Mateusi 25

Erekwatà mã'ẽ rè tè Jesu ojimosã'ãga remẽwarà

1Ãmẽ Jesu e'i jẽ oporegeta. Kãramõwarà rã rè oporegeta jẽ.

– [Napekuwa amãtejẽ'ãi manyvo 'arà mẽ avãetà Jõvijã wasu rõmõ ajikuwa remẽ, e'i. Ajo remẽ emoa'u jẽ mãe kõ kõrijõ araatà erupi ãmẽ.] Keetà. Ãwitõ 10 rõmõ kõjãmuku kõ ijimorypa mõ ojirekotà mã'ẽ rè ojatykatà omãjã kupa. Erekwatà mã'ẽ rupi ootà kupa. Ajawyi oẽ oka wyry pe wyi oo pya ikatu kyty ãrõ kupa.#Ruk. 12.35 2A'e 5 rõmõ mãe kõ otekokuwavay mãe kõ tè. Ãmõ, 5 rõmõ mãe kõ notekokuwai. 3-4Raparina kõ omoãnẽ eraa kupa, ojãvijõ kõ jẽ. Ãmẽ otekokuwa mãe kõ raparina ry weraa oupi kupa. Notekokuwai mãe kõ ãmẽ noeraai. Weraa tepe'yte raparina kupa. 5Ãmẽ wãrõ puku jẽ erekwatà mã'ẽ kupa upa. Novãeive. Ajawyi oke taray kupa ky'y. Okepa kupa ky'y.

6– Ãmẽ pyaikatu remẽ sikaepo ava mõ wapukai. Kee e'i wapukai rõmõ: “Ovãerĩ põ! Pejo õvaisĩ ãmẽ!” e'i. 7Ãmẽ kõjãmuku kõ omã'ẽ ky'y. Oraparina kõ omokatutà eraa kupa. 8Ãmẽ notekokuwai mãe kõ kee e'i epe otekokuwa mãe kõ pè: “Raparina ry mõ eme'ẽ ije”, e'i epe kupa. “Opaerĩ ky'y”, e'i kupa. 9“Ãnĩ” e'i otekokuwa mãe kõ. “Noy'ãi ãmẽ oreupe”, e'i kupa. “Pekwa moma'e me'ẽa kyty peupewarà tapepyy”, e'i kupa.

10– Oo notekokuwai mãe kõ raparina ry pyy ãmẽ. Apykyre kytyve sikaepo ovãema erekwatà mã'ẽ ky'y. Otekokuwa mãe kõ weraa oupi weroike tetã wasu wyry pè, jirekoa pè, jimi'u wasua pè. Ajaire ojiovapy tetã ky'y, ava mõ toike e'ã ky'y.#25.10 Ekoa kõ tè a'evo ekoi kupa ipi. Jane kõ tovãema amãtejẽ ipi. Ãmẽ jirekoa ojiãparõ remẽ, ava noike'ãi ky'y. 11Ajaire tè tite notekokuwai mãe kõ ovãema ky'y. Tetã ypy pe wyi kee e'i epe kupa: “Ore ve toroike!” e'i epe kupa. 12Ãmẽ kee e'i erekwatà mã'ẽ: “Ãnĩ. Ije noporokuwai, ava põ pejẽ!” e'i ijupe kõ.#Ruk. 13.25

13Aepo e'i Jesu poromosã'ãga remẽ e'i jẽ:

– Ãwĩvotà avãe remẽ, e'i. Ajawyi terãrõ jẽ pekupa, a'e pejẽ. Napekuwa amãtejẽ'ãi manyvo remẽ avãetà. Mape kwaray remẽ teve. Ãmõ, mã jay remẽ põ avãetà, e'i.

Karakuri rewarà mosikoa rè tè poromosã'ãga remẽwarà

(Rukasi 19.11-27)

14Jesu omogeta jẽ wemimo'ekwerà kõ. Kee e'i ijupe kõ:

– [Ajivytà rã'ĩ aa erena kyty, Papa rena kyty, e'i. Ajawyi tapeposiko katu jẽ ikõ eayvu rupi erapykyre kyty nẽ, e'i.] Jõvijã rè tè ajimosã'ãgatà tapekuwa sa'u. Jõvijã mõ ootà remẽ, omuroka rã'ĩ wemĩgwai kõ imogeta kõ. “Ejo toporomogeta”, e'i. Kee e'i ijupe kõ: “Ajisyrytà rã'ĩ aa”, e'i. “Pirujẽ emoma'e kõ rè ikõ tapeja'a erapykyre kyty nẽ”, e'i.

15– Ãmẽ yvy karakuri moeta jõvijã ome'ẽ rã'ĩ ijupe kõ ity oo, toporu rã'ĩ mosikoa rè kupa. Kee wereko. Wemĩgwai otekokuwavay mã'ẽ pè, 5.000 rõmõ ome'ẽ. Ãmõ pè, 2.000 rõmõ ome'ẽ. Ãmõ pè, 1.000 rõmõ ome'ẽ.#25.15 5.000 rõmõ mã'ẽ, 175 kiru rõmõ karakuri e'e. 2.000 rõmõ mã'ẽ, 70 kiru rõmõ karakuri e'e. 1.000 rõmõ mã'ẽ, 35 kiru rõmõ karakuri e'e. Ajaire jõvijã ojisyry oo ky'y. 16Ãmẽ jõvijã oo paire, emĩgwai otekokuwavay mã'ẽ oposiko ypy ikarakuri rè, 5.000 rõmõ mã'ẽ rè. Weraa oposikoa repy rã rè. Oposiko katuay wete ee. Ajawyi oposiko paire, 10.000 rõmõ tesõ ikarakuri ky'y. [Oryvay emĩgwai ãmẽ, okuwa jõvijã orytà iposikoa rè rewarà mõ.] 17Ãmõ emĩgwai otekokuwa mã'ẽ a'evo ve. Oposiko katu teve ee. Ajawyi 2.000 maekwerà 4.000 rõmõ tesõ epykwerà ky'y. [Oryvay ãmẽ ee.] 18Na'evoi ãmẽ emĩgwai, 1.000 opyy maekwerà. A'e noposikoi. Opãkõi kõrijõ ijaty yvy kwarà pupe inõ gatu. Ajawyi aekwery vo jẽ ikarakuri tui. Nojimovijai 1.000 maekwerà.

19– Kãramõ ovãe jõvijã ky'y. Ãmẽ ovãe remẽ, omuu wemĩgwai kõ imogeta karakuri me'ẽa rè. “Manyvo põ nereko neposikoa?” e'i jõvijã ijupe kõ, ijãvijõ kõ jẽ. 20Ãmẽ emĩgwai otekokuwavay mã'ẽ ypy uu. Kee e'i: “5.000 rõmõ karakuri itõkõ neme'ẽ ije neo”, e'i. “Ajaire aposiko ee. Eposikoa rupi amoaty wete sa'u ky'y”, e'i. “Emã'ẽ. 10.000 rõmõ tesõ nekarakuri repykwerà ky'y”, e'i emĩgwai oõvijã pè. 21Ãmẽ si oryvay jõvijã ee ky'y. “Aje, neposiko katuay epãtavõarà rõmõ. Eremĩgwai e'eay tè ene”, e'i ijupe. “5.000 rõmõ ame'ẽ tereposiko ee mijã. Age'e ikupei kyty nemoaty ky'y”, e'i. “Tõvijã rõmõtà tè ene ky'y”, e'i. “Ejo awi epyri, tajimory nere”, e'i jõvijã ijupe imoe'e.

22– Ajaire ãmõ omuu mijẽ okoty. [“Ene pa'e? Mã põ neposikoa repykwerà nemoaty?” e'i.] Ãmẽ a'e e'i oõvijã pè: “2.000 rõmõ karakuri moeta neme'ẽ rã'ĩ ije neo”, e'i. “Ajaire eposikoa repy rõmõ amoma. Emã'ẽ. Age'e kejõ nekarakuri rekovijarà ky'y. 4.000 rõmõ tesõ”, e'i. 23Ãmẽ oryvay mijẽ jõvijã ee. “Aje ere”, e'i. “Neposiko katuay wete eupe”, e'i. “Ajawyi age'e ikupei kyty oromonotà neupe tereposiko ky'y”, e'i. “Erory nere. Ejo awi epyri, tajimory nere”, e'i mijẽ jõvijã ijupe.

24– Ãmẽ ãmõ omuu mijẽ. [E'i mijẽ jõvijã ijupe: “Ene pa'e? Mã põ neposikoa repykwerà nemoaty?” e'i.] Notekokuwa ywe'ei mã'ẽ pè aepo e'i ky'y. Ãmẽ emĩgwai kee e'i: “Akuwa manyvo neikoa. Neposikoa rupi rõwã karakuri nemoaty ipi. Ãwitõ ava mõ nojimitãi epe remeve, oo ajaire temitã'akwerà po'o ipi. Ãwĩvo 'ejẽ neiko”, e'i. 25“Emã'ẽ. 1.000 rõmõ karakuri itõkõ neme'ẽ rã'ĩ ije neo mijã. Ajamã'ẽ ajirokyje newyi. Ajawyi napotai nekarakuri moma tite. Ajawyi yvy pupe aaty kõrijõ inõ gatu. Aã aekwerà”, e'i. 26-27Ajawyi aepo e'i remẽ, jõvijã naoryi ee ky'y. “Naneeweri mã'ẽ tè ene! Nivoi neposiko ije! ‘Akuwa manyvo neikoa’, ere tite si ije. ‘Ãwitõ ava mõ nojimitãi mã'ẽ oo ajaire temitã'akwerà po'o ipi. Ãwĩvo 'ejẽ neiko’, ere. Ãwisõ ekuwa ipe rejupa remẽ, neraa kuwasi karakuri rena kyty inõ mijã, tojimovija upa! Ãmẽ aã age'e ojimoatykwerà revejẽ apyy kuwa mijã, eremime'ẽgwerà”, e'i imoãtãre'ã.

28– Ajaire jõvijã e'i ãmõ wemĩgwai kõ pè: “Peekyi karakuri ame'ẽ ijupe maekwerà iwyi ky'y. [Notekokuwai]”, e'i. “Eremĩgwai [otekokuwavay mã'ẽ] pè jẽsi eme'ẽ, 10.000 rõmõ tesõ wereko mã'ẽ pè. [A'e ywesõ oposiko katu]”, e'i. 29“Ava mõ jame'ẽ ijupe mã'ẽ oporu katu remẽ, ãmẽ ywesõ jame'ẽtà ijupe. Ajamã'ẽ ava mõ noporui jame'ẽ ijupe mã'ẽ remẽ, jaekyità jame'ẽ maekwerà iwyi”, e'i.#Mat. 13.12; Mak. 4.25; Ruk. 8.18 30E'i jẽ jõvijã: “Nijeweri mã'ẽ pepokwa imono pãtõmimi kyty, tatui ky'y. A'e pè wapukai tesõtà ojawa mõ upa ky'y. Ojiãpĩkãkãi tesõ tevetà ojawa upa. Nivoi oposiko ije”, e'i jõvijã wemĩgwai kõ pè,#Mat. 8.12; 22.13; Ruk. 13.28 e'i Jesu ojimosã'ãga.

Poromoe'yia 'arà rã rewarà

31Ãmẽ Jesu e'i jẽ wemimo'earà kõ pè:

– Kãramõ tè ajo tarà mijẽ pekoty, Janejare'e Remimuurerà ajimojane mã'ẽ rõmõ, e'i. Jõvijã wasu rõmõ tè ajikuwatà ajo ky'y. Eremĩgwai yvapewarà kõ ve aerutà ãmẽ erupi ky'y. Ãmẽ jõvijã wasu apyka 'aryvo tẽ tesõ aapytà.#Mat. 16.27; 19.28 32Ãmẽ pirujẽ jane kõ ojimoatytà erovake tamosã'ãga kõ. Ãmẽ si mirà kõ amoe'yità ky'y. Nivoi mãe kõ waitevetà. Ivo mãe kõ waitevetà, e'i. Ãwitõ teima jarà kaneiru waite omoe'yi so'o rã'ãga wyi, ãwĩvotà. 33Ivo mãe kõ e'ekatu kytyre amoatytà. Nivoi mãe kõ ãmẽ ejaukwerà kytyre amoatytà. 34Ãmẽ ivo mãe kõ rã'ĩ amogetatà. Kee a'età ijupe kõ: “Papa oryvay pene. ‘Peike ajawyi epyri’, e'ità Papa pejẽ ory rõmõ iko. A'e tè yvy jinõ e'ãve penena rã oinõma amãtejẽtà penenone”, a'epa teãmã itõkõ pejẽ. 35Kee rewarà mõ oryvay Papa pene: “Ajimomorijau remẽ itõkõ eporijauesa pekupa ipi. Eamyay aiko remẽ jakatu itõkõ ja'umã'ẽ peme'ẽ ta'u ipi. Ãmõ, e'ywaray tè aiko remẽ teve itõkõ yy peme'ẽ tay'u. Ãwisõ ãmõ wãnà rõmõ teipe ajo remẽ itõkõ peja'a katu ere ipi. 36Ãmõ, nekamisai aiko remẽ itõkõ, ekamisa rã peme'ẽ ije. Ãmõ, etekorã remẽ itõkõ peja'a katu ere. Ãmõ, jimopã'ãga pupe aju remẽ itõkõ pejo eresa”, a'età ijupe kõ.

37– Ãmẽ ivo mãe kõ e'ità ije: “Manyvo remẽ põkõ aepo oro'e neupe?” e'ità. “Manyvo remẽ põkõ yy orome'ẽ tere'u? Ja'umã'ẽ ãmõ? 38Manyvo remẽ põkõ ãmõ wãnà kõ rõmõ nejo remẽ, oroja'a katu nere? Ãmõ, manyvo remẽ põkõ nanekamisai remẽ, kamisa orome'ẽ neupe?” e'ità kupa. 39“Ãmõ, manyvo remẽ põkõ netekorã remẽ, oroja'a nere? Ãmõ, jimopã'ãga pupe neju remẽ? Norokuwai 'eteay a'evoa, jõvijã!” e'ità ivo mãe kõ ije, e'i Jesu.

40– Ãmẽ a'età ijupe kõ: “Amã'ẽ pene, poroporijauesa remẽ ipi”, a'età. “Eremĩgwai mitigà rè peja'a katu remẽ, ‘Ere oja'a katu mã'ẽ tè ãwĩ’”, a'età pejẽ. Aje aepo a'età, e'i Jesu.

41– Ajaire a'età nivoi mãe kõ pè ky'y: “Pejisyry ikõ ewyi peo nẽ! Papa rena pè napeike'ãi!” a'età. “Tata wasu ainõokapa amãtejẽ ãjãgai rõvijã pè, emĩgwai kõ revejẽ. A'e tata wasu noei mã'ẽ rena kyty pekwa. A'e kyty poromonotà. 42Neporijauesai pekupa ipi. Kee aiko remẽ itõkõ napeja'ai ere. Eamyay tè remẽ itõkõ. Ãmõ, e'ywa tè remẽ itõkõ. 43Ãmõ, ãmõ wãnà rõmõ ajo pepyri remẽ. Ãmõ, nekamisai aiko remẽ. Ãmõ, etekorã remẽ. Ãmõ, jimopã'ãga pè aju remẽ. A'evo 'evo tesõ ipe aiko remẽ itõkõ napeja'ai ere!” a'età.

44– Ãmẽ e'ità eupe kupa: “Jõvijã, noromã'ẽi 'ete nere neamyay remẽ, ne'ywa remẽ, nanekamisai neiko remẽ, netekorã remẽ, jimopã'ãga pè neju remẽ. Noromã'ẽi 'eteay nere. Mape põkõ a'evo neiko?” e'ità kupa. 45Ãmẽ a'età ijupe kõ: “Aje ywete kee a'e pejẽ: Eremĩgwai mitigà rè napeja'ai ojimomorijau remẽ. Ajawyi, ‘Ere noja'ai mã'ẽ tè ãwĩ’, a'e pejẽ”, a'età ijupe kõ. 46A'evo noporoporijauesai maekwerà kõ amonotà jimomorijaua rena kyty. Ivo katuay maekwerà kõ ãmẽ Papa rena kyty araatà, epyri toiko karuaru kupa, e'i Jesu.

Currently Selected:

Mateusi 25: oymNT

Highlight

Copy