Luke 19

Zacchaeus

1Jericho-llu tumkaa kiturluku. 2Tangerrluku-llu tuantuq yuk Zacchaeus-aamek at'lek, akiliqurautnek quyurcistet ciuqliat, tukuuluni-llu. 3Jesus-aaq-llu tangerrsugaa, taungucianek paqnayuami, tau͡gaam tangerciigataa yugyiin, ellii-llu sugkilami. 4Tua-i-llu aqvaqurluni ciunranun napamun mayurtuq tangerrnaluku, tamaaggun kituqataan. 5Jesus-aaq-llu tuavet tekicami, ciugtuq qanrulluku-llu, “Zacchaeus, patagmek atraqina, tua-i mat'umi ernermi enevni uitaarkaungama.” 6Patagmek-llu atrartuq, quyaluni-llu ciuniuraa. 7Ellaita-llu tamana tangrramegteggu qaneksuartut qanerluteng, “Wani-wa yugmun assiilngurtulimun ciunirtuq.” 8Zacchaeus-llu nangerrluni qanertuq Atanermun, “Atam, Ataneq, pima avgat kusgurnarqelrianun cikiutekciqanka, kitumek-llu teglellrukuma uterceciiqaqa amllertatekliulluku cetamarqunek.” 9Jesus-aam-llu qanrutaa, “Mat'umi ernermi anirtuun enemun uumun tekisngauq, tua-i Abraham-aam cali qetunraqngaku. 10Yuum Qetunraa tekican tamaumalriit yuaryarturluki anirturyarturluki-llu.”

Akit Qulen Paiciutekumallrat

11Makunek niicata, cuqyutmek cali qalarutai, Jerusalem-aaq yaaqsinriamegteggu, umyuarteqngata-llu Agayutem angayuqauvia tamaa alairnayukluku. 12Taumek qanertuq, “Atanerruat iliit nunamun yaaqvanelngurmun ayagtuq atanruvigmek pingnaluni, utertarkauluni-llu. 13Pistem̄i ilait qulen taisqai, ayuqluki-llu qulnek akinek cikirai qanrulluki, ‘Ukutgun navruciniartuci tekitnatkamnun.’ 14Tau͡gaam nunalgutain uumikaat kingunrirturcetaat-llu elpengcarilrianek qanerluteng, ‘Uumek yugmek atanengqerrsuumiitukut.’ 15Utercami-llu, atanruvigmek unangellruluni, pistet tamakut akinek cikillni taisqai, navrucillratgun ilangutaitnek niitnaluni. 16Ciuqliq ciuqerranun taiguq, qanerluni, ‘Ataneq, akiuten qulnek allanek ilanguq.’ 17Qanrutaa-llu, ‘Nutaan pista assilria, ikgelngurnun piciullruavet, nunanun qulainun atanrukina.’ 18Aipaa-llu taiguq qanerluni, ‘Ataneq, akiuten tallimanek allanek ilanguq.’ 19Tauna-llu qanrutaa, ‘Nunanun tallimainun atanrukina.’ 20Alla cali taiguq qanerluni, ‘Ataneq, wani-wa akiuten perriutamun imgutellruaqa, 21alikngamken, tua-i takarnaqngavet, tegutelaavet ellilqenrilkevnek, keplialaavet-llu nauceciilqenrilkevnek.’ 22Qanrutaa-llu, ‘Qanllerpegun cuqteqataramken, elpet pistem̄i assiitellriami! Tua-i nallunrituten takarnarqucimnek, tegutelaucimnek-llu ellilqenrilkemnek, naucirivikenrilkemnek-llu keplialaucimnek. 23Ciin akiuteka akiliurten̄un tunenriciu, tekiskuma-llu teguyarqa ilangutetuumaan?’ 24Tuani-llu nangengqalriit qanrutai, ‘Akimek teguiciu, qulnek-llu akiutellegmun tunluku.’ 25Ellait-llu qanertut, ‘Ataneq, ak'a akinek qulnek pingqertuq. 26Qanrutamci, pingqellria cikiumaarkauguq cali, tau͡gaam cailnguq, teguimaarkauguq pianek tuaten. 27Tau͡gaam imkut inglukestenka, wangnek atanengqerrsuumiilnguut taiciki, takumni-llu tuquciki.’”

Jerusalem-aamun Itellra

28Waten qallaterraarluni ciuliqagtai Jerusalem-aam tungiinun. 29Jerusalem-aamun-llu mallgucameng Bethphage tekilluku Olive-aam ingriani, tuaken elitnaurak ayagcetak, 30qanrullukek, “Ayagtek nunanun ciunerpetegnelngurnun; itlerpetegni-llu nuraq petuumalria nataqeciqertek, yuum aqumvikeksailkii, petuirluku taiskit'gu. 31Yuum-llu apeskatek, ‘Ciin petuircet'gu?’ waten kiuciqutek, ‘Atanrem aturyugaa.’” 32Taukuk-llu ayagcecimalriik tuaten ayuqluku nataqaak elliin ellmegnun apertuuciatun. 33Nuraq-llu petuirinanran'gu, pikestain qanrutagket, “Ciin nuraq petuircet'gu?” 34Kiuguk-llu, “Atanrem aturyugaa.” 35Jesus-aamun-llu tekiutaak, aturamegnek-llu tunglilirluku Jesus-aaq qainganun aqumevkaraak. 36Ayallrani-llu aturateng tumkaanun sagtait. 37Mallgucan-llu Olive-aam ingrian atraryaraan nalliini, elitnaurarugaat nunaniryugluteng qastuluteng Agayun nanraraat, caliari caperrnarqelriit tangelteng pitekluki, 38qanerluteng, “Atawaqerli Angayuqaq Atanrem atrakun tekitellria! Uitanqegcin qilagmi, ucurnarqun-llu quyinermi!” 39Pharisee-aat-llu ilaita yugugarni ilausngalriit qanrutaat, “Elitnauristaa, elitnauraten inerqurki.” 40Elliin kiugai, “Qanrutamci, ukut nepailkata, teggalqut nepliryartut.”

41Nunarpak-llu mallgiamiu, tangrraarluku qiatekaa, 42qanerluni, “Elpet-llu-am watua maa-i nallunritellrukuvgu, uitanqegcitkaq! Tau͡gaam wani-wa iigpenek iirumauq. 43Tua-i erenret elpenun tekiciiqngata, tuani inglukestevvet casgu qerturiciqaat kassugulluten atunem-llu avatairluten, 44nunamun-llu cingqaquluten, elpet irniaten-llu elpenelnguut, teggalquten-llu qalliqenrirarkauluki, tua-i paqcimacin nalluavgu.”

45Agayuvigpagmun-llu itertuq, tunenialriit-llu tuaken anevkarluki. 46Qanrulluki-llu, “Waten igausngauq: ‘Eneka piicagviugarkauguq,’ tau͡gaam elpeci teglegviurtarci.”

47Unuaquaqan-llu Agayuvigpagmi elicungcarillruuq. Tau͡gaam agayulirten͞gunret igatulit-llu yuut-llu piuranrita tuquituraat. 48Tau͡gaam nataqutenritut qaillun pillerkameggnek, yuut-llu tamarmeng niicuumilaatgu ungavikluku-llu.

Currently Selected:

Luke 19: YPK

Highlight

Copy