Maku 2
2
Jesu omokatu etãmã nomãrãkuwai mã'ẽ remẽwarà
(Mateusi 9.1-8; Rukasi 5.17-26)
1Ãmõ 'ary pè Jesu ojivy oo Kapanão taa kyty. Ovãe iko remeve, ivãea ojenu jenu pirujẽ a'e taa wãnà kõ pè okwa. 2Ajawyi jane kõ mõa'ãrõwã uu uu Jesu retã gyty esa. Aty wasu kõ ojimoaty ipyri. A'e kõ oike tetã wyry pè remẽ, oporakapa 'ete tetã wyry kupa. Ãmõ kõ tẽ tesõ ikatu pè tui upa. Ãmẽ Jesu poromo'e Janejare'e ayvu rè upa.
3A'evo ekoi remẽ kwaima'e kõ mõ ovãe, irõte rõmõ. A'e kõ ojimorypa mõ omovy eru, Jesu tomokatu. Noatai mã'ẽ a'e, etãmã nomãrãkuwai mã'ẽ. 4Weru ipe Jesu kyty kupa. Ajamã'ẽ aty wasu kõ rewarà mõ mã rupi noeroike'ãi Jesu pyri'ĩje'ẽ eraa kupa. Ajawyi okape 'aryvo werojiupi kupa. Okape 'arà omogwa kupa, Jesu 'aryvo katu. A'e kwarà rupi katu omowyjy imuu kupa. Ikea pupeve omowyjy imuu kupa, Jesu rovakeve.
5Ãmẽ Jesu a'evoa rè omã'ẽ remẽ e'i oupe:
– Haa! Aã kõ “aje” e'i eayvukasia pè mãe kõ tè! e'i.
Ajaire etãmã nomãrãkuwai mã'ẽ pè kee e'i:
– Ejimokasi ikenẽ, era'yry, e'i. Neaiwererà aitypypyipaoka newyi ky'y, e'i ijupe.
6Ãmẽ jakatu kwaima'e kõ mõ a'e pè wapy omãjã ee upa. Tãmõ Moisesi remikusiwarerà rè poromo'e mãe kõ. Ojimõarõ Jesu rè aepo renu. Ajawyi kee e'i ojipy'amogeta kupa:
7– Janejare'e rõmõ'ĩte oitypypyipaoka kuwa janeaiwererà janewyi ipi, e'i kupa. Ajawyi nivoi aepo e'i Jesu remẽ, e'i tite kupa. Janejare'e werõarõ tè ãwĩ aepo javo rõmõ, e'i tite kupa.
8Ameve Jesu okuwapa ijipy'amogeta ai kõ ajamã'ẽ. Ajawyi e'i ijupe kõ:
– Aepo pejẽ sõ! Pejipy'amogeta ai sõ! 9Emã'ẽ. Mã a'e mã'ẽ rè põ “aje ywete” pejẽ kuwa ije? e'i. “Aitypypyipaoka neaiwererà newyi”, a'e mã'ẽ rè kuwa põ “aje” pejẽ? “Epõ'ã eata ekwa”, a'e mã'ẽ rè kuwa põ “aje ywete” pejẽ kuwa? Mã rè põ “aje” pejẽ kuwa? e'i Jesu ijupe kõ. 10Aje ywete yva pe wyi tè ajo ajimojane ike pepytery pè aiko. Ajawyi eayvukasiay teãmã aiko. Age'e aã amokatutà eayvukasia rupi. Pemã'ẽ ere remẽ, kee pejẽ kuwa: “Aje ywete janeaiwererà oitypypyipaoka kuwa janewyi”, pejẽ kuwa ije, e'i Jesu ijupe kõ.
Aepo e'i paire, e'i mijẽ Jesu noatai mã'ẽ pè:
11– Epõ'ã ikõ nekea rerojivy eraa neretã gyty nẽ, a'e ene, e'i ijupe.
12Ameve kwaima'e opõ'ã wata katu ky'y. Okea omovy erojivy eraa wetã gyty. Aty wasu kõ rovake a'evo wereko Jesu. Ãmẽ pirujẽ omã'ẽ ee mãe kõ ojimonyi tesõ ee omãjã. Janejare'e omoe'e ywete a'evoa rè omãjã kupa. Kee e'i kupa:
– Nijamã'ẽi 'eteay ãwĩ rapijarà rè ipi mijã! e'i ojiupe kupa.
“Ejo erupi”, e'i Jesu Revi pè remẽwarà
(Mateusi 9.9-13; Rukasi 5.27-32)
13A'evo paire Jesu oo mijẽ [Karireja] pãranã reme kyty, [wemimo'e ypykwerà kõ reve]. Ãmẽ jane kõ mõa'ãrõwã oo Jesu resa a'e pè. A'e kõ Jesu omo'e Janejare'e ayvu rè ereko ãmẽ.
14Ãmẽ Jesu okwa iko remẽ, kwaima'e mõ rè omã'ẽ. Revi eu erà pè.#2.14 Mateusi eu teve Revi pè. Emogeta Mat. 9.9 Aupeu ra'yry tè a'e. Tekoua repy moatyarà rõmõ ekoi.#2.14 Karakuri opyy jane kõ wyi imoaty Romã pewarà jõvijã wasu pè ipi mã'ẽ. Pee reme pè wapy oposiko upa. Ãmẽ Jesu omã'ẽ ee remẽ, kee e'i ijupe:
– Ejo erupi eremimo'earà rõmõ! e'i ijupe.
Ameve opõ'ã oo Jesu rupi. Awyje oo upi.
15Aja paire Revi weraa Jesu erojimiwa opyri, emimo'ekwerà kõ reve. Ijaty jane kõ ojimi'u ipyri upa, Revi retã wyry pè. Kejõ. Revi vo tekoua repy moatyarà kõ. Pariseu kõ ãwĩ rapijarà kõ pè “nivoi mãe kõ” e'i ipi. Ãmõ kõ ve, Pariseu kõ “nivoi mãe kõ ãwĩ” e'i ijupe kõ ve a'e pè tui. Mokopejõ a'e pè ojimi'u kupa upa.
16Ãmẽ tãmõ Moisesi remikusiwarerà rè poromo'e mãe kõ mõ a'evoa rè omã'ẽ. Pariseu kõ tè a'e kõ. Ajawyi kee e'i emimo'ekwerà kõ pè kupa:
– Nivoi mãe kõ pyri tẽ tesõ penõvijã ojimi'u upa. Ãmõ, tekoua repy moatyarà kõ pyri teve tesõ ojimi'u upa, e'i kupa upa.#2.16 Kee jaa tè e'i kupa: “Aje mira katu tè sõ Jesu remẽ, nojimi'u'ãi kuwa nivoi mãe kõ reve mijã”, jaa tè aepo e'i kupa.
17Ajamã'ẽ Jesu wenupa aepo e'i mã'ẽ. Ajawyi e'i Pariseu kõ pè:
– Emã'ẽ! Poropõanõgarà rè tè ajimosã'ãgatà. Imãrãne'ãgwerà kõ rõwã ojipõanõoka poropõanõgarà pè ipi. Itekorã mãe kõ tè ojipõanõoka ijupe ipi. Ãwitõ poropõanõgarà uu itekorã mãe kõ omokatu, ãwĩvo ve ije ajo pepõ'õ mè, e'i Jesu. Nivoi mãe kõ rè tè ajo aposiko, tijãgyo waiwererà rè itypypyipaoka Janejare'e pè kupa ky'y. A'e rapijarà tè ije. Ajawyi, “Ivo tè aiko”, e'i tite oupe mãe kõ rè rõwã ajo. Nivoi mãe kõ rè tè ajo, e'i Jesu ijupe kõ.
Nojimi'ui rupi Janejare'e pè oporegeta mã'ẽ rewarà
(Mateusi 9.14-15; Rukasi 5.33-35)
18Ãmõ 'ary pè Juwão poromojãmorĩ mã'ẽ remimo'earà kõ nojimi'ui rã'ĩ tesõ iko Janejare'e pè oporegeta kupa remẽ. Pariseu kõ ve a'evo ekoi ipi.#2.18 Ekoa kõ tè a'evo ekoi kupa ipi. Ãmẽ jane kõ uu Jesu kyty javo. Kee e'i ijupe kupa:
– Emã'ẽ! Juwão remimo'earà kõ a'evo ekoi ipi! Nojimi'ui rã'ĩ tesõ iko kupa ipi. Pariseu kõ remimo'ekwerà kõ ve a'evo ekoi ipi, e'i kupa. Manyvore põ neremimo'earà kõ na'evoi ekoi? e'i Jesu pè kupa.
19Aepo e'i mãe kõ pè Jesu e'i:
– Erekwatà mã'ẽ rè tè ajimosã'ãgatà pemotekokuwaa rõmõ. Ãwitõ erekwatà mã'ẽ mõ omenatà remẽ, ojimorypa kõ okwai rã'ĩ imuu tojimi'u eeve kupa. Oryvay ojeeve ãmẽ kupa. Ikatu kuwa põkõ nojimi'ui erekwata 'arà mẽ kupa, erekwatà mã'ẽ eeve kõ jẽ ekoi remẽ? Niĩ! Nikatu'ãi kuwa! Tojimi'u jẽ kupa! Taory jẽ kupa, e'i. 20Omena paire erekwapa mã'ẽ ojisyrytà oo iwyi kõ. Ãmẽ tè ijimorypa kõ opoi rã'ĩ kuwa ja'umã'ẽ wyi ky'y, wãgyo rõmõ. [Ãwĩvo tary ve eremimo'ekwerà kõ. Ajisyrypa iwyi kõ paire tè ijãgyotà kupa ky'y. Ãmẽ tè nojimi'u'ãi rã'ĩ kupa ky'y,] e'i Jesu ijupe kõ.
Jesu rupi tekoua ipyau mã'ẽ rewarà
(Mateusi 9.16-17; Rukasi 5.36-39)
21E'i jẽ Jesu wemimo'ekwerà kõ pè:
– Kamisa jukwerà rè tè poromosã'ãgatà ky'y. Kamisa jukwerà okekeipa remẽ, nijamokarapeta'ãi kamisa pyau pẽgwerà ijukwerà reve ipi. A'evo remẽ ywesõ okekeipa jẽ kuwa jakusu remẽ. [Ãwĩvo ve erekoa rupi peiko remẽ, penãmõi kõ rekoa rupi napeiko'ãi kuwa ky'y, nojisu'ui rewarà mõ, e'i.]
22Aepo jaa pè kee e'i jẽ Jesu:
– Ãmõ, ava jẽ rõwã uvary pyaukwerà oinõ ena jukwerà pupe ipi, e'i.#2.22 Teima pirerà sikãgwerà pupe oinõ kupa ipi. A'e pupe sõ oinõ tite remẽ, okekeipa 'ejẽtà tè ena ovu remẽ. Osururupatà uvary o'a ãmẽ. Ajawyi uvary pyaukwerà ena pyaukwerà pupe tè jainõ ipi, e'i. Ãmẽ tè nimanyvoi ovu remẽ. Nokekei'ãi ena ãmẽ, e'i. [Ena jukwerà vo 'ejẽ tãmõ kõ rekoawerà. Eayvu pyaukwerà tè ena pyau mã'ẽ vo 'ejẽ ky'y. A'e rupi peiko kuwa, e'i Jesu.]
“Jimoava 'arà Jarà tè ije,” e'i Jesu mã'ẽ
(Mateusi 12.1-8; Rukasi 6.1-5)
23Ãmẽ jimoava 'arà mẽ, Jesu oo koo pyryvo okwa, wemimo'ekwerà kõ reve. Aresity koo pupe tui upa. Ãmẽ okwa iko kupa remẽ, aresi mõ opo'o iwa kupa. 24Ãmẽ Pariseu kõ mõ a'evoa rè omã'ẽ. Ajawyi kee e'i Jesu pè kupa:
– Neremimo'ekwerà kõ nivoi ekoi kupa. Noerovijai tãmõ Moisesi remikusiwarerà kupa, jimoava 'arà rewarà, “Tapeposiko e'ã jimoava 'arà mẽ!” e'i itõkõ. Aekwerà noerovijai kupa, e'i kupa.#2.24 Kee jaa tè e'i kupa: “Aepo ayvu werovija sõ kupa remẽ, aresi nopo'o'ãi kuwa iwa jimoava 'arà mẽ kupa mijã”, e'i tite kupa. “Janejare'e naoryi omãjã ee kõ ky'y”, jaa tè aepo e'i kupa.
25Ãmẽ Jesu e'i ijupe kõ:
– [Jane kõ ojavy mã'ẽ ywesõ pemoa'u katu ipi! e'i ijupe kõ. Poroporijauesaa rè ywesõ kuwasi peja'a mijã! Na'evoi ajamã'ẽ pejẽ peiko.] Pekuwa ipe tãmõ Tavi manyvo wereko karamoe remẽ, ijamyay wete remẽ! Isota kõ ve ijamyay remẽ. 26Kõitokõ Janejare'e moe'ea retã wyry pè oike tãmõ Tavi meju pyy iwa. Janejare'e pè temime'ẽgwerà tẽ tesõ o'u, osota kõ reve. Omosãi iwa kupa. Janejare'e pè oporegeta mãe kõ remi'õ tè a'e mijã. Apiata eu erà pè mã'ẽ Janejare'e pè oporegeta mãe kõ rõvijã wasu rõmõ ekoi remẽ, a'evo wereko tãmõ Tavi. [“Nivoi” ne'i ajamã'ẽ Janejare'e tãmõ Tavi pè a'evo ekoi remẽ.] Aje si põkõ napekuwai aepo jaa kõ? e'i Jesu Pariseu kõ pè.#1Sa. 21.1-6
27E'i jẽ Jesu ijupe kõ:
– Jane kõ pewarà mõ Janejare'e omo'y jimoava 'arà. Nomowasui jimoava 'arà jane kõ pè ipi, e'i. 28Ajikuwapa yva pe wyi ajo ajimojane mã'ẽ rõmõ. Ije ywesõ jimoava 'arà wyi. Jimoava 'arà Jarà tè ije, e'i Jesu ijupe kõ.
Currently Selected:
Maku 2: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
