LEVITIKO 7
7
Ko e Feilaulau Halaia
1PEA ko eni ‘a e lao ‘o e feilaulau-halaia; ko e me‘a toputapu ia. 2Ko e potu ‘oku nau tāmate‘i ai ‘a e feilaulau-mōifua te nau tāmate‘i ai ‘a e feilaulau-halaia; pea te ne luluku ‘aki ‘a e toto ‘a e ‘ōlita takatakai. 3Pea te ne ‘atu hono kotoa ‘o e ngako mei ai; ‘a e tu‘ulāvelo, mo e tākai ‘oku ‘ufi‘ufi ‘aki ‘a e to‘oto‘onga, pea mo e ongo kofuua, mo e ngako ‘oku ‘i ai, ‘a ia ‘oku ‘i he kongaloto, 4mo e milimili ‘oku ‘i he funga ‘ate, fakataha mo e ongo kofuua, te ne hae mai ‘a e ngaahi me‘a ko ia. 5Pea ‘e tutu ia ‘e he taula‘eiki ‘i he ‘ōlita, ko e feilaulau fai‘aki ‘a e afi kia Sihova: ko e feilaulau-halaia ia. 6‘Ilonga ha tangata ‘i ha‘a taula‘eiki, te ne kai ai: ‘e kai ia ‘i ha potu ‘oku tapu: ko ha me‘a toputapu ia.
7Hangē ko e feilaulau-angahala, ‘oku pehē ‘a e feilaulau-halaia; ‘oku na lao taha: pea ko e taula‘eiki ‘oku ne fai‘aki ‘a e fakalelei ko hono ‘inasi ia. 8Pea ko e taula‘eiki ‘oku ne ‘atu ‘a e feilau laumōifua ‘a ha taha, ‘e ma‘u ‘e he taula‘eiki ko ia mōno ‘inasi tokotaha ‘a e kili ‘o e feilaulau-mōifua kuo ne ‘atu. 9Pea ‘ilonga ha feilaulau-me‘akai ‘oku ta‘o ‘i ha ‘ōvani, pe ‘oku ngaohi ‘i ha kulo, pe ‘i he fakapaku, ‘e ma‘u ia ‘e he taula‘eiki ‘oku ne fai ia mōno ‘inasi. 10Ka ka ‘ilonga ha feilaulau me‘akai ‘oku natu ‘aki ‘a e lolo, pe ‘oku mōmoa pē, ko e ‘inasi ia ‘o e ngaahi foha ‘o ‘Ēlone kotoa pē; pea te nau tufa ke tatau.
Ko e Feilaulau ‘Ofa
11Pea ko e lao eni ‘o e feilaulau-‘ofa, ka ‘omi ‘e ha taha ki he ‘Eiki. 12Kapau te ne ‘omi ko e me‘a fakafeta‘i, pea te ne ‘omi fakataha mo e me‘a feilaulau ‘a e ngaahi keke ta‘elēvani kuo natu ‘aki ‘a e lolo, mo e ngaahi mā manifinifi ta‘elēvani kuo pani lolo, pea mo e mahoa‘a fefiofi kuo natu ‘aki ‘a e lolo, ‘o ngaohi keke ‘aki. 13Te ne fai‘aki ‘a e ngaahi keke mā lēvani ‘i he ‘atu ‘ene kōpano, fakataha mo ‘ene feilaulau-‘ofa ke fakafeta‘i. 14Pea te ne ‘atu ha taha mei he kōpano kotoa pē, ko e feilaulau-hapai ki he ‘Eiki, ko e ‘inasi ‘o e taula‘eiki ‘oku ne luluku ‘a e toto ‘o e feilaulau-‘ofa. 15Pea ko e kakano ‘o ‘ene feilaulau-‘ofa ke fakafeta‘i ‘e kai ia ‘i he ‘aho ‘o e fai ‘ene kōpano; ‘e ‘ikai fakatoe ha me‘a ki he ‘apongipongi.
16Ka ‘o kapau ko e tukumo‘ui ‘ene kōpano, pe ko ha feilaulau-lotolelei, ‘e kai ‘i he ‘aho ‘oku ne fai ai ‘ene feilaulau, pea ‘e kai ‘i he ‘apongipongi ‘a e me‘a ‘oku toe: 17ka ko e kakano ‘o e feilaulau ‘oku toe ki hono ‘aho tolu ‘e faka‘auha ia ‘i he afi. 18Pea kapau ‘e momo‘i kai ‘a e kakano ‘o e feilaulau-‘ofa ‘i hono tolu ‘o e ‘aho, ‘e ‘ikai tali, pea ‘e ‘ikai lau kiate ia na‘a ne ‘atu: ko e me‘a namukū; pea ko e tokotaha ‘oku ne kai ai te ne fua ‘ene hia. 19Pea ko e kakano ‘oku lave ki ha taha ‘o e ngaahi me‘a ‘oku ta‘ema‘a, ‘e ‘ikai kai ia; ‘e faka‘auha ‘aki ‘a e afi: pea ko e me‘a ki he kakano, ‘ilonga ha taha ‘oku ma‘a te ne kai ai.
20Ka ko e tokotaha ‘oku ne kai ‘a e kakano ‘o e feilaulau-‘ofa, ‘a ia ko e me‘a ‘a Sihova, ka ‘oku ‘iate ia hono ta‘ema‘a‘anga, ‘e tu‘usi ‘a e laumālie ko ia mei hono kakai. 21Pea ko e tokotaha ‘oku ne lave ki ha taha ‘o e ngaahi me‘a ‘oku ta‘ema‘a (ko e ta‘ema‘a‘anga ‘o e tangata, pe ko e manu ta‘ema‘a, pe ha me‘a fakalielia ‘e taha ‘oku ta‘ema‘a), ‘o ne kai ‘i he kōpano ‘o e feilaulau-‘ofa, ‘a ia ko e ‘inasi ‘o Sihova, ‘e tu‘usi ‘a e laumālie ko ia mei hono kakai.
22Pea folofola ‘a e ‘Eiki kia Mōsese, ‘o pehē, 23Tala ki ha‘a ‘Isileli, ‘o pehē, ‘E ‘ikai te mou kai ha ngako ‘o ha pulu, pe ha sipi, pe kosi: 24ko e ngako ‘o ha me‘a ‘oku mate ‘iate ia, mo e ngako ‘o ha me‘a ‘oku hae ‘e ha manu fekai, ‘e ngāue‘aki ki ha me‘a kehe: ka ‘e ‘ikai te mou momo‘i kai ia. 25He ka ‘ilonga ia ‘oku ne kai ‘a e ngako‘i manu, ‘a ia ‘oku ne ‘atu mei ai ‘a e feilaulau-tutu kia Sihova, ‘e tu‘usi ‘a e laumālie ‘oku ne fai ia mei hono kakai. 26‘E ‘ikai te mou kai ha momo‘i toto ‘i ha taha ‘o homou ngaahi tangutu‘anga; pe ko e toto ‘o ha manupuna, pe ‘o ha manu kaivao.#Sēn 9.4; Lev 17.10-14; 19.26; Teu 12.16,23; 15.23 27‘Ilonga ha tokotaha te ne kai ha toto, ‘e tu‘usi ‘a e laumālie ko ia mei hono kakai.
28Pea folofola ‘a e ‘Eiki kia Mōsese, ‘o pehē, 29Tala ki ha‘a ‘Isileli, ‘o pehē, Ko ia ‘oku ne ‘atu ‘ene feilaulau-‘ofa kia Sihova, te ne ‘omi ‘ene kōpano ki he ‘Eiki mei he‘ene feilaulau-‘ofa: 30‘e ‘omi ‘e hono nima pē ‘o‘ona ‘a e feilaulau tutu ‘a Sihova; te ne ‘omi ‘a e ngako mo e fatafata, ke tākalo ‘aki ‘a e fatafata ko e feilaulau-tākalo ‘i he ‘ao ‘o Sihova. 31Pea ‘e tutu ‘e he taula‘eiki ‘a e ngako ‘i he ‘ōlita: ka ko e fatafata ko e ‘inasi ia ‘o ‘Ēlone mo hono ngaahi foha. 32Pea te mou ‘atu ‘a e tefito alanga to‘omata‘u mei ho‘omou ngaahi feilaulau-‘ofa ko e feilaulau-hapai, ko e ‘inasi ‘o e taula‘eiki. 33Pea ko e toko taha ‘o e ngaahi foha ‘o ‘Ēlone ‘oku ne ‘atu ‘a e toto ‘i he feilaulau-‘ofa mo e ngako, te ne ma‘u ‘a e tefito alanga to‘omata‘u mōno ‘inasi. 34He ko e fatafata tākalo, mo e tefito alanga hapai, kuo u vahe‘i ia mei ha‘a ‘Isileli, mei he‘enau ngaahi feilaulau-‘ofa, pea kuo u ‘atu ia kia ‘Ēlone ko e taula‘eiki, pea ki hono ngaahi foha, ko e ‘inasi ta‘engata mei ha‘a ‘Isileli. 35Ko eni ‘a e vāhenga ‘o ‘Ēlone mo e vāhenga ‘o hono ngaahi foha mei he ngaahi feilaulau-tutu ‘a Sihova, talu mei he ‘aho ‘o e fakaofiofi kinautolu ke fai ‘a e ngāue fakataula‘eiki kia Sihova; 36‘a ia na‘e fekau ‘e Sihova ke ‘ange kiate kinautolu ‘e ha‘a ‘Isileli ‘i he ‘aho na‘a ne pani kinautolu: ko e fatongia ta‘engata ia ‘o honau ngaahi to‘utangata.
37Ko e lao ia ‘o e feilaulau-mōifua, mo e feilaulau-me‘akai, mo e feilaulau-angahala, mo e feilaulau-halaia, mo e fakanofo, mo e feilaulau-‘ofa: 38‘a ia na‘e tu‘utu‘uni ‘e he ‘Eiki kia Mōsese ‘i he mo‘unga ko Sainai, ‘i he ‘aho na‘a ne fekau ai ‘a ha‘a ‘Isileli ke ‘atu ‘enau ngaahi kōpano ki he ‘Eiki, ‘i he Toafa ‘o Sainai.
Currently Selected:
LEVITIKO 7: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.