लूका 14
14
ङासोप ङ्यिमाला येशूकी मी यीला टेक च्यितुप
1ङ्यिम्ज्यिक ङासोप ङ्यिमाला येशू फरिसी छ्योक्पाकी मी छ्ये यीकी खाङ्बा सोल शेवुला फेप्सुङ। ते मीतिवी खोला चिवा क्यानी देनोक। 2ती पेला काङ्बा लाक्पा बोवु नेर्पु यी खोकी चिप्ला नोक। 3तमा येशूकी यहूदी छ्योकी गेकेनतिवा ताङ फरिसीतिवाला टि नाङ्सुङ, “ङासोप ङ्यिमाला नेर्पु टेक ज्यितुप ति कोन्छ्योककी ठिमला डिकी ताङ मिडिकी?” 4यिने तिवा खरक्पा देसुङ। तमा खोकी ती नेर्पु तीला छ्याक ज्याक्नी टेक च्यिनी तीला डो च्यिसुङ। 5ती ज्युक्ला खोकी तिवाला सुङ्सुङ, “ख्यिरा पर्ला सी खोरो पुज्युङ याङ्ना लाङ टोम्बी नाङ्ला लुम्सिन ङासोप ङ्यिमाला वोसिनाङ तीला शार्क्येक मेथेन्वी रो?” 6तमा तिवी काङ साङ सि माथुप।
खोरुङला मो बेप गोकिवी
7ते वावु डेन्बुतिवी टाल जिम्नी देतुप थोङ्नी येशूकी तिवाला दुका पे यी शेन नाङ्सुङ। 8“मी ललाइकी ख्युरुङला जेन्दीकी डेनला केच्या क्यासिन टाल जिम्नी मादे, च्यिलासिसिन ख्युरुङ सिनाङ मङ छ्ये वोतुप मीला केच्या क्या वोज्यिवी। 9तुकै यिन्सिन ख्युरुङ ताङ ती मी छ्ये ङ्यिकरला केच्या क्यावु मी ति वानी ख्युरुङला ‘खोला ख्योरो दासाला दे च्यी।’ सिनी सिवी। तमा ख्युरुङ ति खक्योवा लानी तेरी सिनाङ मला वोतुप दासाला दे गोकिवी। 10बोरु ख्युरुङला केच्या कितुप पेला ख्युरुङ गल्नी तेरी सिनाङ मला वोतुप दासाला दे। तुक क्यासिन केच्या कितुप मी ति वानी ख्युरुङला ‘ओ दाल्जा, येला ज्यु।’ सिनी सिवी। तमा तेरी डेन्बुतिवी मिङ्गाला ख्युरुङला ताङ्देन ङ्येकिवी। 11च्यिलासिसिन सी रङला येर देकिवे, ती ति मो बेप्किवी। तमा सी रङला मो बेप्किवे, ती ति येर देकिवी।”
12तमा येशूकी खुरुङला केच्या क्यावु मी तीला साङ दुक सुङ्सुङ, “ख्योरो टोपला याङ्ना गोमुकी डेन कितुप पेला ख्योरो दाल्जातिवा, ख्योरो पिनतिवा, ख्योरो छेङ्गाछालीतिवा याङ्ना युलकी मी छ्युक्पुतिवाला केच्या माकी। तुक क्यासिन तिवी साङ ख्युरुङला केच्या क्यानी डेनकी किन्बा ख्युरुङला लोक्नी तेर्किवी। 13बोरु ख्योरो डेन कितुप पेला पेराङ्बुतिवा, युक मुथुवुतिवा, थेङ्बातिवा ताङ मिक शर्वातिवाला केच्या की। 14तुक क्यासिन ख्युरुङला मोलाम थोप्किवी, च्यिलासिसिन तिवी ख्युरुङला किन्बा लोक्नी तेर मुथुपी। यिने कोन्छ्योककी थोङ्दाङला टेङ्बु वोतुपतिवा शेप ने सेन्बु लङ्गुप पेला कोन्छ्योककी ख्युरुङला किन्बा लोक्नी नङ्गिवी।”
डेन ग्येर्पुकी पे
(मत्ती २२:१-१०)
15येशूकी दी ताम्ङे सुङ्गुप थोसिमा खोकी मुला सापला देतुपतिवी पर ने मिरा च्यिककी खोला दुक सिक्यासुङ, “सी कोन्छ्योककी ग्येल्खापला डेन सेवे, ती ति मोलाम वोतुप यिनो।” 16ती थोनी येशूकी तीला दुका पे यी नेसुर सुङ्सुङ, “दासा यीला मी मिरा च्यिककी डेन ग्येर्पु यी टडिक क्यानी मी बङीला केच्या क्यानोक। 17तमा डेन साप पेला लेप्सिमा तीकी खोरो लावाला केच्या क्यावु मीतिवी ते ताङ्नी ‘लो, फेवा। त याङ डेन टडिक क्या वे।’ सिनी सि च्यिसुङ। 18यिने ती मीतिवा तेरीकी खुङ रे रे क्यासुङ, तमा मिरा च्यिककी तीला सिक्यासुङ, ‘ङे याङ शिङ ङ्योनी वे, तीला ल्हा डो गोकिवी, सेम्ना माकी।’ 19येलुङ यम्बा तीकी सिक्यासुङ, ‘ङे याङ लाङ पा ङ चोके ङ्योनी वे। तीला मोनी ल्हापला डोयी वे, सेम्ना माकी।’ 20तमा यम्बा तीकी सिक्यासुङ, ‘ङे याङ मलोक जेन्दी क्यायी, ती तप्की ङ वुङ मुथुपी।’ 21तमा ती लावा ति लोक्नी वानी खोरो ज्यिन्दाकला ती तेरी ताम्ङे ति लाप्सुङ। ती थोसिमा ज्यिन्दाक ति छासे ङ्यिर्मु लानी लावाला ‘ङमु ग्येसाकी लाम ताङ लाम टिक्पे नेवा गल्नी पेराङ्बुतिवा ताङ युक मुथुवुतिवा ताङ शर्वातिवा ताङ थेङ्बातिवाला दे टि शोक।’ सिनी योक कुसुङ। 22ती लावा तीकी तुक क्यानी वासिमा ज्यिन्दाकला सिक्यासुङ, ‘ज्यिन्दाककी योक कुतुप दोके राङ ङे क्यायिन, यिने तरोङ साङ दासा वे।’ 23लोङ ज्यिन्दाककी लावाला सिक्यासुङ, ‘लाम ग्येर्पु ताङ युलकी लाम टिक्पेतिवाला गल्नी मीतिवाला उर्च्युम ग्यप्नी टि वानी ङे खाङ्बा क्येङ च्यी। 24ङ ख्यिराङला सिरिन, गोमाला ङे केच्या क्यावु मीतिवा सुला साङ ङे डेनकी समी टोवा ल्हाप मेङ्येवी।’”
लोमा च्युङ्गुपकी कोर्ला
(मत्ती १०:३७-३८)
25ङ्यिम्ज्यिक मी माङ्छ्योक येशूकी मुला डोयी नोक। तमा खोकी तिवी थाकाला ग्युर्नी सुङ्सुङ, 26“सु ङे तिङ्ला तिङ्योकुप नो किवे, तीकी खोरो पपाआमा, पेजापेर्मी, अच्युनुप, अज्यीनुमतिवा ताङ खोरो मिजीला साङ ङला सिनाङ मङ ङ्यिङ्ज्ये किवी सिसिन ती ति ङे लोमा च्युङ मुथुपी। 27सु खोरो ग्यङ्शिङ खुर्नी ङे तिङ्ला तिङ मोङ्योक वे, ती ति ङे लोमा च्युङ मुथुपी। 28ख्यिरा पर्ला मिरा च्यिककी चिवुर गुतोक यी जोप नो क्यासिन ती जोनी सिन्दुप चोयी डोसुम ति खोरो लोला वो ताङ मे सिनी गोमाला राङ देनी ची क्यानी ल्हा मोगोवी रो? 29तुक माक्यानी तीकी डम्ज्यी तिङ सिन्सिमा के तीला जोनी सिन्दा कि माथुप्सिन तीला ल्हाप मीतिवा तेरीकी ती मी तीला मर्च्या क्यानी दुक सिवी, 30‘दी मी तीकी जोप याङ गो चुसुङ, यिने सिन्दा ति कि माथुप।’ 31येलुङ चुका ग्येल्वु तीकी यम्बा ग्येल्वी मुला मक ग्यक डोप यिन्सिन खोरो मुला वोतुप मक्मी तोङ्डा च्यिथम्बा तीकी यम्बा ग्येल्वी मक्मी तोङ्डा खल्ज्यिक तीकी मुला मक ग्यक थुप्की ताङ मुथुपी सिनी गोमाला के देनी नासाम मोतोङ्गिवी रो? 32दोजो तीकी मक ग्यक मुथुपुप यिन्सिन यम्बा ग्येल्वु थाक्रिङ्बु राङ वोतुप पेला के खोरो लेन क्योलुप मीतिवा ताङ्नी थिन्दुप सिनी तीला गोङ्बा शिवी। 33दी दोके क्यानी सी खोरो लोला वोतुप ति तेरी ङे थोक्ला क्युर्नी मोज्योकवे, ती ति ङे लोमा च्युङ मुथुपी।”
फेन मोथोवु छ
(मत्ती ५:१३; मर्कूस ९:५०)
34“छ ति ल्यामु यिन, यिने छे टोवा ति तोर्सुङ सिसिन चुक क्यानी तीला येलुङ छेटोक जो थुप्किवी? 35ती याङ सला साङ फेन मोथोवी, छ्याला साङ फेन मोथोवी। तुक क्यानी मीतिवी तीला फिला क्युर्किवी। सी ति ङ्येन्दुप नम्ज्योक नोके, तीकी ङ्येन्शी।”
Currently Selected:
लूका 14: xsrNT
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
