Fulaa 3

1Moise va cɔlua Yetro lefu ndɔ-a mandaa, vana-solia-lasálàá Madian pɛɛn. Paale pilɛ, mɛɛ o kɔɛ a nda o lɛŋnde veselɛilen lekɔɔli, mó tiiya o pembii Hala-e, pembei Horɛb pɛɛn. 2Lon mɛlɛkanɔ Hala-o cɔmnun ndu o yinnde biyaalen nin o bɔɔ nin ni. Moise va yinnden cɔu sandei vulɛi-vulɛi o bɔɔ nin, kɛ bɔɔ kon ve ŋɔ le. 3Mó dimi aa: «I sɔɔnguu vɔ macɛlu mì kɔ tofa dɛnɛ kaamaa bɛndoo ho lapi. Ko yɛɛ nɛ co yɛ tosaa bɔɔ ho co ŋɔ le?» 4Mɛɛ Mɛlɛka ce maa o co sɔɔnguuo le cɔu lapi, mó veelu ndu o bɔɔ nin aa: «Moise! Moise!» Mí Moise cɛl aa: «Yoo!» 5Mó dimul ndu aa: «Tiiya nanu le, soli samtala co nɔm o n'pelu lan. Kani fonda n sim hoo coo-o, fonda diandaa o co ni.» 6Mó dimul ndu vɛlɛ aa: «Ya co Hala fuɲaa nɔmaa mamaa ni: Hala Abraham-ndo, Hala Isaak-o a Hala Yakɔb-o.»

Mí Moise kumbu hɔlla, kani mí siòònde bii ndu le tofaa nɛɛ Hala va sɔɛi-ya. 7Mí Mɛlɛka dimul ndu aa: «I ce mɔnɛi cuavaa nia co nin Esipte-e, i co nda tueyɔ̀ɔ́ koŋullo a saangiaa mɛlɛsoŋnda co nda-o, i ce dɛnɛ palaa co nda coo-o vakpa. 8Le hee, i tol le nda solio o sanga kon nin Esiptea o ba, a le nda yɔ̀ɔ́ o lɛŋnde bɛndule kɛndɛ-kɛndɛlen nin, o lɛŋnde cɔlua a tɔlɔɔlan la naŋ nin taw-taw len#3.8 lɛŋnde cɔlua a tɔlɔɔlan la naŋ nin taw-taw len: Nuaa fondaa ho dimin o hebrei nin ni aa: «lɛŋnde nɔnɔan a lɛan ma co nin taw len». Kɛ ɲɛ Mɛlɛka yeema dimio-o co ni aa: «lɛŋnde cɔlua a tɔlɔɔlan la naŋ nin taw-taw len». Kani te cuinnda a saa naŋ pɛ, mà kui taw, a soli nɔnɔan taw. O lɛŋnde Kanaan-nden nin, ndáà toosiaa vɛlɛ lɛan a kɔmnde tamaro. nin, o lɛŋnde Kanannda, Hitiia, Amoriia, Perisiia, Heviia a Yebusiia co icali nin-nden nin. 9Kani i co cɔu mɛɛ Esiptea co Israɛlla saangiaa a yɔɔkpiaa yɛ, yééla ndalan la co ya komallo háá nanu. 10Lelan, nɔm Moise, i vem nɔm o Faraɔnnɔɔ lo sunsun. Kɔ ma kɔ soli yungu nuu o sanga kon nin Esipte, Israɛlla pɛɛn.»

Hala cɔm Moise diola ndɔlan

11Mí Moise ɲuna Hala aa: «Yɛɛ ya co yɛ le kɔlan simndan Faraɔnnɔɔ o hɔl a le Israɛlla solio Esipte?» 12Mí Hala mulul ndu aa: «I vanin nɔm ikɛi. Tofa vɔ tɔɔmaseloo le sinaa maa ya Hala vem nɔm ni: taa soli pɛ vanaa kan o lɛŋnde Esipte len nin, la hun tosa kaannden o pembei he coo niaa ndaa kpow le ya biiloo.» 13Mí Moise dimul vɛlɛ Hala aa: «I kɛɛ lɛ le kɔlan te, kɛ te i tiiya pɛ o Israɛlla lo, mì dimul nda aa: ‹Hala fuɲaa niaa mamaa vem ya o niaa lo ni›, a co ya ɲuna aa: ‹Vɛɛ o nɔ yɛ diolan?› Vɛ̀ɛ̀ ya mulul-lɛnin nda?»

14Mí Hala dimul ndu aa: «Ya co I CO#3.14 I CO: Kon co dimio ni maa Hala co nda tɛɛn, lende koni o vanin nda tɛɛn le lɔ́ɔ́-lɔ́ɔ̀ ni. Diomndo ho co o sɛvaa o sɛbɛlan lapum nin aa: «Ya co vana vanin-ndo ni.» Tofa vɔ o sɛbɛ Masaa kialaa n'yamaa nin 13.18. Hala co maa halaa tɔ̀a le, tofa vɔ vɛlɛ Esai 43.10. ni.» Mó cɔɔlu vɛlɛ dimi aa: «Dimul Israɛlla aa I CO vem ya o niaa lo ni.»

15Mó dimul ndu vɛlɛ aa: «Ma dimul vɛlɛ nda aa: ‹Mɛlɛka vem ya o niaa lo ni, Hala fuɲaa niaa mamaa pɛɛn: Hala Abraham-ndo, Hala Isaak-o a Hala Yakɔb-o.› Diola nilan la co lán le fɛɛn a fɛɛn ni. Nuaa yungulan kpow la bɛnda mì la veelu ya le fɛɛn a fɛɛn ni. 16Lelan, kɔ ma kɔ cuungiaa kaasoŋaa kɔlkalua o Israɛlla tɛɛn, mà dimul nda aa Mɛlɛka, Hala fuɲaa niaa mamaa Abraham, Isaak a Yakɔb cɔmnun ya, mó dimul-la aa: ‹I mɛɛndan niaa, mí ca mɔnɛi nda co niaa lueiyo o lɛŋnde Esipte len nin-nde.› 17Lelan ya dimi ni aa i co niaa soli o mɔnɛi ken nin, mì yɛɛ niaa o lɛŋnde Kanannda, Hitiia, Amoriia, Perisiia, Heviia a Yebusiia nin, lɛŋnde cɔlua a tɔlɔɔlan la naŋ nin taw-taw len pɛɛn. 18Taa dimul pɛ nda lende, a co sɔɛi nɔmnde cɛlɔɔ, o kon mì la kɔɛ niaa kaasoŋaa kɔlkalua o masaa Esipte lo, mì la dimul ndu aa: ‹Mɛlɛka cɔmnun naa, Hala Hebreea pɛɛn. Lelan, mal naa mì n kɔɛ kɔla palɛi yaa o lɛŋnde veselɛilen nin le Mɛlɛka sálàá solullo, Hala naa pɛɛn.› 19I sina maa masaa Esipte cɛlnin le niaa malɔɔ le. Le niaa malɔɔ, fɔ mì sɔɛi kalɛi hiow ndu mayoomu#3.19 fɔ mì sɔɛi kalɛi hiow ndu mayoomu: O sɛbɛ Samaria nin a o sɛbɛla paandula sɛvan o krɛkiei nin a o latɛnnde nin-ndan nin, o dimin aa «hali sɔɛi kalɛi hiow ndu bɛɛ mayoomu».. 20Le hee, ya pila i co dɛnɛ tosa mì cɔm kpaaya nuu o lɛŋnde ndɔlen nin a sɔɔn kaaman. O kon o malnin niaa mì la kɔɛ. 21I co Esiptea kɔltan muli o niaa lo mà ce niaa ɲia taw. Telen niaa vanin kɔlan-ndo, la kuenin bala fondo le. 22Vanlaandua hebreea, vana-vana va pɛ kɔlan, o piɛi vanalanɔ Esiptenɔ nda co o bɛ́ɛ̀-o, te kon te vana o co o ba cɛinin-ndo ɲɛm-laandun cɔwnun a volin humbon-ndon, ɲɛm-laandun cɔwnun a sianion-ndon a volɔɔla cuɛinanndan. Te la yunga pɛ Esiptea lende, la siiluu poaa niaa a cuavaa niaa ɲɛm mun.»

Currently Selected:

Fulaa 3: BKG

Highlight

Copy

Compare