Exodus 22

Akiliriyaram Picirkiutai

1“Angun teglekuni kuluvagmek wall'u qusngimek, tauna-llu tunluku wall'u tuqulluku, akilirarkaugaa kuluvaukan tallimanek kuluvagnek, qusngiukan-llu cetamanek qusnginek. 2-4Akilitarkaugaa teglellni. Akiliutekailkan teglelleq tunciqaat teguarurtelluku akiliutnguluni teglellerminun. Teglegaq ungungssiq teglegtellrani nataqumakan unguvaluku kuluvauli, ciulvauli, qusngiuli, cimirarkaugaa malrugnek.

“Yuum-llu tegliulria unugmi angukaku kaugturluku-llu tuqulluku, tauna tuqucilleq pinarqelriarunrituq. Tau͡gaam erenrani tuqucikuni pinarqelriaruarkauluni.

5“Angutem naucetaarvigmi wine-arkanek-llu naucetaarvigmi ungungssiutni nerevkaqaku, tauna-llu allam naucetaarvianun ayagluni nerkaki naumalriit tamaani, cimirciqai ungungssim nerellri naucetaami wine-arkautmi-llu assinritnek.

6“Angun kumarcikuni kenermek elliin naucetaarvimini, ayuluni-llu ayagluni allam naucetaarvianun, ekualuki mukaarkat naumalriit kepliarumaluteng-llu quyungqalriit, kenermek kumarcillrem akilirciqai ekuavkallni.

7“Yuum avaliqsukuniki allam yuum akiutai wall'u allat qelegnarqelriit piutai, taukut-llu teglegumakata eniinek, teglellrem nataqumakuni malrurqugnek amllertataitnek akilirciqai. 8Tau͡gaam teglengalria nataqumanrilkan avaliqestellrat taukut qelegnarqelriit, taicimaarkauguq agayuviatnun, tuani-llu ukvernarcariluni taukut teglellrunritniluki.

9“Aklutangqerqan wall'u ungungssirtarluni kuluvagnek, ciulvagnek, qusnginek, wall'u allamek camek tamalriartangqerqan, yuuk-llu malruk qanqagnek, ‘Wiinga pikaqa,’ taukuk pikniluku qanellrek ayaucimaarkauguk yuut agayuviatnun. Agayutem nallunaillra pinaqniluku, akilirciqaa aipani malrurqugnek amllertatiinek.

10“Yuum avaliqsukuniki allam yuum ciulvautai, kuluvautai, qusngiutai, wall'u allat ungungssiutai, tamakut-llu iliit tuqukan wall'u akngirrluni wall'u ayakaucimaluni, tangvagtaunani-llu, 11angun tauna ayagluni agayuvigmun ukvernarcariarkauguq teglellrunritniluku taum yuum ungungssia. Tegelgumallrunrilkan ungungssiq pikestiin canrilkarkaugaa tamarillni, taum-llu aipaan akilirnarqevkenaku. 12Tau͡gaam teglegumakan nutaan cimirarkauluku. 13Ungungssit-llu yuilqurmiutaat tuquskatgu, taiskiliu asguranairutekluku; cimirngaitaa yuilqurmiutaat ungungssit tuqucatgu.

14“Angun-llu navraquni ungungssimek allamek yugmek, tauna-llu akngireskan wall'u tuquluni, pikestii tuantenritellrani, yuum taum navrallrem akilitarkaugaa. 15Tau͡gaam pikestii tuanlluku pikan, yuum taum akilirngaitaa, navrauterluni pikan cagmaumallra navrautiin patumaciqaa.

Yuullerkam Elluarrluni Agayumacikun-llu Alerquutai

16“Angutem unayaqluku akusrarutekekaku anguciuqsailnguq arnaq, nulirruciucirarkaugaa nuliqsagulluku-llu. 17Tau͡gaam arnam atiin pisqumanrilkaku, atii akilirciqaa nasaurlurmun nulirruciutngutulim pitatiinek.

18“Tuqutarkaugarci arnaq angalkumirtaatuli.

19“Tuqutarkaugarci angun ungungssimek akusrarutekilria.

20“Tuqucimaarkauguq kina imna ekuagilria piciatun agayutnun, Atanermun wangnun kiingan pivkenani.

21“Pinerrlugayaqunaciu wall'u nanglluku allanrulria. Umyuaqiciu allanrullrucirci Egypt-aami. 22Pinerrlugayaqunaciu arnaq aipaineq wall'u elli'iraulria. 23Nangeskuvciki ellait-llu wangnun kaigaluteng iqluvkenii niiciiqanka; qayagauqata ikayungcarluteng 24eq'uqerciiqua cakneq, tuqulluci-llu anguyagkun, nuliaci-llu aipainrurciiqut irniaci-llu atairulluteng.

25“Navriskengkuvci akinek yum'a iliitnun arrsaulriamun, navriskengtulitun piyaqunaci ilatii tapeqluku akiliisqelluku. 26Tegukuvciu iliita ulikutaa akqutkevkarluku akiilnguillerkaanun, tunkiu ataam akerta tevirpailgan, 27tua-i-wa kiingan pikngaku urumatkaqluku. Qavaquni allamek uligkaituq. Wangnun qayagauqan kiuciqaqa. Tua-i-wa wiinga takumcutalriaruama.

28“Qanerpegun caunrilkuuryaqunaku Agayun, aniqlaavkenaku-llu yugpet ciuliqagtiit.

29“Elliilaqina wangnun mukaarkautevnek, wine-autevnek, olive-aat-llu uquatnek pinariaqan.

“Cikilaqicia-llu yung'eqarraarutevcen̄ek angutnek. 30Cikilaqicia irniqarraarutaitnek kuluvautevci qusngiutevci-llu. Angucalut ungungssit irniqarraarutait aanaitni uitavkaraqluki malrunlegni ernerni, pingayunelgatni erenret elliitekaqluki wangnun.

31“Elpeci yuugarkauguci allakaumaluci wangnun, taumek ner'arkaunrituci yuilqurmiutaat ungungssit tuqutellrita kemgitnek; tunlaqiciki tamakut qimugten̄un.

Currently Selected:

Exodus 22: YPK

Highlight

Copy