Exodus 13

Allakaumallrat Yung'eqarraarutet

1 Ataneq qanertuq Moses-aamun, 2“Allakarciki tamalkuita yung'eqarraarutet tan'gaurluut wangnun, tua-i-wa yung'eqarraarutet tan'gaurluut Israel-aat cali-llu angucalut irniqarraarutait ungungssit wiinga pikngamki.”

Nerevkaritekumallra Kelipam Quuleciriyarailnguum

3Moses-aaq qanertuq yugnun, “Umyuaqelaqiciu man'a erneq anllerci Egypt-aamek teguaruvillerpecen̄ek. Mat'umi ernermi Atanrem anutellruaci angelriakun pinimikun quuleciramek kelipamek ner'arkaunrituci. 4Mat'umi ernermi Egypt-aaq unitarci ciuqlirmi iralumi Abib-aam iraluani. 5Atanrem piciuluni akqellrui ciuliaci cikirciqniluki nuniitnek Canaan-aarmiut, Hittite-at, Amorite-at, Hivite-at Jebusite-at-llu. Tamaavet tekiuskaci enuqitnailngurmun naungignarqellriamun nunamun man'a aturarkaugarci nerevkariyaraq ciuqlirmi iralumi allrakut tamalkuita. 6Malrunlegni ernerni nerlararkauguci quuleciriyarailngurnek kelipanek, erenret-llu malrunelgatni nerevkariluci Ataneq umyuaqluku. 7Ernerni-llu malrunlegni nerlaryaqunaci kelipanek quuleciranek. Quulecirarkamek, wall'u quuleciranek kelipanek pitangqerrngaituq nunavcen̄i tamalkuan. 8Man'a ayagni'rqan yuc'i qanrutaqluki taringevkarluki: waten pilarniluci umyuaqluku Atanrem elpecen̄un pillra Egypt-aaq unitellerpecen̄i. 9Mat'um atullra umyuaqutnguarkauguq catun unatevcen̄un qillrusngalriatun wall'u qaurarpecen̄un. Neq'akiyarauluni egmircimallerkaanek elitnaurumallerkaanek-llu Atanrem Alerquutiinek. Tua-i-wa Atanrem anutellruaci Egypt-aamek angelriakun pinimikun. 10Atularniarci nerevkariyaraq piyaraan nalliini allrakuaqan.

Yung'eqarraarun

11“Atanrem itruskaci nuniitnun Canaan-aarmiut, ukvernarcariluni akqutkellerminun elpecen̄un ciuliarpecen̄un-llu, elpecen̄un cikiutekekaku, 12elliitekarkaugaci tamalkuita yung'eqarraarutet tan'gaurluut Atanermun. Irniqarraarutait-llu angucalut ungungssirpeci Atanrem pikai. 13Irniqarraarutait ciulviit ataam elliinek kiputarkaugaci naverrluki qusngiyagarmek, tau͡gken ataam kipucuumiilkuvciu uyaqurri ayemn̄iaci. Ataam-llu kiputarkaugaci tamalkuita angutet yung'eqarraaruceci. 14Mat'um kinguani, qetunrarpeci apeskaci, mat'um atullran caucianek kiulaqiciki, ‘Angelria pinini aturluku Atanrem anutellruakut Egypt-aamek tuani teguarullemten̄ek. 15Pharaoh asvailtaallrani ayagcecuumiinata Atanrem tuqutellrui tamalkuita yuut ungungssit-llu yung'eqarraarutait tan'gaurluut. Tauna pitekluku tuqutelaraput elliitekluki Atanermun irniqarraarutait angucalut ungungssit, tau͡gaam ataam utertelluki yung'eqarraarutet tan'gaurluut. 16Mat'um atullra umyuaqutnguciquq catun qillengqalriatun unatemten̄un wall'u qauramten̄un; watnallemteggun-wa umyuaqerkauluku Atanrem anucillra wangkutnek Egypt-aamek angelriakun pinimikun.’”

Napalria Amirluq Keneq-llu

17Pharaoh-m ayagcecaki yuut Agayutem ayautenritai tumyarakun cen̄akuiryarakun Philistia-mun, tamaaggun canimellrungraan. Waten Agayun umyuarteqngami, “Yuut umyuarteng cimiryuaraat uterrluteng-llu ataam Egypt-aamun tangerqunegteggu anguyagarkaucirteng.” 18Tua-i ayautai uivulluki yuilqukun Red Sea-m#13.18: Red Sea: Hebrew-tun pimauq “Imarpik Kelugkalilria” ukut wall'u pinganaki (1) nanvat angayaat-llu akuliigni kangian Suez-aam kangiqucuan imarpicuaraam-llu Mediterranean-aam, tamatum nunii qanrutkumayuk'laraat Exodus 13-aami, cali-llu apertuutekaqluku Suez-aam (2) kangiqucuanun, cali-llu (3) Aqaba-m kangiqucuanun. tungiikun. Israel-aam yui anellruut Egypt-aamek anguyallerkameggnun upingaluteng.

19Moses-aam, Joseph-aam temii malikellrua. Joseph-aam-wa Israel-aam yui akqivkallruateng qanerluni, “Agayutem anirtuqaci temka ayauskiciu maaken.”

20Israel-aat unitaat Sukkoth-aaq qavartarluteng-llu Etham-aami, qau͡gyarrlainaam yuilqum engeliini. 21Erenrani Ataneq ayalartuq ciunratgun napalriakun amirlukun aperturluku tumkaat, unugmi-llu ciunratgun ayagaqluni napalriakun kenerkun tanqiggluki, tua-i pekcugngavkarluki unugmi erenrani-llu. 22Napalria amirluq ciunratneterrlainarluni erenrani napalria-llu keneq unugmi.

Currently Selected:

Exodus 13: YPK

Highlight

Copy