Genesis 48

Jacob-aam Atawaqercetak Ephraim-aankuk Manasseh-llu

1Tamatum kinguani Joseph-aaq qanrutaat atii naulluuniluku. Ullagaa qetunraagminek maligluni Manasseh-nkugnek Ephraim-aaq-llu. 2Jacob-aaq qanrucatni Joseph-aamun ullagniluni piningnaqluni inglemini maktuq. 3Jacob-aam qanrutaa Joseph-aaq, “Agayutem Artuqailnguum alairvikellruanga Luz-ami Canaan-aam nuniini atawaqertellua-llu. 4Qanrullua, ‘Irnialingevkarciqamken yugyangevkarluten, man'a-llu nuna kinguverpenun cikiutekciqaqa nangyuilngurmek pikesqelluku.’”

5Cali qanertuq, “Ukuk-llu qetunraagken yuurtellrek maani Egypt-aami maavet taivailegma wiinga pikagka; Ephraim-aankuk Manasseh-llu ayuquk qetunraagemtun, cangallruvkenatek qetunraagemni Reuben-aankugni Simeon-aaq-llu. 6Kinguagnegun irniangekuvet elpet pikciqaten; paitaugarkaq akurturciqaat Ephraim-aankugnegun Manasseh-llu. 7Waten piunga aanan Rachel-aaq pitekluku. Cakneq angniitevkarlua tuqullruuq Canaan-aami, yaaqsigpek'naku Ephrath-aaq, tamaani uterrnginanemni Mesopotamia-mek. Tuani tungmagtellruaqa Ephrath-amun tumyaram caniani.” (Ephrath-aaq maa-i Bethlehem-aamek pilaraat.)

8Jacob-aam tangrramikek Joseph-aam qetunraak qanertuq, “Kinkuugak ukuk?”

9Joseph-aam qanrutaa, “Qetunraqagka, Agayutem cikiutekellrek maani.”

Jacob-aam pia, “Taiskek canimnun atawaqercetniagka.” 10Jacob-aaq angutngurcami meciirutuq. Joseph-aam qetunraagni taicakek Jacob-aam canianun elliin akuqerlukek melugarak. 11Jacob-aam qanrutaa Joseph-aaq, “Tangenqigtenritnayukellruyaaqamken, tau͡gaam waniwa Agayutem tangercetak-llu irniagken.” 12Tua-i-llu Joseph-aam qetunraagni atrartak atami manuanek, cikluni-llu ciuqerranun.

13Joseph-aam irniagni malkaniutak Jacob-aamun, Ephraim-aaq iqsulirneranun Manasseh-llu tallirpilirneranun. 14Tau͡gaam Jacob-aam talligni navrullukek patgaa Ephraim-aaq tallirpilirneminek, kinguqliungraan, iqsulirneminek-llu Manasseh anngaqliq pategluku. 15Tua-i Joseph-aaq atawaqercetaa:#48.15: Joseph: Atawaqercecillermikun Ephraim-aankugnek Manasseh-llu atawaqercetaa Joseph-aaq.

“Agayutem, kevgiullragnek atagma Abraham-aankuk Isaac-aaq-llu,

atawaqertellikek ukuk tan'gaurluuk!

Agayutem, ciuliqagtestem̄a erneq una tekilluku,

atawaqertellikek!

16An'gilam, aviutestem̄a picurlagnarqelriamek tamalkuan, atawaqertellikek.

Atqa, atagma-llu Abraham-aankuk Isaac-aaq-llu atkek,

piugurqilit ukugnegun tan'gaurluugnegun!

Ataki irnialiqilik kinguvelirlutek-llu!”

17Joseph-aam tangrramiu atami tallirpilirnera patgusngaluku Ephraim-aam qamiqurranun quyanrituq; elliin-llu unatai teguluki nugtartai Ephraim-aam qamiqurranek Manasseh-m qamiqurranun. 18Atani-llu qanrutaa, “Tuaten pivkenak. Una waniwa ciuqliuguq; elliluki tallirpilirneret unateten qamiqurranun pii.”

19Tau͡gaam atii tuaten piyuumiituq qanerluni, “Nallunritaqa. Nallunricaaqaqa. Manasseh-m-llu kinguvri angelriarurciiqsaaqut. Tau͡gaam kinguqlia quyinruciquq elliini, kinguvri-llu atanruvigpaurciiqluteng.”

20Tuani ernermi atawaqercetai qanerluni, “Israel-aam yui atawaqercecilarciqut ateci aturluki. Qanlarciqut, ‘Agayutem ayuqevkaqiliten Ephraim-aatun Manasseh-tun-llu.’” Tuaten pillermikun Jacob-aam Ephraim-aaq ciuqliuvkaraa Manasseh-mun.

21Tua-llu Jacob-aam qanrutaa Joseph-aaq, “Tangrrarpenga tuquniarartua, tau͡gaam Agayutem nayurciqaaci ut'ruciiqaaci-llu ciuliarpeci nuniitnun. 22Elpenun, anelgutevnun pivkenaku, Shechem-aaq cikiutekaqa, nuna nauvigkarnilria Amorite-anek tegukengalqa nuussirpamkun urluvemkun-llu.”

Currently Selected:

Genesis 48: YPK

Highlight

Copy