LEVITIKO 18
18
Ko e ngaahi Feohi Fakasino ‘oku Tapu
1PEA folofola ‘a Sihova kia Mōsese, ‘o pehē, 2Lea ki ha‘a ‘Isileli, pea ke tala kiate kinautolu, 3Ko Sihova au ko homou ‘Otua. ‘E ‘ikai te mou fai ‘o hangē ko e fai ‘a e fonua ko ‘Isipite, ‘a ia na‘a mou nofo ai, pea ‘e ‘ikai te mou fai ‘o hangē ko e fai ‘a e fonua ko Kēnani, ‘a ia ‘oku taki kimoutolu ki ai: pea ‘e ‘ikai te mou fou ‘i he‘enau ngaahi tu‘utu‘uni. 4Ko e konisitūtone ‘a‘aku te mou fai ki ai, pea ko e ngaahi tu‘utu‘uni ‘a‘aku te mou tauhi ke mou fou ai: ko Sihova au ko homou ‘Otua. 5‘Io, te mou tauhi ‘eku ngaahi tu‘utu‘uni mo ‘eku ngaahi konisitūtone, ‘a ia ka fai ‘e ha tangata, te ne mo‘ui ai: ko Sihova au.#Nehe 9.29; ‘Isi 18.9; 20.11-13; Luk 10.28; Lom 10.5; Kal 3.12
6Tapu ki he tangata ke ‘unu‘unu ki he kakano ‘o hono manava, ke fakatelefua‘i ia: ko Sihova au. 7Tapu ha‘o ala ki he telefua ‘o ho‘o tamai, ‘a ia ko ho‘o fa‘ē; ko ho‘o fa‘ē ia, ‘e ‘ikai te ke fakatelefua‘i. 8Tapu ha‘o fakatelefua‘i ‘a e uaifi ‘o ho‘o tamai: ko ho‘o fakatelefua‘i ia ho‘o tamai.#Lev 20.11; Teu 22.30; 27.20 9Tapu ha‘o fakatelefua‘i ho tuofefine, pe ko e ‘ōfefine ia ‘o ho‘o tamai, pe ko e tama ‘a ho‘o fa‘ē, pe ko ha tupu ‘i ‘api, pe ko ha tupu mama‘o.#Lev 20.17; Teu 27.22 10Tapu ha‘o fakatelefua‘i ‘a e ‘ōfefine ‘o ho foha, pe ko e tama ‘a ho ‘ōfefine: he ko ‘ena telefua ko ho‘o telefua. 11Tapu ha‘o fakatelefua ‘a e tama ‘a e uaifi ‘a ho‘o tamai, ‘a ia kuo ne fanau‘i ki ho‘o tamai; ko ho tuofefine ia. 12Tapu ha‘o fakatelefua‘i ‘a e tuofefine ‘o ho‘o tamai: ko e kakano ‘o ho‘o tamai ia. 13Tapu ha‘o fakatelefua‘i ‘a e tokoua ‘o ho‘o fa‘ē: ko e kakano ia ‘o ho‘o fa‘ē.#Lev 20.19-20 14Tapu ha‘o fakatelefua‘i ‘a e tokoua ‘o ho‘o tamai, ‘io, ‘e ‘ikai te ke ‘unu‘unu ki hono uaifi: ko ho‘o fa‘ē ia. 15Tapu ha‘o fakatelefua‘i ho kāinga mali ko e uaifi ‘o ho foha: tapu ha‘o fakatelefua‘i ia.#Lev 20.12 16Tapu ha‘o fakatelefua‘i ‘a e uaifi ‘o ho tokoua; he ko ‘ene telefua ko e telefua ia ‘a ho tokoua.#Lev 20.21 17Tapu ha‘o fakatelefua‘i ha fefine mo ‘ene tama fakatou‘osi; pea ‘e ‘ikai te ke ala ki he ‘ōfefine ‘o ‘ene tama, pe ko e tama ‘a ‘ene tama, ke fakatelefua‘i: he ‘oku mou kakano taha pē: ko e mala ia.#Lev 20.14; Teu 27.23 18‘Oku tapu ho‘o ala ki he tehina ‘o ho‘o uaifi ke tata‘o ‘aki hono ta‘okete ‘i he‘ene kei mo‘ui.
19Pea ‘oku tapu ha‘o ‘unu‘unu ki ha fefine ke fakatelefua‘ia lolotonga ‘oku mavahe ia ‘i ha‘ane ta‘ema‘a.#Lev 20.18 20Pea ‘oku tapu ha‘o tono‘i ‘a e uaifi ‘o ho kaungā‘api, ke ‘uli‘i koe ‘iate ia.#Lev 20.10 21Pea ‘oku tapu ha‘o tuku hao hako ke ‘asi ‘i he afi kia Moloke, pea ‘oku tapu ha‘o fakame‘avale‘i ‘a e huafa ‘o homou ‘Otua: ko Sihova au.#Lev 20.1-5 22Pea ‘oku tapu ha‘o mohe mo ha tangata ‘o hangē ko e mohe mo e fefine: ko e me‘a fakalielia ia.#Lev 20.13 23Pea ‘oku tapu ha‘o ‘unoho mo ha manu neongo pe ko e hā, ke ‘uli‘i koe ‘iate ia: pea ‘oku tapu ke tu‘u ha fefine ‘i he ‘ao ‘o ha manu ke tokoto ki ai: ko e koto fakalilifu ia.#‘Eki 22.19; Lev 20.15-16; Teu 27.21
24‘Oua te mou fakata‘ema‘a‘i kimoutolu ‘i he alā me‘a pehē: he ko e ngaahi me‘a ko ia kuo ‘uli‘i ai ‘a e ngaahi kakai ‘oku ou fakateka atu mei homou ‘ao: 25pea kuo ‘uli‘i ai ‘a e fonua: ko ia ‘oku ou ‘eke ki ai hono kovi, pea ‘oku pu‘aki ‘e he fonua hono kau nofo‘anga. 26Ko ia te mou tauhi ‘e kimoutolu ‘eku ngaahi tu‘utu‘uni, mo ‘eku konisitūtone, pea ‘e ‘ikai te mou fai ha taha ‘o e ngaahi fakalielia ni, ‘a koe tupu‘i fonua, mo koe ‘a e muli ‘oku ‘āunofo mai; 27(he ko e ngaahi me‘a fakalielia ko ia kuo fai ‘e he kakai ‘o e fonua na‘e mu‘omu‘a ‘iate kimoutolu, pea kuo ‘uli ai ‘a e fonua): 28koe‘uhiā ke ‘oua na‘a pu‘aki ‘e he fonua ‘a kimoutolu foki, ‘i ho‘omou ‘uli‘i ia, ‘o hangē ko ‘ene pu‘aki ‘a e ngaahi kakai na‘e mu‘omu‘a ‘iate kimoutolu. 29He ka ‘ilonga ‘a ia te ne fai ha taha ‘o e ngaahi fakalielia ko ia, ‘e tu‘usi ‘enau mo‘ui ‘a e kakai fai pehē mei honau fa‘ahinga.
30Ko ia te mou tauhi ‘a e me‘a ‘oku ou tuku ke mou tauhi, ‘o ‘oua ‘e fai ha taha ‘o e ngaahi anga fakalielia ni, ‘a ia na‘e fai ‘i he te‘eki ke mou ‘i ai, pea ke ‘oua te mou ‘uli‘i ai kimoutolu: ko Sihova au ko homou ‘Otua.
Currently Selected:
LEVITIKO 18: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.