LEVITIKO 19
19
Ko e ngaahi Lao ki he Mā‘oni‘oní mo e Fai Totonú
1PEA folofola ‘a Sihova kia Mōsese, ‘o pehē, 2Lea ki he fakataha kotoa ‘o ha‘a ‘Isileli, pea ke tala kiate kinautolu, Te mou mā‘oni‘oni; he ‘oku ou mā‘oni‘oni, ‘a au Sihova ko homou ‘Otua.#Lev 11.44-45; 1 Pit 1.16 3Te mou ‘apasia takitaha ki he‘ene fa‘ē mo ‘ene tamai, pea te mou tauhi hoku ngaahi Sāpate: ko Sihova au ko homou ‘Otua.#‘Eki 20.8,12; Teu 5.12,16
4‘E ‘ikai te mou tafoki ki he ngaahi ‘aitoli, pe ngaohi hamou ‘otua ukamea: ko Sihova au ko homou ‘Otua.#Lev 26.1; ‘Eki 20.23; 34.17; Teu 27.15
5Pea ka mou ka feia ha ngaahi feilaulau-‘ofa kia Sihova, mou fai pē ke ne hōifua ai kiate kimoutolu. 6‘E kai ia ‘i he ‘aho ‘o hono feia, pea mo e ‘apongipongi: ka ‘oka toe ha me‘a ki hono ‘aho tolu, ‘e faka‘auha ‘aki ‘a e afi. 7‘Io, kapau ‘e momo‘i kai ‘i hono ‘aho tolu, ko e me‘a namukū ia; ‘e ‘ikai tali: 8pea ko ia te ne kai te ne fua hono kovi, koe‘uhi kuo ne takuanoa ‘a e me‘a tapu ‘a Sihova; pea ‘e tu‘usi ‘a e laumālie ko ia mei hono kakai.
9Pea ka mou ka utu ‘a e ta‘u ‘o homou fonua, ‘e ‘ikai te mou utu ke ‘osi‘osingamālie ho‘o ngoue, ‘o a‘u ki he tuliki, pea ko e ngangana ‘a ho ta‘u ‘e ‘ikai te ke tufi.#Lev 23.22; Teu 24.19-22 10Ko ho‘o ngoue vaine foki ‘e ‘ikai te ke toli ke ‘osi, pea ko e me‘a kuo ngangana ai ‘e ‘ikai te ke tufi; te ke tuku pē ia ki he masiva mo e muli: ko Sihova au ko homou ‘Otua.
11‘E tapu ho‘omou kaiha‘a, pea tapu ho‘omou kākā, pea tapu ho‘omou loi ‘i ho‘omou feangai.#‘Eki 20.15,16; Teu 5.19,20 12Pea ‘oku tapu ho‘omou fuakava loi ‘i hoku hingoa ke takuanoa ‘a e hingoa ‘o homou ‘Otua: ko Sihova au.#‘Eki 20.7; Teu 5.11; Māt 5.33
13‘Oku tapu ho‘o fakamālohia ho kaungā‘api, mo ho‘o kaiha‘a meiate ia: ‘e ‘ikai ‘aho ia ‘iate koe ‘a e totongi ‘o e ngāue unga.#Teu 24.14-15 14Tapu ho‘o kape ki he tuli, mo ho‘o ‘ai ha tūkia‘anga ‘i he ‘ao ‘o e kui, ka te ke ‘apasia ki ho ‘Otua: ko Sihova au.#Teu 27.18
15‘Oku tapu ho‘o piko‘i ‘a e fakamaau: ‘e ‘ikai te ke toka‘i ‘a masiva, pea ‘e ‘ikai te ke āfeitau‘olunga?; ka te ke faitotonu ‘i ho‘o fakamaau ha taha.#‘Eki 23.6-8; Teu 16.19 16‘E ‘ikai te ke ‘alu fano ‘i he lotolotonga ‘o ho kakai ke fakakovi: pea ‘e ‘ikai te ke kumi ki he toto ‘o ho kaungā‘api: ko Sihova au.
17‘E ‘ikai te ke tauhi ‘i ho loto ‘a e fehi‘a ki ho tokoua: te ke mātu‘aki valoki si‘i kāinga ko ia, ‘o ‘oua ‘e fua hia koe‘uhi ko ia.#19.17 ‘o ‘oua… ko ia; pe ke ‘oua te ke fai ‘a e hia ko ení kiate ia; pe ke ‘oua te ke fai ha hia koe‘uhi ko ia. #Māt 18.15 18‘E ‘ikai te ke fai sauni, pe tauhi ha ‘ita ki ha ni‘ihi ‘i ho fa‘ahinga, ka te ke ‘ofa ki ho kaungā‘api, ‘o hangē ko ho‘o ‘ofa kiate koe: ko Sihova au.#Māt 5.43; 19.19; 22.39; Ma‘ake 12.31; Luk 10.27; Lom 13.9; Kal 5.14; Sēm 2.8
19Te mou tauhi ‘eku ngaahi fekau. ‘E ‘ikai te mou fakahoa-‘a-kehe ho‘omou fanga manu: ‘e ‘ikai te ke tōkaki ‘i ho‘o ngoue ha fa‘ahinga tenga ‘e ua: pea ‘e ‘ikai te ke tui ha kofu ‘oku fefiofi ai ha fa‘ahinga filo ‘e ua ko e fakakākā.#19.19 fakakākaa; ‘Oku ‘ikai ‘ilo lelei ‘a e lea ‘oku tu‘ú. #Teu 22.9-11
20Pea ka mohe ha tangata mo ha fefine, ‘a ia ko e kaunanga pea polo‘i ki ha tangata, ka kuo te‘eki ke momo‘i huhu‘i, pe fakatau‘atāina, ‘e ‘eke pē ‘a e ongo me‘a, ka ‘e ‘ikai te na mate,#19.20 ‘e ‘eke pē… mate; pe ‘e fai hano faka‘eke‘eke, ka ‘e ‘ikai te na mate. he na‘e ‘ikai tau‘atāina ‘a e fefine. 21Pea te ne ‘omi ‘ene feilaulau-halaia kia Sihova ki he mata Tēniti Fe‘iloaki‘anga: ko ‘ene feilaulau-halaia ko e sipi tangata. 22Pea ‘e fai fakalelei ma‘ana ‘e he taula‘eiki ‘i he ‘ao ‘o Sihova ‘aki ‘a e sipi feilaulau-halaia, koe‘uhi ko e angahala kuo ne fai: pea ‘e fakamolemole ia ‘i he angahala kuo ne fai.
23Pea ka mou ka a‘u ki he fonua, pea kuo mou tō ‘a e ngaahi ‘akau kehekehe ke kai, te mou lau hono fua hangē kuo ta‘ekamu: ko e ta‘u ‘e tolu te nau hangē kiate kimoutolu ha me‘a ‘oku ta‘ekamu; ‘e ‘ikai kai. 24Pea ‘i hono fā ‘o e ta‘u ‘e tapu hono kātoa ‘o e fua ke fai‘aki ‘a e fakafeta‘i ki he ‘Eiki.#19.24 ke fai‘aki… ‘Eiki; pe ko e fakahīkihiki‘i ‘o e ‘Eikí. 25Pea ‘i hono nima ‘o e ta‘u te mou kai hono fua–koe‘uhiā ke fakalahi ki hono fua ma‘amoutolu: ko Sihova au ko homou ‘Otua.
26‘Oku tapu ho‘omou kai ha me‘a ‘oku ‘i ai ha toto: tapu ho‘omou fai ‘a e tuki, pe ko e talotalo kovi.#Sēn 9.4; Lev 7.26-27; 17.10-14; Teu 12.16,23; 15.23; 18.10 27Tapu ho‘omou kosi ke fakaseakale homou lau, pea tapu ho‘o maumau ‘a e ngaahi tuliki ‘o ho kava.#Lev 2.5; Teu 14.1 28Tapu ho‘omou tafatafa‘i homou sino koe‘uhi ko e pekia, pea tapu ho‘omou tātatau: ko Sihova au.
29‘Oua te ke tuku ho ‘ōfefine ke nofo ki he fe‘auaki;#19.29 ke… fe‘auaki; Na‘e nofo ‘a e kau fefine ‘e ni‘ihi ‘i he ngaahi temipale ‘a e kau Kēnaní, ‘a ia na‘e fai ai ‘a e lotu ki he ngaahi ‘otua na‘a nau pule, tokua, ki he mahu ‘a e kelekelé mo e fanafanau ‘a fafine mo e monumanú. Na‘e tui e kau Kēnaní ka nonofo ha taha mo ha fefine pehē pea kuo pau ke mahu ai ‘ete ngoué pea tupu ‘ete monumanú. na‘a tō ‘a e fonua ki he fe‘auaki, pea fonu ‘a e fonua ‘i he fakalielia.#Teu 23.17 30Te mou tauhi hoku ngaahi Sāpate, pea ‘apasia ki hoku fale tapu: ko Sihova au.#Lev 26.2
31‘Oua te mou afe kiate kinautolu ‘oku fakahā‘ele fa‘ahikehe, pe ki he fa‘ahinga tuki; ‘oua ‘e kumi kiate kinautolu ke mou ‘uli ai: ko Sihova au ko homou ‘Otua.#Teu 18.11; 1 Sām 28.3; 2 Tu‘i 23.4; ‘Ais 8.19
32Te ke tu‘u ki ‘olunga ‘i he ‘ao ‘o e ‘uluhinā, pea te ke faka‘apa‘apa kiate ia ‘oku motu‘a, pea te ke ‘apasia ki ho ‘Otua: ko Sihova au.
33Pea kapau ‘e ‘āunofo ha muli kiate koe ‘i homou fonua, ‘e ‘ikai te mou fai ha kovi ki ai.#‘Eki 22.21; Teu 24.17-18; 27.19 34Ko e muli ‘oku ‘āunofo kiate kimoutolu ‘e tatau kiate kimoutolu mo e tupu ‘i he fonua; pea te ke ‘ofa kiate ia hangē ko ho‘o ‘ofa kiate koe; he na‘a mou nofo muli ‘i he fonua ko ‘Isipite: ko Sihova au ko homou ‘Otua.
35‘E ‘ikai te mou fai ta‘etotonu ‘i he fakamaau, ‘i he fua fakalōloa, mo e fua mamafa, pea mo e fua efu.#Teu 25.13-16; Pal 20.10; ‘Isi 45.10 36‘E totonu ho‘omou fuatautau, totonu ho‘omou me‘a fakamamafa, totonu ho‘omou efa, pea totonu ho‘omou kālani: ko Sihova au ko homou ‘Otua, ‘a ia na‘a ku ‘omi kimoutolu mei he fonua ko ‘Isipite. 37Ko ia te mau tauhi ‘eku ngaahi fekau, mo ‘eku konisitūtone kotoa, ‘o fai ki ai: ko Sihova au.
Currently Selected:
LEVITIKO 19: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.