Exodus 15

Moses-aam Yuarutii

1Tua-llu Moses-aam Israel-aat-llu yuarun man'a aturaat Atanermun:

“Aturciqua Atanermun, tua-i-wa ucurnarqellriakun cirlakian;

egtellrui elussitat yugtuumaita imarpigmun.

2 Ataneq pinilria akiurucestekaqa;

anirturtekelqa elliinguuq.

Agayutkaqa nanrarciqaqa-llu,

atama Agayutii, yuarutkeciqaqa angelriarucia.

3 Ataneq anguyagten͞guuq;

Ataneq elliin atqaa.

4“Elliin egtai Egypt-aam anguyagtai pekcessuutai-llu imarpigmun;

atanerruari-llu avurat qecuqitut imarpigmi Red Sea-mi.

5Et'ulriim imarpiim patui;

kill'uteng-llu teggalqutun terr'anun.

6“Tallirpilirneren, Ataneq, ucurnarqellriamek piningqertuq,

piunrirai ciqumlluki inglukesteput.

7Angtaciakun ucurnarqucirpet cirlakaten inglukesteten;

eq'uqrucavki ekuavkaraten carangllugtun.

8Cupngavni meq quyurtuq quyigiluni;

qacarnertun ayuqliriluni;

imarpiim et'uqra tegg'iluni.

9Inglukestiit qanertuq, ‘Kingunrirturciqanka anguluki-llu;

avverqeciqanka akluit tegullua-llu piyugtacimtun;

nuussirpaglua wiinga uayarciqanka.’

10Tau͡gaam cupngavteng, Ataneq, Egypt-aarmiut qecuqitut;

kill'uteng kic'aqutatun alingnarqellriamun mermun.

11“Ataneq, kina agayutni elpetun ayuqa?

Kina elpetun ayuqa tanqiullermikun ucurnaqluni?

Kina caliyugngaa irr'inarqellrianek angelrianek-llu calianek elpetun?

12Tallirpilirneren yagtellerpeni

nunam igellrui inglukesteput.

13Akqillren aturluku ciuliqagtellruaten yuut anirtulten;

pinirpegun-llu ciuliqagtellruluki tanqilriamun uitavigpenun.

14Nunat niicameng kakavut alingluteng;

Philistine-at-llu alingem tull'uki.

15Ciuliqagtai Edom-aam nanikuagut;

Moab-ami-llu yui pinilriit uulegtut;

Canaan-aam-llu yui caperrsunga'arrluteng.

16Alinga civuura-llu tut'uq ellaitnun.

Tangrraat pinin elpet, Ataneq,

nangerngaluteng-llu casciiganateng alingem ugaani,

yugpet, angitellerpet teguarullratnek, kiturnatkaatnun.

17Yut'en itrutellruaten nunalgarrluki-llu ingrirpenun,

elpet, Ataneq, cucukellerpenun nunaknaluku,

Agayuvigmun elpet piliaqellerpenun.

18Elpet, Ataneq, atanruarkauguten akwarpak akwanun.”

Miriam-aam Yuarutii

19Israel-aat piyuallruut kinertellriakun nunakun imarpigmi. Tau͡gaam Egypt-aarmiut pekcessuutait horse-aarit-llu yugtuumarmeng ekellratni imarpigmun, Atanrem meq utercetellrua patuluki.

20Prophet-aam Miriam-aam, Aaron-aam alqaan, aturcetaani tegua, tamarmeng-llu arnat maligtaat aturcetaarluteng yurarluteng tuaten. 21Waten Miriam-aam atuutai:

“Aturci Atanermun, tua-i-wa ucurnarqellriakun anagivkarillruan;

egtellruaki-llu elussitat yugtuumaita imarpigmun.”

Qatlinarqelria Meq

22Tua-llu Moses-aam ciuliqagtai Israel-aam yui, unilluku imarpik Red Sea-q, ayagluteng-llu yuilqurranun Shur-am. Pingayun erenret aturluki ayagtut yuilqukun mermek nataquteksaunateng. 23Tua-llu tekitut nunamun at'legmun Marah-mek, tau͡gaam tuani meq qatlinarqessiyaagan ellaita merciigataat. Tauna pitekluku acillruat Marah-mek.#15.23: Marah: Hebrew-tun una waten ayuquq “qatlinaqluni.” 24Yuut-llu qanemyuugartut Moses-aamun apluku-llu, “Camek merciqseta?” 25Tua-i Moses-aaq piicagtuq cumiggluni Atanermun, Atanrem-llu tangercetaa muraggarmek. Tauna mermun egtaa; meq-llu miy'unariluni.

Tuani Atanrem cikirai alerquutnek yuutekaitnek, tuani-llu cali elliin naspaagai, 26qanerluni, “Niisngakuvciu Ataneq Agayutsi, elluarrluci yuuluci tangvallrani, alerquutai-llu tamalkuita aturluki, naulluutet Egypt-aarmiunun tuc'etellrenka elpecen̄un pivkarngaitanka; tua-i-wa wiinga Atanruama canrircetaqluci.”

27Tua-i-llu Elim-aamun tekitut. Tuani qula malrugnek cipluku mermek ulvelriartangqertuq yuinaat-llu pingayun qulnek cipluku (70) palm-anek avayarpalegnek napanek. Tuani qavartartut mer'em canianun.

Currently Selected:

Exodus 15: YPK

Highlight

Copy