Fulaa 5

Moise nda Aarɔn a kɔɛ o Faraɔnnɔɔ lo

1O kon kɔɔli, mí Moise nda Aarɔn a kɔa o Faraɔnnɔɔ lo, má dimul ndu aa: «Mɛlɛka, o co Hala Israɛlla-o dimi aa nɔm mal cuavaa ndɔa mà kɔ tosa kafoo o lɛŋnde veselɛilen nin le ndu biiloo.»

2Mí Faraɔnnɔɔ mulul nda aa: «Nɛ̀ɛ́-nɛ̀ co yɛ Mɛlɛka, o niaa yeema kon mì bii diom ndɔɔ le Israɛlla malɔɔ kɔnndan-ndo? I sina Mɛlɛka kon te, i melnin vɛlɛ Israɛlla kɔlan te.» 3Má dimul ndu aa: «Hala Hebreea cɔmnun naa ni. Lelan, mal naa mì n kɔɛ kɔla palɛi yaa o lɛŋnde veselɛilen nin, mì n kɔ solul Mɛlɛka naa sálàlan, yɔŋii o cii naa a nàà n'kɔnyaa, te kon te a cɔwvo.» 4Mí masaa Esipte ɲuna nda aa: «Moise niaa Aarɔn, le yɛɛ niaa co yɛ vannda faŋaa o valta ndalan nin? La kɔ o kpekula niaalan nin. 5La sina maa vannda ha kui nin kuiyo pila o lɛŋnden nden nin. Le yɛɛ niaa hin yɛ le nda faŋaa o valta ndalan nin?»

Faraɔnnɔɔ cɔɔlu Israɛlla sangaa tuisi coo

6Paale len, mí Faraɔnnɔɔ dimul mɛlɛsoŋnda a Israɛlaa va kundala vanaa baalaa bollen-nda aa: 7«La va lɛ Israɛlla foeende yɔngoo le kpilikion lɔu mɛɛ niaa yɔngu nda ndi paandu yɛ le. Nda pila va nin kɔlan ndi nuwviaa. 8A bɛnda vɛlɛ mà va kpilikion lɔu maa paandu, la faŋal nda ɲɛ-ɲɛ lecoo le. Kani vanaa siɛlɛiya pila nda co ni, lelan nda co koŋullo ni, mà va dimio aa: ‹N co lakɔ Hala naa sálàlan solul.› 9La cɔɔlu nda baalaa kuilul, mì la kindila nda le ndu tosaa. Te vallo kui pɛ nda o ba taw, a co pɔɛɛnɔn a sɔɔn lacòòvan nda co nda dimullo-on.»

10Mɛɛ mɛlɛsoŋnda a Israɛlaa va kundala vanaa baalaa bollen-nda fula o Faraɔnnɔɔ lo, má kɔ dimul Israɛlla aa: «Masaa handu tɔŋndo maa vana kɔa lɛ mò kɔ kondul niaa foeende le kpilikion lɔu le. 11Niaa pila va nin kɔlan ndi nuwviaa, nɛɛ-nɛɛ niaa salun pɛ ndi, la kɔndu. O kon kɔɔli, mɛɛ mì la suili kpilikion lɔu mɛɛ niaa va mun paandu suilio lɔu yɛ, ɲɛ-ɲɛ faŋan lecoo le.»

12O kon, mí Israɛlla sɛŋin o lɛŋnde Esipte len nin kpow le foeende nuwviaa a le ndi kɔndɔɔ mà hin a ndi. 13A kon kpow, mɛlɛsoŋnda va nda kɔɔli a kpɛlɛkpɛlɔɔ, má va nda dimullo aa: «La siow baalaa tosa. Lepalaa-lepala, fɔ mì la suili baalaa tosaa mɛɛ niaa tosa ndu paandu telen nda va niaa foeende nuwviallo-o yɛ.» 14Má va bɛɛ Israɛlaa va kundala vanaa baalaa bollen-nda lɔɔ, à mɛlɛsoŋaa kan ndáà handu Israɛlla coo-a pɛɛn. Má va nda dimullo aa: «Le yɛɛ nɛ la co vaalio kpilikion suili lɔu mɛɛ niaa lɔa mun paandu yɛ le?»

15Mí vanaa va kan bolle kundala vanaa baalaa coo-a kɔ cɛɛŋun o Faraɔnnɔɔ lo, má dimul ndu aa: «Le yɛɛ n co yɛ naa vanaa baalaa nɔmnda bɛpɛlaa ho nuaa? 16Vana co lɛ naa ifoeen cuu le. Nduyɛ a co naa dimullo aa naa n lɔ kpilikion, a co vɛlɛ naa soŋɔ̀ɔ́ pila. Hakio vanaa nɔmnda co cuaa a naa nuaa ni dɛ!» 17Mó mulul nda aa: «Vanaa siɛlɛiya niaa co ni. Toɲaa, vanaa siɛlɛiya niaa co ni. Lelan niaa co dimio ni aa la co lakɔ Mɛlɛka sálàlan solul. 18La tamala vɔ le muungoo o vallo nin. Vana-vana nuwvial lɛ niaa foeende le. Nduyɛ fɔ mì la suili kpilikion lɔu mɛɛ niáà lɔa mun paandu yɛ.»

19Mɛɛ Israɛlaa va kundala vanaa baalaa bollen-nda tuei sɔɛi ken, má sina maa a kɔndu dɛnɛ. Kani má dimul nda aa fɔ mà suili kpilikion lɔu mɛɛ ndáà lɔa mun paandu yɛ. Lepalaa-lepala, fɔ mì ndáà cii baala ndáà kilu nda le paale len-ndo kpow. 20Mɛɛ nda fula o Faraɔnnɔɔ lo, má komal Moise nda Aarɔn, a va nin bɛɛ nda cumndo. 21Má dimul nda aa: «Màá Mɛlɛka mɛɛndan dɛnɛ niaa tosa hoo-o, mò kilul niaa yamɛi fɔ́! Niaa, la kondul naa dɛnɛ dɛ! Niaa siinguu naa vanaa vɔɔnda Faraɔnnɔɔ nda vanaa ndɔa baalaa o hɔl ni. Mɔɔn cɔwvon niaa sɔɔ nda o ba nuaa ni le naa diwvo.»

22O kon mí Moise kɔ ɲuna Mɛlɛka aa: «Éé Maalii! Ɔ́ɔ̀ dɛnɛ n kondu hoo vannda ha-o? Le yɛɛ n vem yɛ ya? 23Kabi ya hun soo Faraɔnnɔɔ o lani o diola nɔmndan, saangiaa o co nin Israɛlla-o co o bɔɔ. Nɔm Maalii yɛ, a muli bɛɛ le nda solio o sanga kon nin te.»

Currently Selected:

Fulaa 5: BKG

Highlight

Copy

Compare