Exodus 20

Qulen Alerquutet

1Agayun qallatuq makunek qaneryarirluni: 2“Wiinga Atanruunga elpet Agayuten, anutestekellren Egypt-aamek teguarullerpenek.

3“Allamek Agayutengqerrsaqunak ciuqamni.

4“Elpenun yugualiyaqunak, ayuqelciyaqunak-llu camek qilagmi pakmani uitalriamek, wall'u nunam qaingani uitalriamek, wall'u mermi nunam aciani uitalriamek. 5Ciktaarviksaqunaki tamakut kevgiurpek'naki-llu, waniwa Wiinga Ataneq Agayuten, Agayutnguama ilunglua, ataita assiilngillrit tuc'etaqluki irniaritnun, kinguvrita pingasuingitnun cetamaingitnun-llu uumikestemnun. 6Tau͡gaam naklek'laranka kenkestenka alerquutma-llu aturtait amlleqapigtellriit.

7“Elliinginaq apaayaqunaku Atanrem Agayutvet atra, Atanrem pinarqelriaruniciqngaku at'mi elliinginaq apaastii.

8“Erneq Sabbath-aaq uitayaraq umyuaqiu kenciknarqevkarluku-llu. 9Ernerni arvinlegni caliarkauguten caliarkaten tamalkuita caliaqluki. 10Tau͡gaam erenret malrunelgat waniwa erneq uitayaraq Atanrem Agayutvet pia, tua-i camek caliarkamek caliyaqunak, elpet, wall'u qetunraan, wall'u paniin, wall'u pisten angun, wall'u pisten arnaq, wall'u ungungssiten, wall'u allanren nunavnetellria, 11ernerni arvinlegni Atanrem piliaqngamiki qilak nuna-llu imarpik-llu, taukunelnguut-llu tamalkuita, uitaluni-llu erenret malrunelgatni. Tamana pitekluku Atanrem atawaqaasqaa erneq Sabbath-aaq uitayaraq kenciknarqevkarluku-llu.

12“Aatan aanan-llu niisngakikek, unguvamanaurtuten nunami Atanrem Agayutvet elpenun cikiutekellrani.

13“Tuquciyaqunak.

14“Akusrarutekiyaqunak.

15“Teglegyaqunak.

16“Kina piciliryaqunaku.

17“Ciknayaqunak ilavet eniinek. Ciknayaqunak ilavet nulirranek, wall'u pistiinek angutmek, wall'u pistiinek arnamek, wall'u kuluviinek, wall'u ciulviinek, wall'u camek ilavet piinek.”

Yuut Alingellrat

18Yuut niicamegteggu kalluk cupu'uryaraq-llu qalrialria, tangerrluku-llu kenerpallagallra, ingriq-llu aruvirluni, uulegtut alingluteng; nangengqaluteng-llu yaaqvani. 19Qanertut-llu Moses-aamun, “Qalaruskuvkut niicugniciqamteggen; tau͡gaam Agayutmun qalarucecaaqunata tuquyuartukut.”

20Moses-aam yuut qanrutai, “Alingenrici, Agayutem naspaaqainaryarturaaci niisngarrlainaasqelluci kesianek assiilnginritniartuci.” 21Cali tau͡gaam yuut yaaqvani nangengqaut. Kiimi Moses-aam malkaniraa amirluq Agayutem uitavia.

Picirkiutet Ekuavignun

22 Ataneq qanertuq Moses-aamun, “Waten qanruski Israel-aam yui: ‘Elpecen̄ek tangellruarci qalartelqa elpecen̄un qilagmek. 23Agayut'liyaqunaci pikarpecen̄ek qerrirlimek, wall'u suulutaamek, piicagvigkarpecen̄ek wangnun ilakluki. 24Nunamek ekuavigkiuqici wangnun, qaingani ekuaginiartuci qusngimek kuluvagmek-llu, elliitekluki ekualuki qamlluki, ilakuyucimun-llu elliitekluki. Tamaitni allakallemnun agayuyaraqesqelluki wangnun, ullalarciqamci atawaqertelluci-llu. 25Ekuaviliaqavci wangnun teggalqunek kepuumalrianek atuqsaunaci, caskutgun kiicissuutetgun piliaqaqavciki wangnun atuyunairucet'laraci. 26Ekuaviliksaunaci-llu tuss'aralegnek mayulrianek tuavet, tuaten pikuvci kemegci alaiciiqngan tamakutgun mayuquvci.’

Currently Selected:

Exodus 20: YPK

Highlight

Copy