Exodus 14

Qeraraat Imarpik Red Sea-q

1Tua-llu Ataneq qanertuq Moses-aamun, 2“Qanruski Israel-aam yui, uterrluteng-gguq qavartarlit manuanun Pi Hahiroth-aam, akuliignun Migdol-aankuk Red Sea-q-llu, canimelkiinun Baal Zephon-aam. 3Umyuarteqniartuq Pharaoh Israel-aam yui calligtaaryukluki tamaani, qau͡gyakun yuilqukun ayallerkameggnek caperrsugluteng, wall'u nau͡gguirluku ayallerkameggnek yuaraluteng. 4Asvaiceciiqaqa elliin-llu maligciiqaaci, wiinga-llu cirlaklemkun ellii anguyagtai-llu ucurnariciqua. Egypt-aarmiut-llu nallunrirciqut Atanrucimnek.” Israel-aam-llu yui tuaten piut pisqumatacimegcetun.

5Pharaoh qanrucatni yuut ayagniluki, anguyagten̄i-llu umyualinqigtut qanerluteng, “Qaillun-tanem wangkuta piceta, Israel-aam yui pistekelput ayagtelluki!” 6Anguyautessuutegni-llu ayagassuutek akalrialgek anguyagten̄i-llu uptai. 7Ayagluteng-llu ikamrartet ilakluki anguyagtet tiissitsaam avga yuinaat-llu talliman (600) assinrulriit atanerruartuumaita. 8Pharaoh Atanrem asvaicecani, Israel-aam yui malirqerai, tua-i-wa taukut ayiita anagkengelriatun. 9Egypt-aarmiut anguyagtaita horse-aatgun ayagassuutetgun-llu akalrialegteggun maligtait anguluki-llu qavartaumallratni caniani Red Sea-m, canimelkiini Pi Hahiroth-aam Baal Zephon-aam-llu.

10Israel-aam yui, Pharaoh tangrramegteggu agiirtellria, cakneq alingut, Atanermun-llu qayagaluteng ikayuusqelluteng. 11Moses-aaq-llu qanrutaat, “Qungurvigkat amllengrraata Egypt-aami ciin maavet yuilqumun ayaulluta tuquvkaqatarcikut? Qaillun pivkaqatarcikut ayaulluta Egypt-aamek? 12Waten-qaa qanrutellrunritamteggen ayagpailemta Egypt-aamek? ‘Uitaskut kevgiurnauput Egypt-aarmiut?’ Assinruyallruan kevgiurtu'rqumteki Egypt-aarmiut tuqullerkamten̄i maani yuilqumi.”

13Moses-aam kiugai, “Alingevkenaci. Pektayiinaci uitaci, tangerrniarci anirturiyaraa Atanrem, caliarkaa elpecen̄un; Egypt-aarmiut tangrraci unuamek, tau͡gaam uum kinguani tangenqiggngaitaci. 14Atanrem calluuciciiqaaci, elpeci uitauraqainarciquci.”

15 Ataneq qanertuq Moses-aamun, “Ciin qayagasit wangnun ikayuusqelluten? Qanruski tau͡gaam yuut kiiki ciutmun ayaasqelluki. 16Naluggu ayarun, naluumaluku-llu quliinun imarpiim, meq avegtelluku, Israel-aam yui piyuaniartut imarpigmi kinertellriakun nunakun. 17Egypt-aarmiut-llu ircaqruit asvairuceciiqanka maligtevkarluci kingunerpeciuggun, takarnarquciqa pikanirciquq cirlakillemkun Pharaoh-mek, anguyagtainek, akalrialegnek-llu ayagassuutainek alulartainek-llu. 18Cirlakekumteng Egypt-aarmiut nallunrirciqut wiinga Atanrucimnek.”

19An'gilaa Agayutem, ciunratni uitalalleq nugtartuq kingunratnun. Napalria-llu amirluq nugtarrluni ciunratnek kingunratnun, 20akuliitnun Egypt-aarmiut Israel-aam-llu yuin. Amirlum-llu tan'gercetevkaraa Egypt-aarmiunun, Israel-aanun tau͡gaam tanqigluni, anguyagtet atunem tua-i mallgutesciigatevkarluki unugpak.

21Moses-aam-llu unatni nalugai quliinun imarpiim. Atanrem-llu cingaa meq avatmun tuknilriamek anuqlirtelluku calaramek. Unugpak-llu anuqlirtuq, imarpiim mer'a avegtelluku, nuna kinertellria alairluni. 22Israel-aam-llu yuin qeraraat imarpik kinertellriakun nunakun piyualuteng, atunem avategketni meq qacarneruluni. 23Egypt-aarmiut-llu kingunrirturait maliggluki-llu ekluteng imarpigmun horse-aartuumarmeng, ayagassuutetuumarmeng alulartetuumarmeng-llu. 24Erteqatarluku Atanrem unavet tangrramiki, amirlumek kenermek-llu Egypt-aarmiut anguyagtait nanikuangarcetai. 25Pektessuutaita-llu akalriarit qap'itartelluki pegnem ayalangevkarluki. Egypt-aarmiut qanertut, “Qimagnaurtukut! Israel-aam yui Agayutem calluucitai ingluliurluta.”

26 Ataneq qanertuq Moses-aamun, “Unateten yageski quliinun imarpiim, meq uterrniartuq patuluki Egypt-aarmiut, pektessuutait, alulartait-llu.” 27Moses-aam-llu unatni nalugai quliinun imarpiim; erqaarluku-llu meq utertuq ayuqicillermitun. Egypt-aarmiut-llu qimangnaqsaaqut mermek, tau͡gaam Atanrem egtai imarpigmun. 28Meq utercami patui ayagassuutait, alulartait, tamalkuita-llu anguyagtai Egypt-aam. Israel-aat kingunrirturtellrit imarpigmun atauciunge'rmi uitavkenani. 29Israel-aat tau͡gaam imarpigkun piyuagut kinertellriakun nunakun, avategket mer'ulutek.

30Tuani ernermi Atanrem anirturai Israel-aam yui Egypt-aarmiunek, Israel-aat-llu tangrrait taklaluteng cen̄ami tuqumaluteng. 31Israel-aat-llu tangrramegteggu angelriakun pinimikun Atanermun cirlakuciat Egypt-aarmiut, Atanermek qigcigyugtut ukvervikluku-llu Ataneq pistii-llu Moses-aaq.

Currently Selected:

Exodus 14: YPK

Highlight

Copy