Aluki 11

Azezi pa'alɛ a karẽnbiisi ba wʋn pʋ'ʋsra se'em

(Amatie 6:9-13;7:7-11)

1Azezi daan boe la zẽ'a ayɩla pʋ'ʋsra Nawẽnnɛ. La ẽn pʋ'ʋsɛ kɩ'ɩlɩm na, tɩ a karẽnbia ayɩla yele ẽ yetɩ: «Zuudãana, pa'alɛ tɔ tõma n wʋn pʋ'ʋsra Nawẽnnɛ se'em, wʋ Azã n pa'alɛ a karẽnbiisi se'em na.» 2Tɩ a yele ba yetɩ: «Ya sãn pʋ'ʋsra, ya yetɩ:

‹Tõma Sɔ, botɩ fʋ yʋ'ʋrɛ yẽta pẽka,

wa'am wa di na'am nẽrba tẽŋasʋka,

3bɔ'ɔra tɔ daarɛ woo la a dia.

4Basɛ tɩ tõon-be'ero taalɛ,

tɩ tõma mẽ basrɩ sɛba n ẽŋɛ tõma be'em taalɛ mɛ.

Da basɛ tɩ yelle paagɛ tɔ tɩ tɩ lui.› »

5Dee le yele ba yetɩ: «Tẽ'esɛ-ya bɩsɛ, yãma nẽr-sɛka sãn tara sɩrɛ, tɩ a wa'am a zẽ'am yʋ'ʋŋɔ wa sose ẽ yetɩ: ‹M sɩrɛ, bɔ ma borborɩ batã, 6mam sɩrɛ n ze'ele sore wa'am, tɩ mam ka tara sɛla wʋn bɔ ẽ tɩ a di.› 7Tɩ a sɩrɛ la bɔna deem dee lerge ẽ yetɩ: ‹Da dãam mam, mam yʋ m zanõrɛ mɛ, tɩ mam la m kɔma gã, mam kãn yãŋɛ isge bɔ fɔ fõn boorɩ sɛla la.› 8Mam yetɩ ya mɛ tɩ, baa a sãn põn kãn isge bɔ ẽ sɛla ban de sɩtɔ la ĩyã, a wʋn isge bɔ ẽ ẽn boorɩ sɛla la mɛ, ẽn bʋlɛ ẽ na ĩyã. 9Bɛla mam yetɩ ya mɛ tɩ ya sose Nawẽnnɛ, tɩ a wʋn bɔ ya, ya ɛ, tɩ ya wʋn yẽ, ya wẽ kʋlɩŋa, tɩ a wʋn yo'oge bɔ ya. 10Se'ere n soe la, nẽr-sɛka woo n sosrɩ Nawẽnnɛ, a wʋn bɔ ẽ. La nẽr-sɛka n eerɩ, wʋn yẽ. La nẽr-sɛka n wẽ'erɩ kʋlɩŋa, ba wʋn yo'oge bɔ ẽ. 11Ãne n boe yãma pʋam tɩ a bia wʋn sose ẽ zũfo, tɩ a dɩkɛ bõnsɛla bɔ ẽ? 12Bɩɩ a sãn sose ẽ zelle, tɩ a dɩkɛ nãŋa bɔ ẽ? 13Yãma n de tõon-be'ero dõma la sãn mina tɩ ya bɔ ya kɔma bõn-sõma, Nawẽnnɛ n de ya Sɔ n boe saazuum n ãn sõŋa la wʋn bɔ nẽr-sɛba n sosrɩ ẽ a Sɩa la gãnna.»

Azezi pãŋa gãnnɩ Asũtãana

(Amatie 12:22-30, Amarkɩ 3:22-27)

14La Azezi daan dige la kʋlkã'arga n tarɩ bʋraa tɩ a dɛna muko, tɩ kʋlkã'arga la daan yese, dee tɩ bʋraa la n de muko la yãŋa tã'agɛ tɔgra, tɩ la di'ige nẽrba la. 15Tɩ nẽrba la basɛba yele ẽ yetɩ: «Ẽn digri kʋlkã'arsɩ la, la de la Abelzebuli n de kʋlkã'arsɩ naba la pãŋa tɩ a tarɩ digra ba.» 16Tɩ nẽrba basɛba bɔɔra tɩ ba makɛ ẽ bɩsɛ, yele ẽ yetɩ, a tõm tõon-yãlma n pa'alɛ tɩ a pãŋa la ze'etɩ la Nawẽnnɛ zẽ'am. 17Tɩ Azezi bãŋɛ ban tẽ'esrɩ se'em na, yele ba yetɩ: «So'olʋm sɛka woo nẽrba n welge wẽrgɛ zɛbra la taaba, so'olʋm na wʋn sã'am mɛ. La so'olʋm ẽŋa yiɛ mẽ wʋn lui mɛ. 18La Asũtãana sãn welge zɛbra la a mẽŋa, a so'olʋm na kãn tã'agɛ ze'ele. Yãma n yetɩ mam digri kʋlkã'arsɩ la Abelzebuli pãŋa la ĩyã tɩ mam yele bɛla. 19Yãma n yetɩ mam digri kʋlkã'arsɩ la Abelzebuli pãŋa la, yãma nẽrba tarɩ la ãn pãŋa digri kʋlkã'arsɩ? Bɛla, ya nẽrba la mẽŋa n wʋn pa'alɛ tɩ ya ka tarɩ bʋʋrɔ. 20La de la Nawẽnnɛ pãŋa tɩ mam tarɩ digra kʋlkã'arsɩ, bɛla pa'alɛ tɩ Nawẽnnɛ wa'am mɛ wa dita na'am ya tẽŋasʋka. 21Pãŋa dãana sãn mãasʋm sõŋa la a bʋdaan-lɔgrɔ gu'ura a yire, sɛla kãn ẽŋɛ a bõntarsõm. 22La nẽra n tarɩ pãŋa gãnna ẽ sãn wa'am wa zɛbɛ yãŋɛ ẽ, a wʋn fãagɛ la a zɛbrɛ lɔg-sɛba tɩ a te'ege la yiɛn, dee yãŋa vaagɛ a yire lɔgrɔ la pʋɩ.

23Nẽr-sɛka n ka boe la mam, sisri mam mɛ, la nẽr-sɛka n ka lagɩm na mam lagsra, a wɩrgrɩ mɛ.»

Kʋlkã'arga n yese dee leme makrɛ

(Amatie 12:43-45)

24Azezi le yetɩ: «Kʋlkã'arga sãn yese dee basɛ nẽra, a sẽŋɛ la pɔgẽntɩɩsɩ pʋam ka ɛɛra zẽ'a tɩ a vo'ose, la a sãn ɛ zẽ'a koŋe, a yetɩ mɛ tɩ: ‹Mam wʋn lebe la m yi-sɛka tɩ m yese dee basɛ la pʋam.› 25La a sãn lebe ka yẽ tɩ a pɩɩsɛ mɛ malgɛ ãna sõŋa, 26a wʋn lebe mɛ ka tarɩ kʋlkã'arsɩ bayopɔɩ n de wẽensɩ gãnna ẽŋa mẽŋa wa'am, tɩ ba kẽ lagɩm bɔna mĩ. Bɛla, nẽr-ẽŋa toogo yãŋa wʋn gãnna a kʋrʋm toogo la mɛ.»

Nẽr-sɛba n sakrɩ Nawẽnnɛ yetɔga tarɩ zu-yẽlga

27Azezi n tɔgɛ bɛla kɩ'ɩlɩm na, tɩ pɔka ze'ele nẽrba la tẽŋasʋka tĩi tɔgɛ yetɩ: «Pɔg-sɛka n dɔgɛ fɔ, tɩ fʋ mõgɛ a bĩ'isum na, tarɩ zu-yẽlga.» 28Tɩ Azezi lerge yetɩ: «Nẽr-sɛba n wõnnɩ Nawẽnnɛ yetɔga, dee sakra ɩta lan yele se'em na, n tõn tarɩ zu-yẽlga.»

Nẽrba boorɩ tɩ ba yẽ la bõn-yãlma

(Amatie 12:38-42)

29Nẽr-kʋʋŋɔ n lagsɛ Azezi zẽ'am zo'oge, tɩ a yele ba yetɩ: «Zamãan-ẽna wã nẽrba de la nẽr-bɛ'ɛsɩ. Ba eerɩ la bõn-yãlma n wʋn pa'alɛ Nawẽnnɛ pãŋa, la ba kãn yẽ bõn-yãlma ayẽma, sãn dagna bõn-yãlma sɛka n yʋʋn ẽŋɛ Nawẽnnɛ nõtɔ'ɔsa Azonaasɩ la. 30Bõn-sɛka n yʋʋn ẽŋɛ Azonaasɩ la, pa'alɛ Niniivi dõma la Nawẽnnɛ pãŋa, bɛla Nẽrsaala Dayʋa la mẽ de la sɛka n pa'alɩ zamãan-ẽna dõma Nawẽnnɛ pãŋa. 31Sarɩyadia daarɛ, na-pɔka la n yʋʋn yese wẽntulle gɔbga bɔba la wʋn isge mɛ zɛrgɛ zamãan-ẽna wã dõma ba tõon-be'ero la ĩyã. Se'ere n soe la, a yʋʋn ze'ele la zẽ'a n zãagɛ wa'am wa selse naba Asalomõ yɛm yetɔga la, la sɛka n gãnnɩ Asalomõ n boe kalam, dee tɩ yãma ka sɛlsra ẽ. 32Sarɩyadia daarɛ, Niniivi dõma mẽ wʋn isge zɛrgɛ zamãan-ẽna wã dõma mɛ ba tõon-be'ero la ĩyã. Se'ere n soe la, Azonaasɩ n yʋʋn mõolɛ Nawẽnnɛ yetɔga bɔ ba la, ba yʋʋn teege yɛm mɛ basɛ tõon-be'ero. La sɛka n gãnnɩ Azonaasɩ n boe kalam, dee tɩ yãma ka teege yɛm.»

Peelem yelle

(Amatie 5:15;6:22-23)

33«Nẽra kãn yõ fɩtla sʋgɛ, bɩɩ dɩkɛ pɩ'ɩgɔ vuge ẽ, a wʋn dɩkɛ ẽ zoole la sɛla zuo tɩ a nẽegɛ bɔ sɛba n kẽ'erɩ la. 34Fʋ nini n nẽerɩ peelem bɔ'ɔra fʋ ĩyã wʋ fɩtla la, bɛla fʋ nini sãn ãna sõŋa, fʋ ĩyã wuu tarɩ peelem mɛ. La fʋ nini sãn ka ãna sõŋa, fʋ ĩyã wuu boe la lika pʋam. 35Bɛla ĩyã, guuse tɩ bõn-sɛka n de peelem fʋ pʋam na, da dɛna lika. 36La fʋ ĩyã wuu sãn tara peelem sõŋa, tɩ baa bɔbrɛ ayɩla ka tara lika, fʋ ĩyã wuu tarɩ peelem mɛ wʋ fɩtla n tarɩ peelem nẽera bɔ'ɔra nẽrba se'em na.»

Azezi zɛrgɛ Farisi dõma la lɔɔ karẽnsãandõma

(Amatie 23:1-36, Amarkɩ 12:38-40)

37Azezi n daan tɔgɛ kɩ'ɩlɩm na, tɩ Farisi nẽra ayɩla wi ẽ tɩ a wa'am ẽŋa yire tɩ ba di. Tɩ a sẽŋɛ ka kẽ zĩ'ire bɔna mĩ tɩ a di. 38Tɩ Farisi nẽra la yẽ tɩ Azezi ka peege nu'usi wʋ ban ɩtɩ ba sisgo se'em na, dee yetɩ a di, tɩ la di'ige ẽ. 39Tɩ Zuudãana Azezi yele ẽ yetɩ: «Yãma Farisi dõma peerɩ ya wama la ya laasɩ pɔa mɛ, la yãma mẽŋa pʋam pɩrɛ la dẽgrɔ n de fãaga la pʋtʋʋlgɔ. 40Ya de la geto! La dagɩ Nawẽnnɛ n ẽŋɛ poorʋm na, n ken ẽŋɛ pʋam na? 41Dɩkɛ-ya yan tarɩ sɛla la bɔ nasdõma la ya sũure wuu, tɩ sɛla woo wʋn ãna sõŋa bɔ ya.

42Farisi dõma, ya wʋn yẽ toogo. Se'ere n soe la, yãma bɔ'ɔrɩ Nawẽnnɛ zẽvõorɔ buuri wuu pia pʋrɛ mɛ, baa ba sãn ãna pɩka pɩka, la ya ka ɩtɩ sɛla n masɛ, la ya ka nõŋɛ Nawẽnnɛ. La de la bõn-bãna tɩ ya wʋn dẽŋɛ ɩta, dee yãŋa ɩta sɛla tɩ ya ɩtɩ la pa'asɛ.

43Farisi dõma, ya wʋn yẽ toogo. Se'ere n soe la, yãma eerɩ la zẽ'esɩ nẽŋa tɩ ya zĩ'ire wẽndeto pʋam, dee bɔɔra tɩ ba nã'asra ya da'asɩ pʋam. 44Ya wʋn yẽ toogo. Se'ere n soe la, ya ãn wʋ yɔɔrɔ n naagɛ la tẽŋa tɩ nẽrba nẽera ba zuto tɔlla, dee ka mina tɩ yɔɔrɔ n boe mĩ.»

45Tɩ lɔɔ karẽnsãama ayɩla yele ẽ yetɩ: «Karẽnsãama, fʋ sãn tɔgra bɛla fʋ po pɔ'ɔra la tõma wuu.» 46Tɩ Azezi lerge yetɩ: «Yãma lɔɔ karẽnsãandõma mẽ wʋn yẽ toogo. Se'ere n soe la, yãma n botɩ nẽrba la ɩta se'em na, ãn wʋ ze-tɩbsa tɩ ya zelgrɩ nẽrba la, la yãma mẽŋa ka boorɩ tɩ ya kalʋm ba la ya nu'ubiire. 47Ya wʋn yẽ toogo. Se'ere n soe la, yãma mẽtɩ la yɔɔrɔ bɔ'ɔra Nawẽnnɛ nõtɔ'ɔsrɩba la. La yãma yaabdõma n yʋʋn kʋ ba. 48La yãma n mẽtɩ sɛba tɩ ya yaabdõma kʋ la yɔɔrɔ la, la pa'alɛ tɩ ya sakɛ tɩ ban yʋʋn tõm se'em na ãn sõŋa mɛ. 49Bɛla ĩyã tɩ Nawẽnnɛ n tarɩ yɛm na yʋʋn yetɩ: ‹Mam wʋn tõm nõtɔ'ɔsrɩba, la Tõntõnɩba bɔ ba, la ba wʋn kʋ basɛba, dee nãmsɛ basɛba.› 50Bɛla Nawẽnnɛ wʋn sɩbgɛ zamãan-ẽna wã dõma wʋ la de la bãma n kʋ nõtɔ'ɔsrɩba la halɩ dũnia pĩ'iluŋo, wa paam lɛɛlɛ wã, 51lan pɔsɛ la Abɛlɩ kʋa, halɩ wa paagɛ Azakari tɩ ba kʋ kãabgɔ bĩmbĩnne, la Nawẽnnɛ zẽ'e-sõŋɔ tẽŋasʋka la. Mam yetɩ ya la sɩra, tɩ tõon-be'ero bãma wuu taalɛ boe la zamãan-ẽna nẽrba zuo.

52Yãma lɔɔ karẽnsãandõma la wʋn yẽ toogo. Se'ere n soe la, yãma n gu'uri nẽrba tɩ ba ka bãŋra Nawẽnnɛ sɩra. Yãma mẽŋa ka sakrɩ Nawẽnnɛ sɩra la, dee mẽ gu'ura nẽr-sɛba n boorɩ tɩ ba sakɛ la.»

53La Azezi n ze'ele bilam fõrgɛ la, tɩ lɔɔ karẽnsãandõma la Farisi dõma sũure ba isge la ẽ. Tɩ ba bɔɔra tɩ ba bẽrɛ ẽ, sɔkra ẽ sokrɩsɩ zozo'e 54bɔɔra tɩ a tɔgɛ tuuge tɩ ba yõkɛ ẽ.

Currently Selected:

Aluki 11: gurDBL

Highlight

Copy