Exodus 19

Israel-aam Yui Ingrimi Sinai-ami

1-2Israel-aam yuin unitaat Rephidim-aaq. Erenrin-llu ciuqliatni iralut pingayuata Egypt-aaq uniqaanermeggnek yuilqurtaanun Sinai-am tekitut, tuani qavartallerkiurtut acianun Sinai-am. 3Moses-aam-llu mayuraa ingriq Agayun qanellguteksarturluku.

Atanrem-llu qayagauraa ingrimek qanrutesqelluki Israel-aam yui, Jacob-aam kinguvri: 4“Tangellruarci qaillun pillruciqa Egypt-aarmiunun, qaillun-llu ayautellrucirci yaqulpiim piyagaminek ayaucilauciatun yaqugmi qaingagnun piluki, tailluci-llu wavet wangnun. 5Niisngakuvcia, akqutka-llu aturluku, nakmiin elpeci wii yuk'eciqamci; tua-i-wa nuna tamalkuan pikngamku. 6Yuuciquci allakaumaluci wangnun kiima, kevgiurciqerpecia-llu agayulirten͞guluci. Makut qanrutkekiki Israel-aam yuinun.” 7Moses-aam atrarluni ciuliqagtait taisqai qanrutekluki-llu tamalkuita Atanrem alerquutai ellminun. 8Tamarmeng-llu kiugaat ataucikun, “Tamalkuan Atanrem qanrutkellra aturciqerput.” Yuut-llu qanellratnek waten Moses-aam qanrutaa Ataneq.

9 Ataneq qanertuq Moses-aamun, “Taiciqua amirlukun yugnun niitesqellua qalaruskumken, ukveqsagutniaraatgen wak'nirnek.”

Moses-aam-llu Ataneq qanrutaa yuut kiutiitnek. 10Ataneq cali qanertuq Moses-aamun, “Ullagluki yuut kenciknarcarceski unuamek unuaqu-llu, aturait-llu erviisqelluki. 11Upingariniartut yaaliaku. Taumi ernermi Ataneq atrarciquq Ingrimun Sinai-amun tangertelluni yugnun tamalkuitnun. 12Cet'riniartuci kassuggluku ingriq, yugnun qerararkauvkarpek'naku ceteq tamana, qanrutniaten-llu mayuusqevkenaki ingrimun mallguurasqevkenaku-llu. Ingrim agturtii tuqucimaarkauguq; 13ingrim ullagtellra agturpek'naku tuqutniarci yuungraan ungungssiungraan-llu teggalqunek miluquluku wall'u pitgaquluku. Tau͡gaam cupu'uryaraq qalriakan nutaan yuut ingriq mayurniaraat.”

14Moses-aam ingrimek atraami, kenciknarcarcetai yuut ellaita-llu aturateng ervigluki. 15Moses-aam-llu qanrutai, “Upingariniartuci yaaliaku, arniuryaqunaci-llu uptellerpeci nalliini.”

16Unuaquani erenret pingayuata kallirauq kenerpallagaluni, amirlurpagtanguq-llu ingrimi, qastulria-llu cupu'uryaram nepii niitaat. Tamarmeng-llu yuut tuani uulegtut alingluteng. 17Moses-aam ciuliqaggluki anutai uitaviatnek tangerrsarturluku Agayun, nangerrluteng-llu acianun ingrim. 18Tamarmi ingriq patumauq aruvagmek, Ataneq-wa atraan tuavet kenerkun. Aruvak mayurtuq kaminiarpiim aruviitun, yuut-llu tamarmeng qiivut cakneq. 19Cupu'uryaraq-llu qasturiinallrani Moses-aaq qanran Agayutem kiugaa kallugkun. 20Ataneq-llu atrartuq Ingrim Sinai-am kangranun, Atanrem-llu Moses-aaq qayagauraa mayuusqelluku, Moses-aaq-llu mayurluni. 21Atanrem-llu qanrutaa, “Atrarluten yuut aarcirturki ceteq qeraasqevkenaku tangvagyarturlua, qeraquneng amlleret tuquciqngata. 22Agayulirten͞gunger'meng taigarkat mallgeskiinun Atanrem, kencignarcayunarqut Atanrem anucimirqecetaaryuarai.”

23Moses-aaq qanertuq Atanermun, “Yuut ullagciigataat Ingriq Sinai-aq; elpet nauwa qanrutellrukevkut, ‘Ngelelirciu ingriq kassuggluku kencignarqellriaruluku.’”

24 Atanrem qanrutaa, “Atrarluten Aaron-aaq aqvau, tau͡gaam agayulirten̄un yugnun-llu qerarcecaqunaku engela ullagnaluku Ataneq, anucimirqecetaaryuarai.” 25Moses-aam tua-i atrarluni yuut qanrutai Atanrem qanellrinek.

Currently Selected:

Exodus 19: YPK

Highlight

Copy