Genesis 49

Nangneqliit Qanellri Jacob-aam

1Jacob-aam qetunrani taisqai qanrulluki-llu, “Quyurci tailuci, qanrutnaamci elpecen̄un tut'arkanek ernerni ukegkuni.

2“Quyurrluci niicugnici Jacob-aam qetunraini.

Niicugniciu atasi Israel-aaq.

3“Reuben-aaq, irniama ciuqlikacaaqaatgen, piniutekamken

Irniaqerraaqngamken piniryugallemni.

Qutegtenruuten pininqurrauluten-llu.

4Ulerpagtun arulaircimasciigalngurtun ayuquten,

Tau͡gaam ilavni angenrungaituten,

Tua-i-wa tutellruavgu nulirruaqa

Menuurrluki atavet ingelri.

5“Simeon-aankuk Levi-aq-llu anelgutkuk.

Caskutek aturluki aarnarqelria atularaak.

6Aassaqlutek qalaruskagnek ilalirngaitagka,

Quyurrvikegni-llu ilalirngaunakek,

Qenqerrlutek tuqucilallruagnek yugnek

Ulapequcilaagnek-llu ungungssiarnek casciigalivkaraqluki.

7Aniqlaamali qenqerrutiik anagarullutek tuatnalaamek,

Aniqlaamali-llu qenngelallrak takumcuyugpek'natek.

Cekavceciiqagka tamiinun Israel-aam nuniinun.

Avverqeciqagka yuinun.

8“Judah, anelgutvet nanrarciqaatgen.

Inglukesteten uyaqurritgun tegumiaqeciqaten.

Anelgutvet ciktaarvik'larciqaatgen.

9Judah yugtutulitun ayuquq,

Pissuqengani tuquqaarluku utertaqluni igtem̄inun,

Nengluni-llu inarrluni.

Kia-llu tuparqellerkaa alikaa.

10Judah-m tegumiaqeciqaa septer-aaq angayuqrulriim tegumiaqetukii,

Kinguvrin atanirturilriarullrat iquklisngaituq.

Atanruviit takarnarqutmek taiciiqaat

Ciuqerranun-llu ciktelarciqut niisngaluku.

11Petugaa ciulvayagani wine-arkam avayaanun,

Assinkacagarmun wine-arkanek naugitulimun.

Eruraqluki-llu aturani kavirlimun wine-amun.

12Iik kavirivkarak mer'allran wine-amek,

Keggutai-llu qat'rivkarluki milgem mel'allran.

13“Zebulun-aaq enengqerciquq imarpiim cen̄iini.

Sun'at uqisvik'larciqaat uitavian cen̄ii.

Nunautiin engelii tekisngaciquq Sidon-aamun.

14“Issachar-aq cangallrunrituq ciulvagmi

Elavngalartuq aqumlleran qemaggviigken akuliigni.

15Mernuinercirvini assikngamiu

Nuna-llu nunaniqluni,

Pull'uni atmircetuq

Teguatun-llu pistetun aksang'e'rmi calivkaumaluni.

16“Dan-am atanirturciqai yun'i.

Israel-aani ilamegcetun ayuqeciqut.

17Dan-aq ciissirpauciquq tumyarat caniatni,

Tuqunarqelriaruluni ciissirpauluni tumyarat mengliitni,

Keggmaraqluki horse-aat iruitgun,

Qaingani ekumalria kingutmun igtelluku.

18“Utaqaunga anirtullerkarpenek Ataneq.

19“Teglengalriit callugciqaat Gad-aq,

Tau͡gaam elliin tuiggvikluki malirqaraciqai.

20“Asher-aam nunautii neqkaqegtaarnek naugiciquq.

Neqkautenglarciquq angayuqat neqkaqsugngakaitnek.

21“Naphtali tuntuuguq pangalgatuli piyugtacirmitun,

Irniaqluni tangssunarqelrianek tuntuyagarnek.

22“Joseph-aaq yuilqurmiutartun ciulvagtun ayuquq mer'em ulvelriim caniani,

Yuilqurmiutauguq kuuniyagaq qemim uvernerani;

23Inglukestain curukaraat uluryanaqluteng

Malirqeraat-llu pitgaquluteng.

24Tau͡gaam urluvra caqtaaqsaituq,

Tallik-llu pinirivkaumalutek

Piniakun Artuqailnguum Agayutiin Jacob-aam,

Qusngiliurtem Qaunqestiin Israel-aam.

25Ikayurtekan atavet Agayutii,

Artuqailnguum Agayutem atawaqercet'laraaten

Ellallirtelluku atawaqautnek pakmaken

Mermek-llu nunam akuliinek,

Atawaqautnek kuluvagugarnek mikelngurnek-llu,

26Atawaqautnek mukaarkanek naucetaanek-llu,

Atawaqautnek ak'allarnek ingrinek,

qemiini-llu nangyuilngurni uitalrianek.

Makut atawaqautet tull'it Joseph-aamun,

Cunguanun allakaumalriim anelgutminek.

27“Benjamin-aaq alingnarqelriatun keglunertun ayuquq.

Unuakumi unugmi-llu tuqurqiluni nerlartuq.”

28Ukut tamalkuita ilakutellriartaqai Israel-aam. Makut-llu atiita qanelqai atawaqercetlerminiki tua-ingunrituurluki, atauciuqaqluki qanrutaqluki ellaitnun pitalqellriamek.

Tuqullra Tungmagcimallra-llu Jacob-aam

29Nutaan-llu alerqurai qetunrani, “Wiinga tuquarkaurtua; tungmageskicia ciuliama nuniitnun qerranqumun nuniinun Ephron-aam Hittite-am, 30Machpelah-mi calaralirnerani Mamre-m Canaan-aami. Abraham-aam kiputellrua qerranquq nunii-llu Ephron-aamek qungurvigkauluku. 31Tuavet tungmagtellruagket Abraham-aankuk Sarah-llu; Isaac-aankuk-llu Rebecca-llu. Tuavet-llu wiinga tungmagtellruaqa Leah. 32Nuna qerranquq-llu kipukengauguk Hittite-anek. Tungmageskicia tuavet.” 33Jacob-aam qetunrani alerquanriamiki taklarrluni anernerirtuq.

Currently Selected:

Genesis 49: YPK

Highlight

Copy