Génesis 31
31
Jacob ichi wẽraarã ome pedeeteeda
1Maapai Jacobpa kꞌawaji Labán warrarãpa nãga jara nipapatapꞌedaa: “Jacobpa tai akꞌõre netꞌaa jõmaweda jãri ata wãpa pꞌaratꞌara baparida” apachida. 2Ma awara Jacobpa unuji chi chãurepa ichi pia akꞌɨ–e bɨ naawedapemakꞌa.
3Mãpai Tachi Akꞌõrepa Jacobmaa mãgaji:
—Wãpáde aji, pɨ akꞌõreerã eujãdee. Mɨ pɨ ome wãitꞌeeda aji.
4Ma tꞌẽepai Jacobpa tꞌɨ̃ pëiji Raquel, Lea ome chedamerã ichia ovejaarã akꞌɨ badamãi.
5Pachedakꞌãri, Jacobpa mãgaji:
—Mɨa unu bɨda aji, parã akꞌõrepa mɨ pia–ee pɨkꞌa akꞌɨmaa bɨ. Mamĩda mɨ–itꞌee pꞌua–e bɨ, mɨ akꞌõre Isaac Akꞌõre Waibɨa mɨ ome bairã. 6Parãpa pia kꞌawa pꞌanɨ mɨ audú mimiapachi parã akꞌõre pari. 7Mamĩda irua mɨ atꞌapai kꞌũraji mãikꞌaapa ne–inaa tee–e paji ichia jaradakꞌa mɨ mimiada pari. Irua mãga ooji mĩda, Tachi Akꞌõrepa mɨmaa ne–inaa kꞌachia oopi–e paji irumaa. 8Ma kꞌãyaara Labanpa mɨmaa jarakꞌãri: “Pɨ mimiada pari teeitꞌee ne–animalaarã tꞌɨtꞌɨdɨa bee,” ichi ne–animalaarãpa warra tꞌɨtꞌɨdɨa tꞌopachida. Jõdee jarakꞌãri: “Teeitꞌee chi e–erroo bee”, ma ne–animal chakꞌeerã e–erroo uchiapachida. 9Mãgá Tachi Akꞌõrepa parã akꞌõre ne–animalaarã mɨmaa teeji.
10’Ewari aba ne–animalaarã enlunaa pꞌanadakꞌãri, mɨ kꞌãimokꞌaraaji. Unuji ne–animalaarã ɨmɨkꞌĩraarã tꞌɨtꞌɨdɨa beerãpa wẽraarã nomaa jõnɨ. 11Mãga nɨde Tachi Akꞌõre angelpa mɨ tꞌɨ̃ji. Mãpai mɨa pꞌanauji: “Mɨ nama bɨda” aji. 12Ma angelpa mãgaji: “Pia akꞌɨpáde aji. Unuitꞌee ma ne–animalaarã ɨmɨkꞌĩraarãpa chi wẽraarã nomaa jõnɨ jõmaweda tꞌɨtꞌɨdɨa bee. Mɨa kꞌawa bɨ Labanpa pɨmaa jarada. Mapa pɨ kꞌaripaitꞌee. 13Mɨ Jõmaarã Akꞌõre Waibɨa, pɨa unuda Betelde mɨ–itꞌee mãu ɨ̃rɨ aceite weedamãi. Mama pɨa jaraji mɨde ijãapariitꞌee mɨa pɨ kꞌariparu pɨrã. Wãpáde aji, pɨchi tꞌoda eujãdee.”
14Raquel Lea ome mãga ũridakꞌãri, mãgajida:
—Taipa maarepida jɨ̃ada–e paitꞌee tai akꞌõre netꞌaadepema. 15Ma kꞌãyaara irua tai ichi kꞌaurãkꞌa unu–e bɨ. ¡Tai pɨmaa netotꞌaaji mãikꞌaapa pɨ kꞌũratꞌaaji miakꞌãikꞌãri tai ome! ¡Ma awara ne–inaa ichia atada pɨ kꞌaurepa jõmaweda iru bɨ ichi–itꞌee aupai! 16Tai akꞌõre netꞌaa iru bada Tachi Akꞌõrepa pɨmaa teeji taipa tai warrarã ome iru pꞌanadamerã. Maperã oopáde ajida, Tachi Akꞌõrepa pɨmaa jaradakꞌa.
Jacob Padán Aram eujãdeepa uchiada
17-20Maapꞌeda Jacob acomoraaji Canaán eujãdee wãitꞌee chi akꞌõre Isaac baparimaa. Nãga wãjida. Ewari aba Labán awara ãi wãji chi oveja kꞌara tꞌɨɨde. Mãɨmisa Jacobpa ichi ne–animalaarã awaraa netꞌaa ome atada Padán Aram eujãde bɨde, ma jõma pꞌe ataji mãikꞌaapa ichi naa pëiji. Ichi warrarã, wẽraarã ome camelloorãde bataupiji. Mãpai wãjida, Labán ome pedeeda–ee.
Mãgá Jacobpa ma arameo Labán kꞌũratꞌaaji. Ma awara Raquelpa chɨa ateeji chi akꞌõre netꞌaa aɨ kꞌĩrapite ɨtꞌaa tꞌɨ̃pata. 21Jõmaweda ãchi netꞌaa ome jirabodojida. Taarã–e nɨde Éufrates to sĩajida mãikꞌaapa jĩpꞌa wãjida Galaad ee jẽra bɨmaa.
Labanpa Jacob ẽpꞌeda
22Kꞌãima õpee parumaa Labanpa kꞌawa ataji Jacob wãdapꞌedaa. 23Mãpai Labán ichi ëreerã ome tꞌẽe chejida. Kꞌãima siete parumaa ẽpꞌe atanajida Galaad ee jẽra bɨmãi. 24Mamĩda ma ewate pꞌãrikꞌua kꞌãimokꞌaraade Tachi Akꞌõrepa ma arameo Labanmaa jaraji kꞌĩrau pedeenaamerã Jacob ome.
25Maperã Galaad ee jẽra bɨde Labán Jacob ome unukꞌãri, chõo jɨrɨ–e paji. Ma kꞌãyaara Jacob kꞌaitꞌa ãchi kꞌãipata oojida.
26Mama pꞌanɨde Labanpa iidiji:
—¿Sãapꞌeda pɨ jirabee wãjima aji, mɨ kꞌaurã ome, ãichakꞌeerã ome, mɨ wẽ–e misa? ¡Presoorãkꞌa iru bɨda aji, jura chõodapꞌedaakꞌa! 27¿Sãapꞌeda mɨ kꞌũratꞌaajima aji, mãgá miru wãdakꞌãri? Mɨa kꞌawada paara, ¿fiesta waibɨa parã–itꞌee ookꞌaji–ekꞌã aji, tꞌõdoopa mãikꞌaapa arpa ome? 28¡Pɨ kꞌĩsia kꞌawa–ee pɨkꞌa cheji. Mɨ kꞌaurã, ãichakꞌeerã ome mɨmaa kꞌĩra ɨ̃pi–e paji! 29Mɨa parã jõmaarãmaa ne–inaa kꞌachia ookꞌaji. Mamĩda pꞌãrikꞌua pɨ akꞌõre Akꞌõre Waibɨapa jaraji kꞌĩrau pedeenaamerã. 30Wãara pɨ akꞌõre temaa audú wã kꞌinia baji pɨrã, ¿sãapꞌeda mɨ netꞌaa aɨ kꞌĩrapite ɨtꞌaa tꞌɨ̃pata chɨa aneejima? aji.
31Mãpai Jacobpa pꞌanauji:
—Audú pꞌera nɨ̃bada perã isapai uchiajidada aji, pɨa mɨ wẽraarã, warrarã jãri atai jĩakꞌaapa. 32Mamĩda pɨ netꞌaa chɨa–e pajida aji. Tai netꞌaade unuru pɨrã, chi aneeru piu baibeeipia bɨda aji. Tai ëreerã nama pꞌanɨɨrãpa akꞌɨ pꞌanɨ. ¡Mɨa pɨ netꞌaa iru bɨ pɨrã, atéeji!
Jacobpa kꞌawa–e baji Raquelpa chi akꞌõre netꞌaa chɨa atada.
33Mãpai Labán tꞌĩuji Jacob te ne–edee oodade ichi netꞌaa jɨrɨde. Maapꞌeda Lea tede mãikꞌaapa esclavoorã tede tꞌĩuji. Mamĩda unu–e paji ichi netꞌaa aɨ kꞌĩrapite ɨtꞌaa tꞌɨ̃pariida. Maapꞌeda Raquel tede ichiaba tꞌĩuji. 34Mamĩda Raquelpa chi akꞌõre netꞌaa camello ɨ̃rɨ su–akꞌɨ beepata silla ekꞌari tꞌɨtꞌaapꞌeda, aɨ ɨ̃rɨ su–akꞌɨ baji. Mapa Labanpa ma te ne–edee ooda jõmaade jɨrɨkꞌãri, unu–e paji.
35Mãgá jɨrɨmaa bɨde Raquelpa chi akꞌõremaa mãgaji:
—Akꞌõre, mɨ ome kꞌĩraunaapáde aji. Mɨ pɨ kꞌĩrapite pꞌoyaa pꞌirabai–eda aji, mɨ bi kꞌayaa bairã.
Labanpa ichi netꞌaa unu–e pakꞌãri, 36Jacob kꞌĩraudachi mãikꞌaapa mãgaji:
—¿Mɨa kꞌãata oojima aji, pɨa nãgá mɨ jɨrɨ chemerã? 37Pɨa mɨ netꞌaa jõmaweda akꞌɨji. ¿Unujikꞌã aji, pɨchi tedepema netꞌaa apida? ¡Unuji pɨrã, bɨ́ji nama jõmaarã kꞌĩrapite jaradamerã pɨa wãarata jara bɨ! 38Veinte años mɨ mimiaru pɨ pari. Mãga nɨde pɨ ovejaarã, chivoorã ome chi chakꞌeerã maarepida ɨratɨada–e paji, mɨa pia akꞌɨ bada perã. Ma awara mɨa pɨ ne–animal apida kꞌo–e paji. 39Ne–animal kꞌachia beerãpa pɨ ne–animalaarã peedakꞌãri, mɨa chi kꞌapꞌɨa piuda apida atee–e paji pɨmaa akꞌɨpide ma pari pꞌaapinaamerã. Ma kꞌãyaara mɨchi pꞌaratꞌapa mɨa pꞌaaji ma ne–animalaarã atuada pari. Mamĩda ãstaawa maa–e pɨrã pꞌãrikꞌua ne–animalaarã chɨa chedakꞌãri, ma pari pɨa mɨmaa pꞌaapipachi. 40Pɨ ne–animalaarã akꞌɨmaa bɨde mɨ miaji ãstaawa akꞌõrejĩrupa maa–e pɨrã pꞌãrikꞌua jĩsuapa. Ma kꞌaurepa pꞌoyaa kꞌãikꞌaa paji. 41Veinte años wãyaarude mɨ pɨ tede bapachi. Mamĩda waide pɨa mɨ pedee ijãa–e bɨ. Pɨ kꞌaurã–itꞌee catorce años mimiapachi pɨ esclavokꞌa. Ma awara ne–animalaarã–itꞌee seis años mimiapachi. Atꞌapai pɨa mɨmaa pꞌaa–e paji pɨa pꞌaaitꞌeeda adakꞌa. 42Abraham Akꞌõre Waibɨa, mɨ akꞌõre Isaac Akꞌõre Waibɨapa mɨ kꞌaripa–e pada paara, pɨa mɨ netꞌaa maarepida wẽe pëikꞌaji. Mamĩda Akꞌõre Waibɨapa mɨ chupɨria kꞌawaaji, audú pɨ ome miada perã. Mapa pꞌãrikꞌua pɨ ɨtrɨaji.
Jacob Labán ome pacto oodapꞌedaa
43Mãpai Labanpa Jacobmaa mãgaji:
—Pɨ wẽraarã mɨ kꞌaurã; pɨ warrarã mɨ ãichakꞌeerã. Pɨ ovejaarã mëreerã. Ne–inaa jõma pɨa nama unu bɨ mëré. Mamĩda ¿mɨa kꞌãata ookꞌaji mɨ kꞌaurãmaa wa ãchi warrarãmaa? 44Mɨa ne–inaa kꞌachia oo che–e pada perã, tꞌãri pia pacto oodáma kꞌĩrau–ee pꞌaneedaitꞌee. Ne–inaa oodáma Tachi Akꞌõre kꞌĩrapite na pedee kꞌirãpadaitꞌee.
45Mãpai Jacobpa mãu atapꞌeda, bainɨ̃ bɨji 46mãikꞌaapa mãgaji chi ëreerãmaa:
—Mãu abaamaa pꞌe atadapáde aji.
Aramãgá mãu pꞌe atajida bɨdaitꞌee Jacobpa mãu bainɨ̃ bɨda ɨ̃rɨ. Mãpai mama nekꞌojida. 47Labanpa ichi pedeede mãgɨ́ mãu pꞌe badamãi tꞌɨ̃ bɨji “Yegar Saduta”. Jõdee Jacobpa ichi pedeede tꞌɨ̃ bɨji “Galaad”.#31.47 Ma pedee jara kꞌinia bɨ “mãu pꞌe bɨdapꞌedaa Tachi Akꞌõre kꞌĩrapite pedeedapꞌedaa kꞌirãpadaitꞌee”.
48Mãpai Labanpa mãgaji:
—Na mãu pꞌe bɨmãi tachi omeeweda tꞌãri pia pacto oojidada aji.
Mapa ma mãu pꞌe bɨmãi tꞌɨ̃jarapachida Galaad. 49Ichiaba tꞌɨ̃jarapachida Mizpa; jara kꞌinia bɨ “Tachi Akꞌõrepa tachi akꞌɨpari”, mama Labanpa jarada perã:
—Tachi Akꞌõrepa tachi omeeweda akꞌɨpariitꞌee oodamerã tachia nama jaradapꞌedaakꞌa. 50Pɨa mɨ kꞌaurã pia akꞌɨ–e pɨrã maa–e pɨrã awaraa wẽraarã ome miakꞌãiru pɨrã, Tachi Akꞌõrepa kꞌawaitꞌee, awaraarãpa kꞌawada–e pꞌanɨ mĩda.
51Mãpai Labanpa mãgaji:
—Na mãu bainɨ̃ bɨ mãikꞌaapa mãu pꞌe nɨ̃bɨmãi jara kꞌinia bɨ tai omé nama aukꞌa jaradapꞌedaa. 52Mɨ na mãu pꞌe bɨmãi wãyaa–e paitꞌeeda aji, chõoitꞌee pɨ ome. Ichiaba pɨ na mãu pꞌe bɨmãi wãyaa–e paitꞌeeda aji, chõoitꞌee mɨ ome. 53Mɨa oo–e pɨrã mɨa jara bɨkꞌa, pɨ akꞌõchona Abraham mɨ akꞌõchona Najor ome, ãra Akꞌõre Waibɨapa mɨ miapiipia bɨ.
Mãpai Jacobpa aukꞌa juraaji chi akꞌõre Isaacpa ijãada Akꞌõre Waibɨa kꞌĩrapite.
54Maapꞌeda Jacob wãji ee nokꞌodee ne–animalaarã peepꞌeda, paade Tachi Akꞌõre–itꞌee. Mãpai ichi ëreerãmaa nekꞌopiji. Jõmaweda nekꞌodapꞌeda, ma ee nokꞌode kꞌãi pꞌaneejida.
55Aɨ norema tapꞌedaweda Labanpa chi kꞌaurã, chi ãichakꞌeerã kꞌĩra ɨ̃pꞌeda, ãchimaa pedee pia jaraji. Mãpai despediipꞌeda, ichi temaa wãji.
Currently Selected:
Génesis 31: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
