Mat 24

Yesu olaŵililatu va kucenekeka kwa Ngʼanda ya Mulungu

(Mk 13:1-2; Lk 21:5-6)

1Yesu efuma mu Ngʼanda ya Mulungu, nipo penzofuma, asambili ŵake ewela nomuwonesha mweyimangiwila yala Ngʼanda. 2Koma Yesu eŵawuzya kuti, “Kansi muviwonalini vonse ivi? Nukuwuzyani vyendi, pakaŵelini mwala weka umo palulu pa mwala uyakine; yonse azeayiwundule.”

Matamano na manzunzo

(Mk 13:3-13; Lk 21:7-19)

3Yesu pecinkhala pansi, pa Lupili ya Olivi, asambili ŵake ewela kwa yeve pa ŵeka. Emukonsha kuti, “Tiwuzyeni, ivi vikacitike lini? Tizetiwonele vinji kuti nsita yafwika soti ya kuza kwanu, nipo soti yosila kwa calo ca pansi?”

4Yesu eŵayasuka kuti, “Ŵani celu kuti aliyense osati akupumvyeni. 5Cikomo ŵanthu anyinji akawele mu zina yangu nakuzolaŵila kuti, ‘Mpulumushi Wolayizyiwa wala ni newo,’ nipo azeapumvyishe ŵanthu anyinji. 6Muzamvwe va nkhondo keno mbili ya nkhondo. Niye kuti mwewo osati muzecite wowa. Ivi vuwamila kucitika, koma niye kutilini kusilizya kwala kwafwika kale, yayi. 7Pakuti mtundu uzewukilane na mtundu uyakine, na ufumu uzewukilane na ufumu uyakine. Kukaŵe njala na vivomezi vitwa vonse. 8Vonse ivi vizaŵe ngani kuŵaŵa kotatika powona mwana.

9“Pa vuli pake ŵanthu azeakutwaleni kuti mukanzunzike, nompayani. Ŵanthu ŵa mitundu yonse azeatinkhane namwe cikomo ca newo. 10Pa nsita iyo, anyinji azeataye cicetekelo cawo, akotwalana notinkhana. 11Kuzekuwoneke aneneli ŵa wenye anyinji, ŵatiakopumvyishe ŵanthu anyinji. 12Lomba pakuti macimo azeapakile–pakile cinthemwa cizecicepele–cepele pakati pa ŵanthu. 13Koma wala ŵatiazetangʼilile kufwikila ku nsilililo, niye ŵatiazepulumushiwe. 14Nipo aŵa Malizu Aweme olaŵila va Ufumu wa Mulungu azeaŵilizyiwe pa calo conse ca pansi, ngani umboni ku mitundu yonse, nipo nsilililo izeifwike.”

Coceneka ca maloza

(Mk 13:14-23; Lk 21:20-24)

15 # Dn 9:27; 11:31; 12:11 “Mukazowona ‘Coceneka ca maloza cala’ celaŵiliwa na Mneneli Daniyele pecicipanamika mu Ngʼanda ya Mulungu. (Wewo uŵelenga umvwishishe luweme.) 16Pamene apo, ŵala ali mu Yudeya azeawutukile ku malupili. 17Ali palulu pa ngʼanda yake osati aloŵe soti kuyotola vili mu ngʼanda mwake. 18Wala ali ku munda osati akawelele ku ngʼanda kuti akatole mikhanjo. 19Ali na shamu anakazi ŵatiakaŵe na pakati, na ŵala ŵatiakonyonsha ŵana pa nsita iyo! 20Lombani kuti nsita yakuti mukowutuka ikaŵelini nsita ya mphepo keno pa Sabata. 21Cikomo kukaŵe manzunzo akulu, akaliyowonekapo citatikile ca calo mpaka lomba, nipo azeawonekelini soti. 22Masiku ŵala kuti aliyoŵacefye, sembe aliyopulumukepo munthu cukanga yumo. Koma Mulungu akaŵacefye masiku ŵala cikomo ca ŵanthu ŵecisalula yeve.

23“Pa nsita iyo, muyakine akazomuwuzyani kuti, ‘Ali pano Kristu wala! Uyo ali apo!’ osati muzemucetekele. 24Pakuti akristu ŵa wenye na aneneli ŵa wenye akawele nakuzocita viziŵikilo vikulu na vokanganisha, nakuzopumvya cukanga na wosaluliwa ŵa Mulungu. 25Wonani, nakuwuzyilantoni pavikaliyocitika. 26Tetyo, akazokuwuzyani, ‘Wonani, ali mu cipululu,’ osalutako. Keno akazokuti, ‘Ali mkati mwa vipinda va ngʼanda,’ osacetekela. 27Pala ngani kaleza kufuma ku mmawa kufwika ku mcingulo, cikaŵe tetyo nakuza kwa Mwana wa Munthu. 28Acipungu kwati koo, kuli nyama.”

Kuwela kwa Mwana wa Munthu

(Mk 13:24-27; Lk 21:25-28)

29 # Ysa 13:10; 34:4 “Akayoingosila matamano ŵa mu masiku awo, ‘zuŵa ikafipe, mwezi ukaleke kutuŵa. Nyenyezi zizezipone kufuma kululu, nipo mphamvu ya kululu izeisungʼuzyiwe.’ 30Pamene apo cizewonekele mululu ciziŵikilo ca Mwana wa Munthu. Ŵanthu ŵa mitundu yonse ya pa calo ca pansi azealile, nipo azeawone Mwana wa Munthu akuza pa mikumbi ya kululu na mphamvu na mcinzi mululu. 31Azeatume angelo ŵake na lupenga ya mphamvu, azeawunganishe wosaluliwa ŵake kufuma ku vitwa vonse va calo conse ca pansi.”

Sambilo ya mkuyu

(Mk 13:28-31; Lk 21:29-33)

32Yesu epitilizya kulaŵila kuti, “Sambililankoni ku mkuyu. Mukawona kuti misambo yatatika kumela nipo vitepo viyakine vatatika kutumba, muziŵe kuti mainza afwika. 33Tetyo, mukazowona vala vonse vanalaŵila vucitika muzemuziŵe kuti Mwana wa Munthu ali pafupi, ali pa mulyango pene–pene. 34Nukuwuzyani vyendi kuti vonse ivi vizewoneke ŵanthu ŵa luko ino akaliyomwalila wonse. 35Kululu na calo ca pansi vikasile, koma malizu ŵangu akasilelini mphamvu.”

Nsiku yosilizya yuziŵikalini

(Mk 13:32-37; Lk 17:26-30,34-36)

36“Koma nsiku yake keno nsita yake, paliye oyiziŵa – cukanga angelo ŵa Kululu, keno Mwana, koma Atata ŵeka mphela. 37Kuwela kwa Mwana wa Munthu kuzaŵe ngani nsita ya Nowa. 38Ngani nsita yala cigumula pecenzecikaliyofwika, ŵanthu enzokulya na kumwa, enzolungula nolunguliwa, mpaka nsiku yeciloŵa mu wato Nowa. 39Aliyozindikile kanthu mpaka cigumula ciwela noŵaceneka wonse. Vizaŵe tetyo soti Mwana wa Munthu akayowela. 40Pa nsiku imo, ŵanthu aŵili akaŵe mu munda; yumo akatolewe, nipo muyakine akasiyiwe. 41Anakazi aŵili akokutwa; yumo akatolewe, nipo muyakine akasiyiwe.

42“Tetyo, namwe mwakuŵa celu, pakuti muziŵalini nsiku Asikulu ŵanu patiakawele. 43Koma ziŵani kuti mwine wa ngʼanda kuti enzeeziŵilatu nsita yofwikilamo kawalala, sembe eciŵa menso, nipo sembe aliyozomezye kuti ngʼanda yake ityolewe. 44Tetyo, namwe ŵani wokonzeka, pakuti Mwana wa Munthu akawele pa nsita yatimukomulindilalini.”

Nyanchito wocetekeleka na muyakine wosacetekeleka

(Lk 12:41-48)

45“Nkhalani ngani nyanchito wocetekeleka na wa nzelu weciyika asikulu wake kuti ni kapitawo wa wonse ŵa mu ngʼanda mwake, noŵayaŵila cakulya cawo pa nsita yake. 46Ni woshukishiwa nyanchito uyo, keno asikulu pofwika azeamfwane ocita ivo. 47Nulaŵila vyendi kuti azeamuyike wololesha cuma cake conse. 48Koma keno nyanchito ni muyipa, nipo mu mtima mwake akolaŵila kuti, ‘Asikulu ŵangu acelwa kuwela,’ 49notatika kunyata anyanchito ayake, nakulya, na kumwa na acakolwa. 50Tetyo, asikulu ŵake akawele pa nsiku patiakomulindilalini na pa nsita yasaziŵa. 51Azeamusangʼanthe nomutaya ku malo ŵa ŵanthu osacetekeleka. Ku malo ŵala kukaŵe kulila nokukuta menu.

Currently Selected:

Mat 24: GMN

Highlight

Copy