‘e faka‘auha ‘aki ‘a e afi.
53Ka ‘oka vakai ‘e he taula‘eiki, pea tā kuo ‘ikai mafola ‘a e mala ‘i he kofu, pe filo-fokotu‘u, pe filo-fakalava, pe ko e hā fua ‘a e me‘a kili‘imanu; 54pea ‘e toki fekau ‘e he taula‘eiki ke nau fō ‘a e me‘a ‘oku ‘i ai ‘a e mala, pea te ne tāpuni ia ‘o toe ‘aho fitu ange: 55pea ka vakai ki ai ‘a e taula‘eiki hili ‘a e fō ‘o e mala, pea tā kuo ‘ikai liliu ‘a e lanu ‘o e mala, neongo kuo ‘ikai mafola, ‘oku ta‘ema‘a ia; te ke faka‘auha ia ‘aki ‘a e afi: ko e popo ia, pe ‘oku hangē ko e tula-mui‘ulu, pe ko e la‘e-tula. 56Pea ka vakai ‘e he taula‘eiki, pea tā ‘oku mamate ‘a e mala hili hono fō, pea te ne toki hae ia mei he kofu, pe kili‘imanu, pe filo-fokotu‘u, pe filo-fakalava: 57pea kapau ‘oku kei hā pē ‘i he kofu, pe filo-fokotu‘u, pe filo-fakalava, pe ko e hā fua ‘a e me‘a kili‘imanu ia, tā ‘oku tupu pē: te ke faka‘auha ‘aki ‘a e afi ‘a e me‘a ‘oku ‘i ai ‘a e mala. 58Pea ko e kofu, pe filo-fokotu‘u, pe filo-fakalava, pe ko e hā fua ‘a e me‘a kili‘imanu ‘a ia ‘oku ke fō, pea mahu‘i mei ai ‘a e mala, pea ‘e toki fō hono tu‘o ua, pea ‘e ma‘a.
59Ko e lao ia ‘o e mala ko e kilia ‘oka tu‘u ‘i ha kofu sipi, pe līneni, pe ha filo-fokotu‘u, pe filo fakalava, pe ha taha ‘o e ngaahi me‘a ‘oku ngaohi ‘aki ‘a e kili‘imanu, ke tala pe ‘oku ma‘a pe ‘oku ta‘ema‘a.
Currently Selected:
LEVITIKO 13: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.