Mat 23

Yesu ocenjezya ŵanthu va Asambizyi ŵa Matetulo na Afalisi

(Mk 12:38-39; Lk 11:46,52; 20:45-46)

1Pa vuli pake Yesu elaŵila ku winji na kwa asambili ŵake. 2Eŵawuzya kuti, “Asambizyi ŵa Matetulo na Afalisi onkhala pa mpando wa Mose, 3tetyo muwocita nokonkha vonse vakukusambizyani koma osati vakucita. Pakuti ocitalini vakusambizya. 4Ŵeve omanga katundu wosawusha kuwutakula, notakulisha ŵanthu, koma ŵeve okumyakolini na patontho kumo. 5Ocita vonse vakucita kuti awonekele kwa ayawo. Ozimangilila na tumipukutu tukulu–tukulu twa Malizu ŵa Mulungu pa mphumi na pa kwanja. Otalimfya soti misono ya vovwala vawo. 6Otemwa malo ocinzikiwa mu malyelelo na mipando ya mcinzi ngako mu makacisi ŵa Ayuda. 7Otemwa soti kuti ŵanthu awoŵapa moni mwa mcinzi pa misika, noyitiwa kuti ‘Labi#23:7 Labi Kutanthauza kuti Asambizyi .’

8“Koma mwewo osayitiwa ‘asambizyi,’ pakuti mwewo muli na Msambizyi yumo, nipo monse ni ponekwanu. 9Osayita munthu awusu wanu pano pansi, pakuti muli na Awusu wanu ŵamo, ali Kululu. 10Ŵanthu osati soti awokuyitani ‘acitangulila,’ pakuti muli na Citangulila yumo yeka, niye Kristu. 11Pakati panu mkulu ngako aŵe mtumiki wanu. 12Aliyense wolikuzya azeamucefye, nipo aliyense wolicefya azeamukuzye.”

Yesu okalipila Asambizyi ŵa Matetulo na Afalisi

(Mk 12:40; Lk 11:39-42,52; 20:47)

13“Muli na shamu mwewo, Asambizyi ŵa Matetulo na Afalisi, wolipazya! Pakuti muvala mulyango wa Ufumu wa Kululu pa menso pa ŵanthu kuti ŵanthu osati aloŵemo. Mwewo mweka muloŵamolini keno kuzomezya ŵala opangwa kuloŵa kuti aloŵe.”

[14“Muli na shamu, mwewo Asambizyi ŵa Matetulo na Afalisi, olipazya! Munyengelela anyankufwilwa noŵalyela cuma cawo, kuyakine muŵanyengelela polaŵila malombelo atali–atali. Cikomo ca ivi, Mulungu azeakulangeni ngako.]

15“Muli na shamu, mwewo Asambizyi ŵa Matetulo na Afalisi, wolipazya! Pakuti muyenda maulwendo anyinji pa cimmana na pa silya, kusakila cukanga munthu yumo yeka kuti ayaluke msambili wanu. Lomba mukamufwana, mumuyalusha kuŵa mwana wa Gehena kupula mwewo kaŵili.

16“Muli na shamu, mwewo acitangulila mwe mphofu! Musambizya kuti, ‘Munthu akalapila pa Ngʼanda ya Mulungu, paliye kanthu, koma aliyense akalapila pa golide ya mu Ngʼanda ya Mulungu, owamila kusunga lumbilo yake yala.’ 17Mwewo mphofu mwe vipuŵa! Cikulu ni cotyani, golide keno Ngʼanda ya Mulungu yapanga golide kuŵa yopatulika? 18Mwelaŵila soti kuti, ‘Munthu akalapila pa guwa ya nsembe, paliye kanthu, koma aliyense akalapila pa cawanzi cili pa guwa ya nsembe, owamila kusunga lumbilo yake yala.’ 19Mwewo mphofu! Ni cotyani cikulu copula, cawanzi keno guwa ya nsembe yupanga cawanzi ca pa mbali? 20Tetyo, aliyense olapila pa guwa ya nsembe, olapila na vonse vili pamene apo. 21Aliyense olapila pa Ngʼanda ya Mulungu olapila pa munthu aliyense onkhala mwala. 22Nipo aliyense olapila Kululu, olapila pa mpando wa Cifumu wa Mulungu, na yeve onkhalapo.

23“Muli na shamu, mwewo Asambizyi ŵa Matetulo na Afalisi, wolipazya! Pakuti mutwala ca kumi na tumbuto tonunkhila nowamisha cakulya, koma musamalalini vikulu ngavo–ngavo va Matetulo ŵa Mulungu: cilungamo na lusungu na kucetekeleka. Eee, mutwale cendi ca kumi kwa Mulungu, koma mwenzowamila kucita ivi osasiya viyakine. 24Mwewo acitangulila mwe mphofu, mulolesha ngako vakumwa vanu kuti mufumyemo kainzi, koma mmela ngamila.

25“Muli na shamu, mwewo Asambizyi ŵa Matetulo na Afalisi, wolipazya! Pakuti mwewo musuka kunja kwa nthumo na mbale, koma mkati mwake ni mozula nzelu za ukawalala na zolitemwa. 26Mwewo Afalisi mwe mphofu, tatikani kusuka mkati mwa nthumo, nipo kunja kwake soti kuzetuŵe.

27“Muli na shamu, mwewo Asambizyi ŵa Matetulo na Afalisi, wolipazya! Pakuti muli ngani manda owoneka aweme kunja, koma mkati mwake ni mozula na mafupa ŵa ŵanthu akufwa na vowola viyakine vilivonse. 28Tetyo, namwe kunja muwoneka aweme kwa ayakine, koma mkati mwanu muluzule na kulipazya na viyipa viyakine.

29“Muli na shamu, mwewo Asambizyi ŵa Matetulo na Afalisi, wolipazya! Pakuti mumanga vipilala ŵa aneneli nowamya luweme manda ŵa wolungama, 30nolaŵila kuti, ‘Sembe tenzeko masiku ŵa makolo ŵasu, sembe tiliyoŵapaye aneneli ŵala, yayi.’ 31Koma potetyo, muzomelezya mweka kuti nimwe azukulu ŵa ŵanthu epaya aneneli ŵala. 32Ciweme lomba, silizyani nchito yala yecitatika makolo ŵanu.”

Yesu olaŵililatu va cilango cawo

(Lk 11:47-51)

33“Mwewo njoka, ŵana ŵa kapapasha, mukacipewe tyani cilango ca ku Gehena? 34Mvwishishani lomba! Newo nizekutumizyileni aneneli, nipo soti ŵanthu ŵa nzelu na asambizyi. Ayakine mukaŵapanyike pa mtanda, ayakine mukaŵapaye, ayakine muzemuŵakwapule mu makacisi ŵa Ayuda, nipo muzeŵasawushe poŵapilikisha kufuma ku munzi uyakine mpaka ku munzi uyakine. 35Motetyo, cilango cizekuponeleni cikomo ca ŵanthu wolungama wonse ŵala epayiwa, kutatikila kupayiwa kwa Abelo, munthu wolungama wala, mpaka kupayiwa kwa Zakaliya, mwana wa Balakiya, wemwipayila pa mbali pa guwa pa nthangu pa Ngʼanda ya Mulungu. 36Nulaŵilisha vyendi kwa mwewo kuti vonse ivi vizeŵaponele ŵanthu ŵa masiku ŵano.”

Yesu olila cikomo ca Yelusalemu

(Lk 13:34-35)

37“Wewo Yelusalemu, Yelusalemu! Upaya aneneli noŵatema myala ŵanthu ŵakukutumizyila Mulungu. Nsita zinyinji nepangwa kuwunganisha ŵanthu ŵako, ngani nkhuku mwayuwunganishila tuŵana twake pansi pa mapapiko ŵake – koma wewo wekana! 38Wona, ngʼanda yako iyaluke matongwe. 39#Ms 118:26 Nipo nukuwuzya kuti uzeuniwonelini soti, mpaka patiuzeulaŵile kuti, ‘Ni woshukishiwa akuza mu zina ya Leza.’”

Currently Selected:

Mat 23: GMN

Highlight

Copy