Luke 18

Taqsuarillra Aipainrem

1Cuqyutmek-llu qalaruciuq qanrulluki piicagglainaasqelluki qacuiqsaunaki. 2Qanertuq, “Nunani apqauristetangqellruuq Agayun qigcikevkenaku yuk-llu catkevkenaku. 3Tuani-llu aipainertangqellruuq, taum-llu ullanqigtaalaraa qanrulluku, ‘Inglukestem̄a akinaurutkaanek pikia.’ 4Pamanricaaquq ciuqlirmi, tau͡gaam atatakuani qanertuq ellminun, ‘Agayun qigcikenrilengramku yuk-llu catkenrilengramku, 5tau͡gaam uum aipainrem uamterrlainaanga niiciiqaqa taqsuqciqngama tairrlainallranek.’” 6Ataneq-llu qanertuq, “Apqauristem elluatuunrilnguum qanellra niiciu. 7Tua-llu-qaa Agayutem nakmikek'ngani niiciiqenritai-qaa kaigauralriit unugtuumaan? Inglukestait akinaurluki pinaciarngat'lang'e'rmi? 8Qanrutamci, patagmek inglukestaitnun akinauruciiqai. Ilangcivkenaku, Yuum-qaa Qetunraa tekiskuni, ukvermek nunam qaingani nataquciiquq?”

Piicagyartulriik Agayuvigpagmun

9Imkunun-llu ellmeggnek elluaryukelrianun allanek-llu caunrilkilrianun cuqyutmek qallatuq. 10“Yuuk malruk Agayuvigpagmun itertuk piicagyarturlutek, aipaa Pharisee-aaruluni aipaa-llu akiliqurautnek quyurcistet ilakaat. 11Pharisee-aaq-llu nangertuq ellminek piicagluni waten, ‘Agayun, quyavikamken yugtun allatun ayuqenrilama, uayaaritulitun, elluatuunrilngurcetun, akusrarutekilriacetun, wall'u uutun akiliqurautnek quyurcistetun. 12Agayunrek akuliigni malrurqugnek yaalartua nereksaunii, unangelallma-llu tamarmeng qulngurutiit elliitek'larqa.’ 13Tau͡gaam akiliqurautnek quyurcista, yaaqvaariluku nangengqauq ciugcugpek'nani-llu tuaten, tau͡gaam qat'gani unatminek pategluki qanertuq, ‘Agayun, takumcukia assiilngurtuama!’ 14Qanrutamci, una yuk eneminun utertuq niicimanruluni taumi aiparmini. Ilumun qanrutamci, ellminek pivakelria caunrilkumaarkauguq, tau͡gaam nutem ellmikutuulria pivakumaarkauluni.”

Mikelngurnek Atawaqaasqillra

15Mikelnguut-llu elliinun ullautait agtuusqelluki, tau͡gaam elitnaurat elpekngamegteki inerqurait. 16Tau͡gaam Jesus-aam ellminun taisqai qanerluni, “Mikelnguut wangnun taivkarciki, pinriceteksaunaki-llu, waten ayuqelriit Agayutem angayuqauvia pikngatgu. 17Ilumun, qanrutamci, kia imum Agayutem angayuqauvia mikelngurcetun ellirluni ciuniunrilkuniu itervikngaitaa.”

Tukuulria Atanirturta Ayagyuaq

18Atanret-llu iliita aptaa, “Elitnauristaa Assilria, qaillun pilua piksaguciiqsia unguva nangyuilnguq?” 19Jesus-aam-llu qanrutaa, “Ciin assilriamek tuqlurcia, allamek assilriartaituq, Agayun kiimi assilriaruuq. 20Inerquutet nallunritaten makut: Akusrarutekiyaqunak, Tuquciyaqunak, Teglegyaqunak, Piciliqengyaqunak, Aatan aanan-llu takaqikek.” 21Tua-i-llu qanertuq, “Tamakut tamalkuita maligtaqungnaqanka mikelnguullemnek.” 22Jesus-aam niicamiu qanrutaa, “Atauciq piksaitan. Piten tamalkuita navrucarturki kusgurnarqelrianun-llu cikiutekluki, tua-i qilagmi piutengqerciquten, nutaan-llu tailuten maligglua.” 23Mat'umek-llu niicami angniitqapigtuq, tua-i tukuuqapigcami. 24Jesus-aam-llu tangviimiu qanertuq, “Atam, Agayutem angayuqauvianun itlerkaq caknaanarqeqapigtuq tukuulriani! 25Tua-i ungungssim qulugtellriim mingqutem iingakun itlerkaa qacignarqenruuq tukuulriim Agayutem angayuqauvianun itlerkaani.” 26Mat'umek-llu niitellriit qanertut, “Kina-mi tua-i anirtuumaciqa?” 27Tua-i-llu qanertuq, “Yugni caperrnarqelriit Agayutmi caperrnaitut.” 28Peter-aam-llu qanrutaa, “Tangerrluku, wangkuta ilaput unilluki maligtamteggen.” 29Qanrutai-llu, “Ilumun, qanrutamci, kia imum eneni, wall'u nuliani, wall'u anelgutni, wall'u angayuqaagni, wall'u irniani uniteng'e'rmiki, Agayutem angayuqauvia pitekluku, 30maani nunam qaingani unangarkauguq tamakuni amllenrulrianek, cali-llu nunakamten̄i unguvamek nangyuilngurmek.”

Tuqullerkani Qanrutkaa

31Taukut-llu qulen malrugnek cipnelget ellminun taisqai, qanrulluki-llu, “Atam, Jerusalem-aamun mayuqatartukut, tua-i tamalkuita qaqicimaarkaugut prophet-aatgun Yuum Qetunraa pitekluku igausngalriit. 32Tua-i agayumanrilngurnun tunumaarkaungan, piciliutekumaarkauluni-llu, caunrilkumaarkauluni-llu, qeciramaarkauluni-llu. 33Piqertuarciqaat-llu, tuqulluku-llu, erenret-llu pingayuatni makciiquq.” 34Ellait-llu tamakut iliitnek watqapik taringenritut, qaneryarat-llu makut iirumaut ellaitnek, qanrutkumalriit ayuquciinaki.

Cikmiumalriim Anirtuumallra

35Jericho-mun-llu tekitniararluku, cikmiumalria pekcarami aqumgauq cikircetaarluni. 36Taum yugugaat kitulriit niicamiki, apciuq caucianek. 37Tua-i qanrutaat, Jesus-aaq Nazareth-aarmiu maaggun kituqatarniluku. 38Tua-i-llu qayagpagtuq, “Jesus-aaq, David-aam Qetunraa, takumcukia!” 39Ciuliqagtellriit-llu inerquraat nepliisqevkenaku, tau͡gaam tauna pikanirluni qayagpagtuq, “David-aam Qetunraa, takumcukia!” 40Tua-i-llu Jesus-aaq arulairtuq, ellminun-llu taicesqelluku, ullaucan-llu aptaa, 41“Qaillun pisqessit wangnun?” Kiugaa, “Ataneq, tangerrsaurcesqua.” 42Jesus-aam-llu qanrutaa, “Tangerrsaurten, ukverpet anirturaaten.” 43Egmian-llu tangerrsaurtuq, maliggluku-llu Agayun nanrarluku. Yuut-llu tamarmeng tamana tangrramegteggu, Agayun nanraraat.

Currently Selected:

Luke 18: YPK

Highlight

Copy