LEVITIKO 20
20
Ko e ngaahi Tautea ‘o e Talangata‘a
1PEA na‘e folofola ‘a Sihova kia Mōsese, ‘o pehē, 2Te ke tala foki ki ha‘a ‘Isileli, ‘Ilonga ‘a ia ‘i ha‘a ‘Isileli, pe ‘i ha‘a muli ‘oku ‘āunofo mai ki ‘Isileli, ‘a ia te ne ‘atu hano hako kia Moloke; ‘e mate tāmate‘i ia: ‘e tolomaka‘i ‘e he kakai ‘o e fonua. 3Ko au foki te u hāngai mamahi ki he tokotaha ko ia, pea te u tu‘usi ia mei hono kakai; koe‘uhi kuo ne ‘atu hano hako kia Moloke ke fakata‘ema‘a hoku fale tapu, pea ke fakame‘avale‘i hoku hingoa tapu. 4Pea kapau ‘e momo‘i fakakuikui ‘e he kakai ‘o e fonua ki he tangata ko ia, ‘i he‘ene ‘atu hono hako kia Moloke, ka nau fakahaofi ia ke ‘oua na‘a tāmate‘i: 5pea te u toki hāngai ‘ita au ki he tangata ko ia, pea mo hono fāmili, pea te u tu‘usi ia mei honau kakai, ‘a ia mo kinautolu kotoa ‘oku muimui tango kiate ia ke fe‘auaki mo Moloke.
6Pea ko e tokotaha ko ia ‘oku ne afe ki he fa‘ahinga fakahā‘ele fa‘ahikehe mo e kau tuki fakatēvolo ke tango ange ki he fa‘ahinga ko ia, pea te u hāngai mamahi ki he laumālie ko ia ke tu‘usi mei hono kakai. 7Ko ia mou fakatāpui kimoutolu ke mau tāpuhā: he ko Sihova au ko homou ‘Otua. 8Pea te mou tauhi ‘eku ngaahi tu‘utu‘uni, ‘o fai ki ai: ko Sihova au ‘oku fai homou fakatāpui.
9He ko ia ‘oku ne kape‘i ‘ene tamai pe ko ‘ene fa‘ē ‘e mate tāmate‘i: kuo ne kape‘i ‘ene tamai, pe fa‘ē: ‘e ‘i hono tumu‘aki ‘o‘ona ‘a hono toto.#‘Eki 21.17; Māt 15.4; Ma‘ake 7.10
10Pea ko e tangata ‘oku tono‘i ‘a e uaifi ‘o e taha kehe, ‘io, ‘a ia ‘oku ne tono‘i ‘a e uaifi ‘o hono kaungā‘api, ‘e mate tāmate‘i ‘a e tangata mo e fefine fakatou‘osi.#‘Eki 20.14; Lev 18.20; Teu 5.18 11Pea ko e tangata ‘oku mohe mo e uaifi ‘o ‘ene tamai kuo ne fakatelefua‘i ‘ene tamai: te na fakatou mate tāmate‘i; ‘e ‘i hona tumu‘aki hona toto.#Lev 18.8; Teu 22.30; 27.20 12Pea ka mohe ha tangata mo e uaifi ‘o hono foha, te na fakatou mate tāmate‘i: ko e koto fakalilifu ‘ena ngāue; ‘e ‘i ho‘onaua tumu‘aki ‘a hona toto.#Lev 18.15 13Pea ka mohe ha tangata mo ha tangata, ‘o hangē ko ha‘ane mohe mo ha fefine, kuo na fakatou fai fakalielia: te na mate tāmate‘i; ‘e ‘i hona tumu‘aki hona toto.#Lev 18.22 14Pea ka mali ha tangata mo ha fefine pea mo ‘ene fa‘ē fakatou‘osi; ko e mala ia; ‘e fakamomofi ‘a ia mo kinaua ‘aki ‘a e afi; ke ‘oua na‘a ai ha mala pehē ‘iate kimoutolu. 15Pea ka mohe ha tangata mo ha manu, ‘e mate tāmate‘i ia; pea te mou tāmate‘i mo e manu.#‘Eki 22.19; Lev 18.23; Teu 27.21 16Pea ka ‘unu‘unu ha fefine ki ha manu ke tokoto ki ai, te ke tāmate‘i ‘a e fefine pea mo e manu: te na fakatou mate tāmate‘i: ‘e ‘i hona tumu‘aki hona toto.
17Pea ka mali ha tangata mo hono tuofefine, pe ko e ‘ōfefine ‘o ‘ene tamai, pe ko e tama ‘a ‘ene fa‘ē, ‘o ne mamata ki he‘ene telefua, pea mamata ‘e he fefine ki he telefua ‘a‘ana; ko e me‘a fakamā ia; pea ‘e tu‘usi kinaua ‘i he ‘ao ‘o hona fa‘ahinga: kuo ne fakatelefua hono tuofefine; te ne fua hono kovi.#Lev 18.9; Teu 27.22 18Pea ka mohe ha tangata mo ha fefine ‘oku mahaki fakafefine, ‘o fakatelefua ia; kuo ne fakatelefua ‘ene ‘au, pea kuo fakatelefua ‘e he fefine ‘a e ‘au‘anga ‘o hono toto: ‘e fakatou tu‘usi kinaua mei hona kakai.#Lev 18.19
19Pea ‘e ‘ikai te ke fakatelefua ‘a e tehina ‘o ho‘o fa‘ē, pe ko e tuofefine ‘o ho‘o tamai: ka pehē, ‘oku ne fakatelefua ‘a hono kakano ‘o‘ona: te na fakatou fua hona kovi.#Lev 18.12-14 20Pea ka mohe ha tangata mo e uaifi ‘o e tokoua ‘o ‘ene tamai, kuo ne fakatelefua ‘a e tokoua ‘o ‘ene tamai: te na fua hona kovi: te na pekia ta‘eha fānau. 21Pea ka mali ha tangata mo e uaifi ‘o hono tokoua ko e me‘a ‘uli ia: kuo ne fakatelefua hono tokoua; te na pekia ta‘eha hako.#Lev 18.16
22Ko ia te mou tauhi ‘eku ngaahi tu‘utu‘uni, mo ‘eku konisitūtone kotoa, pea te mou fai ki ai: koe‘uhi ke ‘oua na‘a pu‘aki kimoutolu ‘e he fonua ‘oku ou ‘omi kimoutolu ki ai ke mou nofo‘i ia. 23Pea ‘e ‘ikai te mou fai ki he ngaahi anga ‘o e kakai ‘oku ou kapusi mei homou ‘ao: he na‘a nau fai ‘a e alā me‘a pehē, ko ia na‘a ku fakalili‘a kiate kinautolu. 24Ka kuo u tala kiate kimoutolu te mou ma‘u honau kelekele, ‘io, te u foaki ia ke mou ma‘u, ko e fonua ‘oku mahutafea ‘i he hu‘akau mo e honi: ko Sihova au ko homou ‘Otua, ‘a ia ‘oku ou fakamavahe kimoutolu mei he ngaahi kakai. 25Ko ia te mou vahe‘i ‘a e manu ma‘a mei he manu ta‘ema‘a, mo e manupuna ta‘ema‘a mei he manupuna ‘oku ma‘a: pea ‘e ‘ikai te mou fakalielia‘i homou laumālie ‘aki ha manu pe ha manupuna, pe ha taha ‘i he fa‘ahinga me‘a ‘oku ngalengale ‘i he kelekele, ‘a ia kuo u vahe‘i meiate kimoutolu ke ta‘ema‘a. 26Ka te mou tāpuhā kiate au; he ‘oku ou tāpuhā, ‘a au Sihova, pea kuo u vahe‘i kimoutolu mei he ngaahi kakai ke mou nofo kiate au.
27Pea ko e tangata pe fefine ‘oku ne fakahā‘ele fa‘ahikehe, pe ‘oku fai ‘a e tuki fakatēvolo, ‘e mate tāmate‘i ia: te nau tolomaka‘i kinautolu; ko honau toto ‘e ‘i honau tumu‘aki.
Currently Selected:
LEVITIKO 20: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.