Exodus 23

Elluaneq Pitalqeggsaraq-llu

1“Sagciyaqunaci qannguanek. Ikayuryaqunaciu pinarqut'lek angun nallunairinguarluci iqluurluci. 2Maligarutaaryaqunaci amllenrulrianun alarrluteng pikata, apervikualuteng tuaten elluaq mumiggluku. 3Ingluarvikevkenaku-llu arrsaulria yuk naspaamallrani.

4“Tangerquvci inglukestevci ungungssianek tarratellriamek qaunqestaunani ut'ruskiciu pikestiinun. 5Tangerquvci-llu eq'ukestevci ciulviinek iqumalriamek nangercesciiganani atmani uqamailata, kituryaqunaciu. Ikayurluku nangreskiciu.

6“Yuk arrsaungraan elluarrluku cuqtarkaugarci apqaurvigmun ullauskan. 7Kina piciunrilngurteggun picetaarucaqunaciu. Pinarqutailnguq ellualriit-llu tuquceteksaunaki, uitasngaitaqa kina imna tuaten assiitetalriamek pilria. 8Assinrilngurmek pisqengraiceci akilirpagluci ciuniuqsaunaki, ciuniuritulit tuaten ayuqellrianek akinek cikmilriatun ayuqelaata piciulriim tungiinun, ellualriit-llu piyullrat iqlutun ayagcetaqluku.

9“Nangelrakeksaunaki allanret; allanruyaraq nallunrilavciu elpeci-llu allanrullruavci Egypt-aami.

Allrakut Erenret-llu Malrunelgurutiit

10“Allrakuni arvinlegni nauceciilararkauguci nunautevcen̄i quyurciluci-llu naugillrinek. 11Tau͡gaam allrakut malrunelgatni uitavkaqiciu quyurtevkenaki-llu qaingani naulriit. Arrsaulriit nerniartut tamaani naulrianek ungungssit-llu yuilqurmiutaat uitalriit nerniarait. Wine-anek-llu naucetaarvici olive-aat-llu napait tuaten piniaci.

12“Caliaqluci ernerni arvinlegni nitilimi, tau͡gaam erenret malrunelgatni caliksaunaci, teguaci, allanret, calisteci, ungungssici-llu mernuinercirniartut.

13“Niicugniaqluki cat tamalkuita wii Ataneq qanellrenka elpecen̄un. Piicaksaunaci allanun agayutnun atrit-llu apaaksaunaki.

Pingayun Angelriit Nerevkariyarat

14“Atulaqiciki pingayun agayunerpiit nerevkariyarat allrakumi wangnun qigcikutekluki. 15Abib-am iraluani, tuani iralumi anllerci Egypt-aamek nallairaqan, atulaqiciu Quuleciriyarailngurmek Kelipartularvik, tuaten ayuqluku alerquutekellrucimtun elpecen̄un. Quuleciralegnek kelipanek nereksaunaci erenret malrunelgen aturluki. Agayuyartuqsaunaci-llu wangnun elliitekalgirpek'naci.

16“Atulaqiciu naucetaarpecen̄ek quyurciyaram agayunerpii quyurcillerci ayagniraqavciu.

“Atulaqiciu naucetaanek quyurciyaram agayunerpii uksuarmi quyurciaqavci atsaitnek wine-arkat atsangqetulit-llu napat. 17Allrakuaqan ukuni pingayuni agayunerpagni tamarmeng angutevci tailuteng piicagviksartulararkaugaatnga Wii Ataneq Agayutevcen̄i.

18“Quuleciralegnek kelipanek elliiksaunaci ekuagiaqavci ungungssinek wangnun. Uquit ungungssit ekuamallret wangnun ukuni agayunerpagni uitavkaqsaunaki unuakurnatkaanun.

19“Allrakuaqan taitaqluki eniinun Atanrem Agayutevci ciuqliit mukaarkat quyurteqarraalci.

“Keniqsaunaki piyagaat qusngit wall'u qusngirngalnguut aanaita milgitnun.

Akqutet Ayuqucirtuutet-llu

20“An'gilamek ayagceciciqua ciunerpeciuggun cayailkuciumastekarpecen̄ek pektellerpecen̄i, ayautestekarpecen̄ek-llu nunamun uptellemnun. 21Murilkelluku niisngaluku-llu ingluliuqsaunaku-llu pikiciu, wiinga ayagcetellruamku, au͡g'arisngailaci ingluliuquvcen̄i. 22Tau͡gaam maligtaquurquvciu tamalkuita-llu pisqutenka atuquvciki callugciqanka tamalkuita ingluci. 23An'gilaqa-llu ayagceciiqaqa ciunerpeciuggun, ayauciiqaaci-llu nuniitnun Amorite-at, Hittite-at, Perizzite-at, Canaanite-at, Hivite-at, Jebusite-at-llu, wiinga-llu piunrirciqanka. 24Ciktaaqsaunaci agayutaitnun piicaksaunaci-llu tamakunun, agayumacimegteggun-llu piciryarait piciryaraqliuteksaunaki. Piunriraqluki agayutait itumtaqluki-llu qigcikekait teggalqut napalriit. 25Piicagvik'laquvcia wiinga, Ataneq Agayutevcen̄i, atawaqerceciiqamci, neqkangqertelluci merkangqertelluci-llu au͡g'arluki-llu tamalkuita naulluuteci. 26Nunavcen̄i arnat irnicualarngaitut irniarilngaunateng-llu. Wiinga-llu unguvamavkarciqamci.

27“Pairnirastevcen̄un alikevkarciqua, ayuquciiruceciiqanka-llu yuut callukengaci. Tuigceciiqanka ingluci qimagtelluki-llu elpecen̄ek. 28Ingluci nuniinga'rceciiqanka; ayagtelluki Hivite-at, Canaanite-at, Hittite-at-llu iluvainanerpecen̄i. 29Ayagcessngaitanka allrakum ataucim iluani. Tuaten pikuma ungungssit yuilqurmiutaat amllerissiiyaagciqngata nuna-llu yuirtessiyaagluni. 30Tau͡gaam carrauqaqluki anevkarturciqanka elpeci amllerinatkarpecen̄un nuna piksagucugngariluku. 31Nunasi engelengqe'rceciiqaqa Red Sea-mek Philistine-at imarpiatnun yuilqumek-llu Euphrates-aamun; cirlakevkarciqngamki tamatum yui elpecen̄un, ayagtelluki ciunerpecen̄ek. 32Akqut'lillgutkeksaunaki tamakut yuut agayutait-llu. 33Yuut tamakut uitavkaryaqunaciki tamaani nunavcen̄i, assiilngirceciiqaiceci wangnun. Agayulaquvci agayutaitnun tuqunarqelriaruluni picurlautnguciquq elpecen̄un.”

Currently Selected:

Exodus 23: YPK

Highlight

Copy