Luke 17

Picetaarilriim Aarcirtuutii

1Elitnaurani-llu qanrutai, “Picetaarutet taigarkauyaaqut, tau͡gaam nakleng yuk tauna picetaarutem tekiucestii! 2Atawauyartuq tauna miilissuutem teggalqurranek uyaqurrikun kicirluku imarpigmun-llu kit'elluku, makut piniatellriit picurlagcetevkenaki.

Atunem Au͡g'aritaagutlerkaq

3“Murilkici, anelguten assiilngiqan, inerqurru, umyuarnayagucikan-llu au͡g'arisgu. 4Ernerpak-llu assiilngirvikekaten malrunlerqunek, tuaten-llu cali tamakut amllertatekluki qanlaqan umyuarnayaguciniluni, au͡g'aritarkaugan.”

5Apostle-aat-llu Atanermun qanertut, “Ukverput pikanirru!” 6Ataneq-llu qanertuq, “Ukvengqerquvci mustard-aam naucetaarkaatun, napamun uumun qanquvci, ‘Naumallerpenek au͡g'arluten imarpigmun-llu nugtarten,’ niicaraaci.

Pistem Caliarkaa

7“Ilasi-llu pistengqerquni nunamek itumcilriamek, wall'u qusngit tarikluki, tuaken-llu nunamek uterrluni, qanrusngaitaa, ‘Kitaki tailuten neryartua.’ 8Waten tau͡gaam piciqaa, ‘Neqliurnga, naquggluten-llu aulukniarpenga, camircimarikuma-llu nutaan elpet nerniartuten merluten-llu.’ 9Pista-qaa tauna quyavikciqaa pisqutminek pian? 10Tuaten elpeci cali pisqumacirpecen̄ek qaqimarikuvci qanrarkauguci, ‘Pisten͞guyaaqukut cumigtevkenata pisqumallemten̄ek tau͡gaam calillruamta.’”

Qulen Agtuumalriit Canrircecimallrat

11Jerusalem-aamun-llu ayallermeggni Samaria Galilee-a-llu tumkagket. 12Nunanun-llu itran, angutet qulen mamyuilngurmek apqucilget nall'artaat, yaaqsigluteng-llu arulairtut. 13Qayagpagtut-llu, “Jesus-aaq, Ataneq, takumcukikut.” 14Tangrramiki-llu qanrutai, “Agayulirten̄un tangercecarturci.” Ayainanermeggni-llu carriutut. 15Ataucim-llu, carriucini elpekngamiu utertuq, Agayun-llu nanrarluku qastuluni. 16Ciuqerranun-llu palurtuq quyavikluku-llu. Tauna Samaritan-aaruuq. 17Jesus-aaq tua-i qanertuq, “Qulngullruut-ggem carriutellriit, nauwa-mi taukut qulngunritaraan? 18Allamek-qaa Agayun nanrarluku utertellriartaituq, uumek tau͡gaam allanermek?” 19Qanrutaa-llu, “Makluten ayii, ukverpet anirturaaten.”

Angayuqauviim Tekitellerkaa

20Pharisee-aat-llu apcatni Agayutem angayuqauvian qaku tekitarkaucianek, kiugai, “Agayutem angayuqauvia tangrruuluni tekisngaituq, 21qanerngaunateng-llu waten, ‘Tang, wantuq!’ wall'u, ‘Tuantuq!’ Tua-i ak'a maa-i akunlevcen̄i uitauq.”

22Elitnaurani-llu qanrutai, “Cam iliiniku Yuum Qetunraan erenrin iliitnek tangerrsuumiryaaqeciquci, tau͡gaam tangerrngaituci. 23Qanruciiqaiceci-llu, ‘Tang, tuantuq!’ wall'u, ‘Wantuq!’ Tua-i ayanrici, maligtevkenaki-llu. 24Tuarpiaq kalluum kenra kenerpalla'artaqami qiliim iliini, tanqigcet'lartuq cali qiliim iquanun. Tuacetun Yuum Qetunraa ernermini ayuqarkauguq. 25Tau͡gaam ciungakun nangteqeqapigtarkauguq, qessakumaarkauluni-llu ukuni yuullgutkelriani. 26Noah-m-llu nalliin picillratun, tuaten cali ayuqarkauguq Yuum Qetunraan erenrani. 27Tamakut ner'ut merluteng-llu, nulirturluteng-llu uingluteng-llu, erneq tauna engelkarrluku Noah-m angyarpagmun ekellra, ulerpak-llu tekilluni tamakut tamalkuita perrirai. 28Lot-aam-llu cali nalliinicetun. Tamakut ner'ut merluteng-llu, kipussaagluteng kipulluteng-llu, nauceciiriluteng-llu. 29Tau͡gaam ernermi taumi Lot-aaq Sodom-aamek anellrani keneq quluuraq-llu ekualria igtuk qilagmek tamalkuita-llu piunrirluki. 30Tuacetun cali ayuqarkauguq Yuum Qetunraan alaillerkaani. 31Taumi ernermi, enem qainganelnguq aklui-llu enemelluteng, atranrilkili ayautnaluki, naucetaarvigmi-llu uitalria utertenrilkili watqapik. 32Lot-aam nulirra umyuaqiciu. 33Kia-llu imum unguvaminek nataquculriim tamarciqaa, tau͡gaam unguvaminek tamarilriim piksaguciiqaa. 34Qanrutamci, tuani unugmi yuuk malruk inartellgutekciquk, aipaa tegumaarkauguq aipaa-llu unicimaarkauluni. 35Arnak malruk miilissuutmi miilillgutekciquk, aipaa tegumaarkauguq aipaa-llu unicimaarkauluni. 36[Angutek malruk naucetaarvigmetellgutekciquk; aipaa tegumaarkauguq aipaa-llu unicimaarkauluni.”] 37Tua-i-llu qanrutaat, “Nani, Ataneq?” Qanrutai-llu, “Mallulegmun narusviit quyurtelartut.”

Currently Selected:

Luke 17: YPK

Highlight

Copy